BEYOND的 [樂與怒]

245141525

BEYOND的樂與怒

大家好，我係亞祺。
我係BEYOND教教徒，聽BEYOND嘅歌長大，流住BEYOND嘅血，因為一個原因，所以我今日喺度出呢個帖。

唔鍾意睇文字版嘅，可以直接去睇YouTube版，有小瑟大王加持，內容會比較豐富，但片中提及嘅片段，就要喺文字版嘅內容搵返：


三十年前嘅今日，偉大音樂家黃家駒先生離開咗我哋，而今年亦係BEYOND成立四十年，一直都想做返啲嘢，但因為懶，又冇乜動力，又唔知做乜好，又唔知做得好唔好，但係見到個世界變得好快，已經捉唔到路，甚至開始好多嘢原來連講都唔講得，再唔做，可能唔會再有機會。
小瑟都問咗我好多次：喂真係要做返啲嘢喎，噉好嘞，趁住呢個咁齊頭嘅日子，我哋決定做個特備節目，介紹一下BEYOND一隻最重要嘅大碟，【樂與怒】。
但係我唔識音樂嘅，所以唔係從評價嘅角度去講，呢個唔係碟評，只係我自己一啲睇法同感覺，同一啲資料性嘅嘢嘅整合啦你可以當係，所以可能會有啲好似拋書包，因爲我搵咗好多資料性嘅嘢，但係都係一路傾住偈一路講，同埋有啲都有趣、有啲都少人知嘅，又有小瑟喺度，所以應該都唔會悶親大家。

喺開始之前，畀少少預告大家先，喺介紹完呢隻碟呢，我會同大家講一個有關呢隻碟鮮為人知嘅秘密嘅，係關乎黃家駒先生之死嘅，同呢隻碟有關，好少人講嘅，賣個關子，節目嘅尾聲會同大家分享。

---

樂與怒 (1993年5月14日)

1993年5月14日推出，係黃家駒先生去世前嘅一個半月。

無可否認呢隻碟係BEYOND最有代表性嘅一隻碟，沒有之一。
呢張係BEYOND第九張專輯，四人時期嘅最後一張，係離開"新藝寶"轉投"華納”之後推出嘅第二張專輯，第一張係【繼續革命】。
第一個彩蛋嚟喇，唔知有心定無意，樂與怒呢三個字，都出現咗喺歌名入面。
走不開的快“樂”
和平“與”愛
我是憤“怒”

其實1992年佢哋已經去咗日本發展，呢隻碟係喺日本創作同錄音嘅。
因爲日本公司Amuse畀咗好大嘅創作空間佢哋，所以編曲上去得比之前更盡，因爲自由度大咗，據知BEYOND好滿意呢張大碟。
但係聽講【樂與怒】當初推出唔係好賣得，首批出貨只有兩萬幾張，之後幾乎冇唱片店要求加單，所以應該都幾大打擊。(當時一線歌手閒閒哋三、四白金唱片(二十萬張)，佢哋自己1990年嘅【命運派對】都賣三白金，超過十五萬張)
但係黃家駒先生去世後三到四個月內，專輯銷量一下衝到30萬張。

根據非正式統計(即係我)，呢張係BEYOND發行得最多版本嘅唱片。

樂與怒舊版_無IFPI___94年中前CD冇IFPI碼
樂與怒復刻版_2017年發行，(歐盟壓碟)，碟面唔係藍色，歌詞變咗小冊子，相都少啲
滾石版
卡式帶
黑膠
樂與怒 (藍色膠) (限量編號版)
UPM24KCD_金碟
DSD CD
樂與怒 (SACD) (限量編號版)
AMCD_其實我都唔知咩嚟
台灣版_(有紙盒版、膠盒版)嚴格嚟講唔可以叫【樂與怒】台灣版，因爲一啲都唔樂與怒，碟名叫【海闊天空】，得兩首國語歌，冇咗《我是憤怒》、《命運是你家》、《狂人山莊》、《走不開的快樂》，加咗兩首日文歌，其實係一隻雜錦碟嚟。

