人造木耳大測試之Luxman DA-250個人聽覺報告

ykluk

好似好耐都無出過人造木耳報告, 事關小弟呢大半年好似得罪咗公司老細同客咁, 啲嘢多到做極都做唔完, 人又攰莫講話借機嚟試, 連開屋企自己套架生嚟聽都少咗, 有時間都寧願抖抖走去瞓覺...

但幾攰都好, 每年既hifi展小弟都會盡量抽時間去, 事關小弟一世窮L, 要想試吓世上銘器, 除咗hifi展都基本上無咩機會聽. 上年(2017年)小弟就用咗粒幾2粒鐘去等去排貴豐, 今年(2018年)小弟既重點就係soulution+YG, 諗返起soulution+YG出嚟既聲音真係好X聽到呢...

當日駿韻既展位, 除咗soulution+YG, 當然仲有好多人都識既luxman, 同場仲放咗一件小弟完全唔識既牌子 - xo|stream, 而呢件未見過既streamer又吸引到小弟有一試既心癮. 呢啲情況之下就梗係又搵老wil幫手, 問吓輝煌東哥借嚟玩吓啦(當然重點係無得要求小弟早出報告啦)~!!

咁點解今次唔係出xo|stream報告, 而係luxman呢? 又事緣小弟係用緊白金鹿(antelope zodiac platinum DAC), 有睇過小弟人造木耳報告既師亨們可能會記得, 白金鹿既USB driver只係support window同mac os. 而xo|stream係linux based既streamer, 小弟一插入白金鹿出現"dee dee"聲時就知瀨鳥... 唯有又要煩吓東哥, 睇吓可唔可以借多部DAC嚟試啦~ 為咗之後既xo|stream報告有比較意味, 咁今次就先出一個關於Luxman DA-250既人造木耳報告 - 即係nimitra + 白金鹿 vs nimitra + Luxman DA-250~!!

未睇過或者想回味小弟既人造木耳個人聽覺報告, 可以睇返以下連結:

人造木耳大測試之Pioneer N-70A個人聽覺報告
https://post76.hk/thread-242033-1-1.html
人造木耳大測試之Cambridge Audio CXN個人聽覺報告
https://post76.hk/thread-242075-1-1.html
人造木耳大測試之Aurender N100H個人聽覺報告
https://post76.hk/thread-242484-1-1.html
人造木耳大測試之Cambridge Audio Azur 851N個人聽覺報告
https://post76.hk/thread-242833-1-1.html
人造木耳大測試之Marantz NA8005個人聽覺報告
https://post76.hk/thread-243646-1-1.html
人造木耳大測試之Denon DNP-730AE個人聽覺報告
https://post76.hk/thread-244394-1-1.html
人造木耳大測試之Marantz NA-11S1個人聽覺報告
https://post76.hk/thread-247648-1-1.html
人造木耳大測試之TEAC NT-503DAB個人聽覺報告
https://post76.hk/thread-248662-1-1.html
人造木耳大測試之Cocktail Audio X40個人聽覺報告
https://post76.hk/thread-249399-1-1.html
人造木耳大測試之LUMIN U1個人聽覺報告
https://post76.hk/thread-250133-1-1.html
人造木耳大測試之LUMIN A1/S1個人聽覺報告
https://post76.hk/thread-251899-1-1.html
人造木耳大測試之Cary Audio DMS-500個人聽覺報告
https://post76.hk/thread-260817-1-1.html
人造木耳大測試之Esoteric N-05個人聽覺報告
https://post76.hk/thread-265203-1-1.html
人造木耳大測試之Fidelizer Nimitra個人聽覺報告
https://post76.hk/thread-269726-1-1.html

作為HIFI界其中一個比較多人用同多人識既品牌, 力士的確係小弟心目中其中一個好想一試既, 只係相對於其他品牌, Luxman喺streamer或者DAC既開發又真係好似少咗啲同慢咗啲, 旗艦既DA-06出咗好耐又未有新旗艦, 咁就試吓相對較易入口既DA-250啦~{:9_428:}

Luxman都真係有幾多fans, 網上都有唔少既試用報告:
https://www.audionet.com.tw/thread-8778-1-1.html
https://personalaudio.hk/2016/08/15/luxman-da250/
https://www.dcfever.com/column/read.php?id=4347

至於specification可以睇返官網:
http://www.luxman.com/product/detail.php?id=10

先講明, 小弟既人造木耳個人聽覺報告基本上都係以試聲為主, 目的係想盡量以同一套器材環境設定之下, 用同樣既歌去聽吓每一部借返嚟既network player/DAC表現出嚟既聲音特性. 當然係無可能咁多部機同場A/B/C/D/E/F...咁test, 但呢個機會真係唔錯~ 不過對於每部機每一個粉唇每一個輸入/輸出都未必會試晒, 呢啲功能既嘢小弟諗都有好多大師或者專家會有報告, 我乜都唔識就無謂搞埋啲不知所謂既"教學"啦~!!

