AVLife買機日誌[未完]

ykluk

今次小弟想講既, 唔係買咩機有咩用後報告之類, 只係想講吓買機收機過程既點點滴滴, 等大家可以買機前參考吓, 順便比小弟發洩吓...

話說小弟既plasma已經沿用多年, 好彩佢無穿無爛(其中只係搵過代理換過一次panel), 又搵唔到可以替代到plasma既電視. 直至小瑟大王搞咗次Sony活動, 小弟對A9F既表現簡直係拍晒手~ 而小弟都知道只有OLED先可以令小弟放棄plasma(當然plasma已經唔再生產, 無4K機出啦), 非常心郁郁....

喺上年年尾, 小弟得知如喺2018年內買Sony A9F既話, 係會有HK$3,000 + HK$2,000既超市禮券送, 呢啲咁既機會更加令小弟覺得唔可以錯過. 但作為post76第一窮L, 小弟一定要搵間又平又做到信用卡分期既先有得入手, 咁當然其實要做到呢啲要求只有嗰幾間大型連鎖電器鋪. 周圍走問晒價, 最後就為咗"平幾舊"咁向AVLife落單, 但要完成"平幾舊"+信用卡分期, 除咗Sony A9F, 小弟都要加多2件貨先有得搞~

(唔好問小弟咩價入手, 一來其實各位是旦行入幾間大型連鎖電器鋪都問到; 二來小弟呢個post並唔係分享買機)

29/12/2018
小弟決定咗喺荃灣AVLife入手, 同shop manager傾好晒total 3部機咩價錢做好晒分期之後, 就傾吓幾時送貨. 當時講, 有一部機未有實際收貨期, 可能要2-3月先知, 而另一部amp就要起碼1月3號後先知幾時入到佢個倉, 咁就大家同意咗, 等知道部amp幾時送得既時候, 就連埋Sony A9F一齊送去小弟元朗屋企. 而小弟都講咗因為返工關係, 要星期六先可以收貨(佢星期日係唔送貨既).

3/1/2019
Shop manager聯絡小弟, 話部amp未到倉, 所以1月5號星期六送唔到, 問我1月12號收有無問題, 雖然小弟要返半日工, 但都可以請假喺屋企等機既, 所以就決定咗12號送機.

8/1/2019
Shop manager聯絡小弟, 話部amp仲未到倉, 不如12號淨係送Sony A9F, 小弟話無問題, 但因為Sony會有人安排上門裝機, 同時小弟要將舊plasma同器材搬走方便裝機, 所以問定送貨時間係12號星期六下午前. (因為Sony裝機最後時間係4-6點)

12/1/2019
小弟早一晚已經拆咗舊plasma, 將小弟啲器材搬開, 請假喺屋企等. 下午1點未有任何聲氣, 小弟老婆叫我去追, 打比Shop manager, 佢回覆話好多單送緊, 要下午7點後先送到~!!!! 我真係當堂嚇咗一跳, 問佢7點先送, 咁Sony仲會唔會裝機? Shop manager話Sony去到6點, 叫我自己問Sony肯唔肯等, 當然我叫Shop manager去問運輸有無得早啲啦... 隔咗陣Sony打比小弟, 小弟問佢可唔可以等, Sony師傅話佢哋最後order係4-6點, 而AVLife出fax order比Sony都係講4-6點, 過咗無得做. 然後Sony師傅話小弟係AVLife買, 都預咗無可能係同日裝到~!!! 全行都知~!!!

之後當然小弟有向Shop manager有西有七啦, 但最後既回覆都係"無辦法喎"... 嘩大佬, 我專登請假陪坐呀? 你AVLife唔可以同日送機+安裝既話, 你早講嘛, 我使乜請假呀又? AVLife全港得一架車送貨, 司機住元朗所以一定係最後送, 呢啲嘢你唔講我又點知(當然呢啲唔係AVLife講, 而係行內人士講比小弟知)?? 之前幾日傾咗咁多次confirm又唔講, 星期五晚送貨星期六約Sony裝機都得啦!!

BTW, 幾嬲都係無X用, 最後既回覆都係"無辦法喎", 最後小弟都係下午6點收到部Sony A9F, 同埋運輸大佬同小弟講:"sales有咩可能同你安排同日裝機呀!!"

14/1/2019
因為小弟已經拆晒啲嘢落嚟, 屋企立立亂, 老婆已經想踢我出門口, 所以小弟唯有再請假(年頭2星期已經用咗我2日大假!!)去等Sony師傅裝機. 而Sony師傅確係非常專業非常好人咁就搞掂牆架同上機, 仲可以吹陣水添...

