Sennheiser IE 900入耳式耳機 - 試玩平台: 任試計劃 (第十一季)

影音小編輯

【 Post76返歸玩 + 耳機店 ：試聽活動 】Sennheiser IE 900入耳式耳機 - 試玩平台: 任試計劃 (第11季)

今次我哋會聯同 Sennheiser 耳機品牌合辦旗艦級耳機 Sennheiser IE 900嘅試聽活動，亦係我哋首次跳出科林返歸玩，將試聽活動擴展至眾多耳機門市，除咗以往76會員可以通過討論區參與之外，大家更可以在一連六星期在指定地點親身體驗到全新旗艦發燒級耳機 Sennheiser IE 900。

新鮮熱辣剛剛公布嘅Sennheiser IE 900 市面上仍未有售，大家已經可以通過今次嘅活動優先體驗。 而且不論係通過我哋 Post76 討論區 ，抑或親身落實體店試聽的所有耳機發燒友，也可以在我們這個活動帖發表你哋對Sennheiser IE 900嘅聽後分享文章，而在 6月27日 23:59 截止後， 廠方將選出一位最有心思分享嘅朋友，佢會得到一隻 Sennheiser IE 300 作為獎品。

即係大家係街聽完。。。再係呢個PＯ分享聽感就已經係參加活動架勒！有興趣嘅朋友記住黐住呢個post，我哋會繼續為大家update ~


小瑟都已經同大家拍左條IE900評測分享,
如果大家想了解一下大既IE900的特性, 可以去以下Youtube睇返呀!




A）Post76 會員返歸玩
同以往一樣，有興趣嘅會員可以在這個帖下面留言報名，每位參加嘅朋友可以有兩星期時間帶回家試聽，詳情我們會有同事個別與你們跟進

B） 實體店試聽
首輪試聽日期：5月14日至5月27日
首輪試聽地點：
（港島區）Let's Go Audio 音響部 - 灣仔電腦城 267 & 269 號舖
（九龍區）DMA 泛音 - 旺角星際城市 219-223 號鋪

* 第二輪實體店試聽將稍後公布

更多關於 IE 900: https://zh-hk.sennheiser.com/ie-900

*受條款及細則約束。活動奬品數量有限，送完即止。

karshun0206

很有興趣試玩IE900．

Jerry_Banana

有興趣

nocyot

作為 ie800, ie800s 用家，這次的試玩真的吸引我，我也想知道有甚麼不一樣？我報名 🙋🏻‍♂️ ！

ghhf

小弟排隊試聽 IE900。先出口水Blog文霸定位: Sennheiser IE 900 試聽分享。

後記：雖然未能抽中返歸試，要聽多幾次咁解，無阻小弟參予


Sennheiser IE 900 試聽分享

利益申報:
小弟無意吹虛個別產品, 試聽分享純粹係係個人特殊環境, 器材, 偏好趣向, 高低優劣, 仍小弟主觀及忠於自己有限耳感下, 對音質體驗既個人感受舒發, 並不涉及政治, 文化及任何經濟利益. 小弟言論只能作為參考, 一切應該以各位C兄自己耳聽為實!

嘩！嘩！嘩！大日子呀！2021年5月，大廠出旗艦入耳式耳機！Sennheiser IE 900，眼前一亮，小弟點可以錯過唔試聽！



小弟直覺會有驚喜！究竟IE 900可唔可以感動小弟？可以感動到咩程度？小弟對佢既評論又有幾欣賞？幾苛刻？

話說小弟早已同Sennheiser結緣，當年入咗HD 800，係炙手可熱既旗艦級耳牛，造型非常前衛，而且音色獨特，之後小弟又嚐試HD 600另一款經典味道，不過咁多年都未玩過佢既IEM入耳式耳機！


一體三腔

仲未試聽，先去官網收料摸吓底，究竟有咩突破性設計。有兩段官文可圈可點，小弟引述其中精要作為參考，試聽後睇吓係咪真有過人之處，還是只係市場推銷噱頭？

IE 900 更似IE 300，新世代一殼體式同換線設計，但係內部結構截然不同，同 IE 800S 更加完全係有隔代性既不同產物。IE 900 用咗 Sennheiser 最新既 7mm 動圈單體設計，新式無塗層聚合物振膜同音圈，最特別係全新既 X3R 技術，透過三個諧振腔體，聲波漩渦機制，使聲音能夠穩定收束。目標係實現一個無凸峰同凹谷起伏、平衡且通透聲音響應，同時強調具備中性、透明、自然及低失真音色。


未聽先判

雖然小弟對Sennheiser IEM暫時係零體驗，但係以小弟既聰明智慧，完全可以作出合理性既預期，C兄睇完先再話小弟英明神武！

自我抽水之後，要比出第一印象，小弟先以貌取機，IE 900係好靚仔！銀灰低調主色，再加埋充滿金屬質感，流線形簡約體腔設計，完全就係小弟杯茶！IE 900咁靚仔有型格，小弟決定幫佢出呢篇口水文鉅著！

