內容相片更新 - 老麥 McIntosh 前級 C50 後級 MC252 Focal Micro Utopia

pierokwong

GOTO 發表於 2016-11-21 02:54
好奇一問, 對KEF有咩咁唔滿意呢?

X300A & LS50真係咁唔好? 還是跟其他硬件唔夾聲? ...

以上兩隻model，完全係名過其實。尤其係X300A Wireless。好長嘅故仔，盡量簡短匯報一吓。

以下嘅嘢，都係牽涉埋佢哋維修部加Marketing嘅證實。希望各位兄弟姊妹可以參考一吓。我要強調，只係大家問起，我先至講，因為我真係唔想鞭屍。

X300A Wireless，一直廣告都係話裡面有埋高清DAC解碼，亦都係呢個型號嘅主打功能。點知最後，設計上面係有一個問題。就係只要係插USB輸入，內置AMP係會張開，仲要係火力全開嘅狀態，唔識得Auto Off，亦都即係，背脊嘅散熱排骨長期處於高溫狀態。

一開始，我問專門店銷售，長期高溫有冇問題，銷售斬釘截鐵話冇問題，長期開，唔需要擔心。

最後結果，唔夠一年（保養完結前幾日），就係因為高溫，內置AMP一年唔夠已經燒機。跟住上網一睇，原來外國好多同樣例子問題。

最後聯絡維修部，佢哋遲遲唔回覆。最後揼波鐘，差不多過保養。佢哋建議先收取$600，先至開始檢查維修。（強調係保養期內）。我當然拒絕。

最後抖纏好耐，我話如果KEF唔負責任維修，我會通知消委會，同埋傳媒。最後Marketing介入，搞到保養期已經過埋，佢哋先至回收對壞喇叭。

可能有人會問，如果唔識得Auto Off，咪每次伸手去背脊，撳掣熄機。唔好意思，同樣外國都有好多人，因為每日撳掣海關，一年唔夠已經燒機。

產品貴唔緊要，係市場定位問題。但係最起碼，產品質素需要反映到價格，客戶服務有基本服務，唔好推卸責任，保養期內唔好用藉口收取客人費用。

我呢個絕對唔係個別例子。係KEF維修部師傅知道嘅存在問題。

中途好多KEF無理嘅對待，我已經省略，費事再提。

以上係第一次中伏。所以我亦都會對新嘅LS50 Wireless有所保留，除非電源系統，同X300A Wireless係完全唔同設計。

第二次中伏，就係LS50，當時對唔同牌子無乜研究。LS50廣告，網絡推廣太過犀利。所有資訊都係推介。諗住再一次機會啦。最後都係好失望。因為，同樣價位，以聲論價，絕對有更加多，非常好嘅選擇。

唯一可以講嘅就係，而家嘅KEF，已經唔係之前被收購前嘅KEF。

koalaau

ls 50聽過下，中規中矩，如果係特價六千幾都值，成萬就有好多選擇了。

HenryHou1

正呀，有呢套嘢係公司我會好想返工但返到去就好唔想做嘢

benwongkk

HenryHou1 發表於 2016-11-21 15:48
正呀，有呢套嘢係公司我會好想返工但返到去就好唔想做嘢

正常老闆都唔須要做野架...

dxvmon2000

如果樓主可以MC252 轉 MC275 膽後級, 會令到Focal utopia be 更好聽.

不過我自己用focal 1007 be, 之前是用老麥石機去推, 唔夠用膽前後級比較適合。

pierokwong

HenryHou1 發表於 2016-11-21 15:48
正呀，有呢套嘢係公司我會好想返工但返到去就好唔想做嘢

哈哈哈，我而家都係幾鍾意返工。

pierokwong

benwongkk 發表於 2016-11-21 16:49
正常老闆都唔須要做野架...

其實係要做嘢㗎，哈哈哈，要好認真喺員工面前扮高超。好攰㗎。哈哈哈

pierokwong

dxvmon2000 發表於 2016-11-22 19:54
如果樓主可以MC252 轉 MC275 膽後級, 會令到Focal utopia be 更好聽.

不過我自己用focal 1007 be, 之前是 ...

多謝師兄建議。

其實275一直都係我考慮緊嘅後級。可以之後搵機會試一下。

現階段，其實呢個組合已經非常完美。C50嘅高清同埋速度，配合Utopia嘅細緻同埋溫柔，反而效果出嚟啱啱好，不油不膩。

好慶幸之前有機會直接比較1008＆1007同埋Micro Utopia。三款喇叭，完全唔同性格同埋表演。

每日聽歌，都係一種享受。

benwongkk

pierokwong 發表於 2016-11-23 09:33
其實係要做嘢㗎，哈哈哈，要好認真喺員工面前扮高超。好攰㗎。哈哈哈

我都好想扮工....

pierokwong

benwongkk 發表於 2016-11-23 11:42
我都好想扮工....

好慘㗎，我哋有慘為人知嘅一面。夜晚做陪酒小鮮肉，有時唔好彩，一晚四場搵老細傾生意。做完嘢可能係凌晨四點。

早排先至笑緊，有少少似用條命去換錢。

不過，見到老麥，開心晒。