間電器舖洗冷氣真搵笨

jt24

話說早幾日我書房部冷氣滴水，見買咗幾年都應該係洗洗佢嘅時候囉！咪走落街巿間電器舖問洗冷氣要幾錢啦！事頭婆話淨洗$350，如果因為牆身去水位塞要換喉就加多$100，佢仲話我買機裝機D師傅通常都唔幫我換嘅，所以好多時都係用番舊嘅，咪好易塞囉！仲有要整呢樣嘢要擒出去搞嘅，咪要收多一百囉！我話唔係一定要換喉掛，叫佢上嚟拆機嗰陣睇吓要先至計啦！兩個師傅上到嚟，其中一個幫我拆咗部機，拆埋連住部機嘅水兜仔連一條大約4至5吋嘅膠喉交畀另一個攞去洗，我見條膠喉係黑咗嘅，其間要求我攞個水杯裝D水畀佢倒落牆身嘅去水位試吓有冇塞，結果係冇嘅！洗完個水兜仔，個師傅cut咗一段新嘅膠喉駁落個水兜仔度放番上我嘅冷氣機位，跟住就攞部機落去洗，之後我爬上個冷氣位睇吓牆身去水位喺邊個位置啦！原來就喺正冷氣機底部，所以條喉只係需要4至5吋就夠。幾個鐘頭後，攞返部機嚟裝番上去，跟住收錢，收據寫住$450，我話點解唔係$350，佢哋話換咗喉呀嘛！嘩....真係食水深呀！洗冷氣就梗係要拆埋個水兜仔落嚟洗o架啦！去水位咁近又唔駛擒出去整，個段膠喉得4至5吋，頂籠值幾蚊雞，早知係咁，我叫佢唔好換，我搵支舊牙刷洗番乾淨條舊膠喉都可以啦！不過佢已經整完，費事同佢糾纏，畀佢算數，話過以後唔會再幫襯呢間嘢！其實以前搵佢哋洗冷氣都會包埋整呢樣嘢嘅啦！依家搏晒懵要另外收錢！真過分！

PP-HK

你好似由頭到尾都冇應承過叫佢換水喉喎, 換著我唔會俾果100蚊佢, 最多叫佢拆番出黎我自己換番條上去。我之前洗冷氣試過咁樣, 係洗完機之後個師父仔話我部機生銹, 仲好好心咁幫我剪左生銹D鐵片出黎, 但要收番我舊幾水。我即時反應係, 吓! 你未經我同意剪我部機? 佢嚇到唔敢收額外錢裝好機即刻走人。

jt24

你好似由頭到尾都冇應承過叫佢換水喉喎, 換著我唔會俾果100蚊佢, 最多叫佢拆番出黎我自己換番條上去。我之 ...
PP-HK 發表於 2010-7-5 10:23

Ching我冇你咁好氣勢呀！算啦！以後搵過第二間舖搞整算囉！

PP-HK

我家有惡犬MA, 睇我頭像就知la。

giralda

呢d算好.....
有d仲衰...見係d老人家..."昆"佢地入雪種(分體機),
攞支玻璃膠出出面,食完支煙番入來話入咗...咁就收人五舊水..

小瑟

話時話, 其實洗泠氣有冇用架呢??? 我見好多人都話洗完都係唔涷既!??!

Metropolis

洗冷氣唔只冇用, 仲好易搞到凍都變唔凍.
除非你洗完搞埋雪種la

waicsl

話說早幾日我書房部冷氣滴水，見買咗幾年都應該係洗洗佢嘅時候囉！咪走落街巿間電器舖問洗冷氣要幾錢啦！事 ...
jt24 發表於 2010-7-5 10:14

    整完後,覺得怎樣,是否改善了好多,  洗冷氣機是否分 匹數收錢

jt24

回復 6# 小瑟
應該有用嘅，尤其係滴水嘅問題，不過如果部機太舊就真係要換雪種喇！

jt24

回復 4# PP-HK
我家都有隻史納莎囡囡o架！不過得把聲，人哋唔會驚！