[測試分享]9條熱門喇叭線(Canare, Mogami, Kimber, Audioquest, Neotech)

minglau@G

今日集合所有現役喇叭線去配搭我現有的三個喇叭，分別為Usher S520、Spendor Classic ⅘及Q Acoustics 3030i（喇叭特性請看早前測試https://post76.hk/forum.php?mod= ... d=356985&extra=）。測試分3輪:
第1輪測試喇叭Usher S520，試音歌曲為陳奕迅<幸福摩天輪>、許美靜<城裏的月光>、劉德華<他的女人>；
第2輪測試喇叭Spendor Classic ⅘，試音歌曲為羅嘉良 <心中有數> 、許美靜<單數>；
第3輪測試喇叭Q Acoustics 3030i,試音歌曲為衛蘭<大哥>及方大同<每個人都會>。
但這次的測試有相當既困難，因現時測試既線係經過數次大大小小比較而薛選出黎，基本上都是獨當一面無怪聲正路既好線。測試準則純粹是按喇叭特性各自找出最能令我聽得感動的喇叭線。

測試喇叭線
Mogami 3103
Mogami 3104
Kimber 8PR
Canare 4S11 （現任主力）
Canare 4S8g
Van Den Hul The Twin
Neo Tech 5005
Audioquest Type 5(二手入不知真假）
Micca 14 Gauge （Amazon 熱賣）
（*原定還有Canare 2S9F, Kimber 4TC等線但後期剔除了）

測試器材
Hp電腦透過USB  > Acoustic Revive 8800（解碼電源線） > 丁丁解碼TPA1541 > Kimber Tonik 1米>Yamaha A-S301> **測試喇叭線**>分別為Usher S520、Spendor Classic ⅘及Q Acoustics 3030i

第1輪測試喇叭為Usher S520，試音歌曲為陳奕迅<幸福摩天輪>、許美靜<城裏的月光>、劉德華<他的女人>
4S11          和順舒服
8PR           人聲扎實精細一點流暢但偏慢，令人聽到有點想訓
4S8g          稍偏高頻，人聲線條突出，比4s11更直載了當但聲音少少無情
Type 5          人聲偏厚，bass多，聽陳奕迅較突出而有厚實聲，但到許美靜時認為女聲略欠通透，雖然聲音正確但始終不能吸引到我
Micca          聲音正路，不過不失，稍偏高頻單薄而通透，但欠低頻
3103          感覺聲音屬很標準類型，但稍欠柔情，唔覺有尾音，鑑聽音質多於享受音樂
3104          人聲比3103再厚一點，低頻多一點，整體略為較厚聲，聲音亦屬標準，但聽到有少少耳壓
Van Den Hul  尾音多易入耳，美聲類聲音飄逸，人聲略厚
Neotech        人聲厚，圓潤順暢，完全吸引到我聽落去，聽許美靜時時間像靜止一樣Good

第一輪總結：
經過第一輪，有少少不勝負荷，由於太多喇叭線我有啲困難去記得哂所有線聲音。原本打算俾早前篩走了的4TC (稍多高頻）及2S9F(不及4S11)等 黎個復活戰，但發現現有的線都己經競爭激烈及很難找出決定性的缺點，故只暫時先放在一旁。反而令我有少少驚喜或諷刺的是，第一輪最令我感動的喇叭線反而是我剛發燒第一條入手的Neotech 5006/5005, 原本因後期入了不少貴線而打算放棄這條，但每次篩選都總會令我想留下，可見其實力非凡。我覺得他能與Usher S520配合得最好，主要可能係整套系統中的不論喇叭、rca及擴音都太過直白無味，Neotech既人聲感染可令整體加點色彩，然而Neotech都有大量幫人代工生產線材，聽感上聲音都頗大路自然，這方面亦比聲音相似的Van Den Hul優勝一些。

最配S520的喇叭線：
Neotech 5005
Van Den Hul The Twin



我休息大概1小時後再來第二輪，今次我用Spendor Classic4/5 再來一次。不過我這次不會試3104，我有時聽到既耳壓可能係因為擴音功率唔夠大，3103雖然已經夠粗但3104是其兩倍，可能配大功率擴音加座地大喇叭會較合適用佢啲。

