Shokz OpenRun Pro 骨傳導耳機試玩平台: 任試計劃 (第十二季)

vchai

首先多謝 Post76 今次搞哩個活動，多謝 Paul 。

小弟想講吓自己用緊嘅兩款耳機先，我聽音樂用 Sony WF-1000XM4，講電話會用 Plantronics Voyager Edge，佢哋喺嗰兩方面嘅表現都算滿意，尤其 Plantronics，我用咗應該有八年，依然正常，係啲 coating 甩色核突咗啲啫，真係好襟用。Sony 係通話比較差，聽音樂未算係最好，不過兩方面 balance 過當時其他嘅耳機，所以選擇咗 Sony。

入返正題，我從未用過正式嘅骨傳技術耳機，（Sony 聲稱係，不過我唔知算唔算啦），講真連戴得好唔好都唔敢講。一落街首試係個通話，喺條大馬路試就最好不過，對方係聽到我講嘢，不過佢話比較細聲。

到聽音樂覺得啲聲好似好耐以前聽收音機咁，無哂空間感，無乜音樂感，啲聲好薄，最唔慣係啲聲係會令到個單元喺你耳邊震。
再講個操控性，唔係好慣啲掣嘅擺位，可能要適應吓先得。總括黎講基於個聲底我就唔會考慮。

我星期五放工去攞機，今日放工已經還返。好多謝 Paul 嘅安排，最後重追出嚟俾條運動毛巾我。

小瑟

咁快到手有分享呀, 正喎!!!!

wong1032003

多謝Post76今次活動比我先試用耳機,以下係我的分享!

音質方面唔多評論唔係玩過好多耳機,分享主題為"OpenRun Pro 是否適合單車友使用"

耳機

單車

先黎結論! 適合!但有改進地方!

我會用最關注又放棄一般耳機的問題黎試試隻耳機!

安全性&風切聲&音量三方平衡

因為我踩公路車90%都係馬路踩,所以聽環境聲係至關重要.在時速3XKM/H情況下風聲已經開始大聲,在音量80%的情況下先聽很清楚.但冇影響到其他車聲的方位遠近感.
落斜路時速50-60KM/H風聲好大,已聽唔清耳機聲,但唔建議再大聲因風聲太大點都聽唔清

長時間單車運動舒適度

經常團騎路線大冷100KM踩4-5個鐘左右

大冷

獨推踩鹿頸來回共66KM 2個半鐘左右

鹿頸

鹿頸相

隻耳機好輕,十分舒服就算出好大汗,都冇影響聲音.唔夾耳但又好穩陣,用足一日應該都冇咩野.

聲音清晰度

比預期中有驚喜,人聲大約Airpod質數.高音都可以&低音就真係馬馬.低音時隻耳機會震要習慣下
環境大約到75db要開80%聲量,你可以想像其實開緊Specker行出街,環境聲係100%聽到.

踩單車時的通話

我聽對方講係冇問題的,但我行緊30KM/H對方話好大風聲聽唔清,我要慢返到20KM/H先聽到.

結論

它不是一隻大眾耳機,它是一隻針對運動(安全性&配帶舒適)/不適應耳塞(唔會塞到耳窿痛)/超長時間佩帶(長時間佩帶都唔夾耳)/環境絕對安靜的專科耳機!

缺點及改進

UI好難用-全部功能,查電量都要用按鈕&語音控制唔睇住個說明書一定唔記得,如果有APP控制會方便好多
充電麻煩-因為用專用頭,條線一定要跟住隻耳機.如果係Typc-C口加防水蓋會好啲.

