《Ratchet & Clank: Rift Apart》遊戲速評

阿定

《Ratchet & Clank》系列其實已經有一定歷史的了，不過香港比較多人熟悉的，應該係早年係PS4推出的 《Ratchet & Clank》 (PS2重製遊戲)吧。

其實我自己都無玩過之前的任何集數的，不過見到遊戲係PS5獨佔，加上今集遊戲有針對PS5幾個最重要的新功能來設計，(自適應扳機，觸覺回饋，Tempest 3D AudioTech)，加上係之前推出《Spider-Man: Miles Morales》 的 Insomniac Games (PS Studios旗下工作室)出品，所以就抱著一試PS5新功能的試機Game心態開來玩了。



遊戲主線係講主角拉捷特和克拉克一起穿梭不同次元去對抗另一個世界的邪惡暴君，途中係另一次元遇到神秘的隆巴克斯角色蕾薇特後展開雙人合作解救宇宙危機，不過佢地同時出場的機會係接近零，所以玩家只會輪流操作佢地其中一個角色，本作絕對係一隻100%單機Game來，無雙打亦無Online Co-op。



遊戲內有大量不同種類的武器，有近戰用，有遠程用，有自動輔助型等等，玩家可透過遊戲中不停收集回來的螺絲貨幣購買新型武器，每一種武器除了有唔同用法外，就係全部都對應DualSense的自適應扳機同埋觸覺回饋，唔同武器要用唔同的力度射擊，唔再係以前PS4年代狂按鍵咁普通，手感比以前來得真實好多。



武器除了要係遊戲內尋找拉利安金屬用作升級外，使用次數亦係升級條件之一，所以雖然隨身的萬能扳鉗非常(無雙)好用，但我個人仍建議多點使用不同武器，加快升級進程。



遊戲內亦有唔少支線任務，除了可以贏取更多螺絲及拉利安金屬外，仲會有新裝備提供，換裝可以加強攻擊/防禦力，不過說老實，遊戲本身就唔算太難，換裝都係以改變外觀為主。



遊戲畫面雖然係走卡通風，但畫面絕不馬虎，無論毛髮的細膩度，開啟了光線追蹤效果後的機械人反光位，來回宇宙間的黑位場景，絕對對得住4K HDR品質的遊戲介紹。



以下影片為最終決戰的Boss戰，如果有興趣了解戰鬥模式的朋友，可以Click來睇下，因為遊戲本身劇情就好似睇卡通片咁直線，所以只要唔睇最尾個兩分鐘都唔會戲透，就算睇埋最後個兩分鐘都唔會影響遊戲劇情就是。



遊戲有拍照模式，見到有趣的場景可以按停慢慢影相同加貼圖執靚佢，提提大家，遊戲進度去到咁上下，角色頭部可以改大改細，改到大頭公仔咁影相都得架



遊戲聲效方面，因為支持 Tempest 3D AudioTech 技術，所以立體感超強，唯一可惜係此3D音效必須配備相容耳機，如果用開家庭音響的朋友就可能會有少少失望了，我自己今次就特登放棄用Hi-Fi，換上耳機來玩了。



遊戲爆機大約需要十多小時，唔算好長，全收集應該大約二十小時，遊戲製作人之前係訪問有提過，今次白金盃會比較容易完成，因為唔太想玩家浪費時間不停重複遊戲的收集任務，我個人建議可以先好好享受一次遊戲後，待完成遊戲後開啟「挑戰模式」慢慢清支線，就算已經開啟了「無限 HP」及「無限子彈」都唔會影響收集獎盃，每一個關卡都可以係返回飛船時檢查有無漏野未收集齊。



總結: 遊戲簡單易玩，大人同細路都適合玩，武器變化多端，操作容易，解迷小遊戲亦做得好有心思，遊戲畫面除了非常靚外，速度感亦十足，受惠於PS5強勁的機能，4K60P下完全感覺唔到有掉Frame的情況，不過遊玩期間遇上不少死機Bug，幸好每次死機都同失手跌落異次元空間有關，唔太影響存檔進度，加上SSD快速載入功能，重新開始都係轉眼間的事，呢隻遊戲真心推薦比PS5機主，因為PS4的機能真係做唔到呢種爽快感覺，個人認為係Astro's Playroom後最佳的PS5試機遊戲。

相關文章: [電玩新聞] PS5 遊戲軟件《Ratchet & Clank: Rift Apart》將於2021年6月11日推出