當然大部分版本都係黃家駒先生去世之後出。

喺2010年，呢隻碟入選咗華語金曲獎30年經典評選入面「30年30碟」呢個奬項，同時間以《海闊天空》入選咗「30年30歌」，同埋以BEYOND名義，入選埋「30年30人」。(唯一一隊樂隊攞晒呢三個項目)

---

碟名：【樂與怒】，成隻碟嘅風格對得住呢隻碟名有餘，有聽BEYOND嘅都好難唔鍾意呢隻碟嘅。
開使介紹下啲歌：

我是憤怒
Intro一嚟就係BEYOND式嘅吶喊，跟住就一句“可否爭返一口氣”，即刻就可以帶入情緒。
好嗌、好爆、好有力、好粗暴嘅一首歌。
表達出憤怒、嬲、唔妥協。
一句”只想吞千噸的怒火“，由黃家駒先生把聲唱出嚟特別到肉。
呢首歌係電影【醉生夢死之灣仔之虎】插曲，套戲有另一首插曲係《無盡空虛》，片尾曲就係《情人》。
亦係【追龍二】嘅主題曲。


爸爸媽媽
呢首歌係呢隻碟第一首主打歌。
細個聽唔明嘅，歌詞表面上係一啲家庭爭論，爸爸媽媽嗌交之類。
大個先知原來充滿政治味道，係講緊當時香港即將回歸，中英談判嘅過程。
不過初時我都解讀錯咗嘅，我以爲爸爸係講中國，因爲爸爸男人嘛，媽媽係講英國，因爲女人嘛，但後嚟先知係調轉咗。
呢首歌嘅官方MV呢，華納出嘅，華納幫樂與怒呢隻碟出過好幾首歌嘅MV，但唔使講㗎喇，可以話係把鬼！完全冇意思嘅，只係胡亂剪輯咗啲BEYOND嘅片段，我都費事介紹大家睇喇，反而TVB幫《爸爸媽媽》拍過條MV仲有誠意啲，但係我搵咗好耐，得兩個國內嘅網站有得睇，仲要係好低清，有興趣都可以睇下，連結喺下面。
呢首歌仲有一樣嘢好值得講嘅，就係中間嘅一段rap喇，不過其實似數白欖多啲，亦都係第一次加入呢個元素，之後三人時期都有《吓？講乜嘢話？》係rap。
同埋一開始intro係用咗小號，都係之前未試過嘅。
可能呢首歌標誌性太大，所以冇其他版本。

爸爸媽媽MV (TVB)
Link 1：

Link 2：
https://www.bilibili.com/video/BV18s411F7hW?p=2
Link 3：
https://v.youku.com/v_show/id_XNzkxMjY2OTI=.html?spm=a2h1n.8251843.playList.5!9~5~A&f=3121661&o=0


和平與愛
顧名思義，係一首講和平同愛嘅歌，日文版名為《Never Change World》
雖然同《Amani》一樣都係講和平，但《Amani》會有一啲控訴，講反戰，《和平與愛》個感覺會輕鬆一啲，冇《Amani》咁沉重，係帶出珍惜和平多啲嘅。
類似嘅歌其實仲有《交織千個心》、《可知道》。

日文版《Never Change World》- 收錄喺【THIS IS LOVE Vol.1】


命運是你家
國語版叫《命運是我家》，三人時期先出。
廣東話版大概內容都係講唔怕挫折啊，對抗命運啊噉。
有說呢首歌係寫九龍皇帝曾灶財嘅，當然講廣東話版啦吓，睇返歌詞其實都幾貼切嘅。
但係黃家駒先生離世之後呢，將黃家駒先生代入去《命運是你家》入面呢，其實又好啱喎，直情係佢嘅寫照一樣。
仲有個日文版嘅，歌詞我翻譯過，不過都唔係好明佢嘅意思。
又有人話似Pink Floyd嘅《Wish You Were Here》，我就覺得大家都有結他之外，其實一啲都唔似。

