本帖最後由 ghhf 於 2015-2-9 09:25 編輯
Audeze LCD-3開箱與試聽品評
唔想講故仔住, 睇圖先 ….. 其實LCD-3一直都係小弟既目標, T1既成功煉成, 小弟對自己套Head Fi就更有信心更心雄, 時機成熟就出手, 完成打造小弟發燒Head Fi系統, 聖誕新春期間又好唔得閒, LCD-3第一感試聽中 ..... 
同樣先用WE 274B既超強動態響應打頭陣招呼咗LCD-3四個鐘, 雖然只係四個鐘, 但變化巳好明顯. 小弟呢隻LCD-3序號係271行頭, 聽說係有Fazor Technology新版, 其實小弟都唔太在意, 一切以最終耳感輸出為依據. 以而家印象, 試聽第一感係LCD-3比T1易推 ..... 
LCD-3跟箱有一條3.5去6.3線, 小弟有d意外, 表明官方係準備LCD-3插上流動系統 ..... 咁小弟就試下AK-100/ AMP-HP推LCD-3, 始終LCD-3新開箱效果未係好好 ..... 反而好奇心試下推煲熟既T1, 雖然AMP-HP電平要調到3/4位置放大輸出, 但效果竟然唔錯, 富音場空間感, 人聲還原非常好 .....
WA6 SE而家會主力推煲LCD-3, 小弟又玩嘢用AK-100/ AMP-HP推T1行街玩一排, 睇下點 ..... 如果有C兄見到有個傻佬戴住T1行街, 就當時運高睇唔到好了 ..... 
LCD-3第一日試聽
開箱之後巳經推煲咗超過10個鐘, LCD-3開始走出最初時低沉悶焗, 漸漸展示動態音場立體感 ..... LCD-3似乎響應非常均衡, 甚至比T1, HD800更好. LCD-3亦無T1, HD800既"數碼金屬"聲底. 目前為止小弟只可以有咁既初步評品, 隨住推煲進行, 小弟會繼續報告最新LCD-3試聽耳感 .....
LCD-3第三日試聽
再交叉膽推煲咗LCD-3兩日，已取得階段性成果，LCD-3鬆開咗聲，小弟體驗到佢既雄厚實力，濃密度及飽和度難怪有網評LCD-3係耳機界中既喇叭，睇來唔似係吹水。兩日後小弟再試用AK-100/AMP-HP推LCD-3，竟然同兩日前開箱時效果有天淵之别，效果可以比美煲咗成個月T1，LCD-3似乎亦可以用小弟套流動系统推行.....
LCD-3開聲咗，可以用"自然悠美"概括性形容LCD-3。雖然LCD-3相對比較重，不過小弟覺得還可以，小弟決定係聖誕新春期間戴LCD-3行街，實行日煲夜煲，各位C兄如果又見到儍佬戴住LCD-3，就隻眼開隻眼閉好了 ..... 
雖然LCD-3推煲咗幾日就有階段性成果, 而且發現LCD-3係小弟既AK-100/ AMP-HP流動系統同樣有出色表現, 不過LCD-3原廠線實在非常唔順眼, 小弟決心打造心水神器升級ALO Reference 16耳機線, 雖然LCD-3仲未煲熟, 升級ALO Reference 16即時效果, 整體清晰明亮度大幅提升, LCD-3可望提早收成正果 ..... 
有C兄問及流動系統推行方面, 小弟將過程列出比C兄參考:
1. 開箱時試用AK-100/AMP-HP推LCD-3, 效果不理想, 完全不能接受.
2. 用Young DSD/ WA6 SE推LCD-3兩日, LCD-3就開始放聲.
3. 再試用AK-100/AMP-HP推LCD-3, 有意外收獲, 效果比美D7100, T1係流動系統效果.
4. 第三日小弟戴住AK-100/AMP-HP/LCD-3踩場, 試聽ALO Reference 16, 一插即愛上, 決定升級LCD-3耳機線.
小弟係用Young DSD/ WA6 SE推開咗T1同LCD-3, 再係流動試行, 一開始純粹用AK-100/AMP-HP推T1, LCD-3相信時間久長, 而且效果未必理想, 細節小弟再續步同各位C兄分享 ..... 
LCD-3第四日試聽
其實小弟覺得隻LCD-3係易推, 但唔易推得好, 果條原廠6.3線以小弟既品味來講睇落係幾樣衰, 而且有一層模啞暗聲味, 小弟換線係遲早既事, 換咗ALO Reference 16再煲咗十零個鐘, LCD-3既特性巳越來越明顯, 音場空間感得到擴張, 有更多細節同層次感, 豐滿和順, 飽和度同密度提升, 最緊要係果種悠悠自然既伸延性, 真係殺死人 …..
LCD-3而家仲未去到自在奔放地步, 相信下星期就可能有好消息再同各位C兄分享 …..
