我的組合: 終極品聽 經典試聽大計!

ghhf

電池補完 前端優化

已經來到呢個階段，小弟後级電池補完效果應該巳經完全定案，只剩番充電同高温警報及AC斷路部份，佢地對音質唔會有咩影響。

其實補完系统更重要部份系前端供電，前端部份對雜訊敏感，雖然只係低壓，電流需求較低，缐路亦簡單好多，不過就因為係咁，對電源質量要求更高。小弟下一步就會集中力量優化前级電池供電部份DAC +15V及USB +5V，特别係做好屏蔽，訊號地接缐及接頭質量等等，相信改進會更大，會繼續同各位C兄分享成果。

ghhf

充電第一 PB-600開箱

Head-Fi未響, 電池先行, 小弟今日收到隻PB-600充電機, 不過都要自己DIY一條DC電源線, 紅黑線夠粗身上到10A就掂. 今個星期六曰搞掂佢就可以試充電效果, 以10A出力, 8個鐘過夜應該咩都充滿  

又有得開箱, 唔講咁多嘢, 去圖 .....

ghhf

原來BatteryMinder跟機既另一組接線, 個圜頭雖然大咗d唔係好fit, 不過有15A保險絲跟線, 將兩條接埋, 兩邊圜頭就可以分別接PB-600同電池組用住先. 就咁用紙皮隔住, 四圍飛線, 選咗行8段充電模式, 插埋個溫度探頭, 試機 ...... 呢個場境都幾嚇人, 一定要留底做紀念

PB-600行咗一個鐘似乎ok, 不過隻散熱風扇就好似飛機升降咁嘈到啊媽都唔認得. 如果真係行過夜充電, 小弟成晚眼光光陪住佢唔使瞓, 咁樣唔係好掂. 希望係因為新機未行順, 遲些少會靜番. 如果唔係, 小弟就會出手幫佢做手術 (加潤滑油或者換把靜扇)

ghhf

話說小弟收到隻PB-600之後, 急不及待試機充電, 比佢既散熱風扇嘈到不耐煩, 好彩行咗3個鐘之後就靜咗好多, 巳經去到可以接受程度. 本來由晚上9點行到12點, 覺得可以比佢自己行充過夜, 第曰晨早再check應該充滿啦, 臨瞓前再睇下攞個安心, 點知一睇小弟面色突變, 雖然知道未充完電, 都馬上cut電, 有理無理都停咗部PB-600先, 夠竟發生咗咩事???

小弟突然cut電, 係因為係電錶上見到一個未能預期到既電壓讀數59.9V! 小弟一直期望緊既讀數應該係57.6V(=14.4V x 4)左右, 而家多咗成2V有多, 係一個危險訊號, 玩電既嘢, 一次出錯都嫌多, 安全第一, 唔好話過夜, 緊係即刻斷電, 再檢查研究係咩事啦!!!

其實小弟一直用電錶監察住PB-600既充電情況, 巳經過咗定流同定壓呢2段, 應該係行到8段充電模式獨有既第6段, 過壓充電 (recondition boost charge), 平衡電池內各小組電量, 回覆電池原來總電量, 不過估唔到要去到59.9V. 呢組新80AH電池規格, 都有話建議每3個月行一次過壓充電, 不過最高電壓都係59.2V(=14.8V x 4). 小弟星期六日呢兩日開Head-Fi品聽放番d電之後, 會再行多一次PB-600, 睇清楚佢搞咩東東

講完d驚嚇嘢, 又要報番d好嘢, PB-600行咗3個鐘之後比小弟監粗熄咗, 其實如果係係2段或3段充電模式, 佢巳經幫電池組充完電(約10%電量, 由50.4V充到上52.4V). 小弟今日放電睇到電池電量好充足, 夠小弟行足3節大約9個鐘(先回返到50.4V, 大約係係90%電池組總電量), 同BatteryMinder比效, 充足成曰都係行得2節到, 效果都唔及PB-600充3個鐘咁有力, 10A出力果然係有d料到, 等小弟行多幾次PB-600, 摸通佢特性之後再作最後安排

另外, 小弟物盡其用, 攞番d舊接頭同13A保險絲加條粗身紅黑線, DIY番條合心水電池電源線, 唔使單晶銅靚料, 不過打孖上, 配PB-600最緊要夠粗夠長, 靈活可用性好d, 去圖 .....

ghhf

好, 今次先睇圖, 再吹水 .....



呢幅圖比之前d圖更驚嚇, 唔係因為佢睇落更混亂, 心水清C兄睇一定知道, 電錶上既電壓讀數, 先係最吸引眼球既地方

小弟今曰品聽咗幾節放咗d電之後, 再行PB-600既8段充電模式. 今次小弟巳經有心理準備, 睇住最高電壓會去到咩水位. 有2個重要指標, 57.6V (=14.4V x 4)及59.2V (=14.8V x 4), 前者係恆壓充電及過壓充電既基底電壓, 後者係80AH電池官方規格最高過壓充電電壓

好明顯, 呢個電壓讀數肯定係不尋常, 小弟知道PB-600入咗第6段過壓充電之後, 對眼就一路釘住個電錶, 見佢係30分鐘內由55V左右, 一路升到去61.3V. 係過咗59.2V之後，小弟就一路忍住, 希望佢會停, 不過無想停既跡象, 仲繼續上升緊, 電池外殼亦有微暖. 雖然PB-600最大充電電流10A對80AH電量電池唔算得上係咩, 去到呢個水平, 已經係過充電咗一大截, 小弟最終限住30分鐘選擇手動斷電, 係想盡量減少損害(如果真係不正常現象), 再一次監粗整停PB-600

