新購狗病死 寵物店拒賠

halfnew

轉貼

http://www1.hk.apple.nextmedia.c ... amp;art_id=15397680

港人愛養寵物，飼養茶杯貴婦狗成最新潮流。有狗主新購茶杯貴婦 4日後因腸胃炎病逝，寵物店以單據上列明只賠「腸炎、狗瘟」，腸胃炎不在賠償之列拒賠；但有獸醫指腸胃炎是腸炎的一種，直斥寵物店誤導顧客。有寵物專家補充，此品種其實並不存在，消費者須防寵物店「亂噏」招徠。

姚小姐於旺角勝利道「喜喜茶杯貴婦專門店」以$7,380購買一隻貴婦狗，職員聲稱屬茶杯貴婦品種。小狗回家當日已屙嘔不斷，更一度屙血。姚說：「佢只食過寵物店建議嗰隻狗奶粉，狗糧都未食過！」兩日後姚把小狗送到寵物醫院，獸醫指小狗患上腸胃炎，病毒測試結果呈陰性，且病情嚴重翌日即離世，「終年」兩個半月大。
姚小姐要求喜喜賠償，豈料職員指單據列明「只限腸炎及狗瘟（要註冊獸醫證明）換同等價值犬隻，不設退款」，已逝小狗患腸胃炎，不在換犬條件之列。姚小姐稱，小狗去世數日後得到獸醫簽發詳細病歷報告，證實小狗所患腸胃炎，潛伏期達 7至 14日，而姚小姐 5月 31日帶小狗往寵物醫院已出現病徵，亦即購買之時小狗已患病。

要求賠狗價醫療交通費

職員向本報表示，寵物店「行規」做法，只為患過濾性病毒感染的腸炎，或狗瘟才更換狗隻，「腸胃炎同腸炎梗係兩回事啦！過濾性病毒嗰隻一定會死，所以會賠；但家我都唔知佢畀咗啲乜嘢隻狗食，點知會唔會畀飯佢食所以腸胃炎！」
據獸醫黎昌生解釋，過濾性病毒引致的腸炎屬腸炎的一種，而腸胃炎基本上亦是腸炎的一種，「張單就咁寫腸炎，就應該要賠，唔賠即係誤導消費者。」香港狗會全犬種國際評判梁仲楷亦同意寵物店理應賠償：「腸胃炎都係腸炎，所以寵物店理虧，上到小額錢債審裁處贏面好細。」
姚小姐表示，喜喜曾提出讓其以半價另購一隻已注射三針的茶杯貴婦狗，「梗係唔制啦，佢好多狗仔都似有病咁。」她要求店方賠償買狗金額、醫療費用及交通費逾萬元。
檔案編號： 0601075



無良寵物店害人害狗, 為禍人間!

ayumi678

無良奸商有病既狗都照賣比人!!! 衰到無朋友
不過寵物睇醫生係好貴 仲貴過人去睇醫生!!應該要比番錢!!!
想當年我帶隻兔仔去睇醫生 未見官先比6百 醫生都未睇就要比6百!! 直到隻兔仔出門口 共收左我成3千幾蚊 打一支針 比幾包藥咁就3千蚊 貴到阿媽都唔認得

kalok6

買狗真係唔好係果條街買.....去太平道最大間果間啦......

jt24

呢D;事真係經常都發生，十幾廿年前已經係咁嘅喇！

成成

我屋企隻英國短毛貓，上年年中突然後腳郁唔到，攪佢就好痛，醫生話佢有血塊阻塞，先去照乜乜圖乜乜好專業名詞，要四千五，藥費另計，我話唔照啦，佢咁辛苦又話過唔到年尾，不如比佢屋企渡過餘生，好過周圍走去照嘢又醫唔好咁辛苦，埋單三佰蚊返屋企，兩星期後行得返，一個月後周圍跳，而家仲好精靈喺屋企，到期打針唔知醫生會有乜嘢反應呢，我諗隻貓會話：你死我都未死呀

4pk

回復 5# 成成


   
叫隻貓幫醫生照下個腦

stanleykc13

死得快，迫你買過隻新的