Shure AONIC 3, 4, 5 ,50 試玩平台: 任試計劃 (第八季)

karshun0206

首先多謝主辦POST76及代理Qool舉辦AONIC 3, 4, 5, 50試玩活動。

今次試玩型號就是黑色版AONIC 50

AONIC 50包裝

AONIC 50 圓型包裝盒，相當搶眼。

AONIC 50 耳機

AONIC 50 耳機，外型簡潔，加上堅固金钃支架，感覺相當紮實。

本人使用器材是Onkyo Granbeat DPCMX1，Sony ZX300，I phone 6s plus。平時喜歡聽中文/英語Pop Music, Jazz, JPop (包括動漫)。

AONIC 50 (A50) 使用50mm釹磁鐵動圈單元。功能方面，支援主動降噪，環境聲模式（可在不除下耳機聴到外界聲音），無線連接支援Bluetooth 5.0（包括aptX、aptX HD、aptX LL、LDAC、AAC、SBC）。

首先是AONIC 50開盒，A50外型簡潔,左右金屬支架堅固紮實，感覺相當耐用。配載感非常舒適及長時間配帶仍舒服，即使自己屬大頭類型仍很舒適完全沒夾頭。耳機左邊有2.5mm插頭使用跟機2.5mm to 3.5mm耳機線接播放器。而右邊是實体鍵 (包括主動降噪 / 環境聲模式開關，音控，播放／暫停，PREV／NEXT，接聽電話，開關／藍牙配對等。) 及USB C (除充電外，亦可接駁電腦或手機等裝置，最高支援32BIT/384kHz PCM)，操作簡單易用。另建議主動降噪 / 環境聲模式開關如可改成弧型配合手指弧度，就可更加容易，快速操作。

另外經APP Store下載ShurePlus PLAY, 查看耳機連接狀況，電量,使用中的Codec等資訊，亦可調控環境聲模式量，有11段可調.主動降噪可選擇正常/最大。 此APP會自動掃描播放裝置內儲的歌曲,暫時支援WAV/FLAC，同時亦是音樂播放APP，5個預設EQ及自訂EQ。
此APP穩定簡單易用，功能未算豐富，支援格式不多.有很多進步空間.

降噪方面,在街上使用正常模式，已有理想現. 辦公室裡其實都有很多噪音，例如門口開/閥咔咔聲，交談聲，物件擺放聲還有私伙按摸椅機械聲等，測試時在辦公室裡降噪開啟最大，效果非常理想，有效提升聆聽表現。

日系動漫歌曲

AONIC 50聆聽日系動漫歌曲非常動聽，人聲跟樂器處理是它強項。

Adele專輯

Adele是我最喜愛女歌手，其中最喜歡就是"Chasing Pavements"，從AONIC 50可感受細膩情感演繹 。

聲音方面，聆聽前先給用A50大約8小時熱身，但低頻仍薄聲，之後經超過60小時煲機，聲音表現完全進入狀態。測試使用Onkyo Granbeat DPCMX1經aptX HD串流TIDAL播放。
人聲跟樂器條理分明，中頻、人聲清晰明亮、線條流暢，開揚，暖聲,屬埋身而又不是非常貼耳那類，感覺人聲位置恰到好處，樂器結像優異。用Tidal聆聽Adele “send my love” ,  "Make you feel my love”, “Chasing Pavements“ 歌手在曲中細膩情感演繹，A50都能充份表達。低頻雖不是非常非常強勁澎湃，但有豐富細節，很有彈性，下潛力十足，這種聲音表現非常適合聽Jazz。聽日系動漫歌曲＂紅蓮華＂、＂Shout Baby＂聲音表現同樣出色。用藍芽連接在Youtube煲劇、聽現場演唱，沒有甩嘴、延遲等狀況。至於I phone藍芽播放表現，雖然AAC規格比較低，不過播放表現仍理想、動聽，但聲音相對比較柔和。如果使用3.5mm，用手機播歌是不足推好A50，至少使用DAP才會有比較好表現，手上剛有一部RHA DACAMP L1耳擴，在耳擴加持下，有充足推力發揮應有表現。

