LG OLED M4返歸玩「無線連接自由睇驗」昨天已經同版友裝機了!

小瑟

我哋 Post76 x LG 舉辦嘅 LG 返歸玩 無線連接自由「睇」驗 已經開始咗啦~~

我哋同 LG 香港專業嘅安裝&送貨團隊琴日就已經上去兩位版友 CelicaJoJo兄 同 Let-Go兄 屋企裝機喇～ 佢哋會分別試玩 77吋 LG OLED evo M4 4K AI 無線智能電視，配搭 LG S95TR 9.1.2 Dolby Atmos Soundbar 😍✨✨✨


兩位師兄可以同屋企人可以喺屋企呢個最 Comfortable 嘅空間，按自己平時嘅使用習慣，試下 LG 呢個無線家庭影院既效果會係咩效果先！😍😍😍

CelicaJoJo兄 同 Let-Go兄兩位版友嚟緊將會喺呢個帖文下面同大家分享佢哋會點樣「返歸玩」呢套LＧ影院~~


兩位「返歸玩」嘅版友、或者係同樣買咗 M4 電視、S95TR Soundbar 嘅版友們 有野想分享或者係使用上有咩疑難，歡迎喺下面留言啦!!!

CelicaJoJo

各位師兄，我喺其中一個試玩者- CelicaJoJo。試玩咗幾日，等我分享少少體驗。第一，都要多謝LG慨師傅。從度位到安裝，都有介紹清楚。另外Post 76 安排嗰流程都好好。
講翻嗰電視和soundbar先，今次無線技術好新鮮（對我嚟講，我之前喺用G1) 聲和畫都冇delay 。如果地方夠大，可以有更多擺放安排。不過，HDMI 由四個變三個，就有少少可惜。變咗要用原裝soundbar。(因為用無線連接）
試睇方面，睇YouTube 就會少少奇怪。你會覺得後置大聲過前置。睇AppleTV+(用翻apple device)就好大效果啦。我喺睇 SEE 末日光明。好靚，好聲。你會見到黑色好有Layer 風景喺色彩豐富但唔會似加咗味精。另外都試咗權力遊戲第八季慨第三集- The Long Night 。畫面普普通通（可能套戲都有少少舊），但聲音有層次。另外，都試埋另外一套（都喺HBO出品) The Last of Us ,就靚番好多。時間關係，未試打機。有機會再分享🤗。其他師兄可以分享吓，等我學吓嘢😄

小瑟

正呀，好詳盡呀！一陣慢慢睇先。

小瑟

CelicaJoJo 發表於 2024-10-14 19:04
各位師兄，我喺其中一個試玩者- CelicaJoJo。試玩咗幾日，等我分享少少體驗。第一，都要多謝LG慨師傅。從度 ...

睇返D畫面好似好正咁。有冇夜晚睇戲？太太有冇嚴細？？🤣

erinerin

CelicaJoJo 發表於 2024-10-14 19:04
各位師兄，我喺其中一個試玩者- CelicaJoJo。試玩咗幾日，等我分享少少體驗。第一，都要多謝LG慨師傅。從度 ...

辛苦曬師兄!!! 果然第一身體驗到嘅意見係詳盡啲!!!
至於你 Youtube 個前置後置大細聲果部分，想問問你係咪睇戲果陣 SET 大咗個後置？ 如果睇戲 Setting apply 平時啲 YouTube 片，都會影響效果㗎啵 🤣🤣 當然 Youtube 片本身個 Sound Source Quality 都會係其一因素啦~~~


PS. 期待你打機個sharing!!!!

Let-Go

經過咗十日嘅測試之後，而家為大家、各師兄們，報告下我嘅「 試用分享 」
首先要多謝LG (型男、Joyce、送貨同安裝人員) ，同埋Post 76 (Wil 總 、 小瑟大王 、 Erin 、 導演 、 攝影哥哥、Hugo)
非常榮幸佢哋揀咗我，我先有機會可以試到呢部LG 嘅M4旗艦電視機，重要係77吋大電視。
另外就係多謝我屋企埲 "牆"， 如果唔係 "佢" 我都唔會申請今次嘅 「返歸玩」 。