LCD-3第十日試聽
又推煲多咗一個星期, LCD-3似乎進入咗一個穩定期, 未有突破進展, 一如小弟初感覺得LCD-3係易推但唔易推得好同盡, 可以感受到背後好似有一副好龐大既機器運作緊, 要呢副龐大機器行到順的確唔係簡單, 不過咁先好玩有挑戰性, 小弟就更想千方百計要推盡推到LCD-3識飛 ….. 
小弟近期入手Fostex HP-V1升級埋流動系統, LCD-3同HP-V1非常之配合, 經典自然模擬味道, 悠柔暖順. 冬季呢兩個月天氣冷, 可以戴LCD-3行街都唔覺熱焗, 正好比小弟曰煲夜煲LCD-3, 希望早日有成 …..
LCD-3第十七日試聽
係曰煲夜煲多咗一個星期後, LCD-3進入咗一個新階段, 去到小弟既"享受"層次, 展示出悠柔自然節奏感, 唔同HD800及D7100大開大合好易過火位, LCD-3所表現既係一種強勁內功, 局部瞬間動態響應彈性及伸延性係小弟現有其他耳機所不及, 好有speaker果種震撼feel. LCD-3升級ALO Reference 16耳機線, 唔用原廠跟耳機既6.3轉3.5線, 改用6.3轉3.5直插頭, 又唔用Fostex原廠過機線, 換小弟用開銀過機線, 最後一層納悶都消除咗, LCD-3同樣有清甜亮麗, 相對T1既"優化甜"又演繹得比較自然, 而且表現非常均衡一致. LCD-3配HP-V1唔單止係一個"重量級流動組合", 而家既出聲效果真係可以比美其他桌面系統 ….
小弟仍然覺得LCD-3係一副好龐大既機器, 唔係之前開箱時強力磨合感覺, 而係體現係果種特別"內勁". 係咁強大曰煲(HP-V1)夜煲(WA6 SE)推煉下, LCD-3仲係"有負擔"未算得係自如流暢, 的確係易推難煲! 不過來到呢個地步煉成巳經只係時間問題, 以而家既進度小弟估計可能2星期後就有好消息, 又睇下點 ….
LCD-3第二十四日試聽
踏入第三個星期, 推煲後LCD-3巳經有通透及展示大氣場感, 不過仍然停留係小弟既"享受"層次, LCD-3仲未完全放下"負擔"去到無束縛既奔放自如係"一體臨場"必要條件 .....
煉成LCD-3巳經係指日可待, 但相信要比T1更多時間. LCD-3整體更容易配合各膽管得到好效果, 係跟住1-2星期, 小弟會精煉選出最好既LCD-3膽管組合, 有結果再同各位C兄報告 .....
LCD-3第三十一日試聽
來到第四個星期, 終於來到呢個階段, LCD-3己經奔放自如, 而家感覺到就只剩下"氣動", 小弟可以用"悠然甜美, 氣動之勁"概括LCD-3. 雖然係音場方面未及HD800宇宙及T1銀河系規模, LCD-3亦係太陽系同樣有大氣風範, 係大範圍動態方面, 亦未如H800及T1咁高速大開大合大上大落, 不過小弟完全唔覺得LCD-3係音場表現方面有缺失, LCD-3特有既微動態內勁彈性效果, 使整個音場充滿動量場空氣感, 同時展示出一份獨特既自然悠美節奏感. 低音效果係小弟聽過最好的, 中高音亦自然輕鬆甘甜, 而且密度飽和度韻味濃度係小弟擁有耳機中最突出!
今日襯有太陽, 小弟"曬膽"列出一部份藏品, 佢地其實係代表小弟近百粒藏膽(應該涵蓋大部份靚聲品牌)既不同特色, 不同結構音響效果, 加埋西電Globe, 碟集及曰集既274系列, 小弟推煲LCD-3不但落足時間, 仲係最大規模! LCD-3亦一如所料, 比HD800及T1更兼容各膽管得到好效果, 小弟覺得LCD-3出聲亦係最夠"膽味"!
跟住呢個星期, 小弟會再用列出膽管再輪流推LCD-3一次, 不過今次唔係推煲技術效果(呢個階段巳經完成), 係要睇下邊個組合(其實小弟又巳經心中有數)可以推到小弟"物我兩忘", 去到"一體臨場"境界, 咁煲煉LCD-3就正式大功告成! 等小弟好消息!
LCD-3第三十八日試聽
神器的波動
來到第五個星期, 推煲LCD-3終於大功告成! LCD-3不但係奔放自如, 特性完全表現出來, 好似打真鼓震動, 水面波動擴散效果, 係一種模擬自然連貫既"波動"伸延彈性. 小弟而家將煲好既LCD-3接去WA6 SE低抗輸出, 出聲效果更實在, 表現均衡, 細節得到提升, 音場空間感就更突出. 最初用WA6 SE低抗輸出推煲效果唔明顯, 之後推煲LCD-3一直係改用高抗輸出, 動態範圍大亦比較明亮, LCD-3就開始有變化進步, 不過煉成之後, 高抗輸出主體效果就略嫌過度明亮, 影響整體均衡表現, 再接回低抗輸出作最後精煉效果就最好. 其實推煲T1時亦有類似體驗, HD800就一定要以WA6 SE高抗輸出先有最好效果.
