如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
因為離開咗舊公司, 又超過兩年無去過旅行, 所以决定去一次比較長既.... 前後共十五日, 其實扣扣埋埋d機程, 等機時間等等, 總共約十三日到... 相信都頗難有機會再有咁長既旅行..
今次共去咗三個地區, 大板/京都, 北海道 同埋東京.
大板/京都, 比較東京, 大板無咁繁忙, 唔會好似彌敦道咁, 買野食野既鋪頭又少人... 感覺舒服一點.
1. 環球片場
相比廸士尼, 我覺得環球片場比較適合我呢個年紀既人玩, 因為裡面有好多以舊片做background既遊戲對我黎講好有感覺(例如:back to the future, backdraft, waterworld 等等)... 其中有三個係值得推介.... 11點去到玩到8點先走.
- shrek 4-D movie 我睇3D電影係停留係十年八年前既技術, 今次睇3D既立體感覺完全同以前唔同, 真實好多, 仲要加埋體感(盧盧打乞嗤有水噴到你塊面, 蜘蛛係地下爬個位下面有氣噴出黎等等)...好好feel, 唯一佢全程講日文, 唔知佢講乜...
- T2 movie, 又係4-D, 不同之處有於有演員穿插於營幕前後, 最後有共三個立體營幕同埋大爆炸之後有唔知乾冰定煙向你噴咗成十秒, 非常有現場感.
- Spiderman 室內過山車, 又係載立體眼鏡, 一大班怪物係你面前出現但係都比spiderman一一打退, 刺激-新奇-又好玩.
2. 海遊館
號稱全球最大室內水族館, 有魔鬼魚, 海豹, 好多未見過係海洋生物... 最特別係有一群企鵝係一個特製有冰落既水族箱, 同埋數以幾仟既沙甸魚係你面前氹氹圈咁遊... 值得一去.
3. 京都仁和寺/清水寺
- 去仁和寺最主要見到酒店lobby話尚有少量櫻花, 去到果然無錯, 真係好少量. 不過都好過冇... 個廟都好大同宏偉... 見到好多日本阿叔拍友組團去影相... 希望我退休後都可以咁.
- 相比下清水寺就仲大仲宏偉, 好多人... 可惜佢d櫻花已經開完... 呢日係咁多日裡面影得最多相既一日...
其他時間就係好随意咁行吓街同埋揾野食, 去過既有難波, 心齋橋, 南船場, 住就住係梅田.
北海道
經過前後六日係大扳/京都旅程之後, 我地就係黄昏到達関西機場飛去札幌新千歲機場.... 去到酒店都成九點幾十點, 放低行李之後就出咗去宵夜..
其實之前朋友勸我唔係季節到北海道, 叫我放棄... 的而且確唔係時候, 但係我絕不後悔, 仲慶幸無取消去北海道添! 呢個地方我唸我一定會再黎!
4. 札幌市/小樽
- 一日內行曬兩個地方, 朝早行去札幌大通公園, 無雪又無乜花... 行咗一陣附近嗰幾條街之後就去咗二条市場, 佢係一個不算太大既魚市場, 去到食咗本書話出名既五色飯, 又嗌咗一孖燒蟹腳... 好食但唔係咁大驚喜...
- 食飽後行返去車站去小樽, 途經市內一個公園, 係一個城市裡面有個咁靚既公園真係正...
- 坐火車用咗約四十分鍾到達小樽, 火車站古舊得黎有d特色(有好多... 去小樽當然要去小樽運河, 無想像中咁靚, 我有個朋友剛剛2月份去過返黎睇我d相仲話有雪係兩旁就靚, 無雪就似坑渠... 真低死. 參觀過賣玻璃既鋪頭, 賣音樂盒既鋪頭, 賣白之戀人既鋪頭等等... 行完晒之後就揀咗一間sushi店開飯.. 牡丹蝦勁好食... 約十點到返到札幌酒店.
5. 美瑛/富良野
- 除咗係澳門租過車之外, 今次係第二次係外地租車... 我係網上揀咗架有超大天窗既honda airwave.... 點知去到囉車先知佢比咗架無天窗既我, 激死!
- GPS自動導航真係一個偉大發明, 係一個你完全唔熟識既地方都可以輕鬆駕駛... 準確度超過九成.
- 從札幌到上富良野用咗約2.5個鐘車程, 由離開札幌市沿途風景非常之靚, 經過每個山頭都有長滿不同顏色既樹, 非常壯觀! 好可惜唔可以停低影吓相.. 另外係條highway收費勁貴, 3000yen 約港幣$240..
- 去富良野之前, 我地途經美瑛, 雖然周圍都無花, 但係一望無際既環境真係好舒服, 想像到如果周圍開哂花, 嗰種壯觀法實難以形容.
- 係美瑛行吓停吓影吓相, 點知天氣突然轉壞, 落咗一陣雨, 正當想去酒店既時候, 係倒後鏡見到彩虹一道, 即時停車影低佢... 非常好彩!
- 去到酒店門口, 見到門口有個歡近牌, 心裡喑喑講咗句大吉利是... 呢間係一間温泉酒店(其實似一間頗大既家庭式賓館), 房間尚算濶落ok, 温泉既環境我老婆形容為富良野浴德池... 晚餐於酒店內和牛燒, 正!