再睇IE係列，其實設計都係一脈相承，睇得出今次新旗艦級既設計，基本上唔係食味方面既大革命，一體三腔亦唔可以算得上係完全全新技術性突破，可以睇成係現有雙腔技術優化改良，將完全體現係音質方面既提昇！

配合其他細節上既進一步改善，人工組裝配對左右音頻元件，以Ultimate precision, made to last作為對要求絕不妥協承諾，可以放入一個IE 900新階層級型號，而唔係IE 800Z，亦唔係800與900之間一個數型，可以合理推論，IE 900既音質輸出即使現有IE 800S玩家，亦會體驗其中明顯既增進！


愛恨換線

對於IE 900改用私家版Fidelity + MMCX接頭，因而未能將原廠線改換成小弟現有線材，係適用性方面的確係一個弱項，網上亦有唔少相關評論！



想用些少篇幅分享體驗及預期，小弟既Z1R亦係有類似一個特別深凹既MMCX座身設計，基本上係又愛又恨！恨者，換線難又會夾食短身頭！愛者，慢慢發現，原廠線其實真係好正，最終明白設計者初心，對於主玩食味既Z1R，對線材似乎非常敏感，換咗線既Z1R就無咗果陣味道，甚至發揮唔到原來應有性能，巳經唔再係Z1R了！

IE 900似乎都係走緊Z1R同一條路，用適用性換取最優質量性能！小弟預期，IE 900對線材亦係敏感，換咗線既IE 900好大機會感覺就巳經唔再係IE 900了！設計者有着同樣既執着心思！既然入手IE 900，就唔好埋沒佢既獨特性格！


名譽之戰

同市場上其他旗艦級耳機既大口徑多單元唔同，Sennheiser 入耳式高階耳機一直堅持沿用一個動圈單元設計，IE 900亦承繼經典單動圈單元設計基因，面對市場激烈競爭，係一種要自我肯定既名譽保衞戰！



小弟認為當前既IE 900可以視為現有技術最新最成熟既結晶品，必定唔會差得去邊！小弟同時相信，IE 900亦會與小弟現有Sony IER-Z1R及Shure SE846非常唔同既品味效果！意味住對小弟來講，IE 900帶來驚喜係必然既！

IE 900既出世生不逢時，正值COVID-19病疫，世界經濟受到打擊有待復原之濟，似係形像工程多過實際營利效益。考慮到IE 800S市價大約係0.5W，官方既IE 900定價位係1.1W，出文時仲要預定，似乎係比較進取。有信心係好事，有實力先係最重要！睇吓IE 900可唔可以成為新一代經典！


市場對手

唔知點解，小弟覺得IE 900係有些少衝住Z1R而來，定位定價都係同一個市場層級，連個MMCX接頭都一樣要優化埋，又係一體式金屬外殼，連線材整體銀灰主色調都好接近，似乎真係有唔少“巧合”，就咁睇IE 900直頭係Z1R纖體潮版！

小弟口水文中有關Z1R評論，一再反復強調佢輸出既淨質量，係成就Z1R鮮活感性效果既關鍵，再配合“淳恬均衡”，Z1R係“味王”當之無愧！睇番IE 900自己推銷既賣點，小弟用簡單兩個字就可以點出佢地相似，要直接競爭既範疇 - 細膩！

咁當然，單靠淨質量細膩度，就想贏得小弟歡心，無咁簡單！最終係整體意像既雕塑演繹，同時能達到“感性均衡”，小弟要求既“一體臨場”效果！拭目以待！


耳聽為實

性價比值唔值？網上睇到一段有趣評論，“..... IE由我讀書到而家就黎中年都仲係動圈，即係萬幾蚊叫人買動圈又真係有點兒那個 .....”，小弟個人其實唔會去特別取捨技術方面應用，那怕就只係單動圈！黑貓？白貓？捉到老鼠就係好貓！小弟只在意最終輸出效果，一切耳聽為實！聽完再講！

另有傳說，Sennheiser將出售消費性產品業務，IE 900可能就變成係經典“遺作”，有買襯手咁話！小弟唔係善男信女，唔玩模拜名牌獻金呢味嘢！只睇實力！好明顯，即使有驚喜，要過小弟呢關，都係絕對有難度！因為已經有Z1R同SE846！呢期小弟最鍾意講，IE 900一定要使小弟懷疑人生！勾到小弟條“痴根”先係真理！