Audiophile DSD128專輯

MJ 24bit/96kHz專輯

AONIC 50聆聽MJ 24bit/96kHz專輯／Audiophile DSD128，可聽到耳機，中、低頻、密度、動態、音場等表現都非常出色。


藍芽連接在Youtube觀看"THE FIRST TAKE"現場演唱，沒有延遲，相當流暢。


不過個人覺得A50音場方面擴闊多些，聆聽LIVE／演唱會等專輯會比較過癮。其實A50可挑剔的地方不多，現在A50賣屬抵買。

A50最驚喜就是經USB C播放，連接電腦播放Hi-res檔，跟Sony ZX 300經LDAC連接比較，清晰度、密度、動態等都有明顯提升，絕對推薦。

rapperjohnny

首先多謝Post76同代理舉辦今次試聽活動，亦都多謝Paul哥係我還耳機時分享一D心得！

小弟今次借用試聽既係Aonic 4，測試所用既器材分別為iPhone 11及XPUMP Premium接駁電腦用，另外亦會以一直使用緊的SE215 Special Edition作比較。

先講Aonic 4既外形及佩戴時既感覺，Aonic 4作為Shure第一款圈鐵混合耳機，體積依然能夠保持同215相近，而且變成圓圓地既設計，睇落去比215細小，半實色半透明既設計亦頗吸引；而戴上去後亦同樣舒適，入耳後貼服，戴開215既我唔會覺得有任何迫耳或唔舒服既地方！

暫時先打到呢度，稍後會繼續係呢個post繼續補上聲音方面既感想！

CrisWong@FB

第一次參與試玩活動
首先多謝POST76同SHURE代理先
準備將對試玩既耳機歸還
係時候同大家分享下今次試玩Shure新系列耳機既感受!


今次拎到既係Shure Aonic 5
試聽左個幾兩個禮拜
用左以下配置去試
iPhone X轉插直出
iPhone + BEAM解碼
SONY Walkman NW-ZX507
仲有大家都好熟悉既黑磚去作測試
分別用左Tidal, Spotify串流播放
及拎左幾首HI-RES檔案去試試

首先講講HANDS ON既感受先
第一個感覺係耳機箱體好輕身
戴得耐都唔會有負擔
透明+流線型設計
外形有少少似SE846同UM3X合體
配戴得好穩陣
箱體入耳後基本上唔會有太大面積凸出耳窩外
係耳機傾向越來越多單元, 越來越大隻既年代
算係幾難得
原裝線有ANDROID同IPHONE既支援
用聽話聽  轉歌/加減大聲輕都唔洗拎出拎入
實在方便

聽感方面
首先講講IPHONE X轉插直出
聲音都算理想
唔會惡聲或動態嚴重不足既情況出現
開聲唔失禮
如果想買對耳機比IPHONE直出
呢對都諗得過喎

其後再試IPHONE X + BEAM隨身耳擴
分別只係動態及細緻度有所上升
但要注要用左耳擴後  免提功能會失效
想加耳擴既朋友仔要留意呢點!

貴為ANOIC系統頭炮既大佬
當然唔會剩係用IPHONE黎測試佢咁簡單
正規DAP方面  配搭上ZX507同黑磚
由於兩者聲底都似  只係黑磚力水再大少少
所以兩者就唔分開講了

高頻:
Shure Aonic 5既取向係偏向耐聽型
唔會尖聲  刀光劍影
而係聽得耐都唔會攰
而且係推力比較差既裝置上
都可以保持穩定輸出
係一眾手機聽歌既朋友仔既喜訊

中頻:
中頻表現稟承上代SE535
細緻得黎唔會似MON聲
用TIDAL聽戴佩妮既《你要的愛》
滿滿既細節加上微微傾前既人聲
可謂相當之毒

低頻:
對比起SE535
同樣使用兩粒低音單元
Shure Aonic 5低頻量同質有明顯增加
唔再有典型動鐵低頻既感覺
而係相對比較鬆弛自然果種
聽一般流行歌  聽ROCK都同樣咁爽

分析力, 分離度, 音場:
分析力及分離度方面可謂Shure Aonic 5強項
個人認為其分離度更勝我手上既1695TI
每件樂器都分得好開
相當企理
聽多左好多細節
唯獨樂器質感始終1695TI較優
始終價位近乎DOUBLE  好難比較
但Aonic 5表現的確令人驚喜
至於音場方面  表現只能算不過不失
唔會有壓迫感  但整體聲音比較埋身

