[小報] 趙學而x香港業餘管弦樂團音樂會

245141525

趙學而x管弦樂有乜火花？



本身對管弦樂冇特別興趣，但趙學而嘅歌就一直都喺我歌單入面，甚至覺得佢先係《最佳位置》嘅最佳演繹者。
今次同香港業餘管弦樂團合作，老實講，初頭只係對趙學而有期待，成個主題都管弦樂嘅話，總係覺得會太悶。

難得搶到飛，唔去對唔住自己。

音樂會一開始，好聰明噉用咗《天空之城》做序幕，好輕易就帶大家進入咗管弦樂嘅世界，接住就由第一首歌《我恨我是女人》開始。
適逢香港業餘管弦樂團十五週年，音樂會都有部分交由香港業餘管弦樂團團奏嘅環節，其中一首歌係《假使世界原來不像你預期》，唔知點解冇人唱，但份外感動，見而婆佢都忍唔住必咗兩滴淚。

中段有個廁所位，其實係畀大家休息十五分鐘，當然係畀樂團同而婆休息啦。

返嚟之後，連氣四首團奏，對四位偉大音樂人致敬：《似水流年》、《為你鍾情》、《摘星》、《海闊天空》。隨即帶大家進入八、九十年代，唱咗幾首懷舊經典歌。金曲過後就到咗自己認為最精彩嘅部分，因為連接到尾都係琅琅上口嘅而婆歌，當然唔少得《最佳位置》，滿足了！

其間唱完《尋人》，唔知係唔係因為中段有兩隻字入唔切，而婆同團長Moon咬一輪耳仔，之後由頭再唱一次，可見其認真。
最後就由《尋開心》做結尾。

成個音樂會大約兩個半鐘，今次歌單有佢自己歌、有翻唱歌、有新歌、有經典歌，喺香港業餘管弦樂團襯托之下，份外高貴，大飽耳福。

好鍾意趙學而，但又唔係好追，有買佢嘅碟，但又冇睇皆大歡喜；由小骨女到骨婆婆，由每隔兩秒到黃金花，感覺就好似一個識咗好耐嘅朋友一樣，好似好少見，但又好似好熟；睇佢Chill Club多，係冇睇過現場。

音樂會得兩套衫，熱舞欠奉，又冇Encore環節，唔止冇悶親，氣氛仲好好，而婆唱功唔使懷疑，管弦樂團業餘得嚟其實勁專業，現場演出幾時都係咁好睇，只有現場先感受得到嘅氛圍。
可惜，只此一場，出碟？只能回味⋯⋯

註：老爺電話，又坐得遠，影得麻麻地⋯⋯