|
|
如果想睇到更多76師兄嘅分享，快啲登入成為會員啦！
您需要 登入 收看或下載更多內容。還未成為會員？成為會員
x
本帖最後由 AppleChan@G 於 2023-1-20 00:27 編輯
(註：本人只是普通阿爸，家庭全是書、玩具同混亂，對影音絕非特別講究。以下心得都只係班門弄斧的小分享，又唔覺意寫下寫下寫長左D。還望各位師兄體諒！)
本身用緊sharp 52吋電視十幾年，本來電視冇穿冇爛，電視hifi咪又唔係播下peppa pig let it go咁, 但係，心底始終有個影院夢。
十幾年前仲係720p年代，仔女仲未出世的初新婚階段，其實已經心癢癢想整部，但無奈拉線實在麻煩，最後就不了了之左。到2021年左右小型projector興起，又試過千幾蚊買過部極米，最後感覺，完全唔掂，最後個夢同部極米一樣放左入雪櫃。直至有個概念打入自己眼球-----ust projector. 呢個概念應該由2017左右開始，好似係海信以激光電視之名銷售，果時一度覺得好mm7，但之後劣評就如雪飄至------唔夠光取代唔到電視，black level同對比又遠不如傳統投影，跟住就冇乜點留意。直到極米中伏之後目光又轉到ust，幾年冇留意原來已經進步好多亦都好多品牌加入，見到optoma benq 之類都好多網站推薦，一睇價錢，oh都要3萬左右起步不特止，仲贈送以下心理包伏-------廠牌(並無貶低optoma benq之意，但知名度比較難過大人果關)、呢個年代得果兩三個hdmi仲有一個要落plug in先睇到netflix仲要unuser friendly........大佬買個配置落後度同自己十九幾年的電視真係心過唔到，好啦把心一橫睇睇lg三叔啦，咦大廠就係大廠真係好好多最少流媒體優勝好多，睇d光度對比度，尤其三叔部lsp9t 真係係ust甚至投影界中高針水平，但係一睇價錢.........
豐澤網：$65800
冇咩事我返出去做野先。當年買部sharp萬五蚊，要用多4倍價錢upgrade, 真心過不了。
直到第五波爆後宅在家中無聊ebay一下，冇諗過， 我遇上了人生網購史最震驚同大膽的一刻
lsp9t price: $3450US
？？？？？？？？！！！！！！
咩話？3千5美金就有？就算計8算，咪就係2萬8唔駛？？當然都唔係平，但比行貨平成倍未免都太過分了吧？之後就開展漫長的google and post76之旅, amazon買傳統投影同電視機有，淘寶買ust都有，但美網買ust.....好似冇。一度想放棄，但回頭睇返拎住同一舊錢用香港行貨買到d乜......當然仲有，另一個價錢絕對可以買到部70吋以上的頂級LED電視，但最後都係想走投影路，好，去馬。
今次亦係本人首次ebay的鳩烏隔山買牛，click左俾錢，感覺好唔踏實。終於得到shipbao收到包件收取信息終於可歎返口氣。32磅重，放低8舊，展開了一星期飄洋過海，貨終於到。
諗返原來果時我真係冇乜心情影開箱文。一返到家，只抱住160的心跳著機，開到機，等暖機全著，全著仔細望望投出來的screen有沒有黑點，check完最後武士，心跳終於緩下來，終於懂得摸摸新機子帶來的觸感。等待期間睇得多amazon d comment, 見到超短投死機死點的要退貨的事例都府拾皆是於是就愈睇愈驚，感受過呢次飽食驚風散， 就唔會再取笑別人為何貴幾萬銀買行貨，付出更多坐等收貨仲可以買份安心，值。而俾唔起如我，當你決定俾少果份錢同時，亦請承受等同的風險。
講左咁耐，係咪講漏左一樣野呢，係，就係個幕。不論係價錢同安裝，投影幕絕對係步入projector 的一大障礙。已經俾得幾萬買，仲要買多個萬銀幕？買左返黎又要人搞一輪......一不做二不休，繼續自己諗方法。其實超短投最基本就用黑柵幕(淘仔仲興一種叫菲𣵀爾屏，仍增益率仲高過黑柵，聽講今年可視角進步好多，不過我冇緣份享受了)，買唔起美國貨，用台灣貨都好好。上淘仔100吋3000人仔攪得掂，雖然我屋企問題用得90吋，但都有得揀下來買，但問題來了，想免卻安裝點呢？釘上牆真係唔想，如果唔想就要買地升幕會貴一倍兼冇梗幕咁美觀，終於俾我搵到.......原來已經有磁吸幕呢一回事，好，落單，計埋運費港紙二千六，繼續單車變摩托。
機黎左30kg終於要上牆，一個人貼兩貼，十五分鐘搞掂左，雖然角度之後adjust左好耐好耐，但投出來，真係有點點感動，十幾年投影夢，終於達成。
講返呢部lsp9t，雖然佢無論標價或我買的水貨價定係貴貴，但冇得講，打上個幕就明點解坊間會話佢物有所值，因為佢就係一部90吋的電視。 經過左大半年長期使用，我諗可以俾返少少comment 落呢部機，同埋有一d 會係有關超短投的general note.