可調式導管測試:
Aonic 5提供左三種導管
分別係平衡  明亮  溫暖三種走向
要留意導管非常之幼
更換時要十分張心
試哂三隻導管之後
我個人偏向用平衡型
感覺聲音最舒服

小總結:
Shure Aonic 5整體聲音溫和
分析力高得黎亦同時備有唔錯音樂感
女聲帶毒性  而且容易推動
整體比SE535有唔少提升
性格唔強烈  面面俱圓既取向
亦令此耳機相當雜食
而且係推力唔太強既裝置上
依然能夠有唔錯既發揮
整體定位相當唔錯
剛入坑  暫時都係用手機直出既朋友
又或者鐘意分離度高/甜美女聲既朋友
真係不妨去試試呢一對

影音小編輯

提一聲咁多位參與今次Shure Aonic試玩活動Shure嘅師兄

請於7月15日前在這裏寫出分享，大家要把握機會呀～！😇

光與曝光

Aonic 3耳機

多謝返Post 76同Shure代理有依個活動俾我試挽到Aonic3既依款耳機



依隻Aonic3外型比較細小，與以往shure耳機外型截然不同，適合女仕或耳形較小的男仕使用，重量輕細得完全感到舒適滿意.

係我長時間用iphone既試聽下，以單動鐵耳機黎講，有足夠既層次感，
比如聽one ok rock既搖滾樂隊為例，現場既環境聲俾到我驚喜之餘，人聲比較清晰沉實，Bass稍略不足，整體黎講平衡舒適；樂器與人聲分離洽度適中，音色通透感度高，若清澈一點更佳，但有餘韻彌補之下，有穩定表現.

Aonic 3屬於偏向中高頻既路線,聲音屬於爽朗乾淨,比較明亮有活力既感覺,如果聽一啲流行或搖滾樂會更加突出佢嘅優勢.


用手機都容易推到，唔洗耳擴都得，以依個價位既耳機，係各方面都表現平穩適中，足夠證明Aonic 3佢應有嘅價值.

rapperjohnny

rapperjohnny 發表於 2020-7-6 17:47
首先多謝Post76同代理舉辦今次試聽活動，亦都多謝Paul哥係我還耳機時分享一D心得！

小弟今次借用試聽既係A ...

由於上一個post不能編輯的關係，唯有引用並將原本的文字加上補上的部份一併再貼過，唔好意思！

首先多謝Post76同代理舉辦今次試聽活動，亦都多謝Paul哥係我還耳機時分享一D心得！

小弟今次借用試聽既係Aonic 4，測試所用既器材分別為iPhone 11及XPUMP Premium接駁電腦用，另外亦會以一直使用緊的SE215 Special Edition作比較。

先講Aonic 4既外形及佩戴時既感覺，Aonic 4作為Shure第一款圈鐵混合耳機，體積依然能夠保持同215相近，而且變成圓圓地既設計，睇落去比215細小，半實色半透明既設計亦頗吸引；而戴上去後亦同樣舒適，入耳後貼服，戴開215既我唔會覺得有任何迫耳或唔舒服既地方！

聲音感想：
未知是否我run in得唔好，當我用Aonic 4聽歌時雖然低頻依舊保持水準，沉實而不會令耳朵難受，但鼓聲及Bass未有215 SE般澎湃及聽得出細節；而人聲方面因著同時有動鐵的情況下，不但不會被低音部份所掩蓋，更能聽得出清晰人聲之餘，同低音之間既分離唔會突兀，兩者之間磨合得宜！
另外可能戴慣215，戴上體積較細小既Aonic 4有時彷彿會覺得有未填滿成隻耳既感覺，從而會凝住怕有漏聲既情況。配件方面我個人認為耳膠及黃棉較適合我使用，一開始以預設既耳棉試聽時總覺得有部分低頻流失左，後來左耳膠後就再冇出現呢個問題！

由於我未有player及耳擴，所以一直都只係使用iPhone配以轉插用Apple Music聽歌，未能感受到以Aonic 4聽High Res音樂既表現，不過試玩期間曾借用同事的Fender AE1i試聽平時聽開的音樂，即使未有用Fender既Enhancer app亦已聽得到Aonic 4更細緻既聲音表現！

