beyerdynamic T51p: 整合早期聽感及煲機後聽感

斯路 · 發表於 2013-10-17 00:26

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由斯路於 2014-4-22 04:53 編輯

到手時既初步印象

終於到手，之前一直都無法試聽到，還好比想像中唔錯。

感覺上較乾身，整體乾淨，低頻健實，非常連貫，而且非常efficient。

初期未煲開既印象

整合到手後既簡單印象，未完係煲熟既T51p:

1. 好輕微地偏柔，整體順滑、連貫性高，聽落好舒服既聲
2. 音場唔算大，始終係closed back
3. 高音亦唔算有上佳伸延，亦有可能係closed back問題
4. 低頻收斂左唔少，有一定質素，但尚可更細緻
5. 因為我頭大，聽得耐都會係夾耳仔
6. 聽流行樂有唔錯音樂感以及節拍感，有種具質素既爽感
7. 聽中編制以上古典樂時會發現T51P對前端其實都有一定要求，手頭上portable似乎未好好發揮到T51P對古典樂既表現，基本上感覺上係線條感，氣勢，低頻，密度都未能交足貨。期待用台機推，應該會好唔同呢
8. 點都好，我都重係覺得T51P好好聽

經約半年煲機過後既印象

呢半年期間配置改變左唔少，由於轉左新地方生活所以便攜玩具都唔齊，家用置備就更唔使講。期間忍唔住所以添置左左Violectric V800同埋V200，換上左台式配備繼續長時間細聲煲T51p。同初入手時相比，改變非常之大。

T51p整體音色實淨但唔強硬地表現其高訊息量令我覺得T51p亦剛亦柔。聲音密度以及連貫性高，動態表現唔錯。T51p對推力有要求，但一般直推並唔失禮，唔易出惡聲。個人傾向最好加耳放，Just Audio AHA-120會係一個唔錯既選擇。

值得一提既係，T51p的確係Tesla系列耳機。用上Violectric V800+V200，開第二細增益，T51p聲音具有Tesla系列個種密度，聲音非常細緻。細節多但唔會太有偏頗，但唔會過分強調細節；簡單黎講就係能夠令我聽得非常舒服地多細節。特別係比較細微既部分，例如弦樂部擦弦以及弓法刻劃等等，聽得到之餘唔會過量，聽感自然。

以便攜耳機黎講，T51p出到算係非常闊既頻寬，加上非常優質既低頻，T51p能夠優秀地表現出中程度既動態；至於大動態表現雖然無法同同前端下全耳式耳機例如beyerdynamic DT880(600)/AKG K702相比，但顧及到T51P只係便攜耳機加上係封閉式設計，佢對於大動態音樂既表現絕對唔失禮。如果加大增益去催侷動態表現，即使能夠令T51P動態變得更猛，亦會因為佢係封閉式設計而令到含混，細節失去條理變得紊亂，聲音變粗，未必會聽得太舒服。

個人猜測，或者同物料有關所以T51p聲音微微帶有金屬感，或者因為咁所以T51p既高頻稍乾，而低音弦樂部分比較容易出現較有機械感既聲音；呢一點我個人持中性至偏正面既評價。同時亦係個人猜測，有機會係物料因素，而令T51p結像相當唔錯，音場帶金屬感地立體，有一定定位能力。其程度係我係其他同類型定位既產品所未見過。試聽左Mr. Children Simple (1/42，Live Recording)以及Jason Mraz Sleeping to Dream (Tonight; Not Again, Live Recording)，現場感非常高，低頻稍多但同聽流行音樂會現場相若，我非常喜歡。

係整個煲機過程中T51p變化相當微妙，改變好大但同時都重係T51p。最主要係整體表現融和程度改變非常大，細節表達方式變得更細膩同埋無咁衝，本身密度非常高既聲音其實唔算太自然，經過長期煲機後密度質素提高但同時變得更自然。

呢對係我非常推薦既一對耳機。