[超長開箱文]CM玩到封頂係點樣？就係咁樣! - Just Ear XJE...

nanaholic

小弟第一次出post, 多多指教.
先聲明内容超長(多廢話)而且非常之毒，唔好話我唔警告你! 好，去文!

--------------------------------------------分隔線------------------------------------------

上年都唔少地方報導過呢隻Sony spin出嚟嘅品牌嘅CM. 始終Sony耳機大師松尾伴大自己掛名出嚟做嘅第一對CM話題性絕對夠.但當時因爲好多網站唔多識日文無翻譯到/譯錯重點而比唔少燒友狂插嘅"1圈1動要成30萬yen你冇病呀？ 咁嘅價錢我買XXX啦！"嘅XJE-MH1 - 但日本本地當然冇呢問題，而且生意滾滾來，由最初一個月起貨到到依家排隊要3~4個月先有得囉。點解？因爲MH1係連音質都爲你訂造，真真正正世上獨一無二的CM。除咗Just Ear外現時世上有得自己訂造調音的CM只有Ultimate Ears的PRM系列，但係對比起PRM係要你自己玩個調音panel較高中低，Just Ear的服務性同體貼程度嬴幾條街。

一般做CM嘅過程大家都應該很純熟 – 就係聽完demo機覺得啱心水就自己搵人做耳模，然後就經店舖寄去廠度做，然後就等通知攞機，成件事就完。大膽d嘅可以直接自己上網訂製(小弟第一對CM係JH16Pro, 就係自己上網訂的)。Just Ear MH1唔同嘅地方就係你必須去日本東京一間叫東京Hearing Center青山店的地方去做。原因係因爲當店内有位專業嘅耳模師傅菅野聡先生係同松尾先生夾好曬點樣量造耳模先至做得最好最fit。佢哋重共同研究開發咗一個專門爲MH1量度耳朵嘅器材同特細槍頭嘅專用注膠槍(就係因爲一般嘅注膠槍槍咀太粗會撐開咗耳道而令耳道變形)，重重的儀器，技術同心機都係為求達到做到最fit的嘅CM機殼(我想應該都有人試過或聽過做完對CM係唔fit嘅故事吧)。而菅野先生本身都同松尾一樣係有來頭嘅人 - 日本做耳模佢係少有哋同時擁有助聽器同CM知識嘅耳模師傅，據說高峰時期試過一年内幫超過一千個客人做耳模同做助聽器/CM耳機的配戴，經驗老到重係日本都因爲其手藝高超水準而有點名氣，就算未開始做Just Ear前已有遠道而來的人專門搵佢做CM耳模。好啦，機殼部分就咁fit, 咁最令人關心嘅調音部分又點樣呢? 呢部分就賣個關子先之後先講。

廢話背景就講咗咁多，實際上做嘅時候又點呢? 因爲一般人係做嘅過程時係唔可以影相怕泄露商業秘密，所以呢度將就下要各位移步去d業界網頁嘅正式訪問睇相:
http://www.call-t.co.jp/blog/mt/archives/entry/016761.html
http://av.watch.impress.co.jp/do ... 0151202_733181.html
https://akiba-souken.com/article/25673/?page=1

小弟玩大小耳機CM都有一段時候，除了之前講過的JH16Pro外，之前平時出街愛用嘅係一對用咗4年嘅Fitear MH335DW。舊年年頭聽過Fitear Monet 17係本來諗住做一對嚟玩下唔同調任嘅耳機，但阻於Fitear有一排對海外唔係做得咁好同埋又覺得咁樣玩d無謂所以最後都冇搞到, 後來又諗不如買Shure KSE1500靜電機完埋另一個夢佢啦(因爲屋企冇位擺STAX+佢個專用amp)，但係戴完CM又好難返轉頭戴公模機所以又係放棄咗。而接近年未嘅時候上網望下望下就終於發現咗Just Ear, 經過一輪考究終於決定去馬，時間就係夾好啱啱自己四月去日本嘅時候去整。決定好之後就打email去問同約(註:要識日文)，就係咁簡單(?)。呢度補充Just Ear比同是日廠嘅Fitear親切之處係佢唔拒絕外國人去做的(只要你識日文的話)，唔似Fitear要你有日本住址證明咁麻煩。所以(比較上)係容易整得多。而松尾先生都同我講過佢已經有過唔少來自其他國家嘅顧客，其中都有香港人(有冇可能呢度有CHING要現身認頭?)。對於冇正式對海外市場做過PR嘅佢覺得都幾神奇。

就係咁，預約當日就帶住自己嘅player前去東京Hearing Center青山店。而其實去之前自己心裏面已經有一個大概嘅目標 - 就係想tune一隻女毒機！ 咩平唔平均呀，低音沉唔沉高音伸展點呢d我唔理！ 我剩係想聽(自己心目中)好靚嘅女聲!

