第一天入場...《復仇反擊戰 - The Amateur》K11 IMAX 體驗！以劇...

小瑟

小瑟本身對呢套西片《復仇反擊戰 - The Amateur》抱著幾期待嘅心態去入場觀看，見到網上K11 IMAX早場嘅戲飛都只係60蚊。所以就第一天即時入場。究竟套戲係咪好似睇住預告咁好睇呢？？

小瑟

小瑟呢日一早去咗K11 Art House嘅IMAX影院，搶先睇咗雷米·馬利克（Rami Malek）主演嘅《復仇反擊戰》早場！自從《波希米亞狂想曲》之後，雷米好少主演電影，今次見到佢做主角，睇過預告片又好似幾正，咁就二話不說買飛入場。加上今次IMAX早場票價超抵，每人60蚊，兩個人先120蚊，抵到爆！所以就第一日衝去睇啦！😎

揀咗IMAX倒數第三行（L排16、17號），呢個位真係正中間。講真，電影嘅劇本應該係OK嘅。靠黑客技術、IT知識同埋解碼嘅功力，獨自一人四處復仇，劇情去咗好多場景。可惜係，成套戲兩個鐘，節奏比較慢！有啲位真係要偷望手錶，仲忍唔住打咗幾個呵欠，緊張刺激嘅感覺未夠完善！😅

仲有，片入面有羅蘭士·費斯賓（Laurence Fishburne）同莊拿芬·愛德華（Jon Bernthal）呢啲大牌，我以為會有《Matrix》或者《懲罰者》咁嘅打鬥場面，點知動作戲比較少！特別係莊拿芬嘅角色，原本有佢就會期待打得好勁，點知結果完全唔係嗰回事，呢個位有啲失望！😣

不過講返套戲，如果唔將呢套當動作片睇，而係當劇情片嚟睇，咁期望值會好啲。電影都有爆破同動作場面，似係想滿足鍾意刺激嘅觀眾，但核心係講故事。如果你同我一樣，鍾意慢慢煲劇情，呢套應該啱你胃口。但如果你想睇《Matrix》嗰啲高能反轉同智鬥，嗯…可能要調整下期望喇。

講到IMAX體驗，講真有啲失望。呢套戲唔係IMAX格式拍攝，畫面比例係2.39:1，無用盡IMAX大銀幕嘅優勢。聲效同畫質係清晰，不過天空聲道嘅沉浸感未夠到。去IMDb了解技術規格，連用咩機拍、咩格式都無寫，😒 所以我建議大家，睇呢套唔使特登揀IMAX或者Dolby Atmos影院，基本上普通7.1影院已經夠。話雖如此，畫面本身好乾淨，亮度同黑位都唔錯，估計出碟應該好靚，但要話係Demo示範片就未可以！

總括嚟講，《復仇反擊戰》啱晒鍾意劇情片、想慢慢感受嘅觀眾。呢套如果以劇情片嚟睇，應該會好睇啲！😊

睇完你又有咩感想？快啲喺下面留言同我分享啦！

marco

估唔到係劇情片

小瑟

marco 發表於 2025-4-13 18:37
估唔到係劇情片

我最初初都諗住佢會拍得刺激緊張，不過劇情真係推進得比較慢，所以要刺激緊張只係一兩下。

Ed.YEUNG

琴晚睇佐喇，如果抱住似成龍主演嘅重動作低劇情片《英倫對決》期望入場，哩部片好易失分至 2/5。
但係如果將期望轉一轉，以重劇情低動作似《追凶》嘅期待入場，哩部片就容易以 4/5 取勝。

如果哩部片賣座，咁拍續集嘅可能性會有。就如樓主提到嘅，莊拿芬 嘅角色分明欠缺交代。
如果哩部片祇賺小小，要加追銷量，迪士尼/霍士 有可能會通過 串流/實體碟 推出加長版。
如果哩部片票房反應欠佳。。。咁大家就可以"等下部霍士出品"喇！

marco

呢部票房收得,睇怕窄過好褲頭

小瑟

Ed.YEUNG 發表於 2025-4-16 13:11
琴晚睇佐喇，如果抱住似成龍主演嘅重動作低劇情片《英倫對決》期望入場，哩部片好易失分至 2/5。
但係如果 ...

欠佳就好快可以係DISNEY+睇到呢~