[拋磚引玉] 大家點樣砌而家套出街系統? (附上小弟見解)

hiyori

前言

最近愈來愈多人玩耳機，但是不知道為什麼，耳機發燒圈好似突然有個斷層。

新手入門很多東西不懂，甚至不知道如何問也很正常，小弟當年開始玩時，都係什麼都唔識，但勝在大家都唔係好識，於是一齊慢慢玩下玩下玩上去，而家叫做識d，但漸漸發覺一d資深既燒友愈玩愈「尖」，有一批玩家甚至覺得「玩上去」之路係孤獨難登既，然後慢慢就變成不同種類的「高人」都唔多出聲，可能有d覺得其他人同佢地距離太遠無計傾，或者就是大家道不同，於是「話不投機」，一係就一玩就一次過叫人玩d其實高人先知點解要玩既野(例如線，線係有用，但唔係求其唔夠一皮既機換條一皮既線，有無用要由好多機礎慢慢build上去，唔係就只係俾人餵架啦)，但又講d唔講d，於是，大家就玩到中途半端，唔知點玩下去。

慢慢有些「中手」沒有興趣走「hiend」，轉玩speaker/ 相機其他男人敗家野，或者自己私下組group組facebook etc，變成現在奇奇怪怪的情況︰好多新手好有興趣想玩，想問好多野，但又無文睇(舊文仍然有參考價值，但講既係舊耳機，新耳機就好少，無理由而家仲睇e4c有幾正掛，幾正都好，e4c都買唔到啦)，又唔知點問，問左又好似無咩人答，中堅玩家幾乎不見，然後就只有神經刀既高人，咁樣其實，唔好玩既。

所以，小弟雖然什麼人都不是，但都膽粗粗開呢個post(遲d會開埋個家用系統系列)，一方面小弟會講下自己點組合套出街組合，講少少心路歷程同走過既歪路，一方面都希望引到一d師兄出來講下大家點砌，而講理論(例如什麼是動圈，什麼是動鐵，什麼是耳擴)，好似有d悶，所以就試下咁啦不如。

另外，為左豐富討論，對於願意分享玩法既師兄，小弟有小小小小小要求
1. 講下聽開咩歌
2. 講下套系統想追求d咩
3. 講下套setup係點，同埋點解咁set

先由小弟開始

找尋所愛的音色篇

小弟聽開既歌，主要係jpop，尤其係ACG有關，還有就是小眾一些的同人音樂，JAZZ，solo樂器(piano, violin, flute etc)，管弦等

過去，小弟出街聽歌，曾經都只係好簡單，只係想好聽d，但好聽d好空泛，不過一開始我其實唔係好清楚自己想要咩，我只知道我喜歡女聲，重視女聲的表現，尤其茶太，還有類似茶太的女聲(炸)，因為茶太的女聲很懶洋洋，雖然很溫柔，但其實又有點鼻塞的感覺(對不起，茶太m(_ _)m)，所以我就開始先針對女聲來處理

女聲都有好多種，播日系女聲，尤其這種溫柔一點的，直覺會覺得日本機係最可能既正解，小弟最先係搞耳機先既，因為有人話過耳機係最終輸出點，真正影響聲音出來的風格的地方，所以無論如何都要挑對合口味，自己喜歡的耳機，初時沒考慮入耳還是大耳筒還是便攜耳筒什麼，覺得好聲就夠，於是先後玩過好多女聲為賣點既日系機(即係鐵三角啦)，例如esw9, esw10jpn, a950ltd, a900ti, a1000, ck100等等，有d借朋友，有d自己買，全部都出過街玩過(其實w11jpn我都試過…一次咁多啦)，但玩極都覺得差d野，好多時搞到女聲覺得唔錯了，但聽其他野就唔好聽，或者明明昨天覺得d女聲好好聽，但過幾日又覺得悶，後來，我有一天連續韓燒->日式放題->BBQ之後(發生呢個combo既原因唔重要)，悟出左一個簡單道理，就係好似食野一樣，只係得一樣野會膩，只係聽女聲好聲係唔夠，其他野都要配合，那時我以為自己已經悟出左大道理，以後會無往而不利，於是就開始搞所謂全面既系統，但我意想不到，這竟然令我差d行左歪路。

差d行錯路

為了追求平衡的聲音，我找了很多不同所謂的耳機，系統的調整方向也慢慢變成所謂平衡，那時，我相信平衡才是所謂的「玩上去」，然後我發覺把系統愈搞愈平衡，系統的整體的硬質素，例如什麼結像，細節，密度，平衡等等，都提昇了，但我喜歡的女聲，卻好像愈來愈遠了，於是，我又跑了去聽別的音樂，我找到在這種平衡系統會好聽的音樂，我把這個系統給很多朋友聽，大家都覺得很好，一方面我感到自滿，但一方面我又覺得很迷失，然後慢慢，我就覺得很悶，我問我自己︰搞了這麼多，不錯在客觀的標準係提昇左好多，但，聽自己平日喜歡聽的音樂卻變得不好聽了，雖然，我找到新的音樂，會在這個系統好聽，但這樣有意思嗎?

