[超長開箱文]CM玩到封頂係點樣？就係咁樣! - Just Ear XJE...

nanaholic

qoonicholas 發表於 2016-7-27 22:41
咁即係幾多錢港紙呀？

333,720yen以6算4嚟計大概係2萬1500港紙, 其實比起依家市面上嘅旗艦CM甚至JH公模機嚟講唔係貴好多，如果計埋佢d服務同調到絕對啱心水嘅音嚟講，簡直抵到爛~

nanaholic

各位CHING久等, 今晚送上第二部!

--------------------------------------分隔線-----------------------------------------------------------

當我飲咗幾口咖啡之後，松尾先生又開口 – 今次就真係入正題啦! 佢開始問我平時鍾意聽咩音樂，咩歌手，咩情況下會用CM聽歌。但絕對唔係好似審犯咁問，而係傾偈交流嘅方式。交談中發現佢嘅音樂知識真係好廣泛，可能因爲佢以前tune開比較萬人向嘅Sony耳機，所以自然對音樂嘅認識都廣闊嚟應付唔同種類音樂嘅要求。而係呢個時候爲咗自己想要嘅音色都唔好再遮遮掩掩就直接開門見山 – 我自己平時聽嘅就係ACG歌，而松尾先生亦都不以爲然，重係我講出嘅幾位歌手中點出幾首佢自己都鍾意聽嘅曲，甚至用過邊d曲嚟做過耳機調音嘅標準。 好多老燒友眼角高成日以爲玩HiFi一定要古典或jazz先可以聽。其實ACG歌嚴格嚟講唔係用嚟形容曲類而只係指係動漫遊戲内所用過的樂曲，所以ACG曲其實乜風格都有-當然也有古典曲同jazz啦。最近日本HiFi界的網頁同雜誌甚至已經會攞ACG曲嚟試新器材做review，而其中一個原因係因爲最近玩HiFi嘅新血又的確好多係動漫迷，所以爲咗迎合市場HiFi界都要轉型而唔再係以前咁老餅，而松尾先生作爲業界人當然好明白呢個道理(而且佢自己本身都有d宅味，更有幾個非常貼身嘅經驗，遲d有機會再補充一下呢d有趣嘅故事)。遠咗少少，anyway，總之就係咁relaxing嘅氣氛中先做一d簡單嘅音樂喜好嘅交流，而佢亦都會係呢個時間細心地寫note用來作爲參考。

傾完計啦，開始調音啦！ 而呢個時候佢就叫我攞出我個player出嚟。今次我準備嘅player係近來好hit嘅Onkyo DP-X1 (本來重有部換咗muse02嘅Valoq，但掙扎完一輪都係決定用DP-X1), 而佢就將部player接上一個特別嘅分流器上，而呢個分流器本身有一個控制音量大小嘅錶盤，同時會接上一部電腦同兩隻耳機 – 一隻耳機係松尾先生自己用嘅Just Ear耳機，而另一邊就係一隻比我用嘅公模Just Ear。簡單嚟講調音流程就係我嘅player播自己嘅歌，而松尾先生會同我一齊聽歌，而我只要向佢講出想要嘅音色要求 – 比喻説”想要人聲前d”，”要暖聲d”，”bass勁d”，佢就會即時用電腦内嘅特別軟件去模擬一個聲音出嚟，而當調到我滿意嘅時候，呢個軟件係會根據個FR波形去選擇出最適合嘅物理filter物質，最後就直接放落做好嘅MH1内而達到調音嘅効果。據說呢個軟件係Sony自己内部開發嘅東西而且一直内部用嚟設計耳機，而今次松尾先生爲咗Just Ear MH1呢隻機而特別問高層批准攞出嚟用。而呢個亦係Just Ear嘅另一個特色 – 佢嘅調音唔係靠電路/電阻或者crossover嚟做嘅，而呢個做法係重有另一個好處，呢度又再賣一個關子以後再講。