Pink Floyd - Wish You Were Here


國語版《命運是我家》- 收錄喺【這裡那裡】
日文版《君には僕が》- 收錄喺【THIS IS LOVE Vol.1】


全是愛

呢首歌講大愛，有咗愛就乜都得。
有啲感覺係佢哋去咗日本，有啲無助，但係有愛，就可以排除萬難。

唔知點解Google《全是愛》會搵到蕭敬騰？
要同Google傾下點樣置返頂先得。(但好似國歌都唔得)
播錯歌就麻煩⋯⋯


海闊天空
跟住呢首犀利喇，《海闊天空》。
應該冇人唔識，BB仔都聽過。
基本上係可以話係BEYOND十年以嚟嘅心路歷程嚟嘅。
BEYOND嘅音樂一向都以結他為主，但係《海闊天空》由鋼琴帶入，所以demo時叫做《Piano Song》嘅，當然佢唔係第一首用鋼琴啦，但係係BEYOND第一次用真正嘅弦樂團為歌曲配樂，歌曲最後喺弦樂嘅伴奏中結束。
成個編曲好勁，好有鋪排，唔係一般band sound嘅玩法，好大膽噉，頭三份一都只係鋼琴，之後先慢慢加入鼓同其他樂器，最後仲加埋弦樂，而且仲係一隊幾十人嘅小提琴隊入錄音室錄。
所以首歌後段好澎湃、好有氣勢、好蕩氣迴腸，但係因爲有鋪排，成首歌比較慢熱，成05:24秒咁長，電台好難播，所以就剪咗個04:00嘅版本，我會形容係冇咗中間嗰段藥引，突然就跳去爆發嗰段，可以話係畀人斬咗手手腳腳噉，很不爽！
好奇怪嘅，各大串流平台嘅【樂與怒】都係收錄呢首電台版，以我所知得moov係原版、聽講joox都係原版，明明係大碟嚟，我都莫名其妙，之前國仁兄都開過live講過呢個問題嘅。

好喇，又數下呢首歌有幾勁。

1993年，香港電台：十大中文金曲
1993年，商業電台：叱咤樂壇我最喜愛的本地創作歌曲大獎
1993年，港台節目《驕陽歲月》主題曲
2000年，香港寬頻「生有限．活無限」電視廣告廣告歌
2008北京奥運會，劉翔喺男子110米欄退賽嘅時候，「鳥巢」體育場響起咗《海闊天空》
2010年，華語金曲獎30年經典評選：「30年30歌」
2017年，文化信息周刊《Time Out》評選廿大經典粵語流行曲，《海闊天空》排行第一
2017年，香港電台「摯愛20真經典」，華語金曲十大
2018年，台北四大洲花樣滑冰錦標賽，香港選手李厚賢用咗《海闊天空》做配樂。
2022年4月12日，呢首歌嘅MV喺YouTube嘅點擊次數超過1億人次，係全宇宙第一首YouTube點擊次數突破1億人次嘅廣東歌。截稿前已經超過咗1億2千萬。

BEYOND【海闊天空】Music Video (粵) (HD)


當然呢首歌經歷過無數次嘅翻唱，甚至改編啦。
多到數都數唔到，有人用嚟做音樂盒、有人改編Acapella、甚至連蒙古語都有。
仲有高登巴打改詞嘅《海富天空》，雨傘時期嘅，直譯英文版嘅《海闊天空 Sea Wide Sky》，歌詞全部直譯嘅，仲有個女聲版添。
而大家可能比較有印象啲嘅，就係2008年四川嘅汶川大地震，香港演藝人協會用咗《海闊天空》嘅曲，搵劉德華同黃家強寫咗呢首歌嘅詞，陳奕迅監製，改咗名做《承諾》，用嚟做籌款賑災嘅主題曲，演唱歌手近二百人。

