小收穫 大公開 (3月12日 日版 鉄板燒 實物圖)

victor_wong

見各 CHing 入得咁過癮，莫講話食樹皮，就算見嘢就咬都要入；《潛行》我個人其實一般，套戲其實好知識型，冇耐性分分鍾唔知佢講緊咩，戲中大量動作場面只係幫補睇唔明嘅觀眾，至少有動作同 SF 睇，個故仔其實可以拍得再易明同易跟一點，如果纯粹為追求娛樂性故事性直線發展嘅話，情況就同 Blade Runner 一樣，睇一次跟本唔能夠明白晒，睇得都好大壓力架，我個人唔討厭呢套戲，只係想搵個方法 enjoy 到套戲啫，呢套戲，就好似一個好有才華嘅導演，黑口黑面同你講一個同個人情感有關嘅故事，講到咁上下連觀眾走咗佢都唔在乎一樣，結論係，我要從心底講出一句，我唔多鍾意呢套戲，入係纯粹想享受下聲畫，無可否認，個故事係好有創意同野心，只不過唔太係我杯茶啦；論聲畫，呢套做到加零一，而港式字幕在黑邊下亦做得好好，唯一係個盒啜得個外盒太實，我要更換過個盒就好好多啦。

無入場睇《馴龍記》，聽口碑唔錯所以一入，套戲初初投入唔到，因為人物設定比較幼兒向，到後來約廿零分鍾就好 D 啦，到大約四十五分鐘倒我就好 enjoy 啦，呢隻碟雖然得 TrueHD，但一 D都唔失禮，男主角四十五分鐘第一次正式騎龍飛天，畫面用第一身視點，觀眾直情同主角一齊飛一樣，D 聲嘅方向感一流，論故事其實好標準，冇驚喜，但勝在故事講得順暢，大人細路都啱睇，近尾字幕出，《維京人》出得嚟行預咗要還，真係爆笑，未睇配音版，都想想聽聽校長配音如何呢！

LOTR 3，終於出啦，我覺得聲一定勝過畫，同一二集一樣，畫面好 Soft，而且微粒勁粗，但為咗完咗個系列，點都要一入，我對加長版冇期望要出，反正我唔係呢套嘢嘅粉絲嚟。

下個禮拜出《壞蛋掌門人》，我冇喺戲院睇，我喺屋企等你！

朗

見各 CHing 入得咁過癮，莫講話食樹皮，就算見嘢就咬都要入；《潛行》我個人其實一般，套戲其實好知識型， ...
victor_wong 發表於 2010-12-6 07:29

Victor兄點使食樹皮呀，最多去food bank排隊攞罐頭啫! 講吓笑。

Victor兄真好嘢，幾隻港版一出即入唔難，難在一入即睇，更難在一睇完即上嚟報告，更更難在報告咁用心有角度! 實在係好好嘅分享同有用。

自己祗係入咗《潛行》，週末又要睇英超，又要入戲院睇新上畫，未得閒睇所以都未入另外兩隻，睇咗Victor兄咁有heart嘅第一時間報告，等陣去入埋呢兩隻。

咁Victor兄有冇入埋《狄仁傑》呀?

朗

跟LOTR 3嗰個盒呢? 有冇抽起冇送呀?

victor_wong

感謝 CHing 過獎啦，其實我買碟唔算多，係圖多啫。有時睇完一隻碟，就自然會有口水花要噴架啦。不論係好定唔好，都唔想放喺個心度，上得 76，就人人都有話要講架啦。我有入《狄仁傑》，因為得 27 分鐘 Making Of，我成日覺得港產片應該多 D 特別收錄，如果請唔到導演或編劇講旁白，不妨學下 Matrix 咁，請班影評人，不論正反，都一定會有嘢講嘅，再唔係拍定 D 現場花絮，咁就可以係畫中畫 （PIP），《狄仁傑》咁多場景，唔多唔少要定有 D 嘢嘅，照計老徐係有興趣講導白嘅人嚟嘅，之前隻《七劍》都有啦，今次點解唔講呢。

呢套只睇咗 DVD ，故事頭一小時十五分鍾都可以，當真兇出場之後，就即刻變咗以前同宜家間中 TVB 劇集對白同橋段如下。

A：原來你就係凶手。
B：好！等我拎把刀，跟手殺埋你滅口先！
A：點解你要咁做！
B：廿幾年前...........

想唔轉台都難。

victor_wong

本週主打 Criterion，但見書網 Toy Story 有平，於是又執兩隻，而搵咗好耐嘅 Star Trek 鐵盒有二手，就即刻動手；The Night of the Hunter 聽就聽得多，睇都係第一次，Film Noir 講嘢多，呢套亦冇例外，我睇一次未領會晒所有，等精神同時間再睇，套戲雖然只有 95 分鍾，但碟二竟然有兩個半鍾訪問同 Making Of，呢隻碟真係好似本書咁，要慢慢睇。

