從【尋秦記】電影版（有劇透），聊到我最喜愛的TVB劇集TOP 10 📺

女孩兒與四重奏

對於呢類「港劇延續回憶殺」我並唔會過份挑剔，亦睇得出劇組有啲心思，尤其見到由智叔飾演嘅烏博士回歸真係深有感觸，但若果要我認真評一評套戲，劇本始終係一大硬傷，想玩「Ken哥刺秦王」呢條橋又寫到兩頭唔到岸。

仲有個樣十足十《中年好聲音2》「譚輝智」姓吳嗰位油膩大叔，嘩！到底係邊個天才提議揀佢入嚟搞亂檔？條友啲戲仲誇過王祖藍、李思捷mix埋，同其他人根本唔喺一條channel上面，每次出場都想佢快啲畀人Headshot收皮，唔通所謂嘅「中國國家話劇院一級演員」 就係得咁多料？

咁究竟邊個先係我心目中嘅MVP？之唔係“玉樹林峯”嘅秦始皇囉！整齣戲只得佢同李斯能夠連貫到原劇裏面個角色，無論喺語氣定行為舉止上都盡顯帝王風範，面對生平最尊敬嘅恩師，嗰種愛恨交纏、又敬又畏嘅矛盾心情實在係百感交集，特別係結尾幫師傅托返起把劍嗰下，啲淚水啱啱好𠺘吓𠺘吓，更加係全片最大感動位。🎬

其餘要角方面，作為男一嘅古天樂喺頭30分鐘都叫做勉強還原到項少龍嘅面貌，但去到後面唔知搞乜越做越求其，啲內心戲完全畀盤兒屌打；滕麗名風采依舊，可惜長期熊尚善上身，冇咗昔日剛中帶柔嗰一面，而歐瑞偉所飾演嘅陶總管則有啲為死而死嘅feel；繼續係“人質擔當”嘅宣萱一貫婆仔本色，出親場例必嘈喧巴閉，至於做佢個仔嘅朱鑑然全程木口木面，明顯係花瓶一個；「Silly」陳國邦恰如其分咁重現原著人物嘅神韻，功課做足，態度專業；張繼聰個定位好模糊，演得亦兒戲，索性將佢啲戲份分畀善柔同二弟會更適合；有傳片酬高達1500萬嘅「翻版雅夫人」白百何純工具人，全無發揮空間，同埋就算想攻入大陸市場，都唔使用埋啲唔夾口型嘅爛鬼配音㗎！家吓咩年代呀？解釋返Galie老母係山東人，話佢自細喺北京留學然後直出國語咪得囉！🤨

完整全文：
https://timeischanging2013.blogspot.com/2026/01/Back-to-the-Past.html