|
|
樓主 |
發表於 2015-12-10 11:51
|
顯示全部樓層
本帖最後由 ghhf 於 2016-4-10 23:10 編輯
WA22開箱小結
上集 - 硬件及整體印像
自從Project WA22分析後, 決定入手WA22. WA22登陸後, 小弟為Woo Audio WA22 極速開箱. 開箱小結準備分上中下三集比WA22開箱小結。
第一部份小弟想講下硬件及整體印像。送貨包裝箱唔算大件，裏面係兩個并合一齊厚身定形發泡膠，WA22同原配膽管被蓋住及固定保護得非常穩當 
小弟無選擇官方升級膽，開箱收到既係d大路嘢Shuguang 274B整流膽一粒，RCA 6SN7訊號膽及GE 6080功率膽各一對。另外入咗兩個adaptor準備遲d比274A同596整流膽上WA22用 
同小弟現有既WA6 SE一様咁有份量，WA22可以用"成舊鐵"來形都不為過，開箱時要搬動WA22都感到吃力。機身散發岀非常有金屬質感淺灰銀白色光芒，用手觸掃機身時，就更能感受一份剛豪氣勢 
外型設計方面，火牛及膽座位置，機背訊號輸入及面板耳機輸出接缐位，開關及音量控制，佈局一體簡潔，機身線條連貫美觀。小弟自問係眼利之人，機身揾唔到有任何花痕，鏍絲帽凹位亦睇唔出有收緊時被磨損痕跡 
WA22整體印象係製作"一絲不苟"，小弟一向好buy呢種"玩一世"既製作意念同質量，開箱第一感自然就係有讚無彈 
中集 - 音質及一般效果
首先要申明既係，因為對咗WA6 SE成年，期間的確品聽過唔少難忘效果，小弟係已有先入為主有深刻既既定印象。唔敢講閱膽無數，食過好嘢之後自然會有要求，小弟提供既效果描述係主觀條件下既體驗，小弟成日掛係嘴邊既所謂"一體臨場"亦唔係咩絶對標準，同各為C兄一様，只係配合到小弟個人口味效果既主觀共鳴。入正题前又要出番個擋箭牌護下身先
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實!
好啦，小弟唔客氣要來料啦，開箱日係用RCA接線Zendo，第一個印象係，WA22行RCA輸入其實效果一d都唔會差過WA6 SE，係各有特色，WA22原配系统音場效果就比較突出，相信經過一段產品修改，有説官方已加咗反相缐路，即使係非平衡輸入，內部仍會以平衡線路運作。考慮到WA22售價幾乎係WA6 SE一倍，又需要多一組膽管，如果無打算玩平衡，單以性價比睇的確唔化算，何況WA6 SE效果始終比較细緻，而且更要野性一點
有人話唔好對原配膽有期望，佢地只係要來試機，證明系統可以運作，小弟唔同意咁極端説法，不過印像中原配Shuguang 274B，RCA同GE膽出聲都係比較低沉悶氣。當WA22換上平衡輸入，音場明顯深廣，小弟覺得非常驚喜，所驚喜者唔係輸出效果，而係WA22平衡系统潛力，原配膽都竟然出到咁既效果，換埋正膽，上行架撑咪不得了?! 再配上小弟自己DlY平衡線一接功成，就更另有一番滿足感
咁究竟WA22原配系统既效果係點? 首先係，音場效果比預期好，而且富空間感，有動力速度，高频效果嘗可，中低頻就太重厚，層次感不足。配上Zendo輸入缐，呢種"不平衡"效果就進一步擴大，中低頻過亮，换咗銅質訊號線後有所改善，改平衡輸入後就有所收斂。整體而言，WA22原配系統係偏重中低頻(印象中WA6 SE原配系統甚至有肥腫感)，配HD800及T1效果比較理想，配LCD-3效果始終沉重 
今節分享咗音質基本印象，下一節就係下集大結局，會先分享WA22原配系统加上配件武裝化後, 接電池補完既效果進一步體驗。最後就係最精彩既尋找"一體臨場"Tube Rolling遊戲，究竟WA22可以推盡到咩效果?! "終極組合"係咪就比到"終極"效果?!