十分簡短嘅 「 試用分享 」結論係： 今次 LG 嘅 M4 ， 同埋佢嘅 Sound Bar S95TR，畀到我一種十分享受影音嘅感覺。

試用，係會根據我日常嘅應用習慣 (電腦上網、睇youtube 、 netflix 、 網上影音資源、打機)，去作為評測嘅切入點
器材主要係由 普通 desktop 電腦 (HDMI) → 入AMP →  電視出畫面。
聲音，一般就由M4電視嘅喇叭出聲 (之前用SHARP，五千蚊貨仔，已六年) 。
要勁啲嘅音效，就會用Sound Bar S95TR
再要勁啲嘅音效，就會用部AV-AMP推 5.1 + Front Height


畫質 : 繽紛自然，色彩唔會覺得人造，長時間觀看雙眼亦唔見點攰。
(我係用 GAME Optimiser mode ，Eye Care Mode 係 OFF 。原本係用 Personalized Picture (Cold and Vivid) mode 但之後覺得太 Cold and Vivid 。)
大電視當然就睇畫質先。 可能係部電視機都有返77吋大，真係睇乜嘢都係好清楚嘅。試睇足球 、 仔仔打機 ( Gear of Wars, Fortnite)，唔會有鬼影 。
我用netflix 、 網上影音資源 、 youtube嘅4K HDR 去睇下部電視機嘅顏色。
主要係睇下黑色嘅結實度，光亮對比細節，顏色係咪自然 (呢點對我十分重要)
好似呢個equalizer 3畫面光源四週圍嘅陰暗位都可以睇得好清楚
Lion King大象頭鼻嘅紋理，原來係可以咁清晰
Hades 色彩突出
LG M4 嘅顏色，畀我覺得繽紛自然，又唔會覺得係人造色彩嘅感覺。   

我冇用Eye Care Mode 係因為唔鍾意清除藍光之後畫面嘅色tone 暗啞。 所以測試時個畫面都係光亮嘅。但經過我呢幾日，每日幾個鐘頭嘅測試，不同光源環境 ： 梳化座位面向陽光、室內開燈光、夜晚淨係開一盞燈，雙眼又真係冇乜點見攰，適合長時間觀看。

播放Dolby Vision時， 螢幕右上角係會有顯示，等你知道睇緊乜 。

Let-Go

聲音：經由M4電視嘅內置喇叭輸出
喺睇一般嘅電視、劇集 ，M4 畀到嘅人聲及音效，係可以接受嘅。尤其係佢貼埋牆唔到3cm 厚度，咁薄嘅內置喇叭所能發出的音質，可以叫做交足功課。M4 Zero Connect Box 無線影音傳送，一啲都唔發覺有延遲，對白絕對對嘴型。播放Dolby Atoms時， 螢幕右上角係會有顯示。

但我今次測試嘅係 77吋大畫面 ， 一般嚟講用到咁大畫個面、大螢幕 (65吋起計)，我相信亦都對音質方面有少少要求。而且 M4 77吋 LG 官網售價係 HK$79,980。用呢個角度去睇，M4內置喇叭畀到嘅音質，就反而襯唔起呢個售價 。
例如: 我用 M4 內置嘅 Youtube App 去睇  The Phantom of The Opera - FULL SHOW ( )，聲音開到25度(最大係可以去到100)，4:40進入經典嘅樂曲時還可以，但 5:06 Organ開始響起嘅 "高音部分"，竟然有拆聲，再加埋燈泡火花嘅閃灼聲，係有啲亂嘅。

又例如: 睇 [安全地帯] 夢のつづき 月半彎 꿈의 연속 [Live Hongkong 2015]  ( ) 玉置浩二幽怨聲線嘅 "餘韻"，完全冇咗。餘韻消失，變咗佢好似唔夠氣唱落去咁，停下停下(我部sharp 就有同一個問題) 。頓時，成個影音體驗即刻跌曬Watt。但係咁薄嘅內置喇叭，你expect乜嘢 、 幾多先 ？