15/1/2019
AVLife Shop manager聯絡小弟, 話部amp已經入咗倉, 問小弟係咪1月19號星期六送貨. 小弟心諗, 上次送貨司機已經話, 呢幾個星期六送貨都去到夜晚9點, 如果又星期六咪等到嘔? 不如睇吓老婆邊日可以早少少返屋企, weekday送啦.

17/1/2019
小弟聯絡AVLife Shop manager, 決定21/1/2019星期一下午7點後最後既order收貨, 心諗就算9點送都已經喺屋企啦. 佢話無問題幫我安排再覆實我, 但全日都再收到佢覆實...之後2日都無再收佢任何電話...

19/1/2019
朝早11點收到AVLife運輸嗰邊電話, 話安排咗21/1/2019星期一中午12點至下午4點送amp. 嘩! 又咩料呀? 我話係約咗下午7點後最後既order收貨喎, 佢話唔得喎, 要晏啲就睇吓星期二啦! X!! 真係又火起, 又打去搵AVLife Shop manager, 但佢又未返工搵唔到佢...

乜計都無, 唯有向"業內人士"問吓睇吓幫唔幫到手, 搞咗一大輪幾廿個電話又A又B咁, 最後既回覆就係"無辦法喎"!!!!!!! 都係要聽佢話, 等吓星期二下午7點收唔收到貨啦...

22/1/2019
既然都係無say, 佢話星期二6-8送amp(之前已經提過要7點後), 今次真係乜都唔講唔問唔理, 睇吓佢係咪會早會遲...
結果, AVLife話係專登為咗小弟加錢比夜班送貨, 7點15分到屋企, 我patpat痕問司機: "我係咪最後一單?" 司機話: "唔係呀, 仲有幾單元朗, 睇嚟都要送到8-9點呀"

咁....點解話係"專登為咗小弟加錢比夜班送貨"呢又....???

Anyway, amp已送到, 家下仲有最後一送, 睇吓2-3月小弟另一order係咪會到先...

[待續]

P.S. 其實"業內人士"都有同小弟講, 一部amp點解唔自己拎, 或者送去公司, 再自己拎返屋企, 咪唔使忍受AVLife門市既亂咁嚟同運輸囉. 當然咁做係可以, 但一來小弟並唔心急收機; 二來小弟作為消費者, AVLife既送貨服務包咗, 又點解要自己拎? 三來小弟好想知, 佢既送貨安排服務可以去得幾盡, 咁出post都有啲意義嘛~!!

又P.S. 真心講, AVLife門市買嘢既服務, 同可講價既水位的確係OK既. 但當客人買咗機後, 佢既安排又真係激死人, 又唔會選擇同客戶老實並溝通, 一咪話"得既得既", 之後送唔到又只係話"無辦法喎"... 大佬呀, 你喺門市寫明"買機送機只可以接受貴公司既運輸安排, 客戶你喺屋企等啦, 等到收貨既時候就知係幾時收貨喇!"咁嘛, 明買明賣唔得既, 係鍾意炒蝦拆蟹先開心既...

marco

最緊要而家可以開心用機

mwleung1

我買三星電視，我算好好彩。我約星期六送貨，星期五運輸打電話嚟話星期六（2-7）送貨，結果5點半到，送貨同安裝

ykluk

mwleung1 發表於 2019-1-21 19:51
我買三星電視，我算好好彩。我約星期六送貨，星期五運輸打電話嚟話星期六（2-7）送貨，結果5點半到，送貨同 ...

送貨同安裝都係AVLife自己做?

gamma

e, 我sony tv 也是av life 買，同日送和裝，不過我在市區，可能流程唔同，amp 好鬼重，可送就等佢送la，不過其實都唔使一定要自己係屋企

gamma

講開荃灣嗰間，第一次去店長睇落考實又幾好人，第日特登返去諗住比單生意佢，點知佢乜都企硬，只是送d無名線，最後行開另一間，個sales 後生寸寸貢，點知又有計傾，做成生意，所以真是sales 不能mao 相

關大爺

宜家係送貨大哥話事，寫字樓都未必點得佢地

rictom

My experience is quite good, first time bought at AV life:

I bought  an AV AMP on Friday night and they promised to deliver on next day, ie. Sat. around 2-4 pm, and finally, they arrived at 3pm.

小邪ktm

關大爺 發表於 2019-1-21 20:15
宜家係送貨大哥話事，寫字樓都未必點得佢地

同意,講真又真係唔關舖面員工事!送貨大佬就一定係就自己時間路程!真係要睇運氣!樓主師兄唔好勞氣,開開心心睇靚電視!