第2輪測試喇叭為Spendor Classic ⅘，試音歌曲為羅嘉良 <心中有數> 、許美靜<單數>

Neotech         聽羅嘉良時不太舒服亦感到有耳壓，但許美靜就ok, 可能歸究於喇叭與線同時太集中於中低頻聲音？
8PR                 變番舒服，可能Spendor聲厚中頻寬，8PR偏精細而少少音窄，互配恰道好處，人聲變精準厚實，聽許美靜<單數>時間將停了一樣,very good
4S8g          人聲靚線條刻劃出色，高頻稍多而少少沖
3103          聽陳奕迅出奇地好，人聲有感情有厚道而帶有顆粒感質感，同時保持透明度，但聽許美靜時反而有啲悶，可能系統整體稍偏向低音所致
4S11          柔順有厚道比3103聲音放開一點及稍偏高頻一點，但情況一樣聽許美靜時比較悶，聲線都係壓低咗啲，女聲沒有飄逸感覺
中間停一停再聽番8pr，比較之下聽陳奕迅低音部分感覺稍遜於3103及4s11 但反而聽許美靜變番好聽
Type 5         同Spendor聲底一樣厚實，兩首歌都出悶聲
Micca         聽感兩首歌都較單薄一點，細節亦少了一點，失真？
Van Den Hul 男聲有啲飄唔算實，許美靜聲比較慢，笠得黎難叫通透，聲音不算吸引

第二輪總結：
感覺要令Spendor配得較平衡其實難度不少（至少令女聲好聽），可能佢偏厚暖慢柔，需要精細通清既線配佢。原本8PR配Usher S520聲音感覺好一般，但配落Spendor啲聲即刻醒神唒，當然喇叭線影響好有限，Spendor聲底一樣保留只係整體將其缺點減低。其次就係用4S11/3103保留低沉男聲，犧牲女聲而變悶聲底（除了蔡琴）

最配S520的喇叭線：
8PR



第3輪測試喇叭為Q Acoustics 3030i,試音歌曲為衛蘭<大哥>及方大同<每個人都會>

8PR                有啲耳壓，聽衛蘭時超高頻有啲多同飄，方大同緊緊叫ok。
隨後大部分都有類似情況，可能上次測試喇叭用Denon CD 機（稍偏低頻）再加上用較長rca (1.5米Tonik)故未能發現其問題，我認為原因係Q Acoustics 高頻響應高達30kHz之餘靈敏度亦較偏高88db, 可能將系統調教偏快一點便會出現這問題？最後發現Type5可完美解決這問題之餘，在男女人聲的表現亦非常出色。如果嫌Type5多低頻，4S11 亦勉強緊緊可以辟走個層超高頻，但要另外再配再長或其他較慢既RCA會再好一點。

最後同樣兩首歌分別用Usher S520配Neotech 5005、Spendor classic4/5配8PR 及q accoustic 配Type5既組合再試一下。全部都好順耳吸引，與之前用開較雜食既4S11對比之下，Usher會比較平衡一點，人聲線條突出啲深刻啲，而Spendor則保留厚暖人聲之餘亦更通清一點，至於Q accoustic則可能更順耳一些，作為配電視av用，算係無可挑剔。

除了以上，雖然4S11及3103未有出現以上喇叭的最佳配搭建議中，但勝在最平衡兼容性最高，配大部分喇叭很容易出好聲。個人喜歡4S11多一點，聲音較柔同自然一點，而3103感覺稍微快一點同厚實一點。如果4S11適合家庭音響用，3103則適合是鑑聽工作上用。

最後補充，所有以上或早前測試的器材全部自費，本人亦無收取任何利益幫人宣傳，純粹感覺網上有太多不同聲音令人無從選擇，又或者一些好既音響器材少做宣傳，令大家可能忽略了。希望本人既分享可以幫到大家之餘，我忽略或錯誤既地方亦有各位師兄提點，謝謝


擁有過的喇叭線
Neotech 5005 / Neotech 5006 / SAEC SPC 850 (PC Triple C)/ Inakustik LS1002 / 加拿大Accurracy / Sommer SP225/ Belden 9497 /  Belden 8471 / Supra classic 2.5 / Supra PLY 3.4/ Audioquest SLIP DB 14/4 / Audioquest G2  / Audioquest Type 5(二手入不知真假） / Mogami 3103 / Mogami 3104 / Kimber 8PR / Kimber 4PR / Kimber 4TC / Canare 4S11 / Canare 4S8g / Canare 2S9F / Canare 2S11F / Van Den Hul The Twin / Micca 14 Gauge/  楊陽7N單晶銅鍍銀 / Tellurium Q Black 2