數到FPS嘅歷史，有一款遊戲係不得不提嘅 — 《Call of Duty 4: Modern Warfare》(MW)。MW嘅出現除左標誌著主流軍事FPS正式由二戰背景移師到現代戰爭之外，當中所插入嘅電影式情節更加影響到整個本世代遊戲發展。自MW大獲成功後，Activision每年都會推出一部COD作品，而最近嘅三部:《Call of Duty: Modern Warfare 2》﹑《Call of Duty: Black OPS》及本作《Call of Duty: Modern Warfare 3》(MW3)更加係連續三年刷新銷售紀錄。不過質素呢?雖然好多核心玩家都會知道佢地實際要等嘅只係由Infinity Ward(IW)所開發嘅COD作品，但隨著母公司每年機械式咁複製相同內容推出市面，再加上Infinity Ward大部份原製作人已經離開。所以，當MW3綜合媒體評分由最初嘅9分下跌到8.9分，而MC玩家評分亦由最初2.8分上升到3.2分嘅時候，作為一個由PC 1代開始玩起嘅系列粉絲，對於哩款系列最終章，我可以用「娛樂大作」黎形容，但顯然本作離「出色」﹑「神作」等字眼仍然有一段距離。
事實上，本世代主機上推出嘅大部份「三部曲」都出現同樣問題，特別係好似COD哩類單線遊戲。通常個情況就係「第一集hardcore﹑第二集最精彩﹑第三集集大成」，雖然第三集係集大成之作，但平心而論，第三集嘅流程通常都係相對悶。以故事模式黎講，之前嘅《Gears of War 3》及《Uncharted 3》都出現哩一種情況，內容非常豐富，但流程設計遠不及前作。MW3亦都係一樣，劇情部份出現過往系列嘅特色，卻失去左創新同新鮮感。
雖然我地唔肯定將來會唔會有MW4，但今集入面，前作大部份迷團已經解開，而各人嘅結局亦都毫無懸念咁交待出黎。如果你係本系列嘅fans相信你依然會滿意MW3嘅故事部份，儘管佢有唔少盲點。但問題係，邊一部商業大片係冇盲點呢?更何況MW系列嘅火爆主要係關卡設計及過場動畫所構成。所以跟住落黎會講吓關卡設計。本人對於關卡節奏係睇得非常之重。如果一款遊戲入面大部份關卡都各具特色，且色彩不一，而關卡連貫性又強的話，咁樣該款遊戲差極都有個限度。《God of War II》係哩一方面做到咗極致。而前作MW2亦都有意識咁做。由俄羅斯入侵美國至到遊騎兵搶返白宮連續9關，141負責全方位動作大片情節，由《叛諜追擊3》飛簷走壁，到慢動作爆門，到《石破天驚》監獄突入，再到傳統MW潛入作戰。至於遊騎兵路線就負責大型戰事作為調和，當中包括少見嘅sandbox關卡，跟住係經典載具掩護戰，之後就有惡夢般嘅華盛頓保衛戰，最後就黎個白宮奪回行動，中間仲要黎個太空人，問你死未。141同遊騎路線配合得當，任務各異，而且關與關之間嘅時間串聯及過場表演都緊湊非常，令一口氣攻略嘅玩家唔多唔少都會感到有點窒息。至於今集MW3，因為時間上，今次IW放棄用傳統嘅「Day X」，而轉用「X月X日」遊戲入面大部份任務與任務之間嘅時間少則兩三日多則幾個月，而遊戲時間亦只係固定喺5~6個鐘頭，結果「稱職嘅WW3」不成連緊湊程度都相對下降咗唔少。加上整體流程甚至可以用散黎形容。系列前作中，當SAS/141於世界各地進行唔同任務嘅時候，美軍往往只會喺同一個國家戰鬥，例如MW海軍陸戰隊於中東某國，MW2遊騎兵於美國本土。但正如上面提到，今集連美軍本身都到世界各地參與反恐任務，所以玩家唔會喺遊戲入面對住同一種色調超過兩關。如此一來美軍路線嘅調和及凝聚都消失。連貫性不足，導致整個流程感覺變成只係由一段段過場動畫去連接嘅劇情長片。哩種形式如果套落《Uncharted》或者一部一兩個鐘頭嘅商業大片上仍然講得過去，但對於一款5~6個鐘嘅MW遊戲黎講，未必係一個明智嘅做法。《Black OPS》(BO)就作出過咁樣嘅嘗試，但可惜Treyarch仍然唔願意延長遊戲時間….
