我的組合: 終極品聽 經典試聽大計!

ghhf

PROJECT 80AH 天羅地網

小弟襯星期六曰假期開始PROJECT 80AH前期布局工作, 經過仔細考慮過可行最短接線, 散熱, 通風(抽走電池充電時放出有害氣體), 及方便以後緊急及維護操作(均衡使用5粒電池), 決定將電池組B1, B2, B3, B4布置成田字型, 及將備用B5電池(每3個月輪流取代其他電池), 高溫斷路系統(裝置係透明膠盒)及USB風扇放中間

為咗方便觀察充電狀態, 5隻BatteryMinder會搬上前端最靠近sofa邊, 小弟特別搵咗一隻通用可以配插兩片大细腳拖排(大細腳全場都搵唔到, 最後要係Amazon網購)招呼BatteryMinder

另外用上巨型蜂鳴器, 叫聲非常大, 而且聲調尖銳極度吵耳難受(係死咗入棺材都要彈番起身, 整停佢先死得安落果隻), 成間屋都好吵鬧. 小弟驚死緊急時得一隻可能處備太耐唔識響, 所以整多隻拖線對住大門口同步一齊叫. 始終安全第一, 有狀況時一定要一鳴驚人, 打擾到隔離鄰舍都係咁話. 話要一鳴驚人, 但同時都要救停得快, 緊急手動斷路, 系統AC總開關都會放sofa前端, 唔使移動sofa都可以無阻礙, 容易操作, 任何人都做到, 簡單一按全斷

工欲善其事, 必先利其器, 新電池電極端子係F11, 又用10mm六角螺絲, 小弟入埋一支快上快鬆六角起匙, 又改用U字開口大型接線頭, 方便5粒電池替換使用時更改之間接線. 電源線方面, 小弟用返舊有單晶銅線, 將原來焊死既環型頭除咗, 用銀焊料執一執, 再接上新U字接線頭(佢係用兩粒上下前後位置螺絲鎖死條線). 加埋紅黑熱縮膠, 就完成靚靚DIY電源線.  因為要串連個斷路系統, 比原來多一段, 總共要做6條, 2長(電池極端接逆流器輸入), 2中(串連電池極端同斷路relay), 2短(電池極端之間串連)

新電池係新布局下佔咗sofa底一半位置, 咁大壇嘢係升級期間又要移開sofa, 阻礙大廳位置, 巳引來不少微言 , 小弟平曰唔可以操作, 只可以星期六曰先可以有多d進度, 今次先完成布局設計同DIY接線, 下星期再繼續 ......

ghhf

PROJECT 80AH 初試啼聲

小弟既PROJECT繼續有進展, 雖然話會接上斷路系統後先會正式用新電, 不過小弟重新整理sofa底, 搬走不必要部件, 作好新布置, 為新電池加上標簽, 清潔好電池極端同接線頭除去油污及手汗, 再做好連線, 就完成最基本系統主迴路連接(而家只有一粒10A靚聲保險絲作保護, 如果有咩閃失燒咗都幾肉痛，總算完成最重要一步 ), 無充電系統, 更未有斷路系統

小弟特別安排新舊電池同照, 5粒新電池對比5粒舊電池, 一齊見證呢個咁有歷史性意義既交接時刻 ..... 要聽一聽全新電池組音質效果及監測供電表現, 新電池, 新接頭, 最簡潔連線下系統效果究竟係點呢???

ghhf

小弟由晚上10點一整好系統連線開始, 聽到而家過埋零晨12點鐘, 臨瞓前都要用興奮既心情, 舒發一下初試聽感

今次PROJECT搞作表面上只係增大後級電池電量, 但感覺到既完全係一次明顯系統升級效果, 先用四個字概括: "鬆容壯麗". 而家呢套config先叫得上係真正既"電池補完"系統! 雖然小弟心裏面巳經知道邊d地方有突出變化, 都係聽多幾日, 等系統煲下, 穩定d再分享多d細節

ghhf

昨晚巳夜小弟趕住入睡，急忙只係比咗4個字"鬆容壯麗"概括聽感，而家補充多些少。升級效果都係小弟意料之內，音調其實無咩變化，最主要係背景既微動態響應有明顯改善，好多细節更突出，中低頻明顯更有力量，不過唔係大大舊肥肉咁噠出來，又唔係鬆散各自各精彩，係表現出更有協調性既層次同韻律動感