9/8/2022 更新

原來有App 說明書都冇講 ,大大增強左操作便利性！

rlmfung

Shokz Openrun Pro 玩後感

多謝Post76給機會試用OpenrunPro藍牙無綫耳機, 其實四、五年前已經用過同類型耳機，這次一帶上，便有天淵之別的感覺，最主要是音質的進步，無論音量及三頻都有不錯表現。

使用體驗

家中：若果坐定定，其實用正式IEM聽音樂始終會好啲，聲音直接入耳道，無雜音當然最好，但當要做家務時(如煮飯，晾衫，打掃，清潔等)，OpenrunPro 就大派用場，可以清楚聽到電話的音樂，電台節目，youtube 之餘，亦可留意到其他人的呼喚或聲音，避免意外。

運動：在gym room 或戶外，一路聽音樂一路做運動，OpenrunPro 可說首選，因為不像IEM(不論有綫或無綫)運動時都有掉下的危險，OpenrunPro 的設計就可避免意外，尤其在戶外跑步或騎車，聽到外界聲音尤其重要。因只有兩個接觸點，就是大汗也通爽，不怕弄濕及弄污。

乘車：聽音樂，OpenrunPro 不是一個好選擇，因為這不是隔音設計，但講電話就唔錯，對方仍能清晰聽到我的說話，並且能接駁兩部機，非常方便。

比較：OpenrunPro 比 TWS 帶得穩陣舒適不會有塞漲耳洞的不適，但隔音不可。比IEM方便，但音色有差距。比其他牌子及款式，OpenrunPro音質更可說 top of the line。

總結

OpenrunPro 有它可取之處及特定的用途，其實不可以和其他類型的耳機比較，但在同類之中則是表表者，設計輕巧(帶上輕如無物，只兩個接觸點便可便可承托整部耳機)，流線型(保護盒也是)，連續使用時間不俗。有apps可控音色偏好，講電話可選偏向人聲。用磁吸式專用义電線，雖然沒有USB-C及micro通用的方便，但勝在快捷穩妥。

小瑟

二位既分享都好詳盡喎！！👍👍

lcwhd

rlmfung 發表於 2022-8-3 22:58
Shokz Openrun Pro 玩後感

多謝Post76給機會試用OpenrunPro藍牙無綫耳機, 其實四、五年前已經用過同類型耳 ...

骨傳導呢種開放式耳機除咗適合運動用，其實都啱中意聽歌但又要同其他人溝通嘅人

同埋開放式長時間戴嘅舒適度都係一般TWS畀唔到

lcwhd

wong1032003 發表於 2022-8-1 18:27
多謝Post76今次活動比我先試用耳機,以下係我的分享!

音質方面唔多評論唔係玩過好多耳機,分享主題為"OpenRu ...

充電的確係一個爭議點，可能做USB C + 防水蓋始終都會增加入水嘅風險

rl0497

經過兩星期嘅試用，總算抽到時間寫一篇分享文，希望唔算太遲！
先多謝Post 76 提供機會俾我試哩隻耳機，首次參加哩種活動就抽中，都算好好運。

我自大約十年前開始跑步之後，前前後後都叫做用過唔同嘅藍牙耳機，不論有線或真無線差不多共十個有多，一路以嚟所用嘅都係入耳式，因為覺得冇咁易甩，聲音表現方面亦會較好，而且一直冇乜其他款式可選擇，直到近年開始踩單車，我又開始覺得需要有一個耳機可以俾我喺踩單車時方便接聽來電又同時俾我聽到出面嘅路況聲音，其實平時用開嗰個入耳式耳機係可以勝任嘅，佢有穿透功能可以令我知道路況，音質亦有一定保證，可惜該款可能因為耳膠膠料問題令我耳道有敏感會出水及痕癢，唔能夠戴太耐，所以一直都希望有代替品出現。其實近來出嘅耳骨傳導款式我都有留意，不過出面舖頭一來少機會試到，二來其實亦唔會試得真，所以今次見到有得試用就即刻報名，廢話少講，直入正題，不過小心長文，請自行斟酌服用！