不過咁多改編呢，在我嚟講呢，都係唔好搞喇，有啲嘢上咗神台係唔掂得嘅，個人意見啫，不代表本台立場吓。
唯一一首我覺得幾好嘅係黃明志嘅《我們的海闊天空》，因爲其實佢唔算係改嘅，佢係攞咗少少melody，成首歌做過，唔鍾意嘅你可以話抄啦，鍾意嘅即係致敬啦，但好聽嘅，內容熱血嘅，有興趣可以聽下。

講返首歌先，首歌其中一句「也會怕有一天會跌倒」之後係駁Oh No嘅係咪？但係喺港台節目《不死傳奇》入面，黃家強透露，黃家駒先生寫嗰陣時原來係“Oh yeah”嘅？不過黃家強話唔合邏輯，所以之後就改咗做“Oh No”

噉《海闊天空》呢個名都唔係專利嘅，台灣有隊band［信樂團］有隻碟叫【海闊天空】，入面有首歌叫《海闊天空》；之前有套戲【中國合伙人】，台灣片名叫【海闊天空】，戲入面亦都有播《海闊天空》。

講咗咁耐，又講個彩蛋畀大家聽，喺寶麗金金曲卡啦OK嘅MV入面，男主角係由古天樂演出嘅，不過個MV就幾無厘頭，劇情同首歌係冇關嘅。

海闊天空_寶麗金金曲卡啦OK_古天樂演出


改編：日文、國語、蒙古語、汶川大地震賑災主題曲
葉炫清（國語版）


李蘇亞拉（蒙古語）
https://music.apple.com/hk/album/%E6%B5%B7%E9%97%8A%E5%A4%A9%E7%A9%BA-%E8%92%99%E8%AA%9E%E7%89%88/1660892357?i=1660892358

群星【承諾】(黃家強)


黃明志【我們的海闊天空 Beyond The Edge】


海富天空 (高登巴打)


Sea Wide Sky (高登巴打)


Sea Wide Sky (女聲版)


呢首歌四個版本：廣東話、日文、純音樂、04:00電台版
日文版《遥かなる夢に～ Far Away～》- 收錄喺【THIS IS LOVE Vol.1】、3吋CD
純音樂版 - 收錄喺3吋CD
電台版04:00 - 收錄喺【words and music】


狂人山莊
呢首歌我諗會係BEYOND入面最難明嘅一首歌。
歌詞充滿東方色彩，有啲魔幻feel、神話feel
有：龍、猛虎、神、魔、野鬼
又好似有少少預言噉，好似三十年前已經知道今日妖魔當道？所有嘢都無病呻吟？
如果黃家駒先生未去世，會唔會佢就係殘臥老翁？就係佢道破咗天機？
講完都有啲唔明自己講乜。

不過呢首歌應該有啲特別嘅，黃家駒先生離世後，BEYOND三子第一次出返嚟演出，1993年創作人音樂會，佢哋第一首唱嘅歌，就係《狂人山莊》，第二首先係《海闊天空》。

我會形容呢首歌有啲恐怖，Rock爆個嘅代表，係《金屬狂人》嘅級別，甚至超越。
《金屬狂人》indie向啲、野性一啲嘅，《狂人山莊》嗰種淋漓盡致係癲嘅。
呢首歌，真係黃家駒先生先駕馭得到，嗰種狂係啲血滲入首歌，再滲返出嚟，曲詞編嘅配合係神曲嚟。
嗰種咆哮，嗰種爆發力，嗰種剛烈，真係數唔出邊個得，亞Paul都唱過，當然完全唔係嗰回事。