因爲係研究MH1階段時都對個調音過程有d了解，所以事先自己都準備咗幾首自己好鍾意聽但風格大異嘅歌嚟做調音時嘅reference。 而今次自己tune機時用過的歌同揀呢d歌嘅理由如下，有興趣嘅CHING可以自己搵嚟聽下了解下:
細氷 - 如月千早（今井麻美） - 女高音伸展
whiz - TrySail - 合唱harmony
プラリネ - ジュリア(愛美） - rock/前段結他solo
Catch my dream - 最上静香(田所あずさ) - idol pop
トキメキの音符になって - 箱崎星梨花(麻倉もも) - 接近刺耳的萌聲
絵本 - 北沢志保(雨宮天) - 抒情人聲
ラストシーン - 水樹奈々 - 對抗糞錄音( 因爲時下好多歌，特別係流行歌，係錄得唔好！ 所以都要粉飾一下)

當所有儀器接好後，首先松尾先生就根據剛才同我嘅交談中嘅理解模組出一個波形嚟叫我試聽，第一次聽嘅時候整體重係比較重動圈嘅特色 – bass重，高音分析力比較低，但空間感同質感都唔錯，但未係我杯茶。而我就開始同佢講一d更具體嘅要求。因爲我嘅目標係女毒機，所以首先就要求佢將d人聲調前d，bass收返d。佢了解後就調，調完再聽，聽完再講要求 – 今次覺得太前收返d，高音去得太盡開始有d刺又收返d等等等等，就係咁不斷地重覆呢個步驟，直到調到滿意爲止。調到後期其實真係好苦惱要諗/重聽好多次。而最後個人集中嘅聲音特質可以咁以以下幾點爲總結:
•        人聲好前，係所有”樂器”中最出嘅，有貼耳唱嘅感覺
•        低音收檢 - 唔可以搶過咗人聲
•        高音伸展係去到盡量地高，但停係到刺耳之前
•        分析力唔去到盡 – 因爲糞錄音同埋想耐聽d

當搞到去呢個地步嘅時候，調音都用咗足足兩粒鐘! 期間松尾先生絕對冇催我，而且更係有求必應。咁樣嘅服務, 真係去邊度搵….

到調完嘅時候，菅野先生再同我講一次佢係email時所提過嘅嘢 - 就係因爲佢哋最近多單，所以大概要等3~4個月先有得攞機，大概就係8月，唔會遲過9月。而呢個時候佢亦都同我講我可以選擇親身嚟攞機又或者佢可以郵寄去一個日本國内地址。如果親身攞呢就可以當日再做多一次即場嘅fitting, 戴到啱先走。咁我當然係揀親身鑼啦。到此初步就叫完成啦~

離開店舖返酒店嘅時候戴返自己對335聽歌，依？我對聽咗4年差唔多日日返工放工都聽嘅335幾時變得咁難聽㗎? 原因就係短短嘅時間内已經比自己心目中最調到最完美嘅女毒機聲音洗咗腦~

--------------------------------------分隔線-----------------------------------------------------------

今日就打到第二部，聽晚的第三部應該可以寫曬 XD

今日貼一張係店度影嘅相~



其實係做完之後重有一d趣事/小道消息，另外如果CHING們有興趣知道Just Ear其他嘅故事，我可以係打完第三部之後補充~

lowbson

有冇聽過mh2?

onlife

正 ! D 服務好勁... 多謝分享

hiyori

nanaholic 發表於 2016-7-28 00:52
各位CHING久等, 今晚送上第二部!

--------------------------------------分隔線------------------------ ...

小弟既目標同師兄好一致，很期待最終成品既聲音報告
長先好呀，咁先夠毒

dezispop

nanaholic 發表於 2016-7-28 00:52
各位CHING久等, 今晚送上第二部!

--------------------------------------分隔線------------------------ ...

how about MH2? any comparison between fitear 335dw?

nanaholic

見咁多人問MH2又親無乜野做就講下。

當日我tune完時亦到有試過MH2 － MH2係冇得依照個人喜好去調音而只可以係3款固定嘅調音選擇（價錢亦平十萬yen），而三款調音分別係"monitoring","listening"同"club"。

monitoring － 顧名思義係監聽向，完全透明無存在感，即係冇特色就係佢嘅特色。入垃圾就出垃圾，入靚聲就出返靚聲嘅還原度。呢隻其實可以聽得出所有MH用嘅圈同鐵嘅解析度其實好高下。
listening － 注重音樂感嘅tune。比較大眾向嘅典型U字tune － 即係低同高域有加持，中段就凹入去果種少少暖嘅tune。整體比monitoring醇d滑d，聽一d錄音冇咁好嘅歌都唔會令你想即刻除耳機。
club － fing頭tune。完全係發揮個大型動圈實力嘅tune。

