[圖文教學] 將Nintendo Switch主機資料完整轉移到Switch 2新機

阿定 · 發表於 2025-6-5 15:34

對用緊Nintendo Switch的用家來講，購入Nintendo Switch 2後，都想用最簡單最方便的方法過資料到新機，以下呢個官方轉移工具就最好用啦，可以「完整傳送」的項目包括用戶 Account (必需已連動任天堂戶口)，已購買的Game/DLC，存檔 (包括動物森友會)，玩遊戲時拍的相/影片，主機設定，家長監控等等。

首先，係舊機進入設定，揀"主機" ，然後 "完整傳送到Nintendo Switch 2"

之後跟著畫面指示按下一步，例如"繼續"

如果新機已到手，揀"已在手邊"

跟著就開新機，順序揀語言，更新主機等，直到見到以下畫面，揀"進行完整傳送"

之後跟著指示做，兩部機就會自己互傳資料，十分簡單

如果新機未到手的話，想早少少賣走部舊機先，之後再買新機，一樣可以預先將舊機資料寄存係任天堂的雲端，同之前的步驟差不多，去到問你有無Nintendo Switch 2時，揀"還沒有Nintendo Switch 2"

之後跟著做，上傳到任天堂的伺服器

完成後就會寄存係任天堂，方便日後有新機時接收，不過存放期限只有一年，大家要留意一下

最後要提一提，呢個方法係假設大家唔要部舊機，所以過程間會幫你清空資料，重設主機，無得返轉頭的。