PlayStation Portal 港行開箱試玩

阿定

PlayStation第一款遙控遊玩專用裝置PlayStation Portal remote player 香港行貨早前正式開賣了，編輯部同大家分享一下實際使用的感想吧！



拆盒後，唔計說明書，就只有主機一部同USB線一條，無跟火牛 。



開機後，揀好語言 (例如: 繁體中文)，之後駁上WiFi就會見到登入畫面，用手機Scan QR Code跟著做就可以。



成功登入後，會要求你連線到你的PS5主機，成功連線後就可以正式開始玩遊戲。



PS Portal 手掣 同 PS5 DualSense掣 接近完全一樣，手感大細都係跟足，係有部份功能掣有少少唔同位，例如 PS 鍵 放了去左邊，係Cap Screen鍵隔離。



右邊有 Option 鍵 同 Mic 鍵。



大細聲係主機右邊上方位置。



Power鍵 同 連接耳機用的PlayStation Link鍵係主機左上方位置。



由於唔支援一般藍牙耳機的關系，機身後面設有3.5MM接頭，同埋支援PD叉電的USBType C插口。



今次測試我地先講室內WiFi環境，PS5用Lan線駁上網，PS Portal 係同一間房的試玩情況，先講今期大熱的 Astro Bot 《宇宙機器人》，遊戲超級順暢，就算講緊按鍵時機要好準的Bonus Stage一樣無問題，完全無遙控遊玩的延遲感。



之後再試玩黑悟空，同樣好考反應的按鍵時間感無出任何問題，不過畫面有時會有少少撕裂，但說句老實話，直接用PS5駁電視玩，黑悟空都有時會有少少撕裂，所以未必關PS Portal機能事。



再來試玩 Warhammer 40,000《戰錘40k：星際戰士2》，一齊正常，同係電視玩無咩分別，同樣係感受唔到遙控遊玩的延遲感。



最後亦試埋 GT7 《跑車浪漫旅7》，畫面可能同LCD有關，明顯係無屋企部OLED電視咁靚，失去了HDR優勢，太陽光，車身反射都差了少少，不過同樣唔影響遙控遊玩的感受。



最後總結:

先講戶外玩的感受，係離開家後玩，其實順唔順好講網速，先唔講會有SIM卡Share WiFi 同 有d 公家 WiFi 會 Block 了連線打機的情況搞到玩都玩唔到，如果網速夠快夠穩定的話，以上幾隻遊戲除了黑悟空外，基本上都可以照玩無問題的，黑悟空唔建議的原因係當畫面有少少停頓時，除非你勁到唔睇畫面都記得條form點打，否則就係個半秒跟唔到就被連擊而死，都幾痛心的，我自己試過用公司WiFi，人多時係有點lag的，當Lunch大部份同事都出去食飯後，又會變得非常順暢，所以好難評測部機適唔適合出街玩，當然如果你本身手機上網Plan係5G Plan，上網通行無阻，咁問題就不大了。

主機本身性能我會比8分，高評分的原因係手掣手感100%同原裝掣一樣，8寸畫面有1080P夠晒清夠晒大，聲音夠立體又可以開到好大聲都唔會拆，如果家中電視唔係自己獨佔，又或想放部機係公司食完飯打鋪機之類的，呢部機真係好適合買來玩，唔可以話係智商稅產品，不過可能自己要求高，唔係OLED螢幕真係好扣分，無得用普通藍牙耳機亦唔太方便，所以會有扣分的情況出現。

官方介紹

PlayStation Portal remote player可在您的掌中提供PS5體驗。這款產品含有DualSense無線控制器的主要特色，包括自適應扳機和觸覺回饋*。鮮豔的8吋LCD螢幕能以60fps的1080p解析度播放，可提供玩家期望世界級開發商打造之高品質遊戲所帶來的高畫質視覺體驗。

PlayStation Portal是適合與家人同住之玩家的絕佳裝置，因為他們可能需要與家人共用客廳電視，或是單純只是想在家中另一個房間遊玩PS5遊戲。PlayStation Portal將透過Wi-Fi以遠端方式連線到PS5**，因此您將可快速地從使用PS5遊玩切換成使用PlayStation Portal遊玩。PlayStation Portal可遊玩已安裝在PS5主機的支援遊戲，並可使用DualSense控制器。這款產品也含有適用於有線音訊的3.5mm音訊連接端。

不支援需要耳機組的PS VR2遊戲，以及透過PlayStation Plus Premium雲端串流來進行串流的遊戲。***

PlayStation Portal Q & A

PlayStation Portal 可以獨立操作嗎？
PlayStation Portal 係 PlayStation®5 的配件，需要連線到PlayStation®5才能玩遊戲。

PlayStation®5 及 PS Portal 需要使用同一個 WiFi 嗎？
不需要，但不同WiFi，例如從住家以外的區域使用手機WiFi連接家中的PlayStation®5，有機會受連線速度及穩定度影響，出現lag機，斷線等情況。

PlayStation Portal與哪部主機相容？
PlayStation Portal可連接至PlayStation®5主機以使用遙控遊玩功能，並不相容PlayStation®4主機。

PlayStation Portal與哪些有線聲音裝置相容？
您可以使用與3.5mm聲音輸入連接端相容的有線耳機組或耳塞式耳機。將它們連接至PlayStation Portal底部的耳機組連接端。

PlayStation Portal與哪些無線聲音裝置相容？
您可以使用任何支援PlayStation Link™的聲音裝置。透過PlayStation Link，即可在PlayStation Portal和PS5®主機之間快速切換無線聲音裝置的聲音。

我可以在 PlayStation Portal上播放媒體應用程式嗎？  
使用遙控遊玩時，不支援PlayStation®5主機媒體分頁中的應用程式。

*觸覺回饋與自適應扳機功能只有在所遊玩遊戲有支援的情況下可使用。

**需要具備至少5Mbps的Wi-Fi寬頻網路才能使用。若要有更好的遊玩體驗，建議使用至少15Mbps的高速連線。

***需要VR頭戴裝置(PlayStation VR或PlayStation VR2)或是其他周邊設備(DUALSHOCK 4、DualSense或DualSense Edge無線控制器之外)的遊戲並不相容。需要使用PS Plus Premium會籍以在PS5上串流的遊戲並不相容。

GARYKWONG@G

一機難求😵‍💫