入 Videordome 純為好奇，David Cronenberg 嘅戲要向怪雞同少少偏鋒，最易明相信應該係 The Fly 啦，我個人比較喜歡嘅 Scanners 只出過普通版 DVD，希望他日會出靚版啦，呢套 Videordome 又係走另類，之不過個 concept 又真係幾有趣，講電視節目入侵人腦，有 D 畫面都幾得人驚下架；呢隻碟個包装都幾搞鬼下，成餅錄影帶咁，至於聲同畫，畫真係修復得好好，至於聲，以 1983 嘅戲嚟講算唔錯，2.0 得嚟未至於完全冇聲，一條好嘅立體聲，點都比一條雞嘅 5.1 好，試聽聽舊版《猛鬼街》，套戲明明得 Mono，但夾硬整條 DTS Master 5.1，結果效出出嚟失真之如，又係味精 Surround Sound，倒不如一整條靚嘅 2.0,感覺上就更好啦 。

至於 Cronos，發覺呢套其實唔算係恐怖片，其實可能係宗教片，長生受苦，不如老死安樂好過，呢套聲畫都一般，以 1993 年嘅戲嚟講感覺上好似冇點執過咁，可能係 Budget 問題？呢隻碟個 Amp 要開得好大聲至聽得清楚對白，但就點都好過時大聲時細聲；呢隻碟有 DTS Master 2.0，但部 Amp 就話係 7.1，但無可否認，喺近乎 0 Surround 嘅情況之下，想令人唔相信係 2.0 都難。

Toy Story 仲有咩 CHing 未講過？哈哈，我覺得第一集廣東話配音未必係原裝香港上映版配音，至少我聽唔到《張偉健》同《劉青雲》把聲，但第三集就相信係，因為《劉青雲》自己連歌都唱埋，雖然嗜得一般，但相信係佢把聲嚟，呢隻係台版嚟，唔知港版會唔會有唔同？至於隻 DVD 則未試，就唔知係咪原裝廣東話配音啦。

kymak

本週主打 Criterion，但見書網 Toy Story 有平，於是又執兩隻，而搵咗好耐嘅 Star Trek 鐵盒有二手，就即刻 ...
victor_wong 發表於 2010-12-13 09:24

Toy Story 各集台版與港版一樣.
第一集粵語是上映時的版本. 當時第一集沒有標榜找著名藝人配音. (第一集胡迪是電視藝員張錦程, 巴斯是舞台劇演員周志輝)
誰知大受歡迎, 到第二集時才找張衛健及劉青雲二人配音.
正如第二集裡的翠絲不是容祖兒, 到第三集才找她!

victor_wong

Toy Story 各集台版與港版一樣.
第一集粵語是上映時的版本. 當時第一集沒有標榜找著名藝人配音. (第一集 ...
kymak 發表於 2010-12-13 09:59

噢，明解啦 CHing， 多謝補充！

Hon

star trek steelbook個白色好靚呀....!

victor_wong

等唔到英版，港版太貴又買唔落手，終於澳洲版最平，三隻加埋約港幣 $320.00，厚身膠盒同英版一樣，至於 Rating Logo 太大問題只可以話係世事無完美；不經不覺原來《烈火雄心》拍於 1991 年，昨晚開嚟睇，當堂 X 咗一聲，套戲一開始字幕都未出，已經見白點滿天飛，果然之後情況亦冇太大改善，間中 OK，間中差勁，上上落落，感覺上好失望，至於聲，一貫 90 年代動作片情況，一係好多 Surround，一係靜晒，但當然，當消防員走入火場嘅時候，好多細微嘅環境聲就出晒嚟啦，之不過係限於火場環境而矣。1998 年嘅《寫我深情》畫我覺得好過聲，至少表現穩定，而聲亦好自然；至於叫做最新 1999 年嘅《摘星奇緣》，表現反而冇我預期中咁好，畫面感覺上應該可以再實净少少，呢套颜色係夠嘅，之但係感覺上可以再豐富 D，同隻日版 DVD 比較，呢隻 BD 可以話係進步咗少少，只係好少。三隻碟都有廣東話字幕，相信可能係港澳共版，唯一係《摘星》未必同英版係共版，所以唔駛等平英版啦，呢三隻澳版平平哋一入無妨。

victor_wong

冇喺戲院睇《壞蛋獎門人》，因為怕戲院太多細路走嚟走去又叫又盛，都係屋企睇最安心；暫時只睇咗英文版，發覺 Steve Carell D 口音怪怪哋好難聽，成套戲個故仔都唔錯，幾窩心，如果 D 畫功可以再成人向少少就好啦，聲畫冇投訴，但冇大驚喜，《洲立》今次呢隻好在有廣東話配音加咗分，如果唔係嘅話，單睇包裝感覺上簡直可以話係毫無誠意可言，出得一兩次出鐵盒唔夠架。

至於《喪爆型警》，我喺呢面戲院睇過，宜家再睇碟一樣睇得咁開心，套戲爆笑得嚟對白唔低俗，場與場之間幾乎每一場都有一兩個笑位， Mark Wahlberg 今次演喜劇演得好好，冇過火，至於 Will Ferrell 雖則冇突破，但兩人仍算有火花，作為要套新戲嚟講，呢套畫一定勝過聲，聲其實都可以，有飛車有槍戰，只係同樣唔突出。可惜香港冇上畫，呢套其實同 Rush Hour 差唔多，其實比 Rush Hour 更有趣，其實 Rush Hour 並唔算有趣，呢套同樣係 Buddy Movie 得嚟唔老土，D 對白我真係由頭笑到尾，對白內容一 D 都唔難明，香港觀眾要定睇得明，真係值得推介架。