我的組合: 終極品聽 經典試聽大計!

ghhf

kai25570 發表於 2017-6-26 19:33
ghhf ching 請教你,lcd3升級線除左reference 16外,重有無其他推介,Ebay diy線有無試過?thx ...

小弟只試過Reference 16, 的確比原厰線優性, 不過性價比小弟就唔評了. 抱歉小弟無試過其他線配LCD-3, 所以不便吹水誤人荷包 ...... LCD-3其實唔難推, 不過要推到佢出神器本色, C兄努力 .....  

kai25570

ghhf 發表於 2017-6-26 22:13
小弟只試過Reference 16, 的確比原厰線優性, 不過性價比小弟就唔評了. 抱歉小弟無試過其他線配LCD-3, 所 ...

唔該ching,我用v281推,但用原廠線感覺未能達到在金x試lcdx時聽感,當時用Q audio 線,thx

ghhf

kai25570 發表於 2017-6-26 22:36
唔該ching,我用v281推,但用原廠線感覺未能達到在金x試lcdx時聽感,當時用Q audio 線,thx ...

就小弟對LCD-3最深印象既效果係，LCD-3既一種獨特中低頻内勁，一聴難忘，真係引死人。係合適膽管配合下(小弟主力以換膽調節效果)，LCD-3甚至可以被推出悦耳"清爽甘甜"有d似STAX效果，完全擺脫一貫"沉暗"印象!

小弟未聽過LCD-X，唔識評論C兄既心儀效果，如果C兄想調效果，除咗耳機線，可以試下換訊號線，效果可能仲明顯。

kai25570

ghhf 發表於 2017-6-27 09:15
就小弟對LCD-3最深印象既效果係，LCD-3既一種獨特中低頻内勁，一聴難忘，真係引死人。係合適膽管配合下( ...

Thx ching

ghhf

WA5 初嘗玩死膽(八)WA5的設定

係小弟繼續進行抽絲剝繭，為死膽事件深入推理之前，先用些少口水介紹一吓WA5既輸入輸出控制設定。

C兄睇到前文幅WA5面板高清圖，唔好似為小弟既WA5巳經有花痕損傷，其實係反光及塵粒既效果，不過係黑色機身既背景下就特别明顯。雖然WA5仍然安放係臨時既木板車上，不過好平衡穩陣，無任何翻側風險! 而且小弟對WA5非常愛護，入手大半年，仲係百份百如新!

好啦，入番正題，大家都知WA5系統係兩件頭設計，係獨立電源組件面板上，只有一個機械式旋轉形總電源開關，同今次死膽事件無咩關係。WA5所有既輸入輸出控制設定，都係放係功放組件面板上，佢地就係小弟要進一步跟進追查既部份。

功放組件面板上最突出搶眼既，就係中間個大型電位器，不過唔好理佢住，小弟先討論確定，排除咗同死膽無關既部份! 再引用番前文中關鍵問題: WA5用同一套膽管組合推HD800及AKG K-1000，HD800無事，但KK就死膽，咁除咗耳機本身之外，系統其他配置設定究竟仲有咩分别?!

首先，圖中最右邊既係輸入端選項，小弟而家一直都係行第3檔， 以RCA接HUGO作DAC輸入(第1檔係XLR，第2檔都係RCA)，服侍HD800及KK，可以確定係同輸入端選項設定無關。係輸出端方面，HD800係接咗上6.3輸出座，係功放組件最右部份(無拍入圖)，KK就用最左邊既4pins XLR輸出座。WA5係單端系統，其實6.3及XLR兩個座係相連，同樣只提供單端輸出訊號，個XLR座純粹係方便輸出連接用平衡線既耳機(WA5 Version 2)，所以亦可以排除咗HD800及KK用不同輸出座既分别。

係WA5既面板圖上面，仲有3個項控制設定未討論，由左至右，分别標示住"HP POWER"，"IMPEDANCE"及"LEVEL"。佢地對應推HD800及KK時既設定位置有咩異同? 會唔會就係死膽事件既關鍵線索? 究竟殺膽兇手是誰? 劇情發展到呢個階段，已經越來越迫近真相 ......

