我的組合: 終極品聽 經典試聽大計!

ghhf

優化可行性

免責聲明:
所有有關電源及連線改動, 仍小弟跟據個人經驗實踐行為, 改動及連線有一定風險, 不當處理可能會損壞相關器材, 及違反原廠保養條款, 甚至危及人身安全. 小弟無意鼓勵其他C兄模仿, 小弟亦不負責模仿後產生既任何後果同損失.

小弟係前文評估咗WA5既用電數據之後，就繼續求證，WA5既AC供電優化既可行性。   

今次係AC供電線路火線(啡色)串入一組並接既電阻及電源開關。係開機時，電流只能係電阻經過，隔一個短時間，T秒之後，小弟就會按下電源開關，將電阻短路，WA5就會直接接上AC電源。全程由開機到出到聲，WA5既用電電流變化，都會被監察及錄影作參考，小弟就可以知道優化係咪可能，並返複試幾個T時間，揾個最優值。   

醒目既C兄就知小弟想做咩，小弟又搞一壇嘢出來，絶非得閒無聊手痕，而係基於WA5既特性，小弟認為要作AC電源供電優化，先係長治久安，玩得安心盡興!   下一節小弟就會詳述其中背景及原因，及介紹小弟準備既優化設計。

ghhf

危險峰衝大電

小弟繼續講電，先了解一下WA5既設計及特性。

WA5係膽機係人都知，膽機食電，其中既膽管燈絲發光發熱，就更係佢既標誌。Woo系統，包括WA5都有一個開機"預熱"延時，先全電力點膽燈，過咗大約25秒之後(期間藍色指示燈會閃爍)，WA5內部繼電器就會接入B+屏極高壓(達到400V+)供電，咁WA5先正式可以出到聲。

就小弟之前試驗監察，開機大略有4個階段，歷時大約40秒:

1. 第00-01秒(瞬間峰衝大電流難以測度)，AC供電電路瞬間閉合，係火牛穩定磁場階段
2. 第02-24秒(由0.86A平穏降到0.4A)，内部部件穏定階段，特别係膽管燈絲預熱
3. 第25-25秒(由0.4A瞬間升上1A以上)，B+屏壓供電閉合
4. 第26-40秒(由1A以上平穩降到0.7A持續工作電流)，放音前整體系統穏定期

[youtube]S_a6d0jLwvY[/youtube]

膽管屏極電壓及電流控制固然係系統設計首要考量，其實係整個品聽過程，開機時既起始峰衝大電流(可以係工作電流十倍以上計)，對於小弟呢種玩組合，經常換膽，開機熄機繁密用家(WA5開箱2個月以來，開機熄機循環已不下100次以上)，對系統特别係珍品膽管既壽命影響，就唔可以唔認真考量!

膽燈絲係冷凍時引入既起始電流可能係額定量既倍數計! 就WA5用既6粒膽管，佢地合計額定膽燈絲用電量大約係50W(5V/10A或220V/0.22A粗略計算)。係起始時一段短時間(幾秒內)就可能要承受幾倍更高電流，長期返覆係呢種模式操作，膽管壽命就會大打折扣! 小弟今次要針對既就係第一及第二階段部份，為咗保護心愛藏膽唔會因為過度"操練"變咗短命鬼!

再詳細睇下小弟習作對各階段電流量值實際作用及所代表既意思。係第一階段，小弟串連咗粒200歐姆大功率電阻，將起始峰衝電流限制係工作電流2倍之內，大約係1A，為系統作出第一重保護。

係第二階段，原來測度既起始電流大約係0.86A(實際應該係要更高，可能超過1A或以上)，與穩定時電流0.4A最少有0.46A差别。呢個差值既意義重大，大約係各膽管額定膽燈絲工作電流2倍(0.22A x 2)。換句話講，係開機到第二階段初期大約4-5秒期間，膽管要承受最少多2倍以上額定電流!

