尋樂遊:KEF Reference3 Meta x Gryphon Essence工作坊(#10更新影片)

小瑟

小瑟岩岩返到公司, 今日大家都應該玩得好開心啦. R11 MATE同Gryphon Essence夾上來其實都出得好盡!! Reference3 Meta x Gryphon Essence就更加係冇野好講, 人聲果份溫暖出哂來.最後整多個LS60 Wireless比大家, 唔知大家又點睇呢??

歡迎大家係度留言講返你今日活動既感覺, 希望大家都可以分享返你的感受啦!!

#大家如果想試真KEF既喇叭產品, 可以去 Michael's Audio BOOK返個私人演示SESSION。 去到話係76版友, 仲可以得到貼心小禮品。都值最小200蚊架!

kenlun2008

多謝76搞呢個活動,可以試到兩個不同代理的產品,今日印象最深刻就係兩對啦叭AB比較,先說r系列,清晰走向,高音有分析力但不刺耳,中頻清晰,低音量感足,之後到reference系列,雖然少咗兩個低音單元,但係低頻彈跳力及下潛係比r系列更勝一籌,中高頻層次感更加豐富,一分錢一分貨,但如果不作比較下，r系列絕對可以應付大部分用家需要，之後再試電影，用咗一對ls60，加一隻超低音，已經可以填滿成個showroom，做出一個包圍感，效果十分理想，期待參與下一次活動

kenlun2008

kenlun2008 發表於 2023-10-28 18:16
多謝76搞呢個活動,可以試到兩個不同代理的產品,今日印象最深刻就係兩對啦叭AB比較,先說r系列,清晰走向,高音 ...

小弟今天趕住上班，十分抱歉未能與大家合照，期待下次聚會認識大家

banjo

今次最主要, 都係想聽吓KEF Reference3有幾厲害, 果然冇令我失望.
常言道, 無比較就冇傷害, 先聽對R11, 之後Reference3一開聲, 已經立即秒殺R11, 無論音場嘅深度濶度高度, Reference3都係贏到開, 盡顯身價.
全個示範會, 最欣賞係播黑膠環節, 音質音效去最高端水平, 大開耳界, CD難望其背.
期望日後, Post76會多搞呢類型發燒級嘅示範會, 多謝小瑟.

surewinlui

今日一次過見識到三大品牌， 大滿足！: KEF speakers + Gryphon CD, Pre-Amp, Amp + Nordost cables   謝謝76安排

lokki

第二張圖支補光燈射足我全場，個幕又反射支燈，一入去隻眼就唔舒服
Michael's Audio安排內容，KEF安排
自行理解

kelvinhin

比較下先發現reference 系列同R 系列嘅分別都幾大，Reference 3 Meta 雖然少過R11 兩隻低音，但全頻嘅層次感同密度都更優秀，好老實講，Reference 3 Meta 嘅水準已經拍得住好多廿萬內嘅Hi-end 牌子細座地，而且音染更少，可以更清楚地反應出前端嘅變化。例如今次用貴豐推，音色就會有啲暖意，之前喺另一個event 試用Soulution 推，啲聲就會清返啲，啱啱好就反映到依兩隻牌子amp 嘅音色差異。依種可玩性我覺得係Reference 系列可以貴R 系列咁多嘅原因。

recycle

先多謝76、KEF同Michael's Audio 聯手做咗一個咁好嘅活動。再讚就係其中一節，臨時安排用同一首曲目分別係R11同Reference 3播一次，等大家可以分別............無比較，無傷害，其實就算唔比較，賬面上好明顯Reference 3都係會贏，咁仲做嚟為乜？學大雄哥講，抆插喇叭線嘥時間又危險（笑），聽多首歌好過啦！好在就算over run咗，最後都有安排到PK賽。
聽完後，R11嘅表現，除咗音質（肉地）有分別外，自已嘅聽感係，R11嘅清晰度、分析力，及得上Reference 3九成表現，空間感、能量感同低頻表現甚至係相若，至於肉地，特別係人聲，明顯係無Reference 3 厚聲，係咪差我估就真係各花入各眼，不過我自已都係鍾意Reference 3 人聲表現多啲。另外，大王當時都有提到R11可以試用線材去調整人聲厚度，但係會唔會連帶其它都有改變，真係要試過先知。
最後，想講吓自已對於買R11定Reference 3嘅感想，有錢又任性嘅，買貴一倍嘅Reference 3，甚至貴兩倍嘅Reference 5，係夾啱前端訊源，一定無買錯...........但買R11係咪代表屈就呢？至少係今次活動至少我瞭解到並唔係咁，話哂都係大嗱嗱五皮嘢對喇叭，KEF真係交番足功課，俾番足一對喇叭應有嘅表現，但礙於賣價而用不同用料/設計，而令聲音（肉地）有所不同，買家需理解。同埋我亦理解Reference 系列貴咁多原因，除咗係用料外，QC亦都係主因！如果我無理解錯，按KEF負責人現場解說，Reference 系列用嘅單元，相互之間嘅頻率誤差唔會多過0.5db！至於係咪咁就值得用貴上一倍，甚至兩倍價錢買Reference 系列呢？點解我賺錢能力咁低呢？

pac

非常感謝76搞啲咁嘅活動
Reference 贏R 就梗架啦，但比較過先至知差幾多？
性價比如何呢？即場 A B比較就公道啦！心大心細嘅人值唔值得加錢
上REFERENCE?  自己諗啦。
不過當晚我覺得貴豐有啲控唔到對REFERENCE 3,控R11就ok的。
可能糸後級未夠力啦，下次有機會聽下貴豐 Mono 就好喇

小瑟

KEF Reference 3 Meta x Gryphon Essence 「尋"樂"遊」極致工作坊精華 | 活動報導

第二回嘅「Post76 尋樂遊 : KEF Reference 3 Meta x Gryphon Essence 工作坊」，呢轉將邀請到係旺角無人不識嘅 Michael's Audio 支援及其代表嘉賓分享，體驗一下 Gryphon 前後級 + CD 配搭 KEF Reference 3 meta 嘅魅力有幾咁吸引!? 而且仲會講下呢個丹麥經典傳奇一啲值得注意及好玩心得，讓大家再次體驗到 KEF 喇叭係不同領域、不同層次上，都能夠發揮到其真正靚聲且超值嘅本色!!!

🔥影片詳情 : https://news.post76.hk/2023/11/kef-x-gryphon-event-2/



00:00 開場
01:45 Gryphone器材介紹
03:25 CD初試
03:50 KEF器材介紹
07:00 串流實試
07:20 Reference 3 Meta 喇叭實試
09:10 Reference 與 R 系列之分別
12:05 總結