今次推煲LCD-3需然轉換膽管量規模最大, 但進度相對比較慢, 時間亦長, 證明LCD-3的確係易推難煲既一副大機器. 得到"一體臨場"終極效果既組合唔係西電274系列, 唔係GEC/ OSRAM/ Marconi, 亦唔係Tung-Sol, Genalex, Mullard, Brimar, RCA, Sylvania, Ken-Rad, Raytheon, CBS, Emerson, WestingHouse ….. 今次係來自法國既佳麗Neotron 5U4G. 雖然LCD-3有幾乎係線性響應特性(小弟覺得低音都係重咗些少), 整體表現上亦比T1及HD800更適配各膽管, 但論到"Dead-on零距離"暫時就只有Neotron做到, 連大熱既西電274孖生三兄弟, 黑馬Tung-Sol, GEC/ OSRAM/ Marconi等都要甘敗下風, 可見小弟追求既"一體臨場"終極效果係非常特定既優化組合.
各位C兄唔使覺得奇怪, 事實上, 所謂"一體臨場"終極效果係加入咗聽者(小弟本身)作為參與系統既一部份, 同一套軟硬體系統, 不同聽者就會得到不同最優組合. 雖然西電274系列係個別技術範疇如動態範圍, 響應, 密度有明顯優勢, 係配上LCD-3就覺得太厚, 主體及低頻被過度突出, 反而中高頻伸延性及場感細節發揮就不及Neotron同時達到最好既層次立體感, 最深廣音場空間感, 人聲磁性韻味傳神, 全頻響應均衡(以上全部都係建基於小弟-聽者主觀獨斷聽感尺度標準).
小弟又成功煉成LCD-3為神器, 今次分享推煲過程亦告一段落, 下星期小弟想分享一下LCD-3既其他一般印象, 對比HD800及T1既評論.
聽不完 玩不盡
雖然推煲LCD-3巳經大功告成, 搵到"一體臨場"既Neotron, 不過小弟直覺仲未玩到盡LCD-3. 其實小弟最初心目中LCD-3比較敦厚, 以為用Tung Sol功率膽配WE 274B整流膽, 最亮麗最大動態(小弟肯定自己呢套系統相比同級甚至越級系統, 應該都係非常亮麗大氣之列)及全Tung Sol功率膽配Tung Sol(頂方片集)最大空間場感, 兩個組合一定可以推到"一體臨場"效果. 可惜係推煲過程中就知道事實唔係預期中方向發展, 又一次證明將所有獨當一面既强者就咁集埋一堆, 唔一定就係有最好結果, 咁當然大前提係作為受者既小弟, 唔係一個純粹被動獨立觀賞者, 係有"一體臨場"要求既"超系統"積極參予者
係Neotron之後, 小弟用WE 274B再煲煉LCD-3, 不過今次唔用Tung Sol功率膽, 輪流換上不同特色功率膽(小弟亦幾乎收集囊括咗好聲品牌6EM7及相容功率膽Tung Sol, Westinghouse, Raython, Sylvana, Tronix, RCA等), 終於又有收獲, 仲係一次過有兩組 - WE 274B配Westinghouse(頂集)及Raython(黑屏)可以達到"一體臨場". WE 274B配上兩個組合, 重新再展現出全面動態, 亮麗而均衡響應, 密度飽和度空間場感, 一切就係咁又回到自然流暢, Westinghouse雖然不及Tung Sol亮麗空間大氣, 但中高音伸延性及整體純淨度較好; Raython亦無Tung Sol既大動態震撼, 但表現鬆容自如節奏感. 兩組配上WE 274B比Tung Sol既效果要好, 前者係"晶瑩甜", 後者係"悠閒鬆", 雖然音色不盡相同, 對小弟來講兩組效果係"等價"的
小弟之前分享既推煲經驗都係集中係替換整流膽(40%, 電池補完之前約80%), 都係基於最明亮大氣既Tung Sol功率膽(20%, 電池補完之前約40%), 更替功率膽雖然無更替整流膽影響咁大, 但效果亦相當明顯, 只係小弟未有時間玩哂咁多組合. 小弟現有收藏中, 理論上有30多個不同特色整流膽, 配6組不同功率膽, 及金銀及純銅2條不同訊號線(20%), 再加上WA6 SE高低抗輸出微調效果(5-10%), 同樣組配玩法適用於小弟所有耳機LCD-3, HD800, T1, D7100. 咁多"可能性"組合, 好明顯巳經唔係有無"一體臨場"組合既問題, 而係小弟有無時間去"發掘"既問題, 其實呢個正正就係小弟選擇玩膽機系統, 收集膽管既原因, 係小弟人生跟住十年八年, 甚至係幾十年餘生中, 都可能不斷有驚喜!
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實!
|
[複製鏈接]
樓主
發表於 2014-12-18 11:29