由收到測試用嘅Shokz OpenRun Pro耳機第二朝起，我就開始咗差不多一連十三日，每日九小時嘅密集式測試，希望可以試得徹底啲，基本上我充完電後，第二朝出門開始就一直戴住個耳機，直到放工後返家先至除，每日如是，而假日出唔到去出面運動都會喺屋企做運動戴住佢作測試，其實首日測試嘅時候，個心係涼咗一截嘅，乜啲音質咁嘅？！點解又咁細聲嘅呢？！

當日一早出街步行返工，我係聽得係幾辛苦嘅，因為佢真係好細聲，就算推到聲音最盡，都一樣聽得唔清楚！聲音好容易俾街上嘅噪音蓋過！不過後來我發現咗係我喺電話入面嘅一啲系統設定做成哩個問題，哩個我會喺文末再作解釋。

之前我一早已經喺我用緊嘅iPhone入面裝好咗Shokz App，見到有Multipoint Pairing，由於Shokz OpenRun Pro嘅藍牙版本係5.1嘅，即係代表可以同時駁住電腦聽歌同駁住電話接聽來電，所以返到公司我就將Shokz OpenRun Pro接駁公司部電腦，接駁過程順暢，基本上冇任何問題。

身為上班族，我平日需要同總公司用MS Teams開網上會議，測試嘅首日已經有咁嘅機會用到Shokz OpenRun Pro嚟通話，全程話音清晰，對方亦聽得我講嘢好清楚，而之前我曾經提及過好細聲嘅問題，係完全冇出現過嘅！

而有一點我好滿意嘅係，接駁電腦聽歌期間，我間中亦會離開座位，離開咗十多二十米範圍外接收仍然順暢，係去到一啲牆壁後就會斷線，不過當進入接收範圍後，佢會自動駁返同繼續播歌嘅，雖然哩個功能係普通藍牙耳機都可以做到，不過佢接收嘅半徑我覺得比我用開嘅款式遠。另外當我同時駁住電話同電腦，當電話有來電時，佢亦都會自動跳去電話嗰邊，當接完來電後佢又會跳返去電腦嗰邊播歌，今時今日嚟講其實唔係乜嘢新奇功能，不過佢嘅順暢度係非常好，從來冇跳唔返去電腦嗰邊播歌嘅情況，其實用得多有Multipoint Pairing功能耳機嘅朋友就會知有時有啲耳機係會跳去另一邊後又駁唔返另一邊，但係試用十多日中Shokz OpenRun Pro係完全冇咁嘅情況，我亦發覺其實Shokz OpenRun Pro非常適合喺辦公室內使用，因為平日我喺公司係用一個耳罩式耳筒聽歌，不過有時聽得太投入，喺工作時聽歌期間如果有辦公室內電話響又或者有同事叫我，我係成日都會聽唔到嘅，但係Shokz OpenRun Pro就冇咗哩個問題，因為耳道冇被蓋住，身邊有任何聲音你都會即時意識到，哩個亦都係耳骨傳導嘅最大優勢。
不過講到接駁電腦方面，佢亦有一個小缺點，就係到我第二朝返到公司開着枱面電腦，Shokz OpenRun Pro係唔識自動接駁我部電腦，每朝我返到去都需要我作手動操作再接駁（毋需再作Pairing），我認為係一個小瑕疵嚟，不過我深信會喺日後有固件或軟件更新應該可以解決嘅。

既然哩個耳機定位係運動用嘅，冇可能個測試會一路喺室內，可惜嘅係原本打算去踩單車時測試，但係天公不造美，想做踩單車時嘅測試就做唔到喇！好在一星期後天氣好好，終於可以用另一種運作去作測試，就係跑步喇！