但係又唔係得個嗌字，失晒控嗰隻，好難形容。
真係要形容，其實我會話佢係獨孤求敗嚟，「生平求一敵手而不可得，誠寂寥難堪也。」，佢係深不可測㗎。

日文版《Hurry Up》- 收錄喺【THIS IS LOVE Vol.1】
都係聽返廣東話算吧。


妄想
呢首歌又係唔係一貫BEYOND風格，迷幻啲嘅，呢啲算係咩風格？blues？我都唔識⋯⋯
馬來西亞Unplugged演唱會入面嘅《真的愛妳》就係好似呢個風格。
黃家駒先生係好勁，呢首歌係要亞Paul唱先得，佢自己唱又唔會有嗰種味道。

國語版《身不由己》- 收錄喺【海闊天空】
日文版《蒸し暑い夜》- 收錄喺【THIS IS LOVE Vol.1】

馬來西亞Unplugged演唱會《真的愛妳》



完全地愛吧
好輕快，好直接嘅一首情歌。
呢首歌廣東話同國語版都係黃家強唱嘅，但係日文版係黃家駒先生同佢一齊合唱嘅，因爲有說日本唱片公司Fun House要將《完全地愛吧》用嚟做主打歌，因爲係主打歌，唱片公司想由主音歌手嚟唱，但係呢首歌係呢隻碟唯一一首黃家強寫嘅歌，佢當然想自己唱返，最後黃家駒先生爭取到就係兩個一齊合唱。

國語版《愛不容易說》- 收錄喺【海闊天空】
日文版《くちびるを奪いたい》- 收錄喺【THIS IS LOVE Vol.1】


情人
都係情歌，BEYOND一直都唔少情歌嘅，呢首都算係黃家駒先生最後一首情歌。
呢首歌用咗假聲嚟唱，BEYOND嘅歌好少用假聲，要數嘅要數到好耐之前《無聲的告別》都有少少，通常啲高音都係直飆上去。
黃家駒先生歌路可以好闊，情歌一樣難唔到佢，一樣可以好冧。
呢首歌雖然係一首情歌，但比較悽怨，原本係叫《大陸情人》，係講中港兩地嘅情侶嘅一啲阻隔嘅。

有人話過呢首歌好似係寫畀歌迷，歌詞上其實都似嘅，咁呢首歌係全隻碟唯一一首唔係BEYOND成員寫詞，就係劉卓輝寫，有聽BEYOND嘅都應該唔會唔識劉卓輝，御用填詞人，幫BEYOND寫過好多好詞，所以劉卓輝都專門解釋過，呢首歌真係寫畀情人嘅，另一首歌更可以代表BEYOND同歌迷，就係上一隻碟嘅《遙望》。（《遙望》係黃家駒先生寫詞）

電影《醉生夢死之灣仔之虎》片尾曲。
自己有個國語版
辛曉琪有個國語版

呢隻歌喺1994年由姚謙同厲曼婷填詞改編做國語版，歌名叫《戒痕》，並收錄喺辛曉琪嘅【味道】專輯入面。

呢隻歌傳唱度好高，好多人都唱過：(喜歡你都好多，有機會再講)
比較多人聽過可能有林憶蓮、張學友

梅艷芳/倫永亮_？演唱會
林憶蓮_祝你愉快⋯⋯致家駒、創作人音樂會1993
陳奕迅_黃家強X黃貫中This is Rock & Roll Live in HK
黃耀明_黃家強X黃貫中This is Rock & Roll Live in HK
張學友_演唱會
鄧紫棋_Get Everybody Moving Concert 2011
衛蘭_Moov Live 2010、Janice Walking to the Future Live 2014
古巨基_903 拉闊音樂會、我是歌手3
李榮浩_縱橫四海 (大碟)
謝安琪_中國音超
趙學而_ChillClub
關淑怡_TVB節目

