《FINAL FANTASY®XVI》簡評

阿定

剛剛6月22日推出的《FINAL FANTASY®XVI》，編輯部雖然仍未完成遊戲，但都可以介紹下比大家，未買的朋友可以參考下，已買的朋友亦可加入討論，不過大家討論時就唔好劇透啦

劇情方面，遊戲以一本道型式推進，簡單點型容就是故事性重，自由度低，好處係可以清楚感受一個完整的故事，唔好處係玩家參與決定的事項唔多，唔計支線的話，基本上就係跟住劇情走，睇一陣，玩一陣，如果好似筆者咁，以"劇情專注"模式玩時，就會變得似睇戲多過似打機，呢個一本道式的遊戲玩法近幾年都出唔少，而且亦大受歡迎，只係FF咁玩法大家未必咁快可以習慣了。



由於唔劇透得的關系，所以唔講太深入啦，遊戲的劇情係非常引人入勝的，角色們的互動，國與國之間的衝突引起的唔同問題，不停變化的局勢，都讓人非常沉醉係呢一個全新的FF世界，新入坑未玩過FF的，要由今集開始玩的話，應該會好Enjoy。

聲音方面，我地試過日語同英語互相轉換，日語唔夾口型呢個問題應該已經變成業界標準，相信有打開機的朋友都應該要認命的了，為了解決唔夾口型的問題，後期故事我已經全線使用英語配音，不過英語配音又會出現中文字同英語的翻譯唔夾的問題，不過唔太影響劇情就是了，主要係角色講粗口時字幕係唔會跟住譯粗口比你的，如果有睇開美劇的朋友，應該會覺得好爽，始終中世紀風格的世界觀，點可以無Fxxk呢。而音效方面，戰鬥期間的配樂真係讓人好興奮，FF每一集的配樂都保持到高水準，真係信心保證。



畫面方面，公平點講，PS5應有的水準，唔係特別突出，建議大家穩定度行先，如果揀畫質行先會有掉Frame的情況出現。



召喚獸戰鬥可以話係畫面最有迫力的段落，雙方召喚獸對戰時畫面會變得超級震撼，讓人直呼過癮，不過亦因為太過震撼，有時會錯過閃避的時機。



戰鬥系統 相信大家都知道今集唔係指令式對戰，進入對戰動作對戰段落時，玩家基本只能操作自己一個，無法操作同行的隊友，所以經常出現自己一個打晒全部人的感覺，特別係打到敵人「Takedown」狀態下，其他隊友會行過來補刀，就更加覺得自己係故事的主角(有夠中二病)，



除了不停累績經驗學習唔同的連技同強化外，部份特定戰鬥場境會要求玩家輸入QTE指令，相信玩開新遊戲的朋友唔會有太大問題，好易上手。



地圖傳送點亦好早就開放，唔駛行不必要的路，對想做支線任務的朋友非常方便。

總結 故事比較有深度，並唔係兒童向的戲情故事，戰鬥算比較簡單易玩，對只想享受《FINAL FANTASY》世界觀，一邊聽住精彩的配樂，一邊爽快打倒敵人，同時感受史詩式的童話故事的繁忙上班族來講，實在非常合適，特別係"劇情專注"模式提供"自動閃避"同"自動戰鬥"。





相關文章: 《FINAL FANTASY®XVI》將於6月22日正式登陸PlayStation®5

DVD迷

ff迷都會買來玩的