斷市高潮

話說出文時，小弟想係聽IE 900之前，歧途先聽了解一下即將成為“前度”既旗艦IE 800S，但係無得試聽，因為全城缺貨，買都要訂！無他，原來做緊幾乎半價唔使0.5W，似係要錢唔要貨咁既姿態！係咪預示停產期不遠？！唔排除有忠實Fans見大減價，逆市襯底吸納一代經典？！

對小弟來講，應該唔會跟大堆吸納 IE 800S，但係如果因為斷市停產而絕緣試聽機會，的確係有些少遺憾！到時可能要向IE 800S玩家借機交流！


未聽先估

試聽會沿用小弟既鋼磚iBasso DX220 Max，以4.4輸出推IE 900，第一音韻會係點？有無驚喜？甚至剎時中毒？小弟其實都有一個基本預感，今次玩未聽先估，睇吓之後係唔係會對現！

小弟直感IE 900會係屬於“緻密深淨”一類音色，相對於Sony Just ear及Z1R既“淳”味，IE 900會傾向“恬”味多些少，同時有些少偏冷，唔會算係容易推動，用大氣又大力既鋼磚夾佢，小弟覺得係會有唔錯既匹配效果！

小弟會係“淳厚悠盈，恬深淨密”各項元素方面去評審IE 900。當然，最精彩部分就緊係唔少得小弟既主觀獨家意像體驗分享。IE 900可以達到小弟體驗標準邊個級別？


配對鋼磚

小弟今日襯有些少時間，去咗老地方試聽IE 900，用鋼磚推過程大約係一個鐘，聽感可以概括成“一奇，一喜”，究竟係咩奇咩喜？



IE 900既第一音係驚奇既，因為完全打破小弟之前對佢音色預期！

首先，IE 900係非常亮麗，比Z1R更亮。用鋼磚4.4輸出連接，就算係低增益設定，電平器大約去到2點位置，巳經完全無難度，睇落IE 900唔算得係難推！IE 900呢種亮麗同Just ear有非常差異，後者係一種“均亮”，前者係一種明顯要突出主體既聚焦投射光度。

其次，IE 900既底色，唔係偏冷，亦唔算走向恬，相反，係有暖感，有些少淳，但又未去到Sony咁重口味。即係話呢，係食味方面，IE 900相對上就係比較中和。

小弟用驚奇來形容第一感，係覺得IE 900咁纖細體腔，上手感覺比齋睇圖片，更似要靚唔要命果種瘦身骨感，竟然一開聲就係先聲奪人，甚至有些少嗆！同佢低調偏cool既整體外相，有好大對比！

至於驚喜方面，就係絕對既音質，小弟必須承認，係完全拍得住Z1R果種淨密，及深黑背景既效果。

再講一下分析力，明顯係要勝Z1R一籌，聽到多些少細節，同樣有細膩感，不過中高頻就有些少“明刻”。係空間感方面，亦係開放無邊際，雖然感覺到有分離度，整體音場相對集中，正如前一章提到，主體係非常突出貼身！

係音像雕塑方面，線條修飾有立體感，低音收放控制傾向潛深不乏彈性，有一定淳厚，悠盈感比較平和，有氣動，但唔算得係大氣。好明顯，IE 900係食味方面，並無太多着墨，但係音頻輸出淨質量方面，應該係落咗唔少功夫，無令人失望！


配對黑磚

隔咗兩日，小弟再去另一個老地方試聽多一次，不過今次係借店長機配IE 900，係黑磚Sony NW-WM1A，呢個係一個有代表性既組合，得到既效果又有咩唔同？配上黑磚既IE 900表現，又係奇與喜各一！



繼續分享之前，小弟又要再一次讚賞IE 900輸出既淨音質！配上黑磚，超過Just ear，就係Z1R既級數！C兄睇番前文，除咗“正斗”兩個字之外，小弟無嘢可以再講！

再來一個奇，咩咁奇？IE 900配上無咁重口味黑磚，竟然出到“淳厚”既效果，就咁聽仲以為聽緊Just ear Listening版，係一種“淳化”既 Sony音色，係小弟既印象中，完全想像唔到係一隻Sennheiser牌子耳機既演繹，不但豪無冷感，甚至有些少過熱！音場開闊鬆容，同時亦提升咗氣場，有能量感既動態表現！

又來一個喜，小弟豪無疑惑，同樣以“淳厚悠盈”形容當前IE 900配黑磚效果，意味住小弟開始收到意像建構訊息！IE 900接上黑磚之後，雖然唔似得Just ear WM1係一個即時既“一體臨場”效果，但係演繹相對均衡，亮麗貼身，已經可以達到小弟標準既“欣賞”級別！


配對KANN

小弟再三試聽IE 900，今次又去咗另一個老地方借機配對Astell & Kern KANN ALPHA，效果又如何？真係值得一再試聽！係暫時小弟聽過最好效果，而且係一個既有代表性，亦係值得期待既組合！