冇比較就冇傷害，做呢節目之前我專登聽過晒呢啲翻唱，最後再聽返BEYOND嘅版本，冇得傾嘅，可能先入為主啦，真係超越唔到，黃家駒先生把聲好勁嘅。
佢把聲好獨特，剛又得，柔又得，穿透力好強，係入心嘅，辨識度極高，一聽就知係佢，只此一家。
文字好難形容，之前都講過佢係獨孤求敗，草木竹石均可為劍，飛花摘葉皆可傷人，佢把聲係可以投放喺極大部分嘅歌種，我唔敢講全部，但係融合率極高，講講唔到，自己去聽啦。
最近都有佢嘅AI出現，我都有聽過，我都會聽嘅，好定唔好都要聽下，唔係話唔似，但可能得少少尾音似，不過就算畀你做到一模一樣都冇用，永遠都唔會係嗰樣嘢嚟。好哲學。

國語版《情人》- 收錄喺【這裡那裡】


走不開的快樂
典型嘅BEYOND勵志歌，充滿正能量，簡單直接，總之就係叫你正面啲、豁達啲。
呢首歌有個日文版，原本係諗住收錄喺佢哋第三張日版大碟【THIS IS LOVE Vol.2】入面，首歌就未錄晒，然後黃家駒先生就離世，噉呢隻【THIS IS LOVE Vol.2】就胎死腹中冇出到。
但係呢個未錄晒嘅版本呢，得46秒，就出現咗喺佢哋嘅第四張日版碟【遥かなる梦 1992-1995(Far Away)】入面，噉呢隻碟呢，其實係BEYOND嘅日文歌大全，一次過收錄晒佢哋四人時期嘅日文歌，包括埋呢首未錄晒嘅日文版《走不開的快樂》，仲要好特別噉，係喺最後嘅Hidden Track度出現。
但係就唔喺呢度講呢隻碟喇，有機會再講。

日文版《シークレット·トラック》有個中文名叫：多謝、家駒- 收錄喺【遥かなる梦 1992-1995(Far Away)】



無無謂
一首初初聽覺得好搞笑嘅歌，口語化歌詞，BEYOND其實幾適合唱呢啲歌嘅，《俾面派對》啦，之前佢哋唱《半斤八両》啦。
首歌玩扮聲嚟唱，又係第一次，感覺好似演譯緊唔同角色，好胡鬧、好輕鬆噉樣，講出一啲社會嘅生態、社會嘅現實，最後都係叫你睇開啲啦，無所謂啦。

後期先知呢種風格叫做雷鬼。
雷鬼音樂係一種嚟自牙買加嘅音樂類型，噉我唔識嘅，所以唔喺度多講。

日文版《もーまんたい！》- 收錄喺【THIS IS LOVE Vol.1】Hidden Track
發音係：（mou5 man6 tai4）

---

係時候講講黃家駒先生之死之謎，首先我係唔信風水堪輿嘅，但係有說呢，黃家駒先生之死係同風水堪輿有關，甚至係同呢隻碟有關㗎喎。
先講講啲歌，例如：
1993年5月2日《Beyond 我哋呀！Unplugged音樂會》入面將「命運是你家」唱成「命運是我家」
《海闊天空》入面，有「跌倒」歌詞
《妄想》入面，有「跌倒」歌詞
《情人》入面，講離開、分開、希望以後可以再見，甚至歌詞仲提到「歸去」、「意外」、「別去」
《走不開的快樂》入面，有「跌倒」歌詞

《Beyond 我哋呀！Unplugged音樂會》片段：


然後講下好少人提到嘅，就係大碟嘅設計，表面上冇乜嘢，但係原來封底係有玄機嘅，封底係用咗字典式嘅排版，分別顯示咗大碟名樂與怒呢三個字，而頭頭尾尾，嘅字同埋解釋入面，都好巧合咁出現好多唔吉利嘅詞句，例如：
樁：「一頭打進地下」的木頭
思：「動腦」筋，悲悼
怠：呢個比較夾硬（與殆同音）
急：緊要，急事，急轉直下，危急，情形很嚴重，告急，救急，投醫，真把人急「死了」
怔：恐懼、心神不安



