AV 潮文一則

Oushinc

近期有朋友”降級”器材，小弟有感而發，9up 下對 AV 嘅愚見。長文慎入。

大家玩 AV 其實想要咩？對於小弟黎講非常簡單，就係追求戲院感。有人可能會問，戲院感有咩好？冇錯，戲院對比之下，聲畫都做唔出家用高水平的效果。但係，我同某啲師兄都一樣，就係想追求依一種唔完美嘅戲院感覺。擁有自己的私人影院，不受時間地點限制，沉浸式享受，猶如置身於真正嘅商用戲院。呢啲唔係就係各大廠商宣傳口號咩？

好唔好聲，我諗大家好難取得共識。戲院感重唔重，我諗大家應該會容易啲取得共識。當大家都有去過戲院嘅時候，大家都會有共同嘅認知。憑着依啲認知，我諗大家絕對有能力判斷一套系統喺陰場，聲底等各方面，同大家戲院嘅認知有幾相似。

講返我依位”降級”嘅好朋友，Mark 老闆同我都一樣，就係追求戲院感。點樣最簡單直接提升戲院感？換戲院嘢囉。由成套家用 JBL ARRAY 1400 + 880 + ATI 後級，到 3732 + DSI 2000 。可能好多朋友心諗，JM9？都已經玩到走火入魔，點解會玩返轉頭？冇計，就係想提升戲院感。我哋呢啲牛屎佬，地方最多。既然放得落，”降級”仲有錢執，何樂而不為？

少少題外話，同 Mark 老闆 2018 年頭認識，當初 HTPC 認識。多得依個PK , 我 20 出頭已經走火入魔。讀緊大學時已經攞獎學金去買器材，走堂去家訪。當年為左換 AV AMP，走訪全香港家訪。由各日系品牌合併機及前級，到鬼佬怪獸級別前級 (Datasat)，甚至乎 Dolby CP750 ，都聽過唔少系統。經過一年時間嘅深思熟慮，最終入手水尾 Pionner Lx901。當年嘅我同一眾大學同學真係格格不入。

翻正題，擇個吉日，三條麻甩佬就尸吊左三個箱上三樓。尸吊三個箱上樓，真係慘過出嘢。個感覺就好似強迫你打十架飛機咁辛苦，攰到謝哂皮。Mark 老闆同朋友就拉，我就喺後面做老漢。正所謂能成為密友，總帶着愛。如果冇咁深交情，真係好難幫手。









幾日後，終於開聲。中置個種從容不迫，係一般中置做唔到。同 Array + ATI相比，的確少左一浸貴氣，聲的確冇咁幼細，但係戲院感提升到另一個檔次。都係嗰句，Array 好聲啲，Pro 嘢件頭大啲。依種聲可能聽開家用嘢嘅師兄會覺得粗，但係 Mark 老闆就係咁屎忽鬼。個種直接，毫無保留咁尸吊埋黎嘅聲，就係我地依啲屎忽鬼想要嘅嘢。




小弟喺AV 路上，多得唔少前輩嘅分享，先冇乜走冤枉路。喺20 頭，已經有一套自己滿意嘅系統。我想特別點名兩位前輩， Matt 同 Mark。依兩位前輩就係令小弟走火入魔同聽力受損嘅主因。可能有人會問，一個冇乜經濟能力嘅學生到底點玩 AV ? 我嘅答案係家訪，執二手同 DIY 。家訪真係擴闊視野嘅好選擇，令自己認清楚自己到底想要啲咩，行少啲無謂嘅冤枉路。以下附上小弟嘅器材

590 $9XXX
520 $1600
530 $友情價
29AV-1 $1600
十仔 $3000-4000
901 $103XX
CDI 1000 $2700
CT8150 $4000
Canare GS-6 1.5 米連頭 $100  X 7 = $700
4S12F+ 4S6 = 大約 $1000
W2000=$3980
幕 = $2700
CDI 1000 $2000

雖然全部都係 cheap 嘢，但係滿足到小弟。最重要係，能夠令屋企聚埋一齊享受家庭樂，依啲係金錢買唔到嘅歡樂。家用嘢加 Pro 後級，都係一次家訪靈機一觸之後嘅啟發。





以下內容可能會某部份用家反感，慎入

其實香港寸金尺土，正所謂連扑嘢都冇位。喺有限嘅空間之下，大家都係環境鬥士。大家都會發揮無限嘅創意，創造自己理想嘅家庭影院。但係唔係多喇叭就好聲。一部合併機有 13 聲道，用唔哂唔代表你蝕咗。你俾得依個價錢，除咗買佢嗰 13 聲道嘅後級，仲有買佢嘅解碼嘅質素，MIJ ，機嘅穩定性。梳化貼牆，係先天殘障，真係唔好強求玩 7.1 ，乖乖地玩返五隻啦。另外，客觀嘅事實係 10 套有 9 套戲都係 Atmos，其實真係冇乜需要顧及其他格式嘅擺位。所謂四大格式，現階段真係只有一大。