由於我一直都算幾依賴聽歌去幫助我跑步，而我跑步時都係只會聽J-Rock嘅，因為強勁嘅低音同節奏對我嚟講係好大嘅推力，但係去到哩環，Shokz OpenRun Pro嘅弱點就非常突顯喇！其實運動耳機嘅定位，一般嚟講只要低音夠勁，中高音唔太差嘅就已經合格有餘，始終運動用耳機嘅要求唔同Head-fi，但係Shokz OpenRun Pro嘅低音就非常之弱，近乎冇咁滯！！對於我嚟講，佢只係做到發聲，雖然聲音好清晰，喺我跑緊街時亦幫助到我聽到路況，但係因為冇低音，可以話喺以聲音作我嘅助力嚟講，佢係唔達標嘅！我諗哩個應該係一個骨傳導耳機嘅先天缺憾嚟！

至於喺配戴後跑步時，因為機身輕，輕到幾乎你唔多覺佢存在，所以亦冇任何晃動或走位，佢係夾得緊但係完全冇令你唔舒服嘅，另外因為天氣勁熱，我試過戴住Shokz OpenRun Pro時搵水照頭淋都冇影響佢嘅聲音同運作，防水防汗方面合格有餘！


不過如果你好似我又四眼，又戴帽，又戴哩個耳機，又用我哩種束繩式運動口罩嘅話，你就會感受到哩種耳機嘅既係優點亦係缺點嘅設計喇！

Run_Mask

因為佢嘅設計咁樣，好容易同口罩嘅繩纏埋一齊，當你要除口罩嘅時候會好論盡！但係我唔可以話哩種設計完全係缺點，因為當我唔想用耳機嘅時候其實係可以除落嚟掛喺頸上，但係哩方面，所有真無線耳機就冇可能做得到！同埋真無線耳機好容易因為晃動或者喺你踩單車除頭盔時整甩，Shokz Openrun Pro就冇哩個問題，正所謂「針無兩頭利」，的確係千古不二嘅道理。

運動同出街時嘅通話方面，平日放工喺街用Shokz OpenRun Pro講電話，又或者跑步時講電話都一樣話音非常清晰，通話對方亦都聽唔到我背後嘅噪音，我深信廠方喺抑噪哩方面下咗好好嘅功夫，哩方面值得一讚！


Shokz OpenRun Pro嘅另一值得大力讚賞嘅地方係佢充電方面，我個人好欣賞佢充電線同充電位嘅設計，充電線為磁吸式，雖然哩種專用線如果你唔見咗會好麻煩，但係亦因為係磁吸式，基本上你將條線放喺充電位附近佢地就會自然合體，省卻你對位嘅麻煩，同埋我覺得佢設計係為咗防水方面做得更好。我甚欣賞耳機嘅保護盒，佢有一個地方俾你放充電線，我覺得設計係好貼心嘅，善用該設計應該可以減少遺失充電線嘅機會嘅！


而充電嘅速度亦令我非常驚喜，一般嚟講充電大約一小時已經可以充飽充滿，跑步測試當日前一晚耳機嘅電量得返3%，但係第二朝我去跑步出門前做一次緊急充電，充電半小時已經見佢變咗82%，我諗就算我落街跑一個全馬都足以應付有餘！續航力方面更見突出，廠方聲稱有10小時續航，但係我喺十三日嘅測試得出嘅結果係同廠方所講有出入嘅，雖然我冇認真計算，不過一定有十二小時嘅續航力，甚至亦試過有十三個幾小時添（一日九小時測試加另一個半日嘅測試先至冇電）！電力臨近跌至10%以下時，耳機會有語音間中發出（Charge me! Charge me！）提示！而平時如果你唔聽歌又開住個Shokz OpenRun Pro，只要撳一撳音量加大掣佢就會有語音講出而家嘅電量係高定低，哩個設計亦見貼心，唔使下下開app或電話睇電量。如果你係iPhone用家嘅話。耳機嘅電量資訊都可以透過iOS嘅Widget睇到，我覺得哩方面整合得不錯，Android方面我就因為手上冇 Android電話所以測試唔到。


