本帖最後由 ghhf 於 2015-5-11 18:17 編輯
今個星期有一睌返到屋企, 比人投訴話收到舊鐵 {:6_136:}, 原來係一個非常有份量既包裝箱, 小弟就知道件新玩具終於到手. 拆箱睇果然係隻TV-7 D/U Tube Tester, TV-7可以講巳經係膽業界既一個經典標準而且亦係軍用級Tube Tester. 小弟呢隻之前係被修復(Overhauled)及效準(Calibrated)過, 不過好似巳經係十幾廿年前既事, 小弟遁例又要表面檢查一番, 電源頭及接線, 縲絲, 開闗等等, 又一件古董, 但品相非常新淨, 應該係之前被番新後長期收藏, 隨後流落民間, 輾轉再落到小弟手上 {:6_146:}
由於時間關係, 小弟一早巳經特選準備好一隻優質110V牛, 及黃色熱縮膠招呼佢. 搞咗大半日(搞咗d咩睇圖唔詳講啦), 執完好似又醒目咗. 接上電源, 聽到熟悉清脆既啪一聲, 豪獷直接設計既表板上, 係半圓蛋狀散發出寶石般誘人飽滿艷紅光芒指示燈 {:6_157:}, 當小弟按下LINE ADJ按鍵既一刻, 見到指示表針敏捷豪不猶豫流暢滑動, 心裏面就有說不出既喜悅, 因為係小弟面前既不但係一件玩具, 一件工具, 更係一件值得被珍愛收藏代表一個歷史時代既藝術品 {:6_128:}
本帖最後由 ghhf 於 2015-5-12 22:11 編輯
膽王WE 274, 號令天下; GZ34不出, 誰與爭鋒?
初試GZ34
話說小弟驚喜得到2粒金屬座版Mullard GZ34, 造形結構與小弟現有274及5U4G直熱式(Directly Heated)藏膽完全唔同, GZ34應該係非直熱式(Indirectly Heated)整流膽既經典佼佼者. 小弟用tube tester測試過之後, 非常猴急咁插上WA6 SE, 聞名不如見面, 唔係浪得虛名, 不過小弟唔想咁快比詳評, 聽多一個星期再分享聽感. 第一節聽完4個鐘, 小弟只可以咁講, 如果錯過咗GZ34, 將會係小弟玩整流膽歷程既一個必然遺憾 ….. {:6_146:}
倚天出鞘
三個星期後, 小弟既評語就係標題所寫, 小弟唔敢講閱膽無數, 但亦聽過不下百粒多個靚聲系列名膽管. 對於GZ34係有相逢恨晚感覺, 到目前為止, 小弟個人認為GZ34性能表現可以真正與WE 274匹敵, 有如"倚天出鞘"震撼, 絕對值得小弟另開專頁, 詳寫品評 {:6_122:}
事實上小弟巳經用實際行動肯定自己既聽感, 加馬收集多2粒, 共4粒GZ34作為長線收藏及品聽. 至於其中技術性能及表現, 小弟會係跟住呢幾個星期, 逐步同各位C兄分享 {:6_128:}
本帖最後由 ghhf 於 2015-5-27 23:22 編輯
魔鬼天使
呢兩個星期小弟比較靜, 因為"電池補完系統"其中一隻Smart Charger死咗, 本來可以用返原廠火牛改行街電, 不過巳經無法接受行番街電效果, 咁就不如不聽, 所以無開Head-Fi成個星期, 裝返新Charger之後, 系統就要行返幾曰重新Warm Up"去濕"先可以返去之前狀態 {:6_146:}
入番正題, 或者有C兄可能會話, WE 274同GZ34根本唔可以直接比較, 佢地設計結構完全唔同. 小弟同意, 一把係藏有號令天下兵法寳刀, 另一把係藏有絕世武學秘笈神劍. 不過佢地同時都係兵器, 同樣係可以係小弟WA6 SE上有不同演繹效果既整流膽, 小弟合埋眼, 純粹係一個音樂聆聽者既層面, 對最終耳感輸出效果作出個人品評, 其實亦係理所當然 {:6_122:}
小弟嘗試去欣賞佢地各自既獨特性, 其實"屠龍倚天"只可以表象化咁比喻設計結構異同, 更出神既比喻應該係"野索女"與"賢內座", 前者艷麗性感, 一聽難忘誘惑上癮; 後者面面皆圓, 感性溫柔繫心難捨. 左擁索女魔鬼; 右抱賢座天使, 人生若此, 夫復何求? (小弟唔係鼓勵C兄出軌, 只係以一個男人天性角度去作傳神比喻). 至於實際技術效果, 小弟就留番係"經典試聽大計"用比較系統化方式再同各位C兄分享 {:6_165:}