ghhf

WA5 初嘗玩死膽(九)999誰是兇手

係上一節，話說劇情已經發展到，將追尋殺膽兇手既範圍，收窄到係WA5面板上既3個控制設定，分别係"HP POWER"，"IMPEDANCE"及"LEVEL"。

呢3個控制唔使小弟多講，就字面睇，有番咁上下聰明才智，同小弟一齊追踪殺膽兇手到呢個階段既C兄，都知佢地既作用。基本上前兩項係同輸出耳機匹配直接有關，最後一項係同輸入電平調節有關，小弟就唔詳述啦，追劇最忌係技術性而沉長，悶死讀者唔係小弟一貫作風。

首先，係當日死膽現場，KK係案發時慘叫一聲"霹啪"之後，就一路都係啞口，唔為自己解釋，目光發呆，眼球只係一直釘住呢3個控制，係案發當場既設定:

HP POWER: HIGH
IMPEDANCE: HIGH
LEVEL: HIGH

唔知係唔係全部都係HIGH位，HIGH得太多，樂極生悲，所以搞到KK真係HIGH咗嘢!

至於本性冷傲既HD800，雖然都係一路唔出聲，不過大家一早知道佢有不在場證據:

HP POWER: LOW
IMPEDANCE: HIGH
LEVEL: LOW

好啦，比較一吓對應推KK及HD800時既所有設定，究竟足唔足夠證據推論出誰是殺膽兇手?!

ghhf

WA5 初嘗玩死膽(十)HD800好大路

雖然已經將殺膽疑犯迫埋牆角，真兇將好快被揭開面紗! 不過，係法治世界，凡事都要講求證據，要殺膽真兇心服口服，就要有無疑點證據及推論! 咁又要用一大輪唇舌口水，不過係過程中，不知不覺就會更了解系統運作及特性! 小弟作為玩嘢類既用家，係求之不得，對其他有意跳入呢個火坑既C兄，都可以預期一吓，作好心理準備，入坑後可能出現既慘烈狀況!

好啦，小弟又要出動三吋不爛之舌，使兇手無所遁形! 首先，同C兄睇咗推HD800時控制設定，相信係無咩異議啦! HD800屬於高抗耳機，亦係有一定靈敏度，小弟用緊既控制設定，係好大路，亦係官方推薦既! 事實上，以小弟玩嘢既性格，當然會盡量試哂所有控制組合，揾出小弟個人覺得最好效果! 除咗HP POWER經常係LOW位之外，對於IMPEDANCE及LEVEL，小弟亦試過不同組合，最終都係覺得當前既大路控制組合(係WA5板面上3個控制，順序從左至右設為LOW, HIGH, LOW)配HD800係最舒服!

小弟就係咁用呢個控制組合，由開箱一直推行咗HD800幾個月，期間都换過幾個膽管組合，甚至試聽埋WE300B及WE274A配TGRP/ SYMB終極組合, 運作一路都非常暢順，而且覺得WA5表現越來越好，同初開箱時效果已有明顯分别。直至小弟開始用WA5推AKG K-1000，再配上C3G訊號膽之後，就發生離奇死膽事件，仲要係連環兇殺案，情節特别嚴重!

下一節就會再分析WA5推KK案發時既控制設定，KK與HD800控制設定之間既異同，係咪就可以推論出誰是殺膽兇手?!

ghhf

哈! 小弟潛咗水大半年，個私帖似乎殭而不死(keep住火III)，仲有C兄PM問嘢。

踏入2018年，小弟既玩嘢生涯更上層樓，唔係大出血買機買膽，係脱離唔係好見得人既sofa㡳藏電格局，系統將搬入私窩，完全屬於自己既玩嘢天地!

新年頭祝各位C兄荷包腫脹，水頭充足，繼續血拼! 好消息陸續有來

ghhf

Project Move - 螞蟻搬大屋

小弟今日終收返個奈米office，實用得果260平方尺，感覺好似個大㕔咁。小弟準備留作私用，所有家當Head-fi系統包括WA5，WA22，WA6SE，STAX，電池補完全部都會搬哂入去。

雖然搬遷係大project，但小弟已完全掌控局勢，唔使急又唔使要快，無壓力慢慢螞蟻搬家執正佢。

呢個場小弟會做個人Lab，以後經典試聽大計就可以係完全屬於自己既私人空間中進行，點玩都得! 點可以唔興奮!

jaffeinism

ghhf 發表於 2018-2-23 20:50
小弟今日終收返個納米office，實用得果260平方尺，感覺好似個大㕔咁。小弟準備留作私用，所有家當Head-fi系 ...

除左羡慕同妒忌, 真係無咩野好講, 太正了!