長氣都再講, 小弟唔識太多技術嘢唔係睇數字做人, 只係一個"唔理乜7, 啱聽就得"既永遠新手~~!! 所以分享都好少講咁多咩技術, 純係個人既木耳報告only~~

測試器材

再一次介紹吓小弟既垃圾屋企器材比大家知, 只供大家參考呢次既分享報告, 並無任何試圖或意圖展示或示範家居HIFI/AV器材, 或提供任何器材擺位指示或示範, 小弟亦唔會對任何有關以上類似或疑似提問作任何回應, 如任何人試圖或意圖根據以下器材作任何自身家居添置, 當中既後果本人一概乜都唔會負責:

NAS: Synology DS718+ (Mistral EVA-U13抗震板, SANWA cat7 lan線)
LPS: 7輸出LPS比NAS/router/PPA switch/nowtv/GPS clock (自製4N純銀溝純銅DC線)
source: Fidelizer Nimitra (Kenneth Lau牛, SANWA cat7 lan線, Entreq Challenger USB接DAC, brimar fuse)
DAC: Antelope Zodiac Platinum (原裝DC線, 自製4N純銀溝純銅古河碳纖頭尾美式電源線, brimar fuse)
clock: 強國製GPS clock (5N純銀BNC線接DAC)
拖板: 超厚鋁殼+IeGO Pure Silver IEC座+Wattage 381 RH EVO+古河GTX-D鍍白金肉+2mm4N純銀接線+自製4N純銀溝純銅古河英頭電源線直入牆身獨立電+Synergistic Research black fuse
HIFI架: TAOC ASRII
前級: Mark Levinson 26s XLR版 (5N純銀古河balance頭接DAC, 自製4N純銀溝純銅古河頭尾美式電源線, Synergistic Research black fuse)
後級: Mark Levinson 23 (Sommer Excelsior XLR接前級, Neotech 3200古河英頭電源線直入牆身獨立電+Infinity Power 3 Platinum fuse)
speaker: ATC SCM40 (自製4N純銀溝純銅+STAR純銀蕉插+WBT0681Ag叉插喇叭線及jumper, Harmonix　RF-909X-B喇叭墊)

喺開始試聽之前, 小弟已經做咗少少心理準備, 始終白金鹿 vs Luxman DA-250其實本身未聽都已經係一個幾唔公平既test, 喺價位上(接近4皮 vs 皮幾)有好多既分別, 級別上已經有差距~ 而小弟之前試過同Luxman DA-250大約價位既DAC, 例如Pioneer N-70A / Cambridge Audio Azur 851N / Cocktail Audio X40都有返咁上下時間, 仲要嗰陣小弟既器材都有啲分別~ 所以小弟今次真係唔敢講個報告好準確, 只係借返之前既記憶同報告紀錄(好彩有人造木耳個人聽覺報~!!), 同小弟少少既經驗去寫... 只可作為少少參考, 有師兄唔同意歡迎回應, 但唔好打頭...{:9_434:}

東哥實在太好人, 部機好新, 小弟都要煲返咁上下先敢AB test~ 個外盒都幾大件...



但其實裡面個盒就唔係幾大既, 你睇陸寶幾想開佢嚟咬~!!



真身真係唔大件, 簡單直接, 完全係力士一貫既設計~



正路既輸入輸出啦, XLR/RCA analog out, 同軸同光纖輸出, 輸入就可以係USB/RCA/同軸同光纖, 應該都係乜都食~



面板好簡單, 顯示係咩輸入, 同輸入既file係行緊幾kHz. {:9_421:}



留意用行window既nimitra去接luxman da-250係要裝driver, 而用ASIO係播唔到, 轉返做WASAPI就OK~ {:9_427:}



如果有師兄認識, 見到上面個手機cap screen, 都會知道小弟宜家係轉咗用roon, 因為實在係太好太方便, 將自己本身file同tidal完美結合晒~ 只係roon同nimitra本身直出係有少許分別, 咁小弟都做咗少少嘢去調返啱自己聽既聲! {:9_407:}

試聽報告

如果有睇過小弟之前既個人聽覺報告, 都可能會對小弟呢個song list有少少熟悉, 基本上所有個人聽覺報告都係用佢去作為聽覺報告既參考~~

首先試既係小弟喺CD rip出嚟既16/44.1 PCM file.