玩開影音嘅師兄們都知道：影視感覺，係會受到配樂聲音影響。喺呢個情況唯有用外置嘅音效裝置。


聲音：經藍牙連接，由Soundbar S95TR 輸出

好彩今次 LG 慷慨地畀我試埋支Soundbar S95TR，支援 Dolby Atmos 9.1.5 聲道。初時諗住一試無妨，反正唔會時時都開部AV擴音機。而因為我有套AV影音系統，所以對 Soundbar 真係冇研究，而呢支Soundbar就畀到 「驚喜十分」我 (唔知其他牌子嘅Soundbar 係咪都咁有水準勁)。小瑟大王嗰日同我試機，一開始就係用支Soundbar音效輸出，去睇netflix movie，可以話係完全收貨的。現場感、空間感、方向感、移動感、氣氛、槍聲、爆炸聲，十分像真。當然你唔好期望佢會同套AV system同級，可以地動山遙，但都有佢嘅五、六成功力。 對比起內置喇叭 (可能仍然聽到聲音 但係 係flat 嘅)，sound bar 個層次 、起伏 、 dynamic 就好好多 。

而有好多串流電視劇集，都有Dolby Atmos，其實都富有音樂氣氛，但又未去到動作電影級別嘅音效音響級數，令我需要每次每集都去開埋部 AV amp 5.1.2去炸機 (唔少師兄更係7.2.X，我諗就更加唔會)。而支 S95TR Soundbar就正正可以填補咗呢個空位，比起電視嘅內置喇叭，係明顯功力、聲效、音質同聲壓都遊刃有餘，成個影音體驗即刻返曬嚟，有唔少提升。例如: 我睇Shogun時嘅配樂所營造出嚟嘅氣氛 (一開劇，隻船移動時嘅木頭聲音、又或者真田廣之入Osaka 城嗰段)，係可以令到你 “感受” 到劇集裏面嘅場景、形勢、張力。頓時，覺得個畫面(劇集)係好睇咗好多好多。 隻船移動時嘅木頭聲音， 因為聲效嘅關係，會令你留意多咗螢幕上面光暗反映嘅深沉感、唔知乜嘢會出現嘅uncertainty感覺。個畫面係真係會好睇咗。

另外，經過咗睇咗好多 唔同嘅電影片段，聲音聲效經藍牙連接，亦唔見有任何延遲 、唔對嘴型 。

因此 ，LG部M4 (77吋大畫面)，同埋支S95TR Sound Bar，係測試期間畀到我一種十分享受影音嘅感覺。

個人意見
如果買得65吋或以上嘅大電視機大螢幕，而又冇 AV amp 的話。支Soundbar係必入嘅。
但就算已經有AV amp system，套sound bar 都足以應用係大部分有音樂音效氣氛、Dolby atoms嘅劇集，去煲劇(幾個鐘起)唔使下下都去開埋套AV system，怕畀人投訴。

電視嘅內置喇叭 : 應付 一般嘅電視 ， 一般嘅劇集。
Sound bar : 應付音樂音效氣氛、Dolby atoms嘅劇集，甚至乎電影。
AV Amp : 應付 動作電影級大電影，炸機。


銷售意見 :
以價錢而論，M4 內置喇叭嘅質素，應該要更好才是，但係咁薄嘅內置喇叭，又真係唔可以expect太多。但係成個視覺體驗又真係有受到聲音聲效所影響，出現兩難嘅情況。

建議多啲以電視同埋呢支Sound bar一齊去推廣、做 demo。好聽咗(聲音嘅震撼)，畫面係亦都會好睇咗嘅。大尺寸電視(65吋起)，以捆綁形式 (半賣半送) 連埋支Soundbar S95TR 一拼出售 (而家係option要另外加錢。 "送埋" 同另加錢， 當然唔同啦)，提供一體完善嘅影音方案。

Let-Go

CelicaJoJo話：試睇方面，睇YouTube 就會少少奇怪。你會覺得後置大聲過前置。

我都有同樣嘅情況 。 但經電腦用 Dolby Atoms for Home Theater，呢個情況就冇咗 。
用 Stereo 又有同樣情況 。唔知同 youtube 佢哋輸出音效個format有冇相關

小瑟

好詳盡呀, 一陣再時間回到屋企慢慢睇先!!!

CelicaJoJo

小瑟 發表於 2024-10-17 16:02
睇返D畫面好似好正咁。有冇夜晚睇戲？太太有冇嚴細？？🤣

佢成日問，點解唔試83吋