THE FIRST SLAM DUNK 二刷後感想 + 討論帖

阿定

終於二刷了 THE FIRST SLAM DUNK ，首刷係日語IMAX版，二刷係廣東話版，作為一個籃球迷 + 漫畫迷，SLAM DUNK 係我心目中除了係一套經典作品外，仲係一本籃球聖經，當年漫畫連載時正正就係我中學開始真正喜愛打籃球的時代，雖然籃球技巧唔會係漫畫入面學到，不過打波時的心態，好多都係 SLAM DUNK 上腦，入晒血，所以今次亦都想同大家分享下二刷之後的感覺。

以下內容含劇透

今次電影版 SLAM DUNK，好多人會認為係電視版的全國賽續篇，不過我就覺得佢係一套以宮城良田做主角，名為《湘北VS山王工業》的記錄片，如果有喜歡藍球的，可能已經睇過 Netflix 的記錄片 《The Redeem Team》 同樣係講述 美國男籃隊的比賽，但實際係講緊美國隊員的心路歷程，其中以 Kobe Bryant 為主線整合全套記錄片，今次 THE FIRST SLAM DUNK 都係走差不多的套路。

我估入場睇呢套 SLAM DUNK 電影的人，應該會有大約一半人係有睇過漫畫的吧，所以漫畫已有的戲情，好多人都已經好熟讀的了，原作者井上雄彥老師亦係訪問時講過，佢想用一個今時今日佢自己的視角去講述《湘北VS山王工業》呢場波，而井上雄彥今次揀了宮城良田做主角，除了佢口中係因為漫畫比較少交代良田的故事外，估計同佢學生時期同樣係打控球後衛有關。

電影入面有好多漫畫名場面都消失左，個人的睇法係有三個原因的，第一，電影想忠於現實世界，所以非球員進入球場的情景被刪去，晴子等非球員相關角色唔可能係比賽期間出現係賽區，第二，劇情的推進節奏同埋重要性，對主線無關的都被直接刪去，或用其它方法表達出來，電影入面其實好多細節位都會見得番漫畫的場景，例如海南球員係球場頂的反應縮到好細，樣都見唔到，原本漫畫入面湘北各球員的大頭互動，亦變成球場不同角落不起眼的小場景，第三，靠大家的腦補，由 廢物射球、櫻木告白 到最後的 左手只是輔助，網上好多人都話CUT左好可惜，但我想講，井上今次作為監督最厲害的地方係佢無配到音落去或無畫到出來，但只要你對漫畫版夠入血，你個腦自自然然就會補完番上面的對白或場景入個腦入面，劇情去到櫻木起身時，你知我知單眼佬人都知櫻木會講出非常喜歡呢句對白，但電影就係無畫出來，覺得被取消告白的朋友，你真係無係呢個位自動波腦補感動到兩眼流汗嗎？ 只講球賽拍攝的話，我自己就好滿意今次的改動，如果只係搬字過紙式照抄過來，只能說是經典漫畫的動畫化，但今次針對拍攝角度的改動，加埋全新的3DCG拍攝手法，絕對係稱得上超越經典，全新教科書式的動畫化範例，只有井上雄彥可以超越井上雄彥。

電影除了球賽部份外，最多就係宮城良田的成長故事，除了漫畫《耳環》外的延續，仲有唔少8,90年代的藍球場景都係我中小學打藍球時的回憶，其中包括良田係小學時期比賽時，對手換入正選後，大叫各人的號碼，都係當年打比賽時需要全場緊迫的常用手法，另外由最開始良田兩兄弟一對一，初中一年級係公園對三井的一對一，良田都犯了無正面面對對手持球的壞習慣，作為一個控衛，電影入面充滿著良田有好幾次帶波越帶越邊，最後跌倒失波的場景，所以去到山王賽時，良田係夾迫情況下無向場邊走，勇敢地從正面係兩個防守球員中間帶個波出來個種感動，個種有型，對於同樣係學生時期打控球後衛的我，係整場電影最感動的場景，還記得90年代的學生比賽仍然存在著Key波果個需要承擔帶球上前場的責任，好多時學界籃球都會有針對控球比較弱的球隊進行全場緊迫的戰術，成隊波大半場時間都帶唔到個波上前場的比賽，可以話係經常發生，由無力帶波上前的小良田，到獨自突破全國第一的防守，向著No.1控衛的目標進發，個種熱血，用了大半套電影時間來製造出來，相信只有打籃球的人才會明白吧。另外仲有高二時的赤木，鬧良田交波太過花巧，放到今時今日的籃球標淮應該會覺得好奇怪，但事實係90年代初對於後手傳球，No Look Pass，學界藍球仍然係會被視為禁忌，還記得當年自己打開街頭籃球，返到學校夾高年班的師兄打社際籃球，後手傳球係會比學界經常贏獎牌返來的師兄鬧到七彩的，原因唔係師兄唔夠勁接唔到個波，而係係90年代初期，係無默契的情況下，無人想(識)接突如其來的波，所以由良田後手傳波比赤木時鬧交，到赤木出聲撐良田起碼識傳波的劇情，果種心情又係只有打開藍球的人才會明白吧，說真的，要培養到隊友識得接你No Look Pass的默契係90年代真係一點都不容易。

另外我亦想講下，套戲叫 THE FIRST SLAM DUNK 係有原因的，電影上畫，加上年代久遠，無睇過SLAM DUNK 或唔熟 SLAM DUNK漫畫，只睇過動畫的朋友應該都唔少，所以電影對第一次認識 SLAM DUNK 的人來講，係戲院入面的反應係會同我地呢D粉絲會有落差的，佢地會因為未睇過呢場波而比我地更緊張，佢地會一見到櫻木大頭就無緣無故地笑，雖然好影響我的觀賞體驗，但我都高興有人睇得開心，睇得興奮，不過最好就唔好係唔應該出聲的情景出聲啦，例如最後得心跳聲同時鐘聲的場景請保持安靜，同埋已經熟讀漫畫，或一刷再刷的朋友，你地要解釋劇情比身邊的人聽的話，不如開場前迫佢地睇一次漫畫先吧，電影院始終有電影院的禮儀，無謂的談話真係好影響其他人的。

最後，之前有網友問過應該睇咩版，因為已經睇晒兩個唔同的語言版本，所以可以比下感想，日語就一定係原針原味的，對話的語氣都似係正常比賽時球員應有的對話語氣，唔會太過 drama， 而廣東話版因為用了唔少亞視原版的配音員，說句老實話，部份角色把聲有點老，特別係拍埋其它角色配音時，雖然成個球場都係高中生，但聽落去會有角色年齡語調唔平衡的情況，不過情壞行先都係應該的，總好過其它動畫咁搵影視紅星來配音來的好吧，而且廣東話唔駛追字幕，對欣賞球賽絕對有好大幫助，如果只能睇一次的話，我都會推薦睇廣東話版，不過因為廣東話版無IMAX，無Atmos，作為影音發燒音，日語版都有需要入場睇就是了，講咁多，其實都係想講，最少二刷睇晒兩個版本啦，我自己就考慮緊三刷日語Atmos版，反正電影公司不停咁用唔同特典引我入去刷刷刷，應該會再有其它特典成功呃到我入場睇多次的吧！

alleelarry

先前用分換既 VIP 會員特別場，福袋就是這些，主要是當其時已經公開既禮品！

阿定

被稱為山王原型的能代工業，可以從3:30睇到下半場剛開始時使用的緊迫聯防點樣一口氣狂數對手！