到步時首先就係填下form同比錢。耳機價30萬, 倒模費9千，總和加消費稅一共333,720yen (果時6算4左右)， 荷包痛咗一痛,而正常地個心都有d唔安樂覺得會唔會做咗傻仔呢，但都比咗錢唯有繼續啦。

比完錢入房，首先就係菅野先生上陣。佢做咗一d簡單嘅檢查睇下耳道有冇問題可唔可以做模，然後就幫我戴上果個專用儀器嚟量度我耳朵嘅尺寸。呢個時候正式開始感覺到Just Ear與眾不同嘅地方，菅野先生佢開始同我解釋點解要噉樣做呢個度耳 – 原因係因爲Just Ear用嘅圈足足有13.5mm咁大，而套咗入殼嘅時候只有更加大。首先要考慮到究竟客人嘅耳殼放唔放得入，其次係要考慮到點樣放呢個圈而唔會影響到音質/音色之外(動圈同耳道嘅距離當然會影響音色!)，最後係佢亦都好注重個客戴咗之後個外觀好唔好睇(！),  如果凸太出就唔好之類咁。其間我問佢有冇試過有客係耳朵太細，佢答我係試過有一位! 而呢位人兄亦好唔好彩被拒絕做Just Ear。
度耳其間佢不斷係唔同角度同距離睇同調教，度完一輪佢比舊膠叫我咬做open mouth, 然後佢又再度過。度完open mouth係佢又叫我拎開個膠然後合埋口, 再度過！睇到呢度有做過CM嘅CHING可能已經發現咗Just Ear第一個特別點 - 冇錯, Just Ear落膠倒模前係會分別做閉口同開口嘅量度而唔係只有一樣！到佢滿意之後佢再叫我咬舊膠然後就正式入海綿同注入耳膠。其中有一邊耳仔做出嚟個模佢覺得唔滿意，再做!  前前後後剩係做耳模用嘅時間足足有45分鐘! 比起一般去出面搵人搞3個字就走得嘅就算未知手勢同成品如何只計心思已經覺得值回票價。

好，倒完模，一般人就會諗坐咗咁耐終於可以調音啦快X d啦! 而呢個時候松尾先生就出場。一望著住lab coat嘅佢點解會攞住個上面擺咗茶具嘅盤嘅? 只見佢好優雅哋係我面前放低一個茶杯，然後佢自己就坐我對面，再拎起放在盤上的一個手動嘅磨咖啡豆機，竟然開始沖咖啡! 佢一路沖又慢慢開始解釋呢d豆係佢自己配嘅，然後佢問我要唔要糖同奶，我本來話兩樣都要，但定一定神後醒起呢d嘢梗係齋飲先係對對方有禮貌，最後就要black了。雖然平時自己係紅茶派對咖啡完全冇研究，但一入口唔太苦，少少金，味道唔濃，又幾ok。四月當時日本重有d涼意，飲杯熱咖啡又真係幾窩心… 正係度享受一下嘅時候松尾先生又開口– 佢開始同我解釋點解要爲客人沖杯手磨咖啡呢， 除了本人對咖啡嘅興趣外，最主要係因爲之前做耳模嘅時間很長會令到客人心情疲倦同緊張，所以就提供呢杯咖啡嚟比客人嘆返杯靚咖啡relax一下抖吓氣，等客人心情回復平常先去做調音工程，從而達到最佳嘅効果。哇，講到呢度又係要寫個服字比佢，咁貼心嘅服務都比佢諗度!

--------------------------------------------分隔線------------------------------------------

今晚寫住咁多先，明天繼續!

不過先po d相！

01

02

lowbson

好貴 聽落好正
期待音質最後點

sggkchung

期待ing

goodabc2010

師兄堅呀

edgarcpu

期待

dezispop

毒，坐等聽感。

VictorTo

期待聽感

qoonicholas

咁即係幾多錢港紙呀？

kkwkk

strong post lm

shingfung

thanks for sharing