同時我用電腦打機睇戲一直都用聽歌耳機而非電競耳機，並配上XPUMP Premium造出3D sound使用，以215去玩Rainbow Six Siege時能夠準確聽聲辨位，今次試玩時當然都要試一試Aonic 4既表現，即使如上文所講低頻細節未及215，但仍然能清楚聽到對手的腳步聲及方位。

此外，我亦曾到耳機店試聽Aonic 5作比較，可能因為我只用手機播放音樂而非player，當音樂播至某些高頻時聽起來頗為刺耳，低頻的效果我亦覺得是Aonic 4較好。

經過今次試聽後，我認為像我這一類以手機聽歌為主的人，同時亦追求聽低音的話，Aonic 4是一個不錯的選擇，即使只用普通的Lightning轉插亦可以推到這款耳機，同時亦唔需要怕人聲會因為低音而被忽略。相信如果再按自己要換一條合心水的線，再換上優秀的耳擴去聽16/24bits甚至無損音樂的話，將更能發揮Aonic 4既潛力！

fs12501

首先多謝Post 76以及Shure 借出Aonic 50，收到個包裝盒尺寸真係同最大藍X曲奇盒差唔多但再厚啲，負責人好有心一再提醒要試吓MacBook Type-C 連接會有驚喜，Aonic 50攞上手第一個感覺係設計好簡約帶上頭幾舒適亦好穩陣以及連接性好強有藍牙3.5mm jack同type-C，返到屋企第一時間梗係煲番幾日先，但始終唔係自己而且時間有限，所以都唔敢用煲機碟只用平時聽嘅歌煲咗3晚。

第四日後，一開始簡簡單單使用IPhone 11試用藍牙聽串流NAS中嘅音樂，老實感覺係.....”正正常常”，冇嘩一聲嘅感覺，而且部份歌曲低頻控制上有點兒蓋過高中頻嘅情況，心腍可能未煲夠，之後用LG Smartphone用Aptx HD連接，明顯比之前連接iPhone好好多，人聲前咗音塲闊返，再用原裝3.5mm 線連接LG Smartone(built-in Quad Dac)，其實Aonic 50算易推smartphone volume level 55/75 已經夠聲壓，人聲再近啲比藍牙連接更加紮實，人性相對高低頻特出，相信日後有機會upgrade線材應該會有改善或者用App去選擇唔同模式去微調，之後加部Aroma Amp.聲底一樣不過試聽久石讓演奏版大鵬嘢樂器分離度好咗當然唔可以同其他旗艦鑒聽耳機作比較，但聲音取向比較平均耐聽，後再試Type-C 連接Macbook Pro，haha..... 絕對係有驚喜，首先分析力明顯提升，整體三頻堤升咗一級分離度再好啲，平時唔明顯嘅背景樂器都聽得淸楚，聽得更多details，玉置浩二嘅尾音口水聲出返哂，Aonic 50 built-in 嘅Dac係有啲料到，聲音質素絕對收貨，相信有機會upgrade 條原裝Type-C線應該會更上一層樓。

試咗一個禮拜，作為一般用家我喜歡Aonic 50作日常用耳機以有線或無線連接都方便，頭戴式耳機來說算易推而且絶對係「耐聽型」聲音平均人聲紮實聽Eva Cassidy高音完全冇吉耳感覺，毫無壓力下會令人不知不覺間聽完幾小時音樂，用藍牙Aptx HD或Ldac連接電話簡簡單單便能聆聽高音質嘅音樂，再加上專用App聆聽唔同音樂嘅時候可以作出微調增加聽感，真心已完勝我隻舊M2 wireless (M3 就未有機會試)，而降噪功能到現在嘅技術已經很強，可以令我暫時逃避小朋友嘅嘈吵聲專心聆聽心愛嘅音樂，可以十幾二十小時連續使用....夠哂喇。