我開始諗一個問題，究竟我搞系統係為左點?其實搞咁多，都係為左欣賞自己喜歡既音樂呀!其實就算我搞到套系統，客觀來說係好好，但聽自己既野都唔好聽，就錯左啦，於是，我明白了，只有自己是孤獨的，會有盲點的，客觀的標準係有用，但佢唔係俾你直接用，而係要諗下點樣可以放落自己既系統，同自己喜歡既音樂去配合，例如大氣勢聽管弦好重要，但聽jpop就會怪，尤其在portable既世界根本做唔到完美 - 不要說完美，出街本來就有好多妥協，所以反而多d「所謂味精」未必唔好。

後來我入左stax sr001mkii，至今最愛，我有keep DX100同MR1，主要用途係俾我做參考點。而家搭車聽既話我自己喜歡我睇心情，有時ipod shuffle (1代)/ X1000 / ak100 + Spiral ear SE-2Way，有時DX100 + Walker Mini Limited + FAD Heaven VI，DX100同MR1我都覺得係音質好高既機，但味道同音色唔係最岩我，dx100我要配合amp先可以滿意 - 不是推力問題，而是用作調味和調整輸出配合耳機，要用來試機既系統，就會係mr1/ dx100 + L3 + 各種耳機。

hiyori

將來走向
而家我考慮整一套系統，首先會諗呢幾樣野 (按順序的)

1. 便攜性，使用便利性，支援格式等
2. 音色的取向是否和自己聽的歌曲合
3. 音質，基本參數
4. 價錢及分佈

大家可能奇怪我點解竟然會考慮1先
其實我曾經都玩到好瘋狂，試過特製notebook+portable dac+電+"transportable amp"，但後來發現，呢樣野真係唔可以持久，對自己來說好煩，玩幾十次要天天攞好多舊野之後，就開始頂唔到，而家包括埋個電話，我自己係舒服同音質取捨，會接受到三舊野，所以最近試左好幾隻支援iDevice直接抽digital signal既portable dac+amp，fostex hp-p1, vamp verza, sony pha1呢三部對我來說各有千秋，等埋部centrance m8出我就會決定，全部既好處都係1+1，電話+一舊野就可以，其中兩部身痕想加料加多個amp都勉強可以接受

我自己習慣iDevice既操作介面，因為有一排用iMod，有一批歌係aiff同alac，後來玩sony同mr1，轉左堆wav同diff，然後之前有排電腦唔夠位又轉左d flac，(所以dx100有個好處係什麼格式都可以食)，而家唔同我有既歌都唔完全一樣(除左d好喜歡既歌之外，我好多碟都只係轉左一個無損格式做storgage，hdd都唔平...)，每轉一次會，格式會令你好煩，所以呢樣野我又覺得係應該考慮下既。

另一點更重要，就係用入耳定耳筒，耳筒出街就要用袋，而且夏天會好熱，想瀟洒d兩手空空，就唯有cm同一部細機仔(所以我有考慮過terra player)，呢d因素可能一d發燒玩家會覺得唔重要，其實說到尾就係你為左音質你可以接受幾多唔方便咁解，呢個完全係個人因素，好在就係而家其實方便左好多，android機可以otg玩portable dac+amp，支援iDevice既portable dac+amp又愈來愈多，考慮埋呢d因素也不過份，尤其初開始玩既朋友，一開始玩既核彈愈大，放棄既機會其實係會愈大既，因為會好快厭煩好多舊野，慢慢玩上去，開始覺得真係想玩上去想音質好想得不得了，你自己知道點做啦‧

至於2同3，上面講左好多，音質唔係唔重要，真要說，音色係一個人既性格、個性、談吐等等，一d比較感覺既野，音質就係一d可以量度既成就，讀書成績，搵幾多錢etc，有音質但音色不對，就好似一個人好有成就但同你唔夾，咁就唔太work

4方面，我自己分配係 45% source + dac + amp (iphone我會當係ipod touch 既價錢, 炸)，45%耳機, 10% 各式accessories，例如線之類，線我會係做好晒套系統，先用來微調，因為線主要係調音，同解放系統潛力。用提昇在概念上唔太正確，因為線係傳信號，最完美就係無損失同無干擾，系統既潛力就可以完全釋放，但線唔會強化訊號，又唔會加料同修正，所以換線可以提昇系統，其實應該話係可以令你套系統表現出真正實力。有d hiend系統解放解放多幾個%可以差唔少，但有d系統解放多幾個%就唔差太多了

耳機換線聲音會改變唔少，但我建議換線應該係最後一步，真係無法止搞到想要既聲，或者你喜歡某隻耳機既聲底想改d野令佢更完美時用，如果想大改，就換過對耳機似乎比較實際同合乎成本效益，即係要把ue搞成westone聲係可能既，但可何苦呢，買隻westone好過啦

