志明與春嬌 (Love in a Puff) - Blu ray (實物圖+短評+含內容)

SonSon · 發表於 2010-7-21 23:42

本帖最後由 SonSon 於 2010-7-22 13:18 編輯

一套上映前沒太多人談論，亦沒有人期望既電影，原名：談戀愛（好彩冇用到）。但因為網上口碑愈傳愈激，好似傳染病咁傳播開去，令到部份觀眾一而再，再而三入場觀看，就係咁就令到“志”片由票房慘淡到愈映愈旺，係復活節檔期打低晒同期港產片，相信一眾男女主角及彭導演都始料不及．當日無緣入場觀看，呢次出Blu ray就要先賭為快，究竟一套港產地道三級愛情片會點解會有咁多人談論。

故事簡介：

自2007年1月1日開始，香港實施室內全面禁煙，煙民都被迫從辦公室走至後巷抽煙。從此，來自不同背景職業的煙民，在後巷開闢了一個打諢聊天、結交朋友的特殊場所，其中一對男女─張志明與余春嬌，亦因抽煙而在骯髒又狹窄的後巷中邂逅，一段錯摸不定、曖昧難測的戀愛關係，由燃點香煙的瞬間中展開．．．．

英文名：Love In A Puff好似更加貼近故事內容

又食煙又講粗口，屋企有小朋友既絕對不宜共賞

有DTS-HD 7.1，SF比較特別係有男女主角及導演旁述

內頁令我不期然諗起近期一套港產片：分手說愛你，都係有床照

。不過4幅劇照，千樺同樂仔都比較落寞。

內容－８分

開場頭5分鐘，以為入錯Blu ray睇錯片，乜原來係鬼片咩

？點知呢D原來就係“打邊爐”既話題，五湖四海，不同階層既人因同一嗜好而聚首一堂，八卦咸濕話題共冶一爐。

呢一刻開始，雖然事後一個向左走，一個向右走，但係只要大家係＂armchannel＂就得，真正五個字可形容晒＂姣婆遇著姿粉客＂

食環署阿Sir巧遇日韓旅客係其中一個爆笑位。

Facebook台灣男約會一段雖然老生常談，相信十個會有八個都咁樣做過，但依然低死好笑，你/妳有冇試過比人彈鐘。

原來黃德賦已一早發現亂碼內有玄機，呢D就係係埋一齊五年同未夠五日既分別。

＂有Ｄ嘢唔係需要一晚內做晒，又唔係趕時間＂，香港地有幾多個男子真正咁做到？Ｄ女子聽到係唔係會冧死。

谷德昭得兩場戲，出鏡不多，但個人覺得係最搶戲既配角，係七仔吞雲吐霧榨傻扮懵及片尾委屈男自白實忍酸不禁。

開頭唔係太明白UFO一幕，要再睇多次先領略到個中含意，原來很多人根本冇留意身邊擦過的人和事，輕易讓會開花結果既愛情溜走，就好似UFO曾經係您頭頂飛過都睇唔到，唔係因為香港多高樓大廈，只係您冇細心留意啫。

畫質－8.5分

事前對一部小品式BD畫質沒有任何期望，但求有貨收就算，點知有意外驚喜。整套片不論室內室外場景大多彩用自然光及不誇張刻意打燈，貼近真實環境。日景又經常利用陽光做影，突出主角輪廓，夜景沒有因此畫質下降，雖然燈光不足令到部份細節損失，但雜訊又控制得宜。整套片日夜畫面統一，色彩討好，以港產片來說個人收貨有餘。
另外要一讚導演及攝影，雖然千樺已踏入中女階段，已非當年既少女的祈禱，但鏡頭下仍見活潑可愛，拍得千樺有幾分姿色添

（雖然扮娜姐一段有D搞嘢），當然最開心梗係阿丁生啦。

聲效－6分

好抱歉，雖然有DTS-HD 7.1，但小弟對木耳聽唔到有乜特別效果，Ｄ粗口對白都冇前後左右走

，真係懷疑隻ＳＷ有冇郁過，不過乃念＂志＂片都唔係用特效去sale人就算把啦。

總結

據聞＂志＂片已係國內公映，相信事前亦都冇人估計到會有祖國版，相信係口碑引至，雖然上映版本一定會有所刪減，但仍值得慶賀。楊千樺演活一個三十多歲，有一個一齊生活了五年既男友，但生活淡如開水，一日遇到位啱channel既異性，但年齡差距令到自己幻得幻失，加上一D小動作演出令人覺得恰到好處，當然編劇功勞亦不可沫殺。反而余文樂較平均，沒有那段給人較深刻印象。全片夠晒香港地道特色，中間穿插仿紀錄片道盡時下港人對愛情睇法，（雖然覺得千樺一段為接近初戀對象去學食煙打開話題有點兒教壞細路

）冇高潮疊起曲節離奇，只有貼近現實生活化情節，時下七八十後唔多唔少會有所共嗚。唔怪得曾有人提過＂志明與春嬌＂為上半年本土電影回勇三寶之一（其餘為＂歲月神偷＂及＂打擂台＂）。