[加分帖] 有無BEYOND FANS？ 一齊嚟分享吓~

245141525

一齊嚟分享吓大家對BEYOND嘅感覺好嗎？
當然由我講先啦~



我同好多人一樣，第一首接觸BEYOND嘅歌，就係"真的愛妳"
當時，根本未知咩叫音樂，咩叫好歌......
淨係知道，突然間有一把好特別嘅聲音，都唔記得係從電視機定收音機響起。
當聲音從我耳朵進入之後，我就知道，神......叫緊我......
自此之後，我就開始迷上BEYOND；當時仲細，好難得先可以買到一餅帶，第一餅當然就係"BEYOND IV"，之後就出一隻，買一隻；除咗買帶，根本就無經濟能力去做其他嘢，例如聽音樂會...等等，屋企亦唔會畀；每日放學，就係聽歌，仲要有咁大聲開咁大聲果隻，拆晒聲先為之勁！
直到讀完中學，讀書唔成，
出嚟做嘢，終於叫做有啲錢可以買佢地第一隻屬於我自己嘅CD"樂與怒"，係啊~我買佢地第一隻碟，係"樂與怒"咋，當時好興奮，梗係啦，我買佢地嘅第一隻碟喎！
不過......興奮唔得幾耐......，新聞報導中，傳嚟嘅......竟然係一個惡耗，而往後嘅消息，更一個比一個壞，直至果日下晝......佢忽然間...就走咗了......
呢次意外，對我嘅打擊當然好大，忽然間好似乜都無晒，本來無目標嘅我更加無目標，成日會問：點解......點解會係佢？一個咁有天份、咁有才華嘅人，點解會咁？我唯一可以做嘅，就係聽更多佢嘅歌去宣泄情緒，不斷重複又重複......
聽吓又聽吓、一日又一日......，漸漸先發覺，佢雖然係走咗，但係，原來佢留低咗好多說話喎；以前細，咩都唔識，人越嚟越大，越感受得到佢想講嘅嘢，更加覺得尊重佢，更加更加嘅係，要珍惜身邊嘅嘢。
擁有一樣嘢，唔係必然嘅，好多因素、好多機緣巧合，先會令每一件事發生，亦都由好多因素，去決定每件事發生嘅長短。
好慶幸我成長於BEYOND嘅年代、黃家駒嘅年代，無BEYOND，根本唔會有今日嘅我。

spadeace

無特別去買beyond D 碟聽
不過中學歌唱比賽, 班歌通常都唱beyond
初頭都唔知點解咁多人聽beyond, 不過聽落佢D歌都夾得幾好, 歌詞都唔錯
最深刻係"海闊天空", 因為我地連幾器都出埋, 成班玩得好開心
自從嗰次之後就對beyond 多左好感


不過最估唔到...有次公司dinner, 成班management 一齊唱"阿拉伯跳舞女郎", 仲要換晒衫跳埋舞嗰隻

rinko

BEYOND樂隊又地下音樂走到地面係一件好難的事.如果BEYOND冇佢自己嘅實力跟本唔會比人睇中走到地面.BEYOND樂隊出第一隻黑膠已經有好多粉絲.直到一套電影天若有情.BEYOND樂隊不單只唱主題歌曲還唱插曲.就係喺呢個時候BEYOND樂隊就開始比已往更加走紅了.有一天睇電視新聞看到家駒係日本出事入院.又家駒入院到家駒離開我地我都覺得很難過.點解一個咁有才華咁有音樂細胞的人會咁快就離開我地?如果家駒唔係離開了我地.我心想全球每一個喜歡BEYOND樂隊的人都可以開開心心聽家駒的音樂作品.

yoes

Beyond fans 報到!!
以前讀書返studio, 要通頂都是聽住Beyond, 聽得最多是"樂與怒", 所以最近出AMCD第一時間買番隻
還記得家駒出事時係大陸孭住背囊週圍去, 打電話返屋企時家人告訴我的, 感覺好不真實, 花了好一段時間才能接受, 之後的二樓後座雖然已經與以前的Beyond不一樣, 但仍是繼續支持,現在的ipod中, 仍是聽beyond的歌, 遺憾的是未曾親身睇過家駒時代beyond的live

dragonyam

係我地嘅朋友族群度,大概有八九人特別喜歡Beyond嘅歌,包括我自己,
成員有朋友,同學,同事,朋友嘅朋友,大概＋年前開始瘋狂迷戀佢地,
定時定侯相約見面,曾經有段時間,每星期最小兩至三晚必定落K,
整晚只會點Beyond嘅歌,到現在各自擁有家室,見面次數時間己有限,
只作電話分享交談,但係各自心目中,都留下咗對Beyond對自己嘅美好回憶,
己覺今生無悔可以認識到呢班至同道合嘅好友,而家諗返仍然覺得開心

kalok6

認識呢隊樂隊果陣我好細個......都唔知佢既音樂原來係想講好多佢地自己既想法.....
好多好多既歌詞背後原來咁有意思......
家駒走左果日我好記得....我身邊好多女同學都喊...我屋企人都有喊.......
我印象最深就係有個節目劉德華講過話家駒仲欠佢好多歌債定係其他野.....
成班歌手都係想佢聽到之後快d起身..........
果陣話醫成龍果個醫生會飛過去醫家駒.....
我以為會好易醫得返......點知都係唔得.......
果刻成日諗....除左世榮同家駒......
果兩個是但走咁個都無咩所謂(因為世榮打鼓....果兩個都係彈結他...2打6.........細個唔識諗).....點解會係佢
不過都係整定......叻人多數都.............

245141525

無特別去買beyond D 碟聽
不過中學歌唱比賽, 班歌通常都唱beyond
初頭都唔知點解咁多人聽beyond, 不過聽落 ...
spadeace 發表於 28-3-2011 16:06

如果宜家要買返BEYOND嘅碟，我諗都好難了......
要買嘅唯有買精選碟，不過可惜好多滄海遺珠就無乜人識了......

245141525

BEYOND樂隊又地下音樂走到地面係一件好難的事.如果BEYOND冇佢自己嘅實力跟本唔會比人睇中走到地面.BEYOND樂 ...
rinko 發表於 28-3-2011 16:13

"灰色軌跡"真係經典中嘅經典，尾段嘅guitar solo，真係聽到隻碟都就嚟爛了~

245141525

Beyond fans 報到!!
以前讀書返studio, 要通頂都是聽住Beyond, 聽得最多是"樂與怒", 所以最近出AMCD第一時 ...
yoes 發表於 28-3-2011 16:56

我都好遺憾未能見到家駒一面......

245141525

係我地嘅朋友族群度,大概有八九人特別喜歡Beyond嘅歌,包括我自己,
成員有朋友,同學,同事,朋友嘅朋友,大概＋ ...
dragonyam 發表於 28-3-2011 17:35

以前去唱K，真係會淨係唱BEYOND嘅歌，但係BEYOND嘅歌真係好難唱嫁......