臨近文末，講一講軟件方面，廠方所出嘅Shokz App，其實功能非常陽春，除咗接駁咗可以睇到實際電量同開關Multipoint Pairing之外，其他功能可以話係可有可無，佢入面嘅所謂EQ mode，其實只有Standard 同Vocal俾你揀，Vocal係想喺你講電話時話音清晰啲，但係我覺得係冇實際作用，因為本身佢嘅話音已經好可以接受！就我個人而言，哩個App可以不理，就算唔裝，亦都唔會影響到耳機嘅運作（包括Multipoint Pairing哩個功能）希望日後廠方可以加強個app嘅功能喇！



至於文首我曾經提及過開頭試用嘅時候聽得好細聲好辛苦，後來我發現咗一個原因，雖然我深信絕大部份嘅iPhone用家未必會觸及哩點，不過我都想提一提嘅，就係因為我一直都用開入耳式耳機，為咗保護聽覺，而iOS亦有一個保護聽覺嘅功能，開咗佢之後，佢就會限制咗所有你接駁耳機嘅最大音量，我亦都好穩陣一直都開住哩個功能，後來我發現我只需將有關嘅限制解除，又或者將個最高限制音量再推高，咁Shokz OpenRun Pro嘅聲就出返晒嚟喇！雖然對音質嚟講冇任何幫助，但係至少搵到唔夠聲嘅原因，同埋我覺得用佢聽歌係要比平時你聽開嘅音量至少推高多兩格先至會夠聲嘅！


好喇！長文嚟到結尾，總結一下用後感，我覺得如果你想要一個輕便、續航力強、防水防汗到家嘅耳機，又可以同時兼顧聽音樂而又俾到你知道身邊情況嘅安全感，而你本身對於音質要求唔算太高，但求有音欒陪你做運動或返工嘅話，Shokz OpenRun Pro的確係可以列入可作考慮之選嘅！至於如我，對有冇低音有啲執念嘅人嚟講，佢未必係你杯茶！畢竟哩樣都係一個取捨嚟，骨傳導技術暫時都未做到入耳式嘅音質，不過所謂科技日新月異，難保日後廠方真係出到一個有強勁低音又可有安全性兼備嘅產品都未定！如果日後真係有相關產品，希望Post 76可以又搞一次試玩活動就好囉！

最後要再多謝Post76提供試玩，更加要多謝阿Paul唔嫌我麻煩為我配合交收各事宜！多謝晒！

lcwhd

首先多謝咁多位版友參加今次Shokz OpenRun Pro骨傳導任玩計劃！各位嘅使用體驗相信可以幫到仲心大心細緊嘅版友～

經過廠方一番討論，今次Shokz OpenRun Pro任試計劃嘅優勝者就係版友：rl0497 ！恭喜恭喜！記得留意PM，我哋會有專人聯絡你有關領獎事宜架～

rl0497

上星期收到阿Paul嘅通知話我中咗今次試玩活動嘅獎，非常開心，諗住坐喺度等收獎品，點知第二日阿Paul再搵我，我以為係通知我代理寄出咗禮物，點知唔係！！

原來阿Paul話我聽代理好喜歡我嘅試玩報告，決定將獎品加碼！大約過咗兩日，我收到兩份嘢！

Gift

代理除咗送出藍芽喇叭外，亦送咗啲運動袋、手袖同腰包，仲有一舊行動電源，好豐富。

不過阿Paul之前仲話佢地會送埋哩樣俾我！

Shokz

係當日試用嘅耳機！真係好受寵若驚，亦都覺得好意料之外！雖然個耳機並非我理想嘅耳機，不過我亦將哩份歡樂轉贈咗俾當日幫我影跑步相嘅嗰位老友，最緊要大家都開心。

嚟個全家褔先！

Gift_Full

喺度再次多謝Post76俾個機會我試玩，亦都好多謝Thinking Group嘅慷慨同賞識我嘅拙文，希望各位網友日後見到哩啲試玩活動踴躍參與，咁Post76同各大代理先有動力去搞多啲哩類活動等大家開心試玩一下嘅！