可換式模組設計 真無線耳機 Acoustune HSX1001 開箱

阿定

話說，早兩個禮拜，同個朋友去星際試耳機，自己用緊的耳機已經好幾年了，所以想換過對支援新格式的(例如: LDAC Aptx )的耳機，所以我就走去試最近大熱的 Technics EAH-AZ100，以功能性來講，AZ100可以話係我心水的耳機，支援新格式，有降噪，App有得調EQ，耳機盒可以無線叉電，最後試聽埋，係我想要的日系聲音，正準備做決定比錢之際，同行老友就叫停了我。



話說朋友本身睇中 Acoustune HSX1001，佢打算落去試聽過無問題就比錢買，當我試完對AZ100後，老友同時亦試完對 HSX1001，老友話呢對耳機d聲幾好叫我都順手試埋，反正Sales哥哥都已經拿了Sample出來，而且老友已經Confirm買，我唔駛怕混吉無幫襯，所以就好放心去試埋呢對 HSZ1001 。

即場試完感覺係改觀了自己對藍牙耳機的認知，有番十年前用有線耳機的感覺，而且聲音都係我想要的日系調音，即時決定停一停，返去再重新做一次功課，了解下呢對HSX1001先做最終決定。

返到去再睇下小瑟的介紹，網上唔同人的評測，第一件事就係知道 Acoustune HSX1001 係可以升級「C:02」黃銅Chamber，不過整體功能上未算好齊全，部份功能要等Firmware更新，最後本著有買貴無買錯，聽感聲音比功能全齊更重要，決定入手HSX1001，不過升級「C:02」黃銅Chamber就先 Hold 一 Hold，一來原本的Budget只係兩千幾，直上黃銅要五千幾會超出預算太多，二來聽唔少評測介紹，大家都話跟機的「C:01」同 「C:02」有唔同的優勢，所以決定玩住先，有需要先再後追升級。



機身寫了 - Jin - 「迅」，官網有介紹係取自獵鷹(隼)，有速度與力量意思，成件事好日本風。



拆開個外盒，有個勁靚的鐵盒，某程度上我朋友係比呢個鐵盒吸引了才去買的，而我都覺得個盒好浮誇，勁正！



開箱後，入面其實唔係好多野，耳機一對，耳膠一堆，USB線一條，說明書一本

一星期後的用後感

聲音我就唔多講，一來我唔夠小瑟專業，二來聲音喜好非常個人，我就分享下聲音以外的好壞吧

由於隨機附送的聲學腔體模組「C:01」，採用鋁金屬外殼，每次帶上耳仔都有凍冰冰的感覺，不過呢個凍冰冰的感覺正正不同於傳統藍牙耳機的塑膠感才能做出有線耳機的味道吧！
耳機重量同其它耳機比，偏大同重，頭幾日非常唔慣，感覺會跌出來，但實際用慣了就無咩太大問題，只要從跟來的耳膠揀番適合自己的Size來用就可解決，除非帶來跑步，否則應該唔會有問題。

手機App採用同廠副線「ANIMA」的 ANIMA Studio APP，佢地出名賣ACG聯乘，所以HSX1001同樣享受到甜美聲優錄製的開關機等聲效，但呢個App的可用性仍然非常有限，無得自己set EQ，跟來的EQ亦只有Standard同Monitor，兩種EQ我亦感覺唔到有咩分別，明明「ANIMA」自己出的耳機都有唔同音樂類型的EQ揀，呢方面有點可惜，而連線方法之類仍無得調較，以我手機為例，每次連線都預設係aptX，要手動更換成LDAC，有少少唔方便，說穿了除了換聲優同更新Firmware外，呢個App跟本無裝落手機的必要。

行街斷線方面，使用LDAC連線時，如果用上最高的傳輸速度 (990/909kbps) 係會有少少機會行行下街有lag的，但改用自動調整的話，就連行電腦商場，旺角街頭，搭巴士地鐵都無試過有斷線或lag的問題，而且聲音亦唔覺有時好時壞，個人來講幾滿意，滿足了我當初想換耳機的原因。

總結來講，呢對HSX1001係幾值得推薦，雖然個盒無得無線叉電，價錢又唔算平，不過日本製，日本調音，仲有還原番有線耳機的感覺，都係值得入手的原因，宜家希望佢地快點出更新可以支援埋其他功能，例如編碼切換 同埋比多少少 EQ 功能我揀，咁就應該完美啦。

最後，有無人知邊到可以試聽「C:02」黃銅Chamber 呢？ 感覺上我應該忍唔到想升級埋上去。

小瑟

恭喜哂, 希望佢快d整好個apps啦~