唔測唔知，一測小弟見到呢個電流數值，加係西電WE300B同其他珍藏膽上，仲點會開心開機盡興品聽?! 小弟點都要做番D嘢先安心啦!

經過幾次測試，拍片對照分析， 串連電阻，作T秒延遲之後，先比全電力WA5。入咗第二階，係開機後大約T=5秒，按下並聯開閉將電阻短路，整個階段都維持係0.45A或以下，只係比所需0.4A(0.22A膽管，0.18A其他部件)高出0.05A，期間到第15秒，就一直維持係0.4A，直到第25秒第二階段結束。

待續 .....

ghhf

小弟係呢個壇打躉咗差唔多3年，最近發現榮升做"銀級大師"，雖然只係銀級，話哂都叫做大師喎! 咁小弟吹水既毒性，誤人荷包既殺傷力，會唔會又上一層樓?!

ghhf

限流延時 保護膽管

話說係前文小弟確定咗WA5加限流電阻係可行之後，就作進一步試驗，最後既安排係用450歐姆電阻(由9粒50歐姆20W陶瓷電阻串連組成)，再返復試驗咗幾次，發覺延時30秒左右效果最好，系統之後再以全電力行15秒，然後再啟動B+，平衡咗限流電阻耗電(100W之內)及膽管預熱所需時間。





小弟拍咗未加及加咗電阻之後既電流量變化，用450歐姆電阻將起始電流限制係0.27(大約就係膽管正常運作時總電流要求)，就算全電力供應時，亦唔會超出0.42A(穩定狀態係0.4A)。係唔改動WA5內部既大前题下，係外部加合適限流電阻，配合適當延時，可以算係最簡單有效既方法保護膽管。

1. 第00-01秒(瞬間峰衝大電流限制係220 V/450 Ohm = 0.5A)，AC供電電路瞬間閉合，係火牛穩定磁場階段
2. 第02-30秒(由0.27A平穏降到0.18A)，内部部件穏定階段，膽管燈絲預熱
3. 第31-44秒(由0.42A平穏降到0.4A)，内部部件穏定階段，全電力膽管燈絲加熱
4. 第45-45秒(由0.4A瞬間升上1A以上)，B+屏壓供電閉合
5. 第46-50秒(由1A以上平穩降到0.7A持續工作電流)，放音前整體系統穏定期

[youtube]qxYgz_Z5fV4[/youtube]

ghhf

WA5 整流膽的疑惑

好啦，講開WA5用電，小弟繼續進一步深入WA5內部探究，其實之前開箱時打開WA5機箱，除咗好奇，想睇吓內部設計，用料及接焊質量，睇完小弟好快就打消咗自己"砌"或魔改念頭。

不過，小弟另外都係想確定2件事，首先係整流膽既連接及供電，小弟睇完WA5内部後，就確定自已隻WA5 V2版係有優化修改燈絲連接方式，相對上一代版本單純串連，整流膽燈絲而家係獨立連接到火牛一組5V-0-5V次級線圈，中間0分線亦有被使用連接。整流膽既輸出極又係並接，咁WA5上既2粒整流膽，基本上可以睇成係可以完全獨立操作個體。

呢個整流膽連接修改，除咗減低整流膽之間因質量差異既相互應響，同時亦引伸到一個有趣既可能性! 就係2粒不同特性整流膽混合使用既效果，想像1粒WE 274B及1粒GEC 5U4G同時插上WA5混合使用，會唔會比出一個全新效果呢?! 事實上，小弟品聽咗WA5幾個月，已經確定咗整流膽對整體系統效果有明顯應響(先透露些少，依小弟個人既感受，WA5上各膽對整體系統效果應響對比大約係，功率膽:訊號膽:整流膽=3:4:3)。

如果混合2粒不同特性整流膽使用，係會産生一個全新效果，咁對小弟來講就係極大喜訊，因為意味可品聽效果組合，將再以倍數計增加，可能發掘到更多"一體臨場"感動效果! 小弟遲d就會進行實際試驗，再向C兄報告發現到既驚喜(希望唔係驚恐)!