同335比嘅話 - 因為Just Ear係動圈+動鐵嘅hybrid機,所以最主要係多咗動圈先天嘅優勢 - 空間感大, 低音質感同力道都比較好. 而佢選擇嘅動鐵彌補動圈高頻嘅不足都好稱職, 高音嘅分析力都差唔多(335都係得一個高音機, 所以呢方面可以話平手). 所以係睇你個人係中低方面覺得係唔係非圈不可定係鐵都接受到.

kaz7

正!
真係要練好D日文再幫襯佢地

睇TWITTER見松尾佢本身都係聽唔少"ANISONG"
睇D資料除左佢重有個SONY 0既大師級人馬有份搞哩檔JUST EAR

nanaholic

第三部!

--------------------------------------分隔線-----------------------------------------------------------
時間飛逝，眨下眼就過咗差唔多3個月。就係7月頭突然收到來自東京Hearing Center青山店嘅email, 一打開不得了！佢來信就係通知我我對MH1已經做好啦！竟然比預期快咗！事關最後攞機嘅時候會再有一次tuning的機會所以要夾松尾先生嘅空檔，最後就決定咗係兩個音響節中間佢有空閒嘅星期(上星期)去攞機。

在約定嘅時間再一次去到店舖，首先就係由菅野先生攞我對MH1出嚟先做一次嘅試身(耳)，睇下對機fit唔fit。已經有過幾對CM嘅我要戴當然唔難亦都唔需要咩指導，一插一扭，入咗，而且真係fit到冇得再fit! 係我三對CM中最fit一定係呢對MH1. Fitear當然手工都係好有日本品質(JH比起嚟就… 算把啦), 但真係估唔到果個量度過程對個fit嘅影響真係咁大。Just Ear嘅CM其實係材料選擇上重有落多咗一重心機 – 就係佢係尖端部分用上在室溫下係柔軟嘅物料，再加上之前菅野先生量度開口/閉口兩種嘅尺寸，得出嚟嘅結果就係好神奇哋就算你講嘢張合個口尖端部分跟耳道嘅密封都唔會甩而係緊緊貼住。我對335係呢方面真係做唔到(JH就… 都係算吧啦)。係業界會用到柔軟物料做CM尖端部分嘅比較出名係Westone，但Westone跟Just Ear唔同，Westone選擇嘅物料係要到達人體體温先會軟化。因爲小弟冇Westone嘅CM所以比較唔到邊隻好d，但小弟絕對相信任何細節都考慮到嘅Just Ear必定有參考過Westone  CM先改用在室溫下都係柔軟嘅物料而唔跟Westone的做法，所以我都敢斷言Just Ear的應該係比較優勝。

好啦，試完身(根本fit到冇嘢要搞)，菅野先生就叫我張對MH1接上player播歌，好等佢可以check下對耳機戴入耳後左右嘅音量平唔平均。天呀，真係咩變數都比佢哋諗到晒！ 咁我就當然照做，而菅野先生就帶上特別嘅診聽器再逐一經由對MH1外殼嘅入氣孔去check音量，check完佢滿意後佢就交比松尾先生做接下來嘅工作。

今次松尾先生都好似上次咁沖咗杯靚咖啡嚟比我嘆，又順便吹下水交流下。事關小弟最近買咗部AK70同埋Mojo，咁就連埋部DP-X1一齊攞去。而松尾先生咁啱果朝又收到佢自己嘅AK70，所以就討論下部機嘅音色同適合聽咩歌等。而佢亦都好好記性記得我鍾意聽TrySail，就話部機嘅pop取向應該好適合聽TrySail。而佢自己就入咗幾隻花澤香菜試聲咁話。而對於Mojo，松尾先生本身佢都好鍾意呢部嘢，重話Just Ear係同Mojo好夾的。