小弟集到4粒GZ34, 全部都試咗有NOS水平, 其中一粒有少少鬆底, 小弟用混合膠係唔顯眼底部加固. 膽不可以貌相, GZ34無WE 274咁高大有型, 而且質感有d"膠膠地", 不過出聲就令小弟從未如此感動過 {:6_143:}
一體臨場 令人動容
GZ34(加上Raytheon功率膽)配上T1, 就係足以令人動容既"一體臨場"組合, 唔係起雞皮打冷震咁簡單, 係足以讓人感動落淚既程度, 如果有C兄行緊類似小弟系統, 錯過GZ34, 正如小弟之前所講, 就係玩整流膽歷程必然遺憾 {:6_128:}
師兄呢個帖詳盡紀錄大量遊玩心得，精彩的開箱分享，改造細節等，整個歷程詳細記載，實在嘆為觀止
看完一次，定必獲益良多
本帖最後由 ghhf 於 2015-5-26 22:40 編輯
hiyori 發表於 2015-5-26 13:36 static/image/common/back.gif
師兄呢個帖詳盡紀錄大量遊玩心得，精彩的開箱分享，改造細節等，整個歷程詳細記載，實在嘆為觀止
看完一次 ...
小弟只係將係自己小天地內發生既事情, 同心路歷程記錄下來, 日後自己睇返可以會心微笑自愉, 希望同時亦可以愉人 ..... {:6_122:}
多謝版主, 小弟一次過收到咁多分, 真係好驚喜 {:6_165:}
本帖最後由 ghhf 於 2015-6-20 21:06 編輯
EML 274B - 現代新貴
幾經轉接終於可以會一會EML既整流膽, 小弟選咗274型號, 目的係想親耳品聽幾個現代274版(跟機Shuguang 274, 官方升級Sophia 274B, Psvane 1:1 WE274B)同經典WE 274異同. 開咗二節大約8個鐘, 效果比期待中好 …. 遲些少再分享初試聽感 {:6_122:}
豪貴氣派 睇得又打得
雖然小弟近排有d煩雜嘢要處理, 未能正式開始重啟"經典試聽大計", 不過小弟對個別膽管亦有作初步品聽. 話說小弟曾經嘗試入過幾次EML 274B, 一次無貨, 一次無反應, 唔通真係咁掂, 唔想做小弟散客生意?! 今次都係三吹四請, 前後大半年先入到一粒{:6_124:}
EML 274B係高頭大馬形, 金屏網, 水銀頭, 頂底各有一個圓環集, 睇落的確係有幾分豪貴氣派. 上個月到手初聽幾節(每節大約4個鐘), 效果係比期待中好, 係相對於現代新膽表現而言. 首先, 雖然話係274B型號, 不過同西電274系列風格完全係兩馬子事, 唔係走 Psvane 1:1 WE274B既A版策略, 與官方Sophia 274B升級膽品性亦明顯不同. EML 274B係暫時小弟唯一想配搵出"一體臨場"組合既現代膽, 小弟咁樣講, 各位聰明既C兄自然聽得出小弟既弦外之音 {:6_146:}
果然, EML 274B係個幾月, 聽咗十節八節之後, 有明顯進步, 同樣配上T1及Raytheon功率膽, 就得到小弟期待既"一體臨場"效果, 咁EML 274B既個性(小弟竟然覺得有GZ34影子)同其他現代膽甚至古董膽有咩異同,下星期再分享 {:6_128:}
本帖最後由 ghhf 於 2015-7-12 15:58 編輯
經典試聽, 俄膽作先鋒
無敵性價比
小弟之前都提過自己係非常雜聽既, WA6 SE只係一個簡約高效平台比小弟去品聽各膽管個性, 小弟的確聽咗唔少古董名膽, 亦聽過官方及幾粒有代表性現代膽. 小弟唔會只係聽名膽, 只要有共鳴感動就係值得欣賞收藏. 講到無敵性價比, 小弟特別要點名提既係呢隻幾特別結構俄膽, 大約只係官方升級膽十分一售價, 效果卻係出奇咁好 {:6_136:}