如果我今次係寫MW2嘅評測的話，咁我相信又要花一段去評論單機流程方面嘅新元素及出色。實際上自MW系列面世以來，頭兩集都有唔少創新嘅地方，例如MW嘅「睇你點死」關卡﹑AC130﹑雙狙人; MW2嘅雪橇追逐戰﹑sandbox﹑Predator﹑雙槍﹑飛刀….至於MW3，上面亦都講過，作為三部曲最終章，MW3順理成章作為集大成嘅一集。而過中所集之大成非常廣泛，只因佢唔止融合MW系列精髓，仲引入咗唔少COD系列作品嘅特色。當中唔少更黎自Treyarch所開發嘅COD。好似，BO嘅「投石」系統﹑《World at War》(WAW)嘅德國場景(即MW3美軍攻入德國漢堡關卡，中段某堆建築物感覺完全係由WAW復製過黎咁)﹑WAW嘅屋內爬行。仲有係MW嘅AC130，MW2嘅Predator﹑快艇﹑爆門。可能有人會話，咁續集複製前作成功之處又有咩問題呢?冇錯，要喺一款遊戲嘅續集入面引入新鮮元素之餘，令粉絲感到親切亦都係非常重要，不過問題係MW3除左集大成之外，我就真係搵唔倒其他新元素。如果由MW計起嘅話，咁MW3應該係咁多集入面最冇亮點嘅一集。
唔單止單機部份，連MP模式都出現搬字過紙嘅情況。
雖然遊戲入面好多地方都係熟口熟面，但真係要搵新野都唔係話冇(自打嘴巴)。遊戲最後一關「Dust to Dust」入面Price同Yuri所穿著嘅果套盔甲。即使已經喺MW2嘅Spec OPS出過，但如今出現於故事模式之中真係別有一翻風味(雖然我第一眼見到哩件甲嘅時候仍然果斷咁問我哥:「你肯定佢唔係星際爭霸?」)仲有就係第三關即「Persona Non Grata」中出現一架配有火神及火箭炮嘅UGV，用搖控車殺敵感覺真心係幾爽吓。
正如之前所講，今集嘅141路線設計得相對平庸，特別係中段去搵Makarov貨櫃及捕捉索瑪里軍閥Waraabe嘅關卡，相比2代141動作片式路線差上一大截有多。既然無論係劇情或者係關卡都有不足，咁MW3唯一保持絕對優勢就只係得返佢氣勢磅礡嘅戰場描寫，及令人上線腎上腺素急升嘅驚險與火爆。MW3大場面不絕，由華爾街大戰到巴黎鐵塔被炸都有。其中有幾關本人係特別喜歡嘅，好似第二關「Hunter Killer」，一開始Metal及Seal部隊由布魯克林隧道潛到紐約港海床 > 炸毀敵方潛艇引擎後上水 > 目睹美俄激戰 > 突入潛艇 > 清除所有敵方船員 > 攻入控制室並啟動潛艇導彈(目標周遭敵軍艦隻) > 坐快艇脫出 > 沿途四周敵艦受到導彈嘅華麗攻擊 > 擊退截擊敵人 > 坐直昇機離開….整個過程驚險萬分，而且紐約港大戰場面亦都十分給力。再加上本關嘅流程結合左系列嘅經典橋段: 潛入﹑大戰﹑脫出。感覺上係MW系列面世以黎最能夠反映《現代戰爭》係何等遊戲嘅一關。另一關就係第8關「Goalpost」，講述美軍出兵德國漢堡救副總統嘅關卡，當中有久違嘅搶灘情節，又有米格戰M1，之後仲黎個坦克跌落三層停車場。如果計場面浩大而又不失刺激情節的話，「Goalpost」亦都係個人認為MW系列入面最出色嘅美軍大戰關卡。另外SAS關卡「Mind The Gap」，其中有地鐵追逐情節，當卡車同火車高速駛過鐵路站嘅時候，沿途眾多等地鐵嘅市民都顯得相當驚慌，氣氛出色兼頂癮(= =)。仲有之前提到嘅141路線「Persona Non Grata」及後期潛入關卡「Eye of the Storm」都係唔錯嘅。