下集 - 大結局
來到開箱小結下集大結局，先回顧一下WA22原配系统表现，整體效果係强調咗中低頻，雖然有動力，但係感覺吃力，似叫喊出聲，雖然有音場空間感(特别係改以平衡輸入後)，但建構來得粗糙。雖然如此，效果其實比當年小弟入既WA6 SE原配系統表现的確要優勝
體驗過原配系統效果之後，小弟為WA22加上高質寛頻響應保險絲，效果係相當明顯，提升咗整體豐滿度。改以平衡輸入後再加上RCA保護蓋，密度亦得到提升，音場空間開闊，出聲更有韻味。再加埋減震鼠鎮壓住WA22火牛，聽説裏面有特殊礦石可以抗電磁波干擾，真假唔考究啦，主觀耳聽為實效果係好直接，幾分鐘內就感受到背景靜咗，聽多咗細節同層次。最後緊係上埋電池補完，好明顯系統活潑感，淨度再得到提升。不過事實係，每種裝備獨立使用時，感覺效果非常明顯，當各項裝備一同使用既最终結果，就係1+1+1+1少於4 
WA22原配系統被配件武裝及電池補完推盡之後，雖然技術性效果得到大幅提升，表现始終有用力感，中低频仍然突出經常"吸引"住小弟注意力，即使已富有音場空間感，始終感覺係一個不平順不均稱空間，好似一張被亂摺一團後，再打開滿佈皺紋既紙，效果算係可聽，但唔可以稱得上享受，更唔會達到小弟追求"一體臨場"感動級既效果
WA22原配系统表現其實算係物有所值，至於係咪屬於高性價比，小弟認為只有玩平衡同換膽之後先可以真正體驗到WA22濳在實力，相信好多玩過WA22前輩都會同意小弟說法。小弟唔係打手，只係忠於自己聽感，有話直說，C兄如果覺得唔啱聽, 就唔好浪費時間一路睇一路插小弟，快d過主另覓正點欣賞 
至於換膽之後係咩世界，待小弟再深入了解品聽之後，會一路更新有關文章，C兄可參考有關一體臨場, Tube Rolling及終極組合部分。小弟以玩膽藏膽之名起誓，保証驚喜有料到，一定唔會使各位C兄失望
後記
平衡與非平衡之戰
講大咗，小弟邊有资格講d 咁大既题目，小弟想係呢節再分享下有關WA22輸入方面既進一步體驗 
話説係未品聽WA22平衡效果之前，平衡效果對小弟來講只係一種想像，小弟曾經有意識覺得平衡效果會唔會過份强調Hi-Fi感而變得空泛? 結果同小弟既想像有出入，最少係WA22上，小弟感受到既效果一d都唔空泛，響應寛廣，更多細節層次，音場空間感好像係隨手拿來，其實平衡效果係提供咗非常實在，高起點質量(特别係換膽之後)
係WA22以平衡輸入行咗一段時間之後，小弟揾到幾個疑似"一體臨場"組合。為咗更清楚了解平衡及非平衡輸入係WA22上效果異同，小弟將XLR平衡線除去又換上RCA輸入線Zendo及純銅線。今次與初試唔同，因為系統巳經完全被配件武裝化及以電池補完供電，仲換走埋原配膽，代以一個接近WA22"完全體"膽管組合。 再行番非平衡，小弟就揾番WA6 SE既影子，但又不盡相同，小弟得到一個有趣結論
平衡及非平衡輸入邊種更能打動小弟? 首先整體感受係，WA22既平衡效果應該叫"開陽"(如果WA6 SE係"和暖")，係一個"完全豐滿"既中頻響應效果展現。至於非平衡效果感受係"暖"，相對好似係"淡薄"咗，其實唔應該叫"淡薄"，而係"清雅"。"淡薄"係技術性描述，係咁高規格條件下，單純既技術效果反而不再係重點，而係注意不同佈局既展現效果，前者"寛廣飽滿"，後者"深度清雅"。小弟咁講係唔想咁快就為平衡非平衡加上主觀價值取向
平衡效果既"豐滿"好容易使人感受到場感，突顯背境細節及其協調建構空間，但同時主體就相對無咁突出。非平衡效果雖然不及平衡效果有"豐滿"感，但主體反而因此表現鮮明，呢個係小弟係WA22上感受到既分别。相對於WA22效果，WA6 SE雖然音場空間感要深狹一點，但主體動態伸延性就要勝一籌。小弟會覺得WA22强項係高度整合整體性，而WA6 SE就有多一分性感個性
係實際組合配搭上，WA22上小弟傾向選擇"偏冷"組合，以調和"開陽"。係WA6 SE上，小弟就會選擇一個"温和"組合，提升一點豐滿度。值得注意既係，小弟前面既描述與使用輸出耳機及訊號線材有好大關係(其實佢地本身亦同時係被調節一環)，只適用於小弟初試LCD-3。換上HD800或T1，就會需要唔同程度調節，總之係不擇手段，務求接近達到終極目標"一體臨場"。由此可見，當達到一定技術水平，平衡或非平衡巳經唔係高低優劣之分，對小弟來講，反而就係多咗一個可玩組合效果既選擇
耳機線的疑惑
話說小弟回覆tubeamy師兄有關LCD-3原廠線同ALO線效果分别，發現咗一個好震驚既現象, 差d企唔穩暈咗 ..... 
