4K, or not 4K (買唔買 4K 好呢？)

Andykong

已經頂到個舊電視既 remote 和機上的實體鍵開始神神地，開始「的」起心肝搵電視，60" 已經頂晒櫃邊，所以主要搵 55" (60" 都可以考慮)，但已經無玩呢個遊戲好耐，做了一輪功課後，有幾個問題想請教呢度既師兄！

(1)   我相信 Sony 55X8500 的 2D 畫面會差過 55W950，對嗎？咁會唔會和 55WE900 接近？ 如果連 W900 都不如咁好難諗！退蟲記個價我覺得勉強接受到，所以在考慮中。

(2)   LG 以前平靚正，但殘影難頂，現在 4K 換了新 display engine, 係咪已解決問題？我見 9700 的官網話「無殘影：IPS屏幕顯示快速動態時，清晰始終如一，絕對勝於其他品牌的顯示屏」，但睇佢咁寫仍然好擔心。

(3)   除了 LG 9700 外，還有 4K 電視的 3D 行被動式的嗎？國內牌子我都會考慮的。

(4)   2014 的 TV 新產品有無邊款係大家熱切期待的？

這些都是我上 4K TV 的關卡，如果解決唔到便繼續 FHD 算數，唔上 4K 的話，我多數買 55W800 算數，最低價位入手，留子彈下個 round，但一賣落就如果唔壞便要 3-4 年先可以再 upgrade 了，所以唔敢魯莽。

David_Vincent

我覺得仲未係時候出手買4K，因為選擇唔多

chengvin

E加入就係第一批實驗品，樓上ching話dry，選擇吳多，不如忍多陣。

teddyng637

我都覺得睇定啲先買

ctmk

要買non-4K就買質素好嘅FHD TV，想3-4年後至換就要有保養嘅品牌，所謂:
早買早享受
子彈不必留
玩具日日新
去馬無需愁

hugomember

我都想買新電視, 但係覺得未係時候入手4k, 始終都仲係好貴, 且片源唔多, 制式未普及...

我覺得可以買FHD電視, 用3 年後到時4K電視就應該已經普及啦~~

pwong888

等下1代有hdmi 2.0先入4K都吾遲.

gikifk

pwong888 發表於 2014-2-2 11:31
等下1代有hdmi 2.0先入4K都吾遲.

Yes

Andykong

(1)  未有廣播和片源，上 4K 等下先會好 D！
其實買電視未必可以等到「最適合時機」。部電視返來一上牆，快則三年，好彩唔壞就 5-6 年先換，但不幸地，一壞的話，等多一個星期都比家人哦，等下季新出品都已經唔易。所以我的方法只可以望住當時既選擇了。我上一部 TV 係 5 年幾前，當時 1980x1080 FHD 仲好貴下，電視又未有高清，HD-DVD 同 bluray 仲打緊交，幾時傾掂數都唔知，當時都好似大家咁諗，於是買部 1366x768 平平地睇定 D 先啦，部曾志偉牌超平 LED 個個都話一年貨仔，最多兩年，點知我突別好運，部 1366x768 竟然捱到今日，即係我 skip 晒成個 FHD 年代。大家話等多三年，其實我都幾肯定到三年後有師兄問類似問題的話，都會有人答話 8K 出左啦，仲考慮 4K？

(2)  4K 好貴
我見蟲蟲個價，Sony 部 55" 8500 都係萬六人仔多 D，貴 950 四千，以新產品來計，仲算好貴？初出時下下開價貴一個 double 的話我梗係唔會咁勇，但現在貴 30% 其實我個人仲接受到。

(3)  等埋 HDMI 2.0 先
乜呢個唔係 firmware upgrade 咩？要 hardware replacement 既咩？

(4) 4K 選擇小，等多 D 選擇先啦！
其實呢 20 年來我自已每次買電視都係開放式考慮，乜牌子都諗，但最後令我流口水的，唔係 Sony 就係 Pan 記，所以選擇我又覺得唔係等既原因，多選擇其實對 C/P 影響比較大，有競爭嗎，所以要睇 C/P 的話，這反而是最 relevant 的，即係我擺明只會買 Sony 都好，咁我都希望市場上多 D 選擇，由其他對手施壓令 Sony 既 C/P 提高囉！

講返我自已 個 case，其實我最擔心既比左錢件貨都未得，而唔係時機和平貴。你話部 x9000/x8500 既 2D 畫面有 W950 的質數，咁我覺得值比貴 4K 既；如果同 W900 平排都可以考慮，但跌到落 W800 或更低的話咁便真係員唔過了，所以問題是產品質數而唔係平貴和時機。同埋現在買電視好似得返 D 連鎖電器鋪咁，要搵個可以慢慢試慢既鋪頭都唔易，以前帶自已碟去試水貨電視既時代好似已成歷史了！

我對 3D 經驗只限於電影，屋企未試過，但有得揀，我覺得被動式會舒服 D。可惜被動式 3D 像數要妥協，如果 4K電視行 被動式 3D，即係有 non-flicking 既 FHD 3D，我覺得呢個先係這一刻 4K TV 既最佳賣點，所以我問大家知唔知邊間廠既 4K TV 係行 被動式  3D 囉！

至於問 LG，其實係因為 LG 電視一路都係以平小小來對抗 Sony/Samsung/Panasonic，但我見 LG 既 4K TV 反而企係最高點，所以咪鬥問下佢解決左殘影既老問題未囉！

David_Vincent

Andykong 發表於 2014-2-2 16:23
(1)  未有廣播和片源，上 4K 等下先會好 D！
其實買電視未必可以等到「最適合時機」。部電視返來一上牆，快 ...

最近去電器鋪睇電視，三部4K電視列陣，緻細睇左一輪，覺得Samsung－＞ LG －＞ Sony。

對Sony 4K電視好失望，LG都好過佢，難怪韓國機升得咁快。Sony已經失去昔日風彩同優勢，如果我買Sony寧願買番1080。