Isotek Titan V5 report

Zelo

(舊年我寫的報告分享一下。)
上個月俾我搵到一對二手超靚價mono 後級，個價靚到令原本出年先考慮換後級個計劃推前，買之前冇咁多考慮，但之後問題就出現，之前部後級係一直插住部Hydra Triton V3，完全冇留意仲有冇位多出嚟用，原來不知不覺下已經全部插滿晒，唯有用另一臨時折衷方法直接插牆，但又發現原來又係冇位，跟住最大件事係我用緊嗰兩條20A蛇王係唔一樣的，冇辦法之下只好用住跟機兩條英插黑雞線直接插牆玩住先，點知一路聽一路覺得唔太妥當，最明顯亦都早就估計到，後級直插牆蘇力道係有，但完全冇哂線條，比較粗聲，而且背景亦冇以前插住Hydra Triton V3咁靜，如是者只好諗諗其他方法，突然記得某雜誌有介紹過部Titan V5係俾後級專用，於是上網睇吓資料，發覺大部份有讃冇彈，只不過Isotek個牌子我從來未用過，冇理由見人寫好就直接買，於是膽粗粗打上去代理約時間試機，嗰日我仲捉埋Simcity大師兄搒住去，有大師兄面子果然唔同啲，代理好好招呼，一埋位就開對Rockport Orion俾我哋嘆，有好嘢聽點會放過機會，我哋都老實唔客氣，叫德哥同Andy哥重覆裝插部Titan V5俾我哋試聽，試聽前後對比係有分別，無論動態同寧靜度都有明顯改善，插住Titan V5同冇插住可以好明顯聽得出分別，最後足足試咗成個鐘都唔捨得走，其中最大原因係對Orion真係超好聽……。







之後聽住屋企套機幾日，終於按捺不住，就Whatsapp同代理講吓價，經過一輪殺價戰，卒之都訂咗一部返來，同時我額外要求代理將條原配Premier電源線補錢升級去Sequel，再將佢改為system link（點解要用system link，下面會再講），另外再加訂多兩條optimum 20A由Titan V5供電俾對mono用，以前一直用開條蛇王Sigma NR就做主線由牆插做供電俾Titan V5，至於之前提過條system link，個用途係咩呢，就係由Titan V5供電去部Hydra Triton V3。點解我會咁玩其實係有段故，之前某雜誌介紹呢個產品時，提到Tiran V5係有3個蘇位，於是佢就用剩出嚟個蘇位供電俾另一電處，効果仲好顯著，呢個玩法其實都係吸引我買佢嘅其中一個原因，不過呢個玩法我覺得有少少奇怪，於是就同代理及廠家討論過呢個玩法係咪真係得，如果可行，咁我另一條多出嘅蛇王20A唔使浪費咗，可以有番個用途，不過代理同廠家回覆好一致，話咁樣玩係錯晒嘅，由Titan V5供電俾其他電處係唔應該用有filter 嘅蘇位，應該用system link 直入另一電處，咁樣就可以做到全套機統一電源輸入，（各位有其他技術問題請聯絡代理及原廠查問，我只係跟廠及代理建議去玩）就係咁我就先按依個配置去玩，接好晒線就開機試聽，開聲第一個感覺係背景靜哂，依個係立即見効嘅聽感，之後令我興奮嘅係個動態，今次真係聽得出用mono後級嗰種進步，出來嘅聲已經冇晒之前嗰啲粗聲，同未用前完全係另一層次，如是者聽咗幾日，硬係覺得前端有小小不足，即由system link供電去Hydra Triton V3嗰一堆，最明顯係用HE1耳機時，好似冇咗以前嗰種力度，感覺上能量感弱咗一截，就係咁又身痕打個短訊問吓代理，條system link有冇再提升，問吓問吓卒之又訂多條Optimum ，我就索性用將現用緊嘅Sequel同條Optimum交換接頭，用Optimum來做system link，之後再將條大水喉（即由牆插到Titan V5嗰段）忍痛入埋條老頂Ancestion，實行由源頭供足靚電俾哂全套機，依個大動作除咗真係好肉痛之外，以成効計真都算值得，由HydraTriton V3供電嗰部份完全改善咗，成組機有番應有嘅力度，另外換咗大水喉後，動態方面並冇特別加強，保持之前水準，反而背景比之前更靜，結像更突出，今次完全收貨。











老實講，Isotek呢個牌子我從來冇用過佢嘅產品，因為一直被洗腦話有動態壓縮，但今次我用呢部Titan V5，我完全感受唔到有任何壓縮，反而用咗之後所有動態、力量全部有提昇，部Titan V5唔算太高價，原裝跟機條Premier 其實一般好夠用，換線只係我本人問題愈玩愈大鑊，按價錢同成効，其實都算低投資高回報產品，依個都可以算係我今年Best Buy。

SimonCham@G

恭喜師兄!

Benip

十分認同師兄說法，小弟加左EVO3比後級用後，就覺得Isotek titan 系列既產品絕對值得投資，但我同師兄有少少唔一樣，一開始我都係用system link 出拖多部電處比訊源，但之後對比過電處直插返牆蘇出來既效果比用system link 好，所以兩組電處最後係分開攞電，Isotek titan evo 3條總龍我用Lightspeed既原廠30A電線，之前用黎做system link 果條就Lightspeed 20A，自己買個圓插改黎用

Zelo

Benip 發表於 2024-1-3 07:41
十分認同師兄說法，小弟加左EVO3比後級用後，就覺得Isotek titan 系列既產品絕對值得投資，但我同師兄有少 ...

我之前都係分開插牆蘇，試過之後都係由部Titan V5個system link供埋電俾部Hydra Triton好，其實最理想應該係將部Hydra Triton都換走埋，只係太大動作兼冇銀，見依家効果都算唔錯，玩住先。

Benip

Zelo 發表於 2024-1-3 10:55
我之前都係分開插牆蘇，試過之後都係由部Titan V5個system link供埋電俾部Hydra Triton好，其實最理想應 ...

可能V5用system link 個效果比較好，EVO 3都算係舊型號，技術同V5有差距係正常，我最終另一電處插返牆係因為試左唔同電線有更好效果，用system link 好局限，我又唔想下下自己去換頭，有啲廠線換頭好唔方便

Zelo

Benip 發表於 2024-1-3 12:03
可能V5用system link 個效果比較好，EVO 3都算係舊型號，技術同V5有差距係正常，我最終另一電處插返牆係 ...

師兄都好正確，用緊V5系列冇理由加添番上一代產品，睇吓之後有冇新嘢再出，Isotek產品我都係第一次用，今次部Titan個効果真係唔錯。