初入兩聲道選購的生路曆程

加里

係2020年10月正式步入兩聲道開始經歷左兩個半月日煲夜煲的地獄時間，由一開始聲音差到係到懷疑人生直到而家感覺已感覺收成正果，唔能夠話係每日都聽到有太明顯改善，但每星期都會有驚喜，煲機全程用煲機王1-8首加上Focal官網Download的Tools CD 第41-44首，音量係用40度(前級音量係0-128)用大家的講法應該係10點鐘音量多少少。因怕對喇叭冷親係煲機其間仲幫佢冚被(為左減少對家人同鄰居影響)，好似講太遠，入返正題。
新setup好時一開聲，悶，焗，硬，尖⋯除左分析力好一點外，基本所有最差的聲音都出晒。經過兩個半月時間煲左約400小時，有一晚認真去聽返自己返自己熟識的音樂時忽然覺得去左第二個世界咁，高音好清脆，聽人聲覺得有種好輕柔輕快，甜甜地，覺得好舒服，無左之前好尖好硬會拮耳仔的感覺，而低音感覺好強彈性，好爽快，唔再有好悶好焗，好似拖泥帶水的感覺。
整體音樂感強左，順滑左，分析力同分離度高左，雖然只有6尺闊的空間，但都覺得音牆闊左，空間感同定位高左，感覺到樂器的位置同距離，唔再覺得聲音係喇叭位發出，聽得好舒服好開心，唔通呢個就係傳說中的收成正果？
維一感覺不足就係低頻量差左小小，特別係聽大動態時更加明顯，有種去唔盡的感覺，而將音量增加雖然問題有改善，但同時毛噪感同時增加，感覺唔係好爽，再煲耐D睇下會唔會有改善。
以上係小弟第一次出耳感報告，以下就是後續⋯

係上年12月後又過左一個月，經過差唔多100個鐘加煲，問題雖然有輕微改善，但未能解決。經過之前的前輩提醒會唔會係部AMP唔夠力去發揮喇叭，雖說S125有4ohm, 125W x2 ,但對住成靈敏度86的4ohm大食怪會唔會真係唔夠力？經此提醒我就開始不停反覆A - B測試，以單聲道Bi-Wire, BTL, Bi-AMP等唔同接發去試。
雖然只有一隻喇叭去聽，但試左成日之後發現當轉用BTL後發現低頻量不足的問題無左，而用Bi-AMP感覺動態有所提升，而Bi-Wire得到感覺同之前分別不大，就係咁⋯決定帶多個姐妹返屋企⋯

買AMP前的小插曲⋯係去買多部AMP前打去代理到問有冇現貨，點知得到回覆話得返最後一部，而且呢隻S125已停產，我一聽到真心腳都震晒，心諗唔係麻，咁嚇我，如果無晒咁我點算呀，無能力再換新AMP⋯於是就講我今日會去買，一定要留比我，留低左少少資料去HOLD貨，原本公司仲有野做都唔理一收工彈閘衝去買。

終於買到啦，可能因最後一部老闆平左D比我，勁開心

似層相識的畫面


三姐妹聚首一(枱)


因線材所限只用XLR行BTL


接上喇叭線（呢個係接錯左，接返啱後忘掉影相，用呢張頂住先 ）


完成啦


因原本部AMP煲左500幾個鐘，所以我請教老闆新舊AMP點去平衡個煲練度，係唔係新AMP要單獨煲返4-500個鐘，老闆話唔洗，Set好左當平時咁聽就得。
新舊雖然有分別，只要開機比佢Run左個幾鐘等熱左機後影響就唔會好大，邊聽邊煲就可以。不過老闆話最好就行Bi-AMP，新機去推低音，舊機推高音咁分家，平衡度會更好，仲話有需要可以訂做對1開2的XLR，呢個將會係我下個線材升級方向。

好啦，開始試機，老闆真係無講錯，開左2個鐘熱左機之後同剛開機試聲真係差好多，唔通A/AB類係唔洗點煲機，只要熱左機就可以發揮得好好？
等左2個鐘熱機後一開始試聽真係嚇左我一跳，成個音場同空間感闊左，低頻密度，速度，層次感高左，低音下潛得更深，只開到30度音量已聽得出有足夠的音壓，已足夠聽到之前要開到60度先聽到的動態同細緻位。連財政大臣入嚟都話好聽左，成個音樂分析力高左好多，高音更清爽，係聽古典音樂更有現場感，樂器明顯感覺到更清晰的結像同定位，聽人聲好甜，就好似係前面對住我唱歌咁，真係聽到起晒雞皮，超開心。

估唔到只係加多部AMP行Mono Mono行BTL會有咁大升級，而家真正感受到BS-403的威力。
死啦，聽到咁又心癢癢想買對1開2的XLR同買多對喇叭線試老闆的建議。

文章有點長，以上就係小弟初入兩聲道選購的生路曆程的完整報告

ericjoe

CHING 多口講句,  放枱面真係無問題,  唔係人人可以放腳架.  個d 有幾百尺既富豪唔會體諒無位人士既痛苦...

btw 想講係你個 ALCTRON speaker 墊我都用過....    如果仲用緊, ""強烈建議你試下換左佢""   ......  試下如 isoacoustics 或 TIGLON  墊.      甚至平到幾蚊既EVA 膠都比佢好... 講堅

一斤花生@G

ericjoe 發表於 2021-2-19 10:39
CHING 多口講句,  放枱面真係無問題,  唔係人人可以放腳架.  個d 有幾百尺既富豪唔會體諒無位人士既痛苦... ...

非常同意  買個isoacoustics 155    我都係電腦台放喇叭  用左比較好   買個入門膠版都係 1k有找   

SimonHon@FB

加里 發表於 2021-2-19 04:08
係2020年10月正式步入兩聲道開始經歷左兩個半月日煲夜煲的地獄時間，由一開始聲音差到係到懷疑人生直到而家 ...

行雙mono 正到爆😁
但兩部加埋，發熱嚴重嗎?

chrischan0630

very good. enjoy.

加里

ericjoe 發表於 2021-2-19 10:39
CHING 多口講句,  放枱面真係無問題,  唔係人人可以放腳架.  個d 有幾百尺既富豪唔會體諒無位人士既痛苦... ...

正如師兄所言，所以我用左半個月都無就已換左對20cm高的木製腳架

加里

一斤花生@G 發表於 2021-2-20 08:10
非常同意  買個isoacoustics 155    我都係電腦台放喇叭  用左比較好   買個入門膠版都係 1k有找    ...

而家用緊木的問題不大，不過都會想試下用其他唔同物料或自己DIY對腳架試下，不過仲未諗到個方向

加里

SimonHon@FB 發表於 2021-2-20 18:30
行雙mono 正到爆😁
但兩部加埋，發熱嚴重嗎?

發熱量一般，進入狀態後，新amp 49度左右，舊amp 42度左右， DAC前級 39度左右，可接受範圍

kkchau@G

呢個位真係會出到靚聲咩.......

SimonHon@FB

kkchau@G 發表於 2021-2-23 22:23
呢個位真係會出到靚聲咩.......

會大打折扣，因空間小

但可以為夢想瘋狂，也是一種幸福