近排多左入戲院睇戲.......有感而發

EzraMiller

小弟已好多年冇入戲院睇戲了,最近有兩套似乎幾出色嘅港產片上畫就支持下港產片入場睇啦,戲本身就係幾好,但啲觀眾質素係咁差,一邊睇一邊講嘢,演員講一句佢又講一句,好似同緊啲演員對話咁好有交流,明明有啲位都唔係笑位又笑,特別係啲中佬,好似好投入好識睇戲咁,好討厭,自己近年少入戲院某程度都係因為呢啲人,估唔到今時今日仲有呢類人.戲院唔駛再播咩唔好偷拍呢啲不合時宜嘅宣傳片啦,應該改為拍條片叫人唔好講嘢先啱!


你自己係咪呢種人?

alleelarry

早排入場睇 The Last Dance，前面個兩位後生仔同女，未開場就一直傾計，咁未開場都無咩所謂既，但到開場繼續傾，堅好影響，還好過了不久，兩人起身離去，唔係好肯定坐去前D，定係索性走人，係後者都唔奇，因為睇落睇戲只係一個藉口，好可能另有安排……

rl0497

劣質觀眾已經唔係第一次見，拍拖去睇戲嘅，好多時候條女係咁問嘢，條仔懶威嘅就係咁解畫，好惡劣。最難忘係嗰次去睇The First Slam Dunk，最尾追剩一分嗰幾十秒畫面，基本上除咗有少少低頻之外，係冇聲嘅，但係同場嘅有幾條細路係不停講嘅嘢！好彩我係第二次入場睇，如果唔係我真係會喺門口等佢地。其實而家啲人，尤其係十幾至三十頭嗰類，好多都係咁！我同哩位網友都有同感，係因為好多哩啲人入場，我真係入少咗場去睇戲嘅。不過我唔知啱唔啱，我發覺一般你去啲比較平價啲嘅戲院會特別易撞到哩類人，因為對佢地嚟講成本低，我試過去啲稍為貴少少嘅戲院，例如IFC，真係冇哩類人嘅，又或者我好彩遇唔到。

EzraMiller

rl0497 發表於 2024-11-25 16:57
劣質觀眾已經唔係第一次見，拍拖去睇戲嘅，好多時候條女係咁問嘢，條仔懶威嘅就係咁解畫，好惡劣。最難忘係 ...

我都同意唔同地區嘅觀眾質素又確係有些分別

阿定

rl0497 發表於 2024-11-25 16:57
劣質觀眾已經唔係第一次見，拍拖去睇戲嘅，好多時候條女係咁問嘢，條仔懶威嘅就係咁解畫，好惡劣。最難忘係 ...

平價戲院遇著當屋企睇VCD咁，鐘意一路講一路睇，風險極高，

但貴價戲院都有時會遇到 "假鬼仔" 鬼叫亂笑亂坐，

早場的話就咩價位都係死，

亦試過比錢買可以半訓係度睇的VIP院，明明好肯定除了自己無人買飛入場，都有人偷雞入來睇，仲要係咁講野，用30蚊睇150的戲，職員行過亦唔打算理，明顯係慣犯當睇唔到。

EzraMiller

阿定 發表於 2024-11-27 11:24
平價戲院遇著當屋企睇VCD咁，鐘意一路講一路睇，風險極高，

但貴價戲院都有時會遇到 "假鬼仔" 鬼叫亂笑 ...

假鬼仔

DavidLeung1@G

rl0497 發表於 2024-11-25 16:57
劣質觀眾已經唔係第一次見，拍拖去睇戲嘅，好多時候條女係咁問嘢，條仔懶威嘅就係咁解畫，好惡劣。最難忘係 ...

唔同地區的觀眾, 確實質素不同

rl0497

DavidLeung1@G 發表於 2024-11-27 18:15
唔同地區的觀眾, 確實質素不同

不過我想講，我遇過其中兩次劣質觀眾都係嘁同一間戲院，係康怡樓上嗰間，我諗我大概會絕跡於嗰度嘅，但係喺佢一街之隔，太古城嗰間呢，我印象中冇遇過哩類劣質觀眾，其實地區都差不多，但係啲人好似差得遠喇！我唯一諗到有兩個原因，一，係我好彩，二，係同票價掛鉤。唔知左家有冇發覺，去得iMAX睇戲嘅，都好似冇哩類觀眾嘅咩？

小瑟

都係喎, 仲話人偷拍不如叫人唔好講野仲實際~

不過我見有D戲院已經有叫人唔好睇手機同講野, 好似係百老匯~