WA5 6moons audio review vs WA5 V2

ghhf

心中有兩條刺

小弟明明話會分享WA5及西電WE300B聽感，突然又走咗去玩電源供應?! 其實小弟WA5開箱3個月以來，雖然已經聽咗WA5超過100節200小時以上，但都係以Hugo作DAC輸入，接HD800作耳機輸出，仲未試音Young DSD，亦未試用8W大功率推AKG K1000及其他耳機效果。

現階段如果就寫死品評效果，係太過片面，畢竟小弟對WA5配KK耳機及以Young DSD輸入既組合係有更高期望! 唔知呢個組合再加上WE300B/ WE274A西電膽效果會唔會更有驚喜? 真係好奇待! 所以等品聽埋配Young DSD及KK既效果，小弟對WA5及西電膽既品評就會更全面，肯定更精彩!

不過而家小弟心中有兩條刺，都係同WA5用電有關，要先除為快，可以安心繼續品聽! 前文已講咗其中一個問題，峰衝電流及可行優化方法，小弟將加入一個30秒延時繼電器，代替前文實驗手動開關。話時話，加多咗30秒延時，比膽管係額定工作電流以下先預熱更多時間(係限流電阻作用下, 膽管燈絲係無發光, WA5藍色指示燈唔着亦無閃, 成個系統都係"缺電"狀態)，似乎唔止可以"延壽"，出聲方面亦比較"順滑流暢"，開機幾分鐘後，就好似係開機成個鐘之後既效果，系統更快進入"狀態"! 再配合"電池補完"一齊使用，希望得到最好效果!

咁第二條刺係咩? 係一個睇似簡單，但又極煩厭問題，未開機就已經感受到，小弟硏究咗一輪，最終覺得係同WA5既設計有關，究竟係咩問題小弟覺得咁煩厭?! 下節再講，先去圖睇吓WA5既電源部件內部圖 .....

ghhf

WA5 煩厭"哼聲"

小弟對Woo産品自WA6 SE，WA22到而家WA5都係有讚無彈。事實上，小弟覺得佢地真係睇得又打得，完全感受到産品既一份簡約而精進既信念! 小弟今次講到有關供電上既現象，只係WA5上發現，未係WA6 SE及WA22見到有類似現象。

呢個現象就係，即使仍未開啟電源，只要WA5接上AC電源，係耳機就會聽到"哼聲"! 雖然唔算大聲，但係容易察覺，特別係入夜之後背景更静，"哼聲"就更明顯!

有冇搞錯?! 咁大鑊?! 小弟最初發現係開箱之後大約一星期既時候，咁遲先發現，因為正常人，平時係唔會係仲未開機既情況下，留心去聽耳機有冇聲出!

小弟當時第一個感想，覺得係質量問題，頓時産生咗退貨念頭! 不過係一輪試驗及考量之後，其實情況唔係最初想像中咁大鑊，最多係有些少煩厭，WA5係供電連線可以有地方優化!

小弟無選擇退貨，係因為WA5係開機之後，就完全無咗昵d"哼聲"，即使音量調到最大，係無播放音樂訊號輸入時，背景仍然無一絲噪音，或者應該咁講，係一個小弟無法察覺到既水平! 最重要係，完全肯定"哼聲"只能係未開機時先聽到!

雖然呢個現象並唔影響到實際品聽音質，但係熄機之後，耳機長期放出"哼聲"，就唔知會唔會有無其他意外效果，甚至損害到耳機! 所以小弟就嚐試探究，希望自己可以解決問題!

小弟進一步探究既結果如下，WA5所有輸入端斷開與前級完全分離，但"哼聲"仍然存在，確定唔係來自前端干擾! 轉換膽管及耳機，亦無作用! 斷開AC電源"地線"，"哼聲"反而變大，似乎又唔係地閉迴路問題! 最後斷開AC電源"中線"，"哼聲"就消失! 一定消失啦，斷六親又未開機都仲有聲，就真係見鬼，要拜神先得!