係繼續之前要，小弟要再三讚多一次 IE900既淨質量輸出！嗱嗱，小弟無意sell嘢，純粹係忠於自己聽感既分享！

首先，相對之前兩個配對鋼磚同金磚“淳”味效果，呢個組合就明顯體現到“恬”既特性！可以講得上係“淳恬交融”，接近平衡既演繹。係具體表現上，如果前兩者係“開闊鬆容”，咁IE 900配KANN就有返“深透淨密”，主體成像更有立體感，完全可以感受到S型曲線身栽！

係背景暗黑位置處理亦討好得多，整體效果有穿透性，甚至感覺到晶瑩感！事實上，音樂感及感性方面既演繹，特別係女聲，富有磁性感染力！低頻音原亦收得貼身，下潛時更有層次感，動態亦明顯有相應提升！

小弟話對呢個配對有期待，係因為整體評價效果已經達到小弟既“欣賞”級別，而且前境“正面”！即係話，小弟感覺到隨住推煲時間增加，好快可以去到“感動”級別，甚至有機會達到小弟要求既“一體臨場”終極效果！

IE 900接上KANN，睇來係所有AK DAP，似乎係一個比較理想既匹配。對 IE 900有興趣既C兄，小弟覺得一定要試聽呢個組合！


對比Z1R

聽過 IE 900之後，小弟可以更加確定前文預期。係一方面，從外相內音各種跡象，覺得IE 900的確有些少玩市場針對Z1R！話哂佢纖輕機體，可以成隻嵌入耳腔，以非CM耳機既貼耳隔音性能，真係無嘢講。另一方面，如果IE 900真係擁有拍得住Z1R既“超動氣量”及“無限細膩”性能，小弟會豪不猶豫就帶咗佢返屋企！

IE 900無可能就咁同當打開咗聲Z1R“鮮活感性”既“一體臨場”比較，完全係未到火喉！魔鬼當然就係細節，除咗技術性淨音質及分析力之外，相對Z1R效果，係其他各方面，例如整體伸延性，深度及穿透感，音樂感，音像雕塑細膩度，面線條順滑質感，迅微動態，淳恬均衡，感性均衡，都仲有一段明顯距離！


對比SE846

雖然小弟認為IE 900既市場針對對像係Z1R，不過都用一節篇幅，比較SE846異同。簡單一句總結，IE 900係玩淨質量及味道，SE846就係玩均衡及直白。

首先，兩者最明顯分別，係整體音色方面，IE 900係屬於暖厚味道及強調主體既演繹，SE846相對就係中性平衡比較淡口味。係技術性方面，無論係淨音質，背景空間感，音場開闊及深度，立體感，IE 900都要勝一籌。咁IE 900係咪贏哂？

當然唔係！SE846聽落比較有協調性及音樂感，感覺上可塑性高，即係容易配唔同音源，未必次次驚喜但容易產生舒服效果！小弟個人覺得SE846呢種“直白”演譯，非常適合做監聽及比較評價唔同DAP，亦係當初小弟選佢作為經典試聽大計耳機原因！即係話呢，如果有幾部DAP放係面前要比對品評，要用一隻耳機作為輸出參考，小弟唔會搵IE 900，更加唔會搵 Z1R，而係SE846。


現任前度

今次試聽不足之處，係未有機會直接比較“前度”及“現任”，暫時只能係網上睇到IE 900及IE 800之間異同評論，小弟無意重覆，講多幾句廢話當交功課！

正如之前預期，IE 900主要唔係音色食味方面既革命，而係淨音質，分析力及層次方面既明顯提升。一句講晒，就係HiFi感，IE 800就相對比較有模擬味道！

有機會小弟會爭取試聽IE 800，作為一代經典，值得品味一吓，小弟之後再補充呢篇口水文。


試聽小結

現實就係極高難度，一如預期，IE 900未能使小弟即時懷疑人生，小弟暫時亦未體驗到IE 900既獨特意像。咁當然，三兩次幾個鐘既試聽，只能算係皮毛體驗。可以肯定既係，唔係果種剎時感動，一聽鍾情既緣份！

至於最大疑問，值唔值呢個問題呢？出文時收到風，IE 900預訂情況有一定進度，而且係有限量，餘額無多咁話！唔理係唔係市場策略，玩刻意泡製排隊搶購潮？小弟都無任何情意結，今次選擇唔直接回答或分析，但用行動表態！唔會預訂IE 900，有時間會再去聽多幾次，繼續關注，有麝自然香，時間最終可以說明一切！

issachar

有興趣呀, 我對 SE846 就黎分體.....

iamraymond620

小弟都排ie900旗艦耳機

!老坑!

很有興趣試聽一下ie900！

richardx

我都有興趣想試玩IE900

Tekinlam

小弟現有ie800s和ie500 pro, 都想試聽ie900.