小弟準備好膽管組合配上LCD-3及ALO，聽咗一個鐘之後就中途換返原廠線，準備聽多一個鐘比較。收埋咗成年，唔聽無事，一聽就發現原廠線效果竟然好過ALO，而且係好明顯，效果更鮮明活潑，ALO效果反而覺得有點悶氣。呢個效果非常震撼，因為當初就係覺得原廠線出聲有一層暗灰，行咗一排又無咩改進，所以先換線，今日再聽完全係兩回事 
小弟聽完之後苦思咗一陣，好彩無抯損頭皮，只能覺得係因為LCD-3經過一年歷煉之後，巳經完全奔放自如，再加上WA22系統配一個"完全體"組合提供高質訊源，所以耳機線對最終輸出效果既影響敏感度就相對減低咗，而且原線既"輕盈"更能調配WA22既"開陽"味道。不過呢個完全係一個假設，小弟準備試下HD-800用開既金銀升級線同原線會唔會有類似效果
另一方面，小弟決定要揾出真相，做番個對比試驗，就係除去老鼠，保險絲及RCA保護蓋，最後仲要飛走埋"電池補完"，上番條黑色13A電源線直插牆身攞電。監粗就咁忍心將WA22"去勢"打回原形，再比較一次ALO及LCD-3原線效果，今次會一并試埋HD-800原線，究竟會唔會又有震驚嘢發生呢?! 
回想小弟上年係鋪試ALO線(小弟自己帶埋私貨LCD-3搵上鋪)同屋企試效果一樣可以用"優勝"來表示ALO效果, 感覺輸出音質係有級數上既差別, 所以入手ALO係毫不懷疑. 不過小弟今日繼續聽原廠線效果, 只可以講係各有特性, 真係唔可以再用"全面技術性擊倒"既"優勝"姿態來形容 
而家小弟呢邊戰情非常嚴峻, 原廠線效果巳經攻陷咗第一度防線, 實力不容忽視. 小弟要係最後防線, 以"去勢"既WA22再考驗一下原廠線, 睇下ALO同HD800升級線守唔守得住. 依小弟直覺, 戰情不容樂觀, 待小弟明察大局之後, 再向C兄報告最新戰況
話説小弟為咗揾真相，將武裝化既WA22回復番原配裝備，今次再重新品聴LCD-3及HD800升級線及原廠缐效果差別。可能WA22係巳經行咗成個月，小弟覺得再試效果比初開箱時好。係原配裝備WA22(以平衡輸入)分別聴過LCD-3及HD800升級線及原廠缐效果，小弟對呢場耳機線大戰有以下評論
首先，以前WA6 SE上原廠缐感覺到既灰暗及焗悶，巳經再揾唔到，而家係WA22上原廠裝備輸出效果其實真係算唔錯，唔會感覺好似有技術性缺陷。特别係HD800配原廠線，小弟覺得配WA22"開陽"效果係幾隻耳機中最好，比HD800金銀升级線表现更有彈性及均衡，升级線反而表現動態及中低頻太過搶，聽一陣就有耳攰感。至於LCD-3，ALO效果比原廠線既表現今次的確可以用"優性"來表示，提升咗密度純淨感及飽和度，效果明顯，不過差别程度始終巳經無以前係WA6 SE上既咁大 
綜合WA22原配及"完全體"下換耳機線表現，小弟大膽作主觀結論。最主要因素係耳機本身效果改變，LCD-3及HD800被煲透後，已變得奔放敏銳，配合平衡輸入訊源質量得到提升(特别換上配套優質膽管後)，耳機線對整體輸出效果既影響程度相對減弱。想深一層，其實呢個結果係好合情理，當系統達到一定程度技術規格時，耳機缐效果之間既"絶對"性優勢就變成各有特性，再以Tube Rolling配以特定膽管優化組合，即使係原廠線，亦可能得到比升級線理想效果
小弟呢個個案，當WA22係"完全體"狀態下，LCD-3及HD800原廠線絶對可以配合整個系統達到"一體臨場"效果，咁當然大前題係，奔放自如耳機，高質訊源及撞手神配到一個特定既膽管組合
一體臨場
小弟而家正式宣報, 第一個WA22(完全體裝備, 並以"電池補完"供電)上既"一體臨場"組合, 係HD800(配以原廠線)，National Union 5U4G (長片集)整流管，Tung Sol 6SN7訊號管及Tung Sol 6080WB功率管