而作為入門發燒用家我亦享受使用Type-C 以及3.5mm連接MacBook Pro出嚟嘅聲音質素再加上換線增加可玩性以及配合個人要求，期待日後推出2.5mm balanced線材升級，縱然Iphone 藍牙連接雖然依然未達到絶佳音色但亦係最方便嘅方法，如果對音質有要求真心建議用靚啲嘅lightning 轉3.5mm頭再upgrade線使用 (試過用Lightning 線加Type-C Connector接Aonic 50不過唔成功😂)，始終Apple 嘅藍牙連接技術一直都未能與音響界同步，唔同嘅連接方法適合唔同嘅用家自行取捨吧，但頭戴式耳機對於大汗嘅我喺夏天冇冷氣嘅情況下未必敢用，無謂增加維修部嘅負擔......😅，若然日後有機會真正擁有Aonic 50，我會第一時間上網搵再靚啲嘅Type-C 線同2.5mm to 3.5mm 線玩盡佢，相信音質上會再進一步提升😎。

對於Aoinc 50其實有少少意見，首先當啟動降噪後最嘈並唔係環境噪音，反而喺耳機內Power on, Paring mode, Connected, Power off.... etc.把女聲😅當使用者處於放鬆享受音樂嘅時候會覺得佢特別響，希望之後有update可以調細聲啲又或者改用溫柔點嘅女聲，而每當使用type-C 連接Aonic 50時，電話會自動變成耳機既充電寶....結果大家都明，希望有update 可以選擇開關Type-C連接差電功能(又或者電話設定可做到....未有深入硏究)，另外係室外或坐車嘅時候建議開啟降噪功能，因為當關掉降噪嘅時候耳機內置咪會啟動用作輔助聆聽周圍環境嘅聲音，但可能內置咪調節上相對敏感同大聲，譬如周圍嘅風聲又或者耳機唔覺意與其他物品有輕微碰撞，內置咪會將所有聲音放大，結果隻耳仔會有點受罪嘅感覺，不過以上嘅問題我相信應該都可以靠frameware update一併解決，而Aonic50嘅包裝令我回想以前買香港歌手嘅CD，隻CD其實只有五吋闊，但個靚靚CD盒永遠大到令人頭痛唔知擺出嚟定收埋好，但香港寸金尺土屋企又細，希望廠商考慮吓我哋哩啲苦主，Packing儘量簡約啲🙏。

最後還機前更做了一個測試，就係比阿爸試用呢個耳機，佢本身聽力有少少下降，帶上Aonic 50 後把降噪關掉，佢話聽嘢清楚咗好多，原本電視音量要調到30才聽清楚現在15度便ok，終於可以同阿媽嘅聽力同步，返屋企食飯唔使再大大聲對話，有趣地原來呢個耳機可以作一個「助聽器」，呢個可能係一個bonus功能亦係其中一個理由阿媽同我都覺得嚟緊8月可以考慮送俾阿爸作為生日禮物，到時佢隨時享受自己喜愛嘅經典金曲(又可以適當嘅時候隔絕阿媽嘅梵音😂)，喺疫情期間減少兩老經常留喺屋企有機會產生嘅爭拗，正所謂一舉幾得.....haha。

作為Shure第一款頭戴式耳機，音色以及舒適度已經有唔錯既表現當然亦有改善空間，而方便程度以及音質上有着唔錯嘅平衡度，想方便就無線藍牙而想要高音質就連接Type-C或3.5mm線，個人建議大家花少少時間親身去店認真試吓以及預先下載專用App(最好自備一條有質素嘅Type-C線) ，因為Aonic 50真係好多嘢玩，試完你會搵到愛上佢嘅理由亦不自覺地包容埋佢嘅短處，期待下次音響試聽分享，再次多謝Post 76 同Shure，祝Shure 95週年快樂!

設備如下:
Macbook Pro 13 2017
Iphone 11
LG V30
Aroma A10 Amp.
軟件: Tidal HIFI / NAS App (Aiff and WAV files)

影音小編輯

多謝咁多位師兄嘅參與同埋分享，所有朋友嘅分享報告更已經於deadline前全部出晒街

Shure廠方以及代理已經在甄選優勝者，相信好快就會有好消息俾大家

影音小編輯

首先恭喜 karshun0206 師兄，你嘅試聽分享已被廠方選為今次活動嘅優勝者😇
重溫： https://post76.hk/forum.php?mod=redirect&goto=findpost&ptid=318474&pid=4776819&fromuid=2687

再次多謝各位參與今次是試聽活動嘅朋友，亦歡迎各位响呢度繼續分享

期待下次試玩活動再見大家 ～

光與曝光

多謝Admin俾面仲share左我篇野響76Facebook

早知係咁，下次再有機會我都寫詳細啲先