就小弟所知呢隻俄膽係大約60-70年代產品, 依小弟個人品評, 佢拍得住一d有名歐美膽效果, 小弟唔會話呢隻俄膽係勝過其他膽管, 不過佢各方面既表現都非常均稱,係屬於清甜品味. 最重要既一點係, 雖然未及一d古董膽純淨柔潤, 但呢隻俄膽小弟似乎搵唔到類似係現代膽身上明顯既"不協調煩雜"背景. 以咁既價格, 絕對係入門升級及後備首選 {:6_146:}
清新明麗 自成一格
唔好以為只有名膽先會有"一體臨場"效果,事實上小弟初試一聽就巳經知道呢隻俄膽係唔難搵到一個"最優"組合. 小弟襯假期一連聽多幾節, 果然不出所料, 配上Raytheon功率膽及T1, 就係小弟一直追求既"一體臨場"組合 {:6_128:}
呢個組合與小弟之前發現既其他"一體臨場"組合一樣, 係小弟既時空尺度中都係"等價"的, 除咗有極高分晰力, 佢既中高頻延伸性非常突出, 係屬於高水平級別既演釋效果, 清新明麗, 足以讓人毛管感動. 雖然小弟話呢隻膽係入門升級及後備首選, 只係因為佢既無敵性價比, 絕對唔係有貶意, 佢根本就有自成一格既實力, 完全打破"平嘢無好嘢"既既定觀念 {:6_146:}
結構異同 造就個性
小弟係介紹呢隻高性價比俄膽時, 出咗兩張相, 眼利心水清C兄一定知佢地係兩隻唔同既膽, 雖然外貌好似, 亦有類似獨特結構, 不過細心睇過內部, 一隻有2個圓碟型集(getter), 另一隻就只有一個相似既圓碟型集. 呢個集結構上分別, 對膽管表現有咩影響? 肯定係有影響, 如果唔係, 所有膽管集結構根本可以一模一樣, 事實上, 同一型號系列膽管, 可以有不同集形, 係膽管內亦可以有唔同位置.
曾經有人問小弟, 話膽管集作用只係通過化學反應及吸附方法除去膽管內氣體, 點解有d人特別要收集某一類集結構膽管? 集結構及係膽管內位置對輸出音質效果有咩關係? 小弟無答呢個問題, 其實係唔敢答, 因為小弟無足夠技術知識去分析解答. 可以肯定結構上(及質料上)既不同, 對膽管物理電氣特性有影響, 不過點樣再反映係音質效果上, 對小弟來講, 完全係摸不着頭腦, 或者再過一段曰子, 小弟慮積多d知識及經驗, 可以扮下嘢噴多些少口水 {:6_122:}
耳聽為實 一體臨場
雖然小弟未夠料去解說呢個問題, 但小弟有最強既信念, 就係"耳聽為實", 追求"一體臨場"以聆聽者(係配合人左右耳聽感, 以致腦內建構成象感差異)為本既"超系統"相對均衡(相對於純粹絕對技術性系統均衡 - 膽管內極平衡, 膽管配對, 平衡線材以致平衡放大等). 有咗呢個大前題層面上觀念, 一個圓碟集, 或二個圓碟集既俄膽, 係小弟作為聆聽者耳聽為實下, 就係不同兩個獨特個性膽管, 一切既特性差異就不再係目標或問題, 而係為咗達到"一體臨場"效果既可能性手段. 小弟遲些少會再分享兩粒俄膽效果異同 {:6_128:}
挑戰極限 其樂無窮
膽管結構及質料差異對音質輸出影响，有試過tube rolling既玩家其實都知唔係咩新奇事物。以新進玩膽小弟為例，首先玩既係GEC/ Marconi/ Osram，巳經注意到不同集形(D，日，杯，碟)及膽屏質料(黑，銀灰)，甚至集係膽管內相對位置(底，兩側，頂)會有不同音質輸出效果，係Tung Sol及WE 274系列中亦有類似效果差異，同一型號不同品牌差異就更明顯 {:6_146:}
事實上，小弟亦因為自從知道膽管多樣變化呢個特性，先激發出小弟既志願，收集膽管，欣賞佢地個别既獨特個性，並籌備"經典試聽大計"進行有系統化既欣賞與品評，其間係充滿變化發掘與重组，更可以挑戰自己既耳感極限，其樂無窮，人生美善 {:6_143:}
經典試聽, 俄膽作先鋒
話說小弟最近覺得現代新貴EML 274B聽感好有驚喜, 其實同時亦繼續留意住隻無敵性價比俄膽, 小弟發現俄膽有另一版本, 係黑屏方碟集, 品相完整不過比較多塵漬, 似乎係久經收藏比較早期產品.