同時亦係因為細節響應效果提升，不但主題人聲更有磁性，整體空間音場係協調性既層次建構下就更有立體感。小弟用"鬆容壯麗"唔用"亮麗"或"艷麗"就係想表達出力量感提升既同時又唔覺得有急壓咄咄逼人感，唔係纯綷既亮度對比性或剛性震撼感，而係一種整體表現自信實力既"鬆容"大氣度(大把在手咁)

總體上小弟既直接感受就係，電量增大(同時執順咗條電氣，最簡潔接缐肯定亦有幫助)係明顯提升咗微動態響應效果，不過亦感覺到出聲未夠潤滑甜，估計新電池同新接頭(遲d串連埋斷路relay)係要煲行一段時間先暢順

ghhf

小弟昨日一返到屋企，就急急開着HeadFi，由晚上7奌到11奌繼續品聴多4個鐘，今次又換d聴慣既膽管睇下新電池效果，咁當然係再一次確認有新體驗，係一個整體性既效果提升

講完音質效果，小弟同時監察新電池放電狀態，2日總共聽咗6個鐘，電池组由51.4V跌到50.4V，大约放咗10%電量，符合預期。小弟亦開始試用BatteryMinder為新電池充電，確定實際充電所需時間同效果

去圖，呢d咁混亂既場景，整完之後唔知幾時先再會玩多一次，所以要拍落黎留返弟日回味

ghhf

話說後級補完系统用咗新既大電量80AH電池，配合BatteryMinder充電巳經差唔多行咗一個星期。首先音質聼得出一路有改善，除咗微動態響响，出聲巳經有甜滑潤感，感覺越來越順暢。

至於充電方面，電池組經過第一次充咗成日先充滿，再放電6個鐘由最高開路電壓52V放電到50.9V，再充電大约要12個鐘，初步估算每放電1個鐘就要充番2個鐘。用BatteryMinder以過夜充電8個鐘的確有d勉強。小弟等埋大功率PB-600充電機，試下充電效果，然後再決定最合適充電细節安排。應該係先行PB-600充電8個鐘再切换到BatteryMinder作維護平衡充電。

雖然充電部份仲未定案，斷路系统小弟決定唔做DC斷路部份，只做AC斷路。一來當系統布缐完成，主迴路有保險絲保護，實際電池電極及接缐短路引至高熱機會幾乎係零，充電系统亦有獨立保險絲，唔會因過大電流充電出現高熱。唯一係電池自身内部出現問題，咁主迴路DC斷路亦無咩作用，AC斷路(PB-600及BatteryMinder组成1+5獨立充電系統)就可以減去再充電添加既危險，刺耳蜂鳴警號就更加係盡早發現問題既最重要關鍵。唔做DC斷路亦使主迴路接線保持最簡短少接點設計，保證達到系統最高質水平輸出。

充電要試實際效果，接線都要二次製作，因為小弟覺得感受到出聲既升級效果應該唔單纯只係電池電量增大既作用，所以決心一次搞掂，再入咗另外10個高質靚叉頭，幫DC電源線作2次升級，再次連線睇下效果異同。

ghhf

靚靚DC電源線二次製作中, 金金閃真係好誘人, 整好試音, 究竟有幾多唔同呢??? 好緊張, 好緊張, 星期六曰再分享聽感 .....

ghhf

搞咗成日之後，小弟總算完成電源線二次升级，雖然整到十隻手指都酸痺(淨係剪走舊包膠都搞咗半個鐘，又逐粒清潔接頭，再執接缐同保險絲焊位同封新膠，逆流器原廠接缐端亦要改動拆走保護膠套先用到新接頭)，見到咁靚靚既新缐已經值番哂。

今晚正式再品聴換上新接頭電源缐效果，用熟悉膽管聽番幾節先比報告。不過如果變化明顯，小弟可能會忍唔住跳出來吹兩句，攞番個頭彩先。

ghhf

真係唔使等聽幾節先比品評啦, 哈哈 …..

用新接頭電源線, 一開機就知佢咩料, 小弟唔噴咁多口水講行貨效果, 三個字"豐密濃", 又亮麗咗d, 講完! 不過同樣有d生硬感, 應該要煲下先會順暢d. 心水清C兄一定知道小弟既感受. 雖然都係金色, 唔係話貴嘢一定好d, 小弟耳聽為實, 好明顯呢隻新頭比之前十蚊雞貨係有唔同, 算係物有所值.

ghhf

小弟玩玩下Head-Fi, 玩歪咗些少, 玩埋電池, 呢個網d料唔錯, 收納係小弟呢個帖作日後再參考.

http://batteryuniversity.com/