總結，其實點玩，真係人有各自。最緊要認清楚到底自己想要咩。跟唔跟標準，大家悉隨尊便。不過我諗，跟標準起咗個頭，俾 AV AMP 9 cal 衰極都有個譜。

P.S. 大家有需要，請自行聯絡 Mark 老闆安排家訪



完！

mark1

點解睇到我眼濕濕

AskaLung@FB

(客觀嘅事實係 10 套有 9 套戲都係 Atmos，其實真係冇乜需要顧及其他格式嘅擺位。所謂四大格式，現階段真係只有一大。)

所以依家AURO 3D都要屈服,ATMOS天花格式擺位，denon 都已經兼容埋，已經冇再藉口裝FH同RH😏

matt88p

Waaaaa, 呢單嘢真係唔加分唔得!!
好耐冇啲咁詳細嘅Post, 非常認同師兄所講內容

咁我都抽下水先, 雖然我啲仲cheap,  😂😂😂
不過真心, 先唔好講喇叭級數, 淨係講電影靈魂喇叭, 亦即中置喇叭講對白個人聲音出嚟嗰個厚度同埋件頭, 大音壓嘅時候嘅從容不迫, 已經值回票價..... 小弟用咗880 +1400 六年, 真心880真係非常好 聲, 但往往去到大音壓嘅時候, 就算我將880低音用eq修正咗 + 500w 後級bi-wire去推, 盡量令到佢唔會過肥, 但係始終都有兩個問題,尤其好大音壓嘅時候, 戲院中置喇叭從來唔會聽到箱聲, 所有聲效非常從容 , 其二就係, 當前三一齊發聲, 1400就擔當咗主角位置, 880 變咗配角, 因為體積實在相差太遠, 但係往往去戲院睇戲嗰陣, 中置喇叭永遠仍然擔當主角位置, 投影幕中間嘅音場仍然最大, 呢樣嘢亦都係小弟覺家庭 影院同戲院最大分別嘅地方!!
小弟過來人用家心得覺得, Pro 非常容易填滿音場, 非常容易得到戲院包圍感,  睇戲嘅氣氛高手!! 🎬🎥📽️🎞️

AskaLung@FB

matt88p 發表於 2023-4-11 13:25
Waaaaa, 呢單嘢真係唔加分唔得!!
好耐冇啲咁詳細嘅Post, 非常認同師兄所講內容

你嗰度都叫cheap嘢？
最緊要有料到
上次去你度家訪,睇強戰世界,嗰隻外星機械人開雷射光嗰陣, feel到頭髮好似有靜電咁樣震，我自己屋企就做極都做唔到😤

intruder

有幸見識到呢套影院系統，真系堅，無論聲畫，尤其D聲可以講系比普通戯院更刺激埋身，難得係在咁勁嘅音壓之下，線條同層次亦都交代得清清楚楚。

mark1

AskaLung@FB 發表於 2023-4-11 13:24
(客觀嘅事實係 10 套有 9 套戲都係 Atmos，其實真係冇乜需要顧及其他格式嘅擺位。所謂四大格式，現階段真係 ...

其實ORAL 3D 制式係符合人體工學多D 既， 人耳對兩層聲音會敏感D, 可惜ATMOS 已當道，乖乖就範。

mark1

好多D 野都未執好， 早兩日痴左幕殼， 好feel 好多！
窗簾圍哂四邊，靜左。

高秋

我都真係多得matt 同 mark 哥唔小 我先有今日

intruder

matt88p 發表於 2023-4-11 13:25
Waaaaa, 呢單嘢真係唔加分唔得!!
好耐冇啲咁詳細嘅Post, 非常認同師兄所講內容

matt哥太謙虛了，matt哥同阿mark屋企我都有去過，無可否認兩個地方都各有水凖。
mark套嘢能量勁，夠凶狠，好難想像只用一隻超低，果D低頻排山倒海殺到過來，(果三隻巨大前中置都居功奇偉)呢種埋身感覺，普通戲院係畀唔到咁刺激感覺！
matt哥屋企套嘢就相對較溫和(其實都唔算溫和，只是相比mark果套變型金鋼而言:-)相對來講件頭細返D，但係線條更靚，分隔度包圍感更加明顯。連續睇兩三套應該都唔會覺得好攰。
其實兩個地方都值得去見識下嘅。加之兩個大哥又好客，玩完直落宵夜對啤一樂也。