以上係小弟既一d心得，唔係真理更唔係高見或者guideline，大家可以當係一個玩家既一d體驗，我個人好open-minded，而且好鍾意玩野，所以好希望可以見到各位師兄既玩法，又或者覺得小弟有咩野講得唔岩，都唔洗客氣，最緊要好玩。有野想問都可以隨便問。

再recap一下

為左豐富討論，對於願意分享玩法既師兄，小弟有小小小小小要求
1. 講下聽開咩歌
2. 講下套系統想追求d咩
3. 講下套setup係點，同埋點解咁set

當然，吹水亂入歡迎

whitefang

1.出街是聽日系/POP 比較多
2.音質不差於imod同時體積不大過imod+amp
3.
AK100直推
兜兜轉轉還是覺得便攜系統最重要是方便, 排序和你一樣
因為個人的壞習慣, 出門口永遠很趕, 什麼炸彈基本上都無時間執
自從換了AK100才有更多時間聽歌

我也訂了M8 LX, 可以用AK100光纖out, 驅動手上的大耳牛, 不過不會帶出街用

另外近日其實有意玩返portable, 但發覺自己已經完全脫節
要由新手重練

blindfaith3by8

我係sansa fuze + c&c bh +tf10
除左death metal/trush/k pop /jpop/classic吾聽之外....
我愛korn，但又愛olivia ong...仲有fatboy slim....

sansa fuze因為我吾愛apple..而佢又可以講係有LO既c/p皇...
c&cbh...又係C/P仲有size同fuze好襯....


10吾洗講...我鍾意live music....人聲後令我似演唱會人群中.....

gahqm

我就起初係手機聽歌，跟住買左對 10 仔後就開始中毒，後來入手 ipod classic 後跟住買埋 exk，因為啲聲好似差啲咁就買埋 amp(hornet)，最近好唔好彩 hornet 打左柴就買左馬老闆出果隻 amp 聽住先，聽開o既歌係 ACG  + 聲優 soundtrack，因為我出街有孭袋關係，所以 ipod + fsm02vs + exk 冇乜問題。至於上 dac 我就諗都冇諗過，因為至終三舊野都幾大下，就算我有孭袋都會覺得阻訂。

hiyori

whitefang 發表於 2013-4-18 17:20
1.出街是聽日系/POP 比較多
2.音質不差於imod同時體積不大過imod+amp
3.

whitefang兄你用緊AK100，都唔脫節啦(笑)
AK100我一直未有機會玩佢既光纖，期待你既報告
話說M8究竟幾時出貨呢...

我也是覺得出街要拿幾部機好煩，而且差電要差幾部機又係煩，所以希望簡單有音質
imod+amp的話，我覺得現在iphone/ android機+portable dac amp有機會，m8我也看好的

whitefang兄而家出街多數用邊對耳機?

hiyori

blindfaith3by8 發表於 2013-4-18 19:26
我係sansa fuze + c&c bh +tf10
除左death metal/trush/k pop /jpop/classic吾聽之外....
我愛korn，但又愛 ...

blindfaith3by8兄呢個係性價比甚高既組合啊
師兄有無rockbox?個lod 係自己改造定係?(記憶中好似apple個dock差唔多但係要改d野?)
我想師兄的triple fi 10 pro應該是比較早期一點的版本，10仔聽live係好有feel，我有個朋友聽本地流行曲，又係覺得搵唔到替代品
選用c&c bh應該也可以調番近d個人聲?

hiyori

gahqm 發表於 2013-4-18 21:16
我就起初係手機聽歌，跟住買左對 10 仔後就開始中毒，後來入手 ipod classic 後跟住買埋 exk，因為啲聲好似 ...

ACG  + 聲優 soundtrack啊，同好呢

exk係一隻我幾鐘意但係玩唔好既耳機，我之前試左唔同組合推出來，高頻都會比較硬同刺耳
不知師兄既組合推出來既exk會係點呢?

師兄會唔會考慮pico power?

44244434589

小弟聽開classic同jpop多,,
暫時用住IPC+IE80
未來可能會改IPC做SSD同大電
但係咁投資法好似唔夠直接買國磚抵
因為想一機搞掂晒D野
話晒叫隨身聽嘛

或者聽喇叭多..
所以對動鐵既聲唔太感興趣
IE80就比到果陣感覺我

whitefang

hiyori 發表於 2013-4-18 23:54
whitefang兄你用緊AK100，都唔脫節啦(笑)
AK100我一直未有機會玩佢既光纖，期待你既報告
話說M8究竟幾時 ...

現時是 RWAK100 直推 IERM 和 ESW11LTD
有點想玩近期的入耳, IQ, IE800, 334等... 但都不知從何入手
也不太認識現時的AMP(不過近來好像是player的市場比較活躍)
總之就是沒有主意...


上次headfi meeting之前專登買了一條toslink線給ak100用來接其他人的系統
也有接上自己家中的dac
質數中規中距吧, 好過一部無調節過的電腦

恐怕我訂M8 LX要比M8等更耐甚至有可能胎死腹中...
Centrance到現時仍未正式確認可以做到LX...