有咁既試驗結果，問題就唔難解決，就係將WA5既內部電源開關改為雙刀，同時閉合或斷開AC供電迴路中既火線及中線就搞掂! 實際上，小弟係唔會改動WA5內部(住!)，只會係前文既AC供電限流線路中，加入斷開中線既方法!

咁"哼聲"點來既呢?! 睇返WA5供電部件内部圖就知，電源開關係串連住火線輸入，地線輸入係接去電源變壓器初級線圈既其中一端，呢個係一個典型接法。 其實中線對地之間係有些少電位差，雖然供電迴路仍未閉合，但WA5電源變壓器一直係接住中線，照小弟自己既猜測，電源變壓器感應到交流訊號，經過WA5獨有既電源連線(為B+，12VDC，6.3V訊號膽及5V功率膽燈絲供電)，由供電部件傳到功放部件，再係耳機輸出端呈現出來!

好啦，來到呢個位，係所有可見風險都受到控制之後，小弟無意再進一步尋根究底，所以WA5既供電問題，就此告一段落，小弟要用精力去品聽玩返膽管! 本文希望可以比其他WA5用家及Woo官方參考，精益求精!

ghhf

WA5 DIY電源開關

總結咗之前既試驗結果，優化要求，相關限制及安全性，小弟好快畫咗個設計草圖，包括2個雙刀開關，輸入輸出指示燈及限流電阻。



選用雙刀開關係想除去WA5既未開機就先"哼聲"既現象，另外SW2係提供多一個保險，為限流電阻斷路，防止SW1有咩閃失無閉合或斷開時，限流電阻都唔會因為連線過時過熱! 就係咁簡單，唔用延時線路，亦唔用繼電器，好處係無需為控制部份提供額外電源，考慮到限流電阻會發熱，準備揾個鋁盒，一個手掌左右大細盒仔就搞掂，裝哂佢地入去(注意: 金屬機殻必需要有良好接地!)。

簡單既代價就係要自己計時，手動操作! 小弟係用右手開機，係實際佈置及操作時，鋁盒可放貼住係WA5電源部件右邊，作為新既電源開關。SW2會係鋁盒面上右邊向外，SW1並排係內侧，咁様安排後，開機程序就非常暢順，右ON-左ON-右OFF! 先閉合右側SW2，延時，再閉合左侧SW1，見到輸出指示燈發光，就斷開右侧SW2。至於熄機，就只需將SW1斷開或確定所有開關都係OFF位置。

手動程序好似有些少繁複?! 對小弟來講，完全係無問題，唔會有咩出錯機會，就算真係次序錯咗，亦唔會有嚴重大鑊意外發生! 又唔使擔心係不知情下，自動延時線路或繼電器出現問題! 另外，由於延時時間唔使太準確，就算手動操作時間長咗，都只係消耗多咗以幾秒計既些少電力係限流電阻上，WA5就遲多一陣先全電力運作，無咩副作用，唔使死既!

好啦，開工去也，完文!

ghhf

小弟度咗一輪位之後，今日去老地方一次過集齊d部件，準備跟之前個圖DIY一個外置電源開關比WA5。雖然線路已經盡量簡化，執埋d零件之後，睇落其實都要用唔少力，特別係機殻鑽孔及固定d大功率電阻!

係接線方面，小弟準備打條原有既10呎長單晶銅電源線主意，將佢一分為二，分别做3呎一段接WA5，另外7呎一段接AC電源，佢地中間就接呢個開關盒。小弟唔會用IEC座，而係將兩段線切口兩邊直入機箱，咁又可以慳咗栽切機殻工序! 基本上就係，係條原來既電源線上，串連個開關盒，呢個盒小弟應該點都要整番一頭半個月!

ghhf

老地方無黑箱, 上ebay執到一件, 睇吓邊個配小弟既黑版WA5順眼d