小弟覺得自己犯咗個錯誤，但對結果又唔感到意外。有留意呢個帖既C兄就知，小弟之前發現既都係LCD-3既"疑似"組合，只能算得上享受，並未真正達到感動級別。所錯誤者，一開始小弟就應該以HD800既"冷傲"去調配WA22既"開陽"，LCD-3既"暖厚"底配WA22只會增加難度。所不意外者，係WA22上既"一體臨場"效果係一如以往，與小弟係WA6 SE感受到既效果係"等價"
事實上，小弟所講既"一體臨場"對其他C兄來講係一個相對概念，因為C兄會有自己既標準，對小弟就係一個"絶對"標準，因為呢個"一體臨場"純粹係屬於小弟自己個人的。係"一體臨場"狀態時，小弟係分唔出係WA22或WA6 SE，係平衡或非平衡輸入，因為根本已經係無意義 
估唔到過年前，終於遇到第一個WA22上既"一體臨場"組合，又完成一個心願。隨住小弟更了解WA22性能，應該陸續有新發現新驚喜
後後記
小弟入咗WA22都有成個月啦，d精華好嘢緊係最後先出, 特別係應用操作及效果細節想係呢個"後後記"再同各位C兄分享。
再論平衡耳機線
首先WA22既外相及質感係無話可説，如果一定要比出改進既地方，就係缺少咗一個獨立低阻抗耳機輸出，要以電源開關共用以左右選擇切換，因為要顧及3針及4針平衡輸出, 呢個設計完全係可以理解的。講開平衡，WA22上既平衡輸出對小弟來講意義不大，因為小弟唔打算改用平衡耳機線，會維持用6.3接頭，一來有說WA22各輸出端既訊號效果其實係無分別，平衡輸出接口係為適配方便，二來小弟個人覺得用平衡連接效果分別不會明顯，因為電流巳被放大，雜訊係耳機線上既應響相對大幅減少，耳機平衡線與非平衡線之間效果差異主要係決定於線材物料既分別(另請參看換耳機缐疑惑一段)，而並非係平衡與非平衡連接之間既分别。請前輩C兄指正提示，以同樣物料製作平衡及非平衡耳機線連接WA22高質訊源耳機輸出，係其他條件相同下, 最終耳感輸出效果會相差多少?
永遠不足的電源
係用電上，電池補完10%電量只可以供給WA22兩節品聽大約6小時，WA22多咗一對功率膽係要用多30W~40W，要高於WA6 SE大约30%，發熱量亦明顯增加，而家冬季無咩大問題，夏天小弟就會加隻寧靜小型USB風提升對流效果，幫WA22散熱。充電方面，以而家既用電量，每用1個鐘，就要充電4個鐘(BatteryMinder 1.5A慢充電，盡可能唔用PB-600既10A充電)，小弟亦要調節一下安排，改為排程00至08每日充電
Tube Rolling
係換膽效果方面，訊號膽影響最大(三頻響應)，其次係功率膽(動態空間)及整流膽(純淨密度)，比例大概係4:3:3。呢個現象同一d網上品評有差異，不過WA22係小弟既環境，其實表現係好合理，因為係配件減震老鼠，保險膽，RCA保護蓋及電池補完作用下，好明顯整流膽及功率膽既影响力減低咗，而訊號膽既效果變化就明顯咗。以前係WA6 SE上整流膽對音質有決定性影響既效果一去不返，不再係咁決定性啦，返而小弟入咗既3組訊號膽Tung-Sol, Ken-Rad同Sylvana就相對變得更有主導性，詳情請參閱另文WA22 Tube Rolling
爐火純青
又講下音質效果，雖然用家手冊裏面話WA22要行番150個鐘先順(break-in)，即係差唔多6個月後，小弟呢個月裏面巳經可以確定WA22聲底。初開箱係比較"燥熱"，由其是配原廠膽管，好彩小弟有老鼠鎮壓住WA22，配埋RCA保護蓋及電池補完，感覺係好似順服駕馭咗一隻"燥牛"，好快就揾到第一個"一體臨場"。心水清C兄或者都發覺到小弟兩隻抗震鼠得番一隻係WA22上面，另一隻其實放咗係逆流器機殼上，小弟發覺咁放效果更好，WA22既"燥火"完全除去，變得有"爐火純青"感覺
真正的升級