有新發現小弟緊係暫時放低粒新貴, 第一時間聽下黑屏碟集俄膽係咩料, 有咩特別之處. 果然同小弟既預期差唔多, 類似質料結構差異既效果, 係小弟其他藏贍系列GEC/ Osram/ Marconi及Tung Sol亦體驗過. 比較資深有玩Tube Rolling師兄可能大概都估到小弟既意思 {:6_136:}
好啦而家小弟手上既俄膽可以話巳經自成一個系列 - 灰屏圓碟(左), 灰屏雙圓碟(中)及黑屏方碟(右), 雖然佢地全部都話技術性能係兼容, 係小弟部WA6 SE上行完全無問題, 不過耳聽為實下最終輸出差異係走唔出小弟聽感 {:6_146:}
小弟亦決定有系統咁品評呢三粒俄膽聽感效果差異, 試行一次經典試聽流程, 過程亦會設計及優化品聽及記錄, 為真正"經典試聽大計"熱身籌備. 小弟會將整個俄膽系列既品聽過程及結果, 繼續係呢個專帖上發報同各位C兄分享 {:6_136:}
而家要做既係煲新俄膽, 搵一個組合做參考基準 …... 大把好戲在後頭 {:6_128:}
經典試聽, 第一階段: 煲膽
小弟呢2個星期又係比較靜, 一來繼續不停交叉轉換3粒俄膽試聽變化, 每粒要行番50個鐘以上先再詳評. 另外後級供電系統唔穩定, 供電比WA6 SE既逆流器行3個鐘就話電池電量不足, 本應充滿電(過夜大約充4個鐘)可以用到8個鐘以上, 足夠比小弟品聽2節. 經過驗查, 原來係12V x 4串連鉛酸電池組中有一粒好快放完電到10V, 其他3粒都仲係12V以上. 小弟搵番一粒新電頂上, 由於係串連作48V = 12V x 4輸出, 所以唔會有電池之間放電充電不均問題, 呢set鉛酸電池組用咗2年, 雖然係平嘢不過算幾穩定, 小弟幾滿意. 其實小弟當年入逆流器時就特別選咗比較高壓48V輸入型號提高轉換效率, 電池串連作輸入仲比較容易管理同安全, 小弟果然係有先見之明 {:6_146:}
C兄可能會問小弟寫咗成大段嘢講電池, 又自己讚自己, 同煲膽品聽有咩闗係?! 小弟就係有d有趣發現.同樣既電源接線及連接線路, 只係換咗其中一粒電池, 充滿電之後小弟再聽, 就發覺效果有明顯唔同, 係差咗一截, 各方面都有影響, 小弟肯定唔係自己心理作用, 不停番聽放幾百次既飲歌,好似窄緊薄咗, 無咁流暢同奔放, 飽滿度, 純凈度亦好明顯不及改動之前效果, 感覺系統好似有一件重要元件被攞走降咗級 {:6_136:}
只係換咗其中一粒電池就有咁既分別的確令小弟好驚奇, 而且打亂咗小試聽俄膽進程, 因為平衡已被打破, 一路轉換3粒俄膽試聽咗十節儲下來既印象巳經改變咗, 唔通新電池都要煲? 呢個似乎係唯一合理推論 {:6_146:}
本帖最後由 ghhf 於 2015-6-27 13:08 編輯
黑馬俄膽 - 性價比CP無容置疑 全文:
http://post76.hk/forum.php?mod=redirect&goto=findpost&ptid=189701&pid=3517097&fromuid=87952
本帖最後由 ghhf 於 2015-6-7 21:29 編輯
踏入夏季, 天氣非常悶熱, 對小弟既WA6 SE真係一個威脅, 膽管同機體增加既熱力引起小弟注意, 夏天開Head-Fi散熱變成係一個必要考量地方, 不過小弟唔鐘意涼冷氣, 又唔想用大風扇直吹, 最終睇到呢隻平靚正USB風扇仔, 放係sofa邊, 加強WA6 SE附近既空氣對流, 效果的確係唔錯, 而且黑色外型配充滿質感金屬扇葉及枝架, 同小弟部爆cool黑色WA6 SE都好襯下 {:6_138:}
本帖最後由 ghhf 於 2015-6-27 13:08 編輯
黑馬俄膽 - 性價比CP無容置疑 全文:
http://post76.hk/forum.php?mod=redirect&goto=findpost&ptid=189701&pid=3517097&fromuid=87952