吹完水就入正題 – 冇錯就係再調音!  呢度點解要再做多次調音其實都唔需要多講 – 公模同CM會唔同聲係常識吧? 所以當然要再調啊！ 唔係點稱得上獨一無二爲客戶連音質都訂做嘅CM呢？ 呢個時候有d CHING可能會諗”依？CM做好咗入埋殼重點調音呀?”, - 呢個就係第二部賣關子嘅地方啦。記唔記得Just Ear係用物理filter而唔係用電路/電阻/crossover? 冇錯，爲嘅就係可以係最後呢個步驟可以比松尾先生作最後嘅音質調整。呢個時候其實對MH1係未正式完成的，係當客戶完全滿意音質嘅時候松尾先生先會固定機内所有嘅filter，咁先叫完成。

因爲我帶多咗幾部機去(DP-X1, AK70, Mojo)，而且重準備咗條balance線，咁就問松尾先生點樣做先好。而佢就講”首先我哋用3.5mm原裝線逐部調, 調完後我哋再轉balance線調吧!”。就係咁理所當然地一心一意完全爲客戶提供絕對滿意服務。呢d錢真係洗得唔冤枉~

今次調音有同上次有d唔同就係唔再用到分流器，而係完全靠我口講形容點樣調而松尾先生就調，呢部分我估真係少d經驗同技術都做唔到。咁我就戴上對MH1開始聽歌，用嘅當然係上次tune時嘅playlist。一聽果然同記憶中有d差距 – 最主要就係因爲達到密封所以第一樣感覺到嘅就係d bass即刻又勁過頭, 咁就叫佢收返。搞啱d bass後就聽返人聲, 唔~好似又後咗d就叫佢調, 調調下松尾先生又提醒我叫我聽下高音位, 依又好似真係矇咗d，咁就搞返清d，然後佢話其實重可以再清d要唔要試下？ 好啦就試下，呀今次又清過頭，就係咁又調一輪攞返個靚人聲位同高音嘅清晰度，然後就換機換線再試/調! 就係咁又花咗兩粒鐘去搞，但係結果係真係perfect! 係完完全全我心目中嘅女毒機呀! 依家聽歌嘅時候就好似歌手係耳邊唱咁，特別係d唞氣/換氣位聽起嚟真係有d 色情又性感嘅感覺! Bass收發好快，唔會奪過人聲但又唔會消失咗。高音保留返一定嘅清晰度但又唔會刺耳，而中段亦都唔會凹咗，總之總之就係只有完美兩個字可以形容. 一路聽返個playlist嘴角真係不自禁地向上僥，聽到雞皮起晒頭皮發癢！真係好耐都冇試過聽音樂會有咁興奮嘅感覺！呢個時候松尾先生就固定個音質了。最後松尾先生重會手寫一張卡片用簡單幾句嚟形容呢對MH1嘅音色，咁就大功告成啦!

世上獨一無二, 連音色都完全屬於我自己嘅MH1就係咁樣誕生！


--------------------------------------分隔線-----------------------------------------------------------

開箱部分就係呢到完。(好眼瞓)

總結一下，由於以前各網頁誤報嘅情況下，好多人都誤會咗以爲呢對Just Ear XJE-MH1究竟黐咗邊條綫覺得可以叫價30萬yen。的而且確如果你剩係睇規格嘅話，一對1動圈加1動鐵嘅hybrid CM叫呢個價比人嘅第一感覺一定係唔值得，但我相信各位CHING睇完我呢篇特長開箱文之後絕對會改觀。冇錯依家市面上CM選擇非常之多，甚至已經去到單邊都十幾單元，但係老老實實聲唔啱心水嘅話就算比咁勁嘅規格你其實都係冇用，而俗語說千金難買心頭好，如果而係呢個角度去睇嘅話，Just Ear簡直可以話係超值嘅CM了。而日本那邊都有個説法就係"如果你買MH1都不滿意的話，世上應該沒有比這個更愚蠢的事情"。

各位CHING如果有咩問題可以留言，之後小弟會繼續解答!

今日就貼果張卡片~

vicentk

師兄講完到覺得好正，日本人做事的專注真係世上獨一沒二，可惜我唔識日文