相信唔少玩家完成MW一開始嘅訓練關卡後，都會問起:「咁同二戰COD有咩分別?」唔洗擔心，開發團隊IW馬上喺第二關釋出一個完美嘅答案。喺「Crew Expendable」入面，玩家須要攻入一隻愛沙尼亞嘅貨船。然而，完成任務後，貨船被敵方戰機攻擊，海水不斷湧入，SAS狂奔至直昇機處，沿途船身不斷入水傾斜，險象環生。當大部份隊員都上咗直昇機，而船身同直昇機距離愈黎愈遠嘅時候，主角Soap決定盡力一煲，喺冇跳板嘅情況下嘗試跳上甲板，可惜大雨令機身異常濕滑，緊緊用手捉住甲板嘅Soap開始向下滑落。千鈞一髮之際，隊長Captain Price捉住咗Soap並將佢拉上直昇機，眾人安全離開，此時畫面彈出本作遊戲名稱 —《Call of Duty 4: Modern Warfare》。IW:「答倒你問題未?」
MW並非第一款現代戰爭遊戲，但應該係第一款FPS遊戲引入有「空中炮艇」之稱嘅AC130戰鬥場面。喺「Death From Above」入面，玩家扮演AC130上面嘅熱能成象武器操作員，目標就係以火力掩護陸地上嘅SAS隊員登上直昇機脫離險境。過程玩家可以自由切換兩種成像模式及三種炮彈口徑。平時需要一排指彈先可以殲滅嘅敵軍，喺AC130嘅40MM重炮下如同一堆螞蟻。該關對於軍事遊戲黎講算係一個挺為成功嘅嘗試。AC130亦都成為咗本作MP部份嘅KillSteak利器。雖然MW2誕生後佢嘅地位已經被Predator等UAV所取代，但「Death From Above」嘅仍然係MW系列甚至同類遊戲嘅經典。順帶一提，MW3嘅巴黎關卡「Iron Lady」同樣出現AC130部份哦。
4. 關卡名稱: All Ghillied Up / One Shot，One Kill 所屬作品: Modern Warfare
7. 關卡名稱: The only easy day ….was yesterday / The Gulag 所屬作品: Modern Warfare 2
又一經典連關。「The only easy day ….was yesterday」及「The Gulag」發生喺劇情中期。巴西一役後，TF141從支援機場大屠殺嘅毒犯Rojas口中，打探到Makarov有一個囚犯代號為「627」嘅死對頭被囚禁喺俄羅斯位於堪察加彼得巴甫洛夫斯克，一個叫做Gulag嘅監獄上。但由於監獄對出嘅鑽油台被敵軍改裝成地對空導彈基地，又捉著若干工人作為人質。TF141及第六艦隊根本無法通過該海域到達監獄。喺「The only easy day ….was yesterday」入面，玩家扮演Roach與TF141隊員由潛艇出發，從油井底部突入。哩一關嘅經典之處相信係首次引入「爆門」設計，面對著被挾持兼身上裝滿C4嘅人質。TF141於門上安裝炸藥，然後引爆突入，其間玩家會開啟「Bullet Time」，將人質身邊嘅敵人全部擊倒。通過三次爆門之後，油井所有敵人都被清除，工人亦都安全。本關誕生後，之後嘅系列作品都出現哩種「Breach & Clear」嘅爆門設定。與MW3同期推出嘅BF3亦加入咗類似嘅元素。