小弟而家的確係有從WA6 SE升級既感覺，所升級者唔係話WA22比出更好既終極效果，畢竟小弟追求既"一體臨場"係兩者上係無分別的，而係WA22比出高起點，更高既起始音質，及提供更多達到"一體臨場"既可能組合。再講，小弟亦覺得入WA22係比入WA5合適，係以好玩多變組合而然，至於絶對音質效果，小弟覺得完全體既WA22同WA5應該係各有千秋，WA22既音場空間感應該係無出其右(甚至有d過泛)，WA5經常被冠以"effort-less"來形容佢既力量感，小弟係完全體WA22"終極組合"上就體驗過幾乎係"純能量"既效果(無一舊既感覺，亦無一塊，無一片，無一條，甚至無一點，所似無物質只有純能量場)，懼怕原廠WA5無靚膽同其他配套，都未能有咁既效果。詳情參看另文"終極組合"分解
老實講體驗過WA22之後，覺得係相逢恨晚(如果先入WA22我未必會入WA6 SE)，老問題，會唔會上WA5?! 而家好明顯已經無咗之前果份強烈衝動，不過如果中咗六合彩就一定入。好啦，小弟既長氣WA22開箱及品評文真係要告一段落啦，C兄可以參看其他相關章節留意後續發展
WA22 底噪雜音與背景氣氛
回應黑翼菜鳥C兄提出既問题，小弟特登再用RHA T20接WA22詳聼一次，底噪效果係同小弟其他大耳牛一様。無論係將WA22輸出音量調到最小，或將前級DAC輸出音量調到最小，但保持WA22音量位置，小弟都聽唔出有任何可感到噪音。事實上，之前既WA6 SE亦同樣寧靜，小弟覺得Woo系統係控制㡳噪方面功夫係無話可説
係運作上就有機會出现一d"雜音"，小弟襯呢個機會又分享一下自己既經歷同應對方法。首先，雖然小弟巳經行緊電池補完供電，WA22比WA6 SE敏感，對電器特別係風扇運作容易聽到"開關雜音"。呢個問題小弟準備遲下入d減震抗干擾環，套上d膽管身上，希望可以有好效果 
另外就係同操作方面有關，有d膽係開機後十幾分鐘内，個别聲道都仲聽到有"雜音"，但並不常見，相信同個別膽管質量有關，小弟一般先開DAC，再開WA22，WA22本身已有十幾秒接訊延後，不過小弟一般會開機5分鐘後，先會播曲同調升輸出音量。係熄機方面，就咁突然熄WA22會出現一下好明顯"噗"，久而久之可能對耳機有不良影響，所以小弟習慣會先調到最小音量，試驗過既結果係，等2分鐘之後先熄電係最安全，完全無哂呢d雜音
最後想講下"背景"效果，小弟覺得WA22同WA6 SE所展現既係一種"非常寧靜"背景(寧靜到不能察覺到任何音形)，但寧靜唔代表"虚無死寂"(小弟聽到一d高階耳擴所展示既效果)。WA22同WA6 SE背景好似仍然充積住"接連能量"，就係呢份感應，使小弟覺得系統更有"自然生氣"，係一個"活交流"而並非一個"密封閉"系統
咁當然，可能有C兄會話，呢d咪就係膽管"噪訊"囉!(膽味?!) 對小弟而然，呢種背影唔係噪音，小弟會用聽不到的"䦕放氣氛"來形容，其實已經超出音形範疇，小弟無法用技術同理性再作進一步陳述形容，可能係個人意識深處既一種深刻演䆁效果，或者大部份喜歡膽管系統C兄，其實同小弟一樣，都係不自覺地被呢種魅力吸引住
相關文章:
Project WA22, Woo Audio WA22 極速開箱, WA22一體臨場, WA22 Tube Rolling, WA22終極組合, 玩味 調音工程
利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化同任何經濟利益. 小弟言論只能作為參考, 一切應該以各位C兄自己耳聽為實! |
|
[複製鏈接]
), 一來行咗廿幾個鐘後, 系統可能開始煲順, 二來平衡效果本身亦巳經好飲得杯落. 雖然原配WA22平衡效果超出小弟預期, 但距離小弟要求既"一體臨場"效果, 仲有一大段距離 