其實係小弟出手之前, 電壓讀數巳去到61.5V (=15.375V x 4 = 2.5625V x 6 x 4), 小弟巳經不能容忍, 無時間拍攝, 快手斷電. 或者係小弟大驚小怪, 不過唔知電池組會上到咩電壓, PB-600充電機官方網站同其他電池充電網頁, 亦未搵到過壓充電去到咁高電壓既資料, 係咁既情況下, 為安全計, 小弟會將PB-600調去3段充電模式, 直至搵到相關資料去支持呢個過壓充電方式, 先會再考慮行番8段充電模式. 不過, 就算要行, 都唔會, 亦唔應該設定為一個經常性既自動化充電操作流程

Lancelot

師兄可以考慮在output端裝上DC-DC 穩壓保險, 始終電壓過於浮動可能是電池充放階段不均導致, 加裝DC-DC穩壓也可作current limiter做雙重保險

ghhf

Lancelot 發表於 2015-10-13 13:22
師兄可以考慮在output端裝上DC-DC 穩壓保險, 始終電壓過於浮動可能是電池充放階段不均導致, 加裝DC-DC穩壓 ...

小弟有考慮過呢個問題, 由於PB-600係屬於智慧型充電器(smart charger), 佢會一路監控電池狀態, 然後進入不同充電階段, 以求得到最好充電效果, 如果係輸出端同電池組之間串連額外穩壓限流線路, 可能會有不兼容效果, PB-600唔能夠準確掌握電池狀態, 就不能正確完成充電

最簡單佈置係, 小弟可能會加一個電壓感知線路, 並聯係輸出端檢測充電電壓, 當充電電壓超過一個觸發電壓, 例如59.2V, 就會啟動鎖定AC斷流器(高溫觸發之外, 加多個高壓觸發). 限流方面, PB-600既10A最大充電電流對80AH電池短時間來講唔會構成威脅, 小弟會繼續用番13A保險絲作為上限保險

不過解鈴還需繫鈴人, PB-600其實係可以firmware update, 重新篇程充電參數及開關不同充電階段, 小弟會嗜試聯絡官方如何可以更改最高充電電壓等參數. 係小弟得到確切結論同方案之前, 只好"斬腳趾, 避沙蟲", 唔行8段, 行住3段充電模式先

ghhf

終極大計 勁量穩妥

好啦，經過個多月既試驗80AH新電池，2款充電牛BatteryMinder同PB-600之後，而家都應該係小弟做一個小結既時候

首先講下應用策略，小弟經過實驗同分析，巳有自己既使用守則，電池组盡量防止深度放電，並且經常保持蓄備電量在10%(50.48V=12.62V x 4)以上。以小弟後级得WA6 SE咁簡單系统，10%電量實際使用效果係可以滿足到3節大约9個鐘使用時間

係充電電量及性能方面，小弟唔會用24小時常備充電模式，係安全考慮，同時電池充電後亦應該比佢有一段穏定時間。小弟會盡量用盡係可接受充電時段(即係盡量小弟係屋企既情況, 每日既零晨12點至早上8點)內以適當電量充電，唔會貪快一味追求大電流充電。PB-600既10A最大充電電流對80AH電池來講，可以為整體電池组提供快速充電。另一方面雖然BatteryMinder出力得1.5A相對细好多，不過勝在可以每粒電池獨立充電，得到均衡充電效果。係實際使用時，PB-600應該係4個鐘內可以為電池组補充10%電量，BatteryMinder就可能要成12個鐘

至於充電既運作流程方面，根據以上規限，小弟會按排每星期充電二次，第一次係星期一晚上8點開始至星期二早上8點。另一次係星期六零晨12點去到星期六中午12點，即係逢星期一同星期六做一個12小時充電，都係由BatteryMinder出陣。至於PB-600，就會用作個别緊急快充備用及每3個月一次全放電全充電(80AH電池全放電後再充滿，PB-600可能都要充成大半日，BatteryMinder用作全充電就唔合適)

最後每3個月亦會做一次第5粒備用電池輪替，過壓平衡充電(小弟準備用另置既穩壓限流PSU手動進行)及乘機清潔電池電極及接缐接頭，保持最佳音質效果

各位有睇開小弟呢個帖既C兄，一定可以體會到小弟呢個安排，係背後所涉及既各種需求，技術及安全因素平衡後既結果。再加上高温警報及AC斷路部份，系统可靠安全程度就可以進一步得到保障。長篇大論，口沫横飛，小弟其實好懷疑有幾多C兄會一路睇到呢個位。不過，下一節就會講實際落實設備及細節優化，有多d圖睇下就無咁悶

ghhf

天使設計 魔鬼細節

話說小弟噴完口水, 講到自己套Head-Fi系統個電池補完大計幾咁妥善正斗, 去到落實細節位, 就更要考工夫, 手工優劣係可以直接影響最終效果, 小弟今個星期吹住咁多先, 分享d圖比C兄玩味估下小弟如何落實到細微之處, 下星期繼續補充說明, 去圖 .....

ghhf

小弟終於以3段充電模式用PB-600行咗一轉，只係用咗2個鐘就搞掂。最高電壓只係去到57V，小弟見佢係晚上11點轉綠燈話充完，就比佢行過夜，一路keep住係53.8V。電池组只係有微暖，效果算係好理想

小弟選用BatteryMinder為主力充電，係考慮到電池组最優使用壽命，均衡及安全性(以BatteryMinder充電，對80AH電池構成安全風險極低)，最重要係以小弟現時系统用電量及可用充電時段，仍然可以接受BatteryMinder以較長時間充電。除非將來需求有變，先會考慮引入PB-600到每星期充電排程