8. 關卡名稱: Just Like Old Times / Endgame 所屬作品: Modern Warfare 2
「歷史由勝利者所編寫，但歷史卻充滿著謊言」此乃Price「最後遺言」入面最精要嘅一句。「Just Like Old Times」及「Endgame」屬於MW2最後兩關連關。講述TF141全員幾乎被叛逆嘅Shepherd將軍殺清光。最後只係得返Price及Soap兩人。但哩對「黃金二人組」及目睹Ghost之死嘅玩家又點會比隊友死得不明不白呢?如其名 — 「Just Like Old Times」，一開始玩家扮演Soap跟隨Price潛入Shepherd位於阿富汗嘅機地打算仇殺Shepherd，並與Shepherd嘅私人軍隊「Shadow」展開激戰。然而，老狐狸Shepherd一早坐快艇離開，Soap等人同坐快艇上前追截。最後Price擊落載住Shepherd快艇嘅直昇機，但自己都不慎跌落瀑布。「Endgame」最經典嘅地方就係Soap﹑Price與Shepherd嘅一場惡鬥。雖然玩家扮演受傷嘅Soap，極其量只可以喺地上龜速爬行，不過目擊Price及Shepherd兩個加埋成百幾歲嘅老野互相噁打都尚算係一種娛樂(= =)。而最終，眼見Price被Shepherd打至奄奄一息，Soap將插喺身上嘅刀忍痛拔出，然後使出周星馳絕技 — 「小李XX飛刀」，將刀拋向Shepherd頭顱將其殺死。事成後，「黃金二人組」倒臥地上未見起色，畫面亦開始變黑，正當一眾玩家感嘆遊戲就此結束嘅時候，Price突然蘇醒，並上前為Soap進行急救。哩個時候Nikolai嘅直昇機到達，兩人一齊護送Soap上機。然後畫面一黑兼彈出「Infinity Ward Present」字樣。突如其來嘅結束實在震撼無比。如果話IW將MW2打做成一部「互動電影」，咁本關激烈嘅近身格鬥及片尾演出就係最好嘅證據。而哩一幕亦都係三集入面最精彩嘅ending黎。
同樣為美軍路線，相信唔少朋友都會問我點解會揀「Goalpost」而唔係MW2嘅「華盛頓保衛戰」或者「白宮奪回戰」。冇錯，後者嘅戰爭場面的確係更加浩大更加殘酷，不過「Goalpost」哩一關勝在喺描寫戰爭嘅大氣同時，加插咗唔少經典又驚險嘅荷里活情節，實為MW系列入面最出色嘅美軍路線關卡。「Goalpost」講述自Makarov於歐洲放置生化武器後，各歐洲國家嘅防禦隨即被瓦解，俄軍繼而入侵。身處德國漢堡準備簽署和約嘅美國副總統都被俄軍挾持著，所以今次美軍嘅行動就係派兵當地營救副總統(順便侵略他國….講笑)。繼COD1﹑COD2及COD5後，「Goalpost」再次出現搶灘情節，今次更有「雷霆救兵」嘅影子。攻入城後，眾人受到俄軍嘅激烈反抗，除咗T90之外又有米格直昇機。主角Frost進入已方M1坦克，勉強擊退敵人部隊。之後承勝追擊至停車場，怎料停車場負荷唔起坦克重量，主角連人帶車跌落三層地面。哩幕相比起前作總係「飛機失事」黎得刺激好多。值得注意嘅係，完成本關後，可以解除成就/獎杯 — 「Welcome to WW3」喻意遊戲標榜嘅WW3正式掀開序幕。
[複製鏈接]
發表於 2011-12-3 15:08
樓主
隻 GAME 幾正! 
