喺愛爾蘭睇咗《雷霆特攻隊 Thunderbolts》

陳永仁

可能呢好幾年啲電影質素普遍太差，或者又唔係好啱我口味，我近年都甚少入戲院。

最上一套入場睇嘅西片，已經係去年嘅《死待與狼人》（Deadpool & Wolverine）。今年第一套入戲院睇嘅西片，巧合地同樣係MCU片嘅《雷霆特攻隊》(Thunderbolts)。本來，我想睇《暗算2》（The Accountant 2），但透過預告片了解到會同首集嘅風格大相逕庭，為咗唔好破壞我對第一集嘅美好回憶，所以決定暫時擱置。

描寫主角群嘅系列作品如《魔戒》(The Lord of the Rings)、未賣畀Disney嘅《星球大戰》(Star Wars)、《哈利波特》（Harry Potter）、《狂野時速》(Fast & Furious)等，至少需要好幾年時間、好幾集，去累積觀眾嘅支持同喜愛。MCU呢個大品牌亦不例外。隨著六年前嘅《復仇者聯盟4: 終局之戰》（Avengers: Endgame）嘅故事發展，復仇者聯盟嘅開山始祖成員都已經因為各種原因而退場。話雖天下無不散之筵席，但Disney點會咁輕易放棄當年花咗幾十億美金喺Paramount 買番嚟嘅金蛋？The show must go on。呢幾年MCU片嘅品質如何，相信大家有目共睹。爛船都有三分釘，電影續作再拍得難看，只要前作個底夠厚，電影公司仍然有利可圖。所以咪有咁多拍到爛到仆街嘅系列作繼續死唔斷氣囉。

反正舊角色都未死乾死淨，就揾番一向都喺舊作戲份唔少、人氣頗高、人工又唔算太高嘅Sebastian Stan飾演嘅大配角Bucky領軍，再加多幾個喺幾年喺其他作品出現嘅新角色，由舊帶新咁炒埋一碟，咁就整咗套《雷霆特攻隊》出嚟。

老實講，入場之前，我已經同自己講唔好抱著太大期望，當係戲院坐兩個鐘等老婆放工就算。套戲好唔好睇呢？唔爛，不過我冇意欲再翻睇。

電影開頭，主角們喺密室內，舞刀弄槍、群毆爛打，確係刺激過癮，簡直係MCU近年最佳打鬥場面（《死待與狼人》就唔計啦，反正都只係掛名MCU）。主角們嘅內心戲，都拍得唔錯，起碼我感受到主角們嘅愧疚同煎熬。而主角們由一開始互相廝殺、猜忌，再免為其難地合力脫險，都幾振奮。過咗頭廿分鐘，我又天真地以為今次MCU真係起死回生。原來，我太過樂觀。

公道講句，電影頭三分一真係唔差，中段雖然有點拖泥帶水，但都唔算難睇，至少反派有合理解釋點解要違抗上級指令都要放生主角們。去到尾段，先令我發火。我知個final boss好勁，勁到殺人速度仲快過Thanos，唔洗啪手指頭已經可以𣊬間令對方死無全屍。英雄同大反派強弱懸殊嘅電影唔係冇，同電影公司嘅都有至少三套。但《雷霆特攻隊》結尾咁打法，實在令人大跌眼鏡。

「不能力敵，但能智取」係英雄角色戰勝強大反派嘅慣常招數。但係可唔可以唔好咁馬虎、咁趕收工吖？話晒電影前上半段都打得頗為精彩，結尾竟然用最慳水慳力嘅方法去散場？我真係接受唔到囉。本來，女主角兵行險著，好似Christopher Nolan執導嘅《潛行凶間》（Inception）咁去進入反派嘅潛意識去令對方釋懷童年陰影，可以令反派有更大發揮。好可惜，力不從心，反派所謂嘅心靈創傷同黑暗面草草了事就完咗，認真冇癮。所以呢，主角同反派實力就最好咪咁強弱懸殊，個差距咁大，真係好難拍得好睇。講到主角同反派強弱嘅嚴重差距，Zack Snyder執導嘅《保衛奇俠》（Watchmen）算係極少數拍得好睇嘅英雄片。2014年嘅《美國隊長2》（Captain America: The Winter Soldier）之所以至今仍然被公認為MCU嘅最佳電影，除咗因為劇情緊湊、節奏快，好大原因係美國隊長同戰友打嘅反派起碼級數旗鼓相當，打起上嚟都合理得多。


《雷霆特攻隊》令我最失望嘅就係Olga Kurylenko 飾演嘅Taskmaster戲份奇少，仲要用咁嘅方法去退場。明明幾張大海報都有Taskmaster，演員名單都有Olga Kurylenko，連首映禮都有份亮相，點解得幾秒鐘時間露樣㗎 ！Olga Kurylenko雖然唔係好大粒，但至少喺Daniel Craig第二部007電影《量子殺機》(Quantum of Solace)做邦女郎兼擔正做女一、又喺Tom Cruise嘅科幻片《攻·元2077》(Oblivion)做女一，仲喺由第五代007嘅Pierce Brosnan主演嘅《諜網暗戰》(The November Man)、Mr. Bean套惡搞版007《特務戇J：神級歸位》(Johnny English Strikes Again)、《殺手47》(Hitman)都係女⼀！全部票房都冇蝕錢㗎！就算家陣人氣下滑，都未至於要受咁嘅待遇啦。所以我撐Jeremy Renner 拒絕同電影公司妥協！


《雷霆特攻隊》雖然有好多地方到喉唔到肺，但至少故事都叫有條有理，演員們嘅演出同群戲、有兩場動作戲都頗為精彩，而且又冇乜荷里活近年嘅植入式政治正確，確係難得。正所謂「蜀中無大將，廖化作先鋒」，呢套都算係繼《終局之戰》後，最好睇嘅一套MCU片。

評分：65/100

Logan

師兄寫咁多字
真係好俾心機

陳永仁

Logan 發表於 2025-5-10 16:01
師兄寫咁多字
真係好俾心機

Thanks 🙏🏻