6. 富良野/層雲峽
- 離開酒店後就開車到附近既小型農埸餵吓羊咩, 北海道其實有好多地方都提供一d體驗興趣班, 呢個農場就有一個教人整麵包既興趣班.... 如果我識日文我都會玩吓...
- 跟住就去咗一個當地比較出名既薰衣草田, 雖然室外無開咗既薰衣草, 但係佢地都有温室薰衣草比你睇.... 當然最後都放低多少錢两買吓d周邊產品..
- 揸住架車亂襟兜去揾午餐開, 卒之揾咗間地道居食屋食咗個好好味既生姜燒定食... 我鍾意自由行既原因就係咁.. 有驚喜, 無論好或者唔好.
- 開完餐之後就驅車往層雲峽, 途中有個路口我無出到, 當時真係有d驚, 之後十分鐘先有另一出口出返去加上gps導航, 又重捨正軌.. 呢日天氣唔多好, 一路有雨落之餘仲幾大煙霧同埋勁大風, 兼且上山路兩旁都係一d石峽, 都咪話唔騰.... 最後上到層雲峽朝陽resort, 温度低到零度, 雨都變成冰粒, 風大到架車停低都可以吹到左右擺... 環境勁惡劣... 但係入到resort裡面就完全唔同..
- 入到lobby裡面只係得一位小姐識講英文, 講到最後先知佢原來係中國人... 話時話日本都好多中國人係道做野, 我今個trip最少遇過4-5個..
- 係香港揀呢間酒店係最貴, 果然一分錢一分貨, 房間超大, 温泉靚過之前嗰間好多好多... 仲有一個露天風呂, 赤條條係落冰既室外浸温泉, 感覺過引.
- 食物方面反而無上一晚咁好, 但係都唔係叫差... 呢間酒店仲有提供自費足底按摩, 初頭以為實係一d大陸外勞做, 點知係一d後生日本妹...
7. 層雲峽/千歲/支笏湖
- 訓晏咗, 本來唸住浸多次温泉都趕唔切.
- check-out之後唸住坐cable car上山頂, 因為太大風淆底無上, 跟住去咗大雪山國立公園, 連綿山丘令人心曠神怡...
- 再之後揸咗四個幾鍾車落千嵗outlet mall, 發揮部車到140km/hr, 之後就feel盤吠有少少震就無再加速. 係outlet mall買咗一堆衫褲比智智, 我都唔執輸買咗少少野...
- 買哂野上車去函館, 入咗目的地原來要成五個幾鐘先會到... 當時已經係4點幾5點, 最後決定放棄函館, 改去近新千歲機場附近既支笏湖... 係無期望下, 我同我老婆都"嘩"咗一聲出黎, 湖既size好大, 湖面平靜, 山倒影係個湖上面連成一線, 靚到"氹"一聲, 又好彩去到嗰間酒店又有房... 不過就貴咗d, 12800yen一個人包懐石料埋晚餐及早餐...
- 呢間温泉resort無朝陽咁大, 但係都有個好靚既温泉同露天風呂... 露天風呂對住個湖都咪話唔爽..
- 又第一次食懷石料埋(唔知算唔算正式係), 每樣食物都造得好精緻, 食落ok, 但無乜驚喜.
8. 支笏湖/千歲
- 較咗鬧鍾五點起身唸住影日出, 我自己就四點十個字起咗身, 天已經光... 我拿拿聲開窗影咗2張相之後換衫落樓下再影... 朝早雖然滿佈了雲, 但仍算清淅.. 廣闊寧靜既湖, 得我一個人行來行去影吓相, 正爆!
- 影完返上房再瞓多陣, 瞓醒浸多次温泉就check out.... 之後就去咗無幾遠既支笏湖小型國立公園, 幸運地見到櫻花, 雖然唔係好多, 總算見到! 睇黎放棄函館改去支笏湖係一個正確既决定.
- 由於呢日本來由函館返新千歲準備第二日搭早機去東京, 而家多咗時間出黎.... 係千歲附近食完晏又去咗outlet mall 行多次...
- 黃昏到機場附近一間賓館check-in, 之後去咗還車, 跟住揾咗間非常地道既居食屋食晚飯... 老闆兩公婆自己主理, 睇落去老闆都有成70歲喇! 佢見我唔識講日文, 就自已發板燒咗條魚比我地食... 飲吓sake食吓魚咁又一晚喇!
東京
- 去到東京嗰3日幾都係行d原宿, 涉谷, 新宿, 秋葉源等等.... 好多人不過d野又真係又多又齊又靚....
- 最特別算係去六本木山, 我上次去仲未開...
後記:
- 幾乎每餐都係日本野(早餐除外), 係純吉列無食過...
- 買咗好多衫褲鞋比智智, 我自己都有d收獲, 反而出奇地我老婆買得最少野!
- 計錯時間, 從未試過班機起飛前九個字先到機埸, 本來打定輸數會滯留東京, 非常好彩可以上到機返黎...
多謝收看!
[ 本帖最後由 ronaldlaw 於 2008-5-14 01:35 編輯 ] |
一名永遠的入門玩家, 對電影, 音樂, 影音等玩意永遠雀躍, 其後為了可以將這個毒海無涯信念推展開去, 故建立了這個毒人唔洗本的影音娛樂資訊平台
發表於 2008-5-9 00:38
樓主
發表於 2008-5-9 08:49