以上都係一啲好巧合，或者係馬後砲嘅事。
點都好，有人話，黃家駒先生冇死到嘅話，BEYOND唔會咁紅，可能係，冇人知，無論而家嘅BEYOND係點樣，最好嘅已經喺心中。
歌詞都有講：
忍痛話別 但心裡悲傷
只知道 曾是擁有

---

要講嘅嘢都差唔多，希望大家唔好彈咁多，亦都希望今次籍住呢個節目，等大家唔識BEYOND嘅認識BEYOND，認識BEYOND嘅就更愛BEYOND，但係愛呢樣嘢唔係我叫你愛就愛，自己都要分析下先，愛係發自內心嘅，冇得逼、冇得教，唔係我叫你朝朝早起身聽一次海闊天空就會愛，一樣嘢只要唔乞人憎就自然有人愛㗎嘞。係咪？

今次專登整埋呢個【 BEYOND的樂與怒】圖文版，方便大家睇之餘，亦都方便我自己留返啲記錄嘅，想睇詳細啲、生動啲嘅，可以去下面嘅YouTube版，唔嫌棄就可以去睇下，再喺樓下畀下意見，我全部都會睇。

最後希望大家平平安安，光輝歲月。
有機會再見～

YouTube版：

---

【 樂與怒】
我是憤怒
曲：黃家駒
詞：黃貫中

爸爸媽媽
曲：黃家駒
詞：黃貫中

和平與愛
曲：黃貫中
詞：黃家強

命運是你家
曲：黃家駒
詞：黃貫中

全是愛
曲：黃家駒
詞：黃家駒

海闊天空
曲：黃家駒
詞：黃家駒

狂人山莊
曲：Beyond
詞：黃家駒

妄想
曲：Beyond
詞：黃家駒

完全地愛吧
曲：黃家強
詞：黃家強

情人
曲：黃家駒
詞：劉卓輝

走不開的快樂
曲：黃家駒
詞：黃家強

無無謂
曲：葉世榮
詞：葉世榮

manid903

這是一個十分好的唱片介紹，希望將來有更多！ 多謝祺同版主大大！
睇完訪問，誠意真心有200%. 現在很少這類介紹一隻唱片的特輯，希望將來keep 住。
樂與怒是真正專業錄音技術，一隻真正hifi 碟級數的band album 表表者。

michael123

多謝亞褀同小瑟分享
條片都睇曬

真係好多謝佢地當年作左咁多好歌
佢地大部分既歌到而家都唔過時
經過歲月既沉澱，有啲歌重正過當年第一次聽個時

dragonyam

慶幸可以聽着 beyond 的歌長大

dragonyam

1993年，一轉眼已經30年，由剛出來社會工作，到現在白髮蒼蒼，
世事無常，只能嘆一句：家駒你離開得太早

245141525

manid903 發表於 2023-7-1 11:00
這是一個十分好的唱片介紹，希望將來有更多！ 多謝祺同版主大大！
睇完訪問，誠意真心有200%. 現在很少這類 ...

多謝支持。
要數經典廣東大碟，【樂與怒】一定佔一席位。

245141525

michael123 發表於 2023-7-1 12:34
多謝亞褀同小瑟分享
條片都睇曬

多謝支持。
經典就係唔會過時。

245141525

dragonyam 發表於 2023-7-1 21:51
慶幸可以聽着 beyond 的歌長大

多謝支持。
我都慶幸佢喺我生命中出現過。

245141525

dragonyam 發表於 2023-7-2 20:56
1993年，一轉眼已經30年，由剛出來社會工作，到現在白髮蒼蒼，
世事無常，只能嘆一句：家駒你離開得太早 ...

師兄隻碟keep得好～
我嗰啲其實都殘晒。
已經用膠袋入住。

dinosaurcio

Very good article, waiting for the album of Amani. Thank you !!