火大!!! 忍無可忍之下, 向屋苑管理總公司投訴.......

Raphael

雜物問題, 再加上發現好多野壞 / 爛又無人維修..........
忍無可忍之下, 尋日打咗去啟勝總公司, 投訴咗二十分鐘

今朝早管理處有位先生打返俾我, 向我了解情況
結果就足足投訴咗大半個鐘...........

雜物:
1) 所謂 "酒店式管理", 大堂偏偏工作人員就將地拖掃把到處放, 連工作人員自己既雨傘都隨意掛喺花盆邊! 垃圾桶被踢翻又無人執
2) 屋苑入口保安更亭又係放滿雜物, 似士多房多過似屋苑門口
3) 明明無工程既地方, 放咗圍欄足足三個星期, 但佢偏偏又唔係圍住地方唔俾人進入! 似係純綷亂放無人收拾
4) 明明無落雨無濕滑, 偏偏到處擺放 "小心地滑" 膠牌, 搞到好似地盤指示牌咁; 俾人踢跌 / 踢到飛開一二邊, 都無人執拾
5) 好多指示牌都用沙包壓住腳部, 防止被風吹到. 呢個原本應該只係臨時方法; 長遠應該換過較穩陣既指示牌. 但而家, 佢地用開係咁, 就由得佢......... 我每次經過, 都覺得似行過整路地盤, 肉酸夾核突.........

衞生:
1) 一星期之內見過三次小強, 其中一次仲要係喺大堂
2) 花園到處垃圾, 下晝四點見到喺喥, 七點幾依然無人執
3) 有蓋貨車位附近有一個冷氣去水位, 由得啲廢水流落地面, 又臭又易滋生蚊蟲

設施損壞, 投訴過成個月都無人理
1) 平台有兩盞燈壞咗, 地面咁啱又有好矮 (約兩吋高) 既花槽邊位; 試過因為太黑, 我 "kick" 到兩次, 仲仆埋街...... 一個月前投訴, 今時今日居然都未整好區區兩盞燈!!!
2) 健身室跑步機壞咗兩個星期以上, 都係無整好
3) 會所大堂電視壞咗, 就搬咗健身室部電視出大堂; "話" 補返部電視入健身室 "話" 足個幾月, 今日都未買到電視!! ("話" 百老匯個多月都未俾到貨嚟......... 咁都得? 我即時問佢, 我今日去買電視, 如果兩三日送到嚟, 咁點先? 佢之後話立即跟進...........)
4) 花園木地板 "翹" 起咗, 容易 "kick" 親人
5) 花園藤椅有隻腳 "拗" 咗, 隨時冧...... 通知咗佢地, 叫佢地貼張紙上去, 提醒大家唔好坐上去 (尤其係老人家, 大肚婆) ........... 又係無人理會! 一星期後依然由得佢係咁!!!!! 結果我發大火地再通知佢地, 佢地先至肯做野!! (今次好彩無人出事...... 如果有老人家 / 大肚婆出事, 我問佢點算?!)
6) 就連 lift 入面按鈕既膠膜, 穿咗窿成個月, 都無人更換 ( 話明每兩小時清潔一次; 無理由會發現唔到掛????)

投訴期間, 聽到對方附近啲女同事喺喥嬉戲, 即時火嚟.......
忍唔住問對方, 到底佢地係唔係好得閒, 屋苑有咁多問題唔理, 但有時間喺喥玩?

最後, 對方又再係嗰句 :
好多謝先生你提醒...... 我地會立即跟進

好!! 我今次就睇吓你地又要跟進幾耐.........

ricoy288

啓勝管理, 即是新紅A樓........??

PP-HK

不如去業主立案法團投訴等佢俾壓力管理公司啦。

Raphael

啓勝管理, 即是新紅A樓........??
ricoy288 發表於 2010-9-8 16:57

無錯......就係郭氏兄弟既 "佳" 作
樓宇本身用料無問題........ 管理就真係令我扯火
咁既管理質素, 居然夠膽死收人$2一呎........ ^&^$#&$()@_($@)_%$_)(@$_

Raphael

不如去業主立案法團投訴等佢俾壓力管理公司啦。
PP-HK 發表於 2010-9-8 17:01

小弟淨係識得一個委員, 偏偏佢又比較低調......
所以索性自己出手抦管理公司! 至少應該狠啲狼啲...........

rinko

嘩...咁多野都有問題都唔去跟進.住屋村都唔會咁啦!仲話酒店式管理?我現在知道住屋村有幾好.

PP-HK

小弟淨係識得一個委員, 偏偏佢又比較低調......
所以索性自己出手抦管理公司! 至少應該狠啲狼啲......... ...
Raphael 發表於 2010-9-8 17:04

不如出封信俾立案法團要求佢地跟進啦, 佢地先係管理公司既老細, 業主直接投訴唔好聽講句佢可以當你唱歌。

Raphael

不如出封信俾立案法團要求佢地跟進啦, 佢地先係管理公司既老細, 業主直接投訴唔好聽講句佢可以當你唱歌。 ...
PP-HK 發表於 2010-9-8 17:19

都好
如果佢依然無改善, 就一於咁做

raymond430

ching住邊區?

Raphael

ching住邊區?
raymond430 發表於 2010-9-8 17:31

荃灣, 爵悅庭
好似你都係.....?