先試人聲 - Angel《2014原音精選》, The Prayer《Andrea Bocelli - Sogno》

力士一出聲就係舒服, 第二個感覺都係好舒服~!!

自然而又穩重既聲音, 唔會突出中頻人聲, 唔會加重口味, 有音樂味但又唔會悶, 成件事好實在好自然又唔誇張. 人聲無話有厚重味, 清晰唔含糊, 口形亦都適中. 呢啲聲真係非常耐聽, 聽得耐又唔會覺得攰覺得煩, 又或者好悶咁瞓咗...

相對返而分析力見稱既白金鹿, Luxman DA-250既分析力明顯低兩班, 前後左右既音場都少咗一大圈, 聲音穿透力喺白金鹿既強勁比較下, 都好似無乜咁... 咁當然啦, 輪分析力穿透力, nimitra + 白金鹿基本上都已經係咁多人造木耳聽覺報告之中最高, 低兩班都唔係好差架喇~!!

喺小弟既記憶同比較之中, Luxman DA-250分析力都應該係Cambridge Audio Azur 851N之下, 不過比Pioneer N-70A同Cocktail Audio X40好~

不過輪舒服同耐聽程度, 其實Luxman DA-250一定喺呢幾部機之上, 沉穩實在, 無過厚無誇大, 三頻都算平衡, 人聲有少甜味~{:9_409:}

再嚟樂器 - 春江花月夜/新版十面埋伏《聆聽中國》, Jazz Variants《Manger CD》

仲以為聽人聲以分析力比白金鹿強力比下去, 聽樂器會仲大鑊, 哎~ 反而又唔係喎!! {:9_433:}

Luxman DA-250出嚟既樂器聲音交待得唔錯, 樂器聲定位明顯而清楚, 仲要氣氛營造得唔錯, 速度上完全啱數無慢無拖泥帶水, 都唔會太快變到無尾音~

呢一部分整體都覺得好平均, 三頻平衡, 比Pioneer N-70A同Cocktail Audio X40好, 可能小弟唔太buy厷誇張既尾音同泛音~ 對比851N, 可能分析力爭好少好少, 但勝在聲音舒服自然又耐聽~

最後試吓DSD file

Luxman DA-250播DSD更加係如魚得水, 本身已經係好舒服自然, 密度都幾高,  聽DSD就更加感覺analog, 當然唔可以同膠膠比, 但就真係已經表現得好好~

總結

因為Luxman DA-250部機太新, 小弟其實都日夜狂煲咗佢1-2星期先再試聽寫報告, 當然除咗以上既歌, 都聽咗唔少小弟平時聽開既嘢~{:9_423:}

以小弟一直以嚟既認識, 力士機係其中一個品牌, 追求非常舒服同自然既聲, 從來聽力士都唔會話好似金仔咁誇, 又唔會好似美國機咁大力, 唔會好似英國機咁厚實, 更加唔會係法國機咁柔和. Luxman DA-250完全係一個力士聲既表現, 不溫不火, 真係好舒服.  

尤其是係聽pop或者jazz, 小弟覺得係最夾, 開足一日都唔會悶~!!

借機既時候東哥因為知道小弟既人造木耳報告話明唔收錢唔會做打手只係寫返小弟木耳既真實感受, 叫小弟高抬貴手唔好寫得咁衰~ 其實又唔使咁驚既, 今次Luxman DA-250既對手係白金鹿, 喺價位上都已經有一段好大既距離, 而一直以嚟小弟對白金鹿都係情有獨鍾, 大家既定位好明顯係2回事...

始終事實還事實, 小弟個人覺得但就真係唔好諗住搵Luxman DA-250聽大掤嘢喇, 又或者太複雜, 太多聲音, 需要做大空間既歌, 好似黑教堂, 麥田園, jazz variants呢啲, 又或者小弟近期好鍾意用嚟試既"the greatest show", 同埋久石譲 in 武道館(THE BEST OF CINEMA MUSIC)既NAUSICAA等等... 如果淨係鍾意聽呢啲嘢既師兄, 可能力士未必係啱胃口~

記得以前旺角影音未執前, 好鍾意用力士推ATC, 不過小弟會覺得, 用力士推ProAc會更加啱口味, 呢個組合聽jazz, pop, 結他真係一流~!!


以上純係個人經歷及個人睇法, 並無任何強制建議或指示, 不喜勿插, 謝謝觀看~~!!

喜喜天使

力仕我都差不多用了兩年，係底玩的 各方面都平均丶全面無做作