讚左佢先：
- 夠光。2800ANSI流明以投影機來講唔算好勁，但少少日光入同開燈都冇問題。可能因為只投90吋會光d，亦都因為佢係行三重 laser唔行色輪，聞說單色DLP色輪轉動會減緊d光，3 Laser響光度上係會有d優勢。
- 行0.67吋DLP，係2Kx2唔係一般0.47 DLP行1080pX4，所謂大底一級壓死人，近距離睇果份精細度即使同傳統靚仔投影機都有得拼一個。
- HDR10+有料到，再配合上超100%rec.709同bt.2020, 色彩層次好豐富，尤其紅色的成色同立體感都好引人。 另外佢冇一般投影邊角失真的問題，同中央保持幾乎一樣的表現，收貨。
- 上面都講過，基本上三叔電視有既野佢都俾晒你，netflix disney+ 加本地薑viutv hmoov好豐富的apps支持兼唔駛用plugin, 變相慳返個hdmi(都唔知點解ust d hdmi位咁孤寒)
- 聲好，4.2 40W 拍得住中低階生巴。
- 1：0.19投射比，市面上只有epson LS800勁過佢，有相你睇， 90吋投出來只需9cm，完全冇拉櫃出來的需要，開心。
彈：
- 色調：剛剛上面講的紅色，成為呢半年最困擾我的地方。紅色係好靚，但開箱的default setting相當偏紅，white balance 一tune連其他色都會偏，搞到頭都大埋。好彩之後projector central(好好的投影機評測站，陣間再講)同lsp9t做左review再幫佢俾左少少建議setting，部機d顏色先醒神返d。
- 激光色斑 睇電視時總覺得有少少好微好細的粉斑點，我以為係因為自己個cheap cheap mon問題啦，但睇review原來就算最好的幕布一樣有呢個問題。不過只類似貼左塊mon貼咁，絕對唔算顯眼唔講唔覺。
至於好多人關注的彩虹效應，聞說佢係有的但唔算係勁，好彩我自己係睇唔到的，但黑白對比好強的字幕邊係會睇到虹邊，不過並唔覺眼。
- 菜單。一來個遙控太少掣下下setting都係咁㩒方向掣㩒到手殘，二來順暢度並唔爽快。叫得做旗艦premiere俾但就窒下窒下，梗梗不爽了。
呢兩個就係我問題/ 唔知係咪我問題：
- 佢係少有內置TV tuner的projector, 但作為美水命運應該同各大電視機命運一樣，不過冇人試過儘管買條電線博博，結果......當然衰左。好彩我用有線內置各大免費數碼台，但對原廠有得開箱即睇的行貨真羨慕ing。
- 個hdmi earc ....可能我部AMP太冷門(Lyngdorf tdai-1120)，用到最upgrade的2.1線佢都係認唔到出唔到聲死死氣要用返光纖線，當時想求救又係無門.......呢d就係做爛頭卒的代價。
跟住就係一d使用左大半年對於超短投的general note, 我覺得若有意思投入UST世界但以下任何一關過唔到，師兄都好應該唔好腦衝冷靜下再想想：
1 Black Level/ 對比度
我諗有玩超短投都會覺得呢個係UST不能逃避的命門。因為我用緊已經係Review界最大底最好對比度的其一，但始終UST 99%DLP即使熄晒燈一d黑色細節位都唔算係太好，對下比唔上新一代頂級LED電視，對上亦都追唔到sony/ JVC D-ILA 投影。
2 時延
我並唔係遊戲用家，Lsp9t 55ms的時延冇乜影響我睇戲但.......有有次想玩太鼓........真心想撼頭埋牆。其實剛新出的LS800同optuma新機時延都好低點解要放響genernal note?因為依家最新最頂級的Hisense同 LG HU915等大底DLP時延都係around 40ms up唔理想，而epson 同optuma都係用1080p mode行先做到低時延，對高度玩戲玩家呢座真係會係座大大的高山。
3. 風扇嘈音
一般review都好評超短投的音嘈噪，的確物理距離上響電視機前的確比起響自己頭頂遠，二來控制激光的溫度比起以前燈泡會來得容易，但男人的浪漫夜闌人靜煲戲，風扇聲唔擾人但始終都會係個顯眼（耳）的存在。暫時只有一部HP超短投用緊水冷靜音，唔知未來會唔會多d廠會採用？
4 邊角黑影
超短投獨家問題，應該因為由下而上的投射導致有黑邊，一般開燈唔覺的，係一熄燈就會現形，如果套戲本身已經唔係16比9仲要多條黑邊強逼症人士應該會抓狂🥲不過呢個問題應該梗幕先有， 如果用地升幕係冇事的。
5 光度
其實今日超短投已非吳下阿蒙，光度閒閒地上到ANSI 3000（記得唔係LED流明，削好多的）已經好夠做，但佢的光度（例如三叔的dynamic mode）通常都係犧牲左d細緻度換返來，用落唔覺，一落百記豐記睇睇LED電視舖頭幾光光度暗位都咁靚就知冇比較冇傷害。我自己一般開燈時都係睇下新聞就冇乜問題，但對開燈下的表現好有要求的建議你去showroom睇下部新出的 epson LS800（4000ANSI），如果都通唔到關，就唔好勉強自己。
...
6 最後呢一個唔係負面野，LED電視對UST甚至投影絕對比唔上的，係眼球舒適度。呢大半年眼睛感受過反射光對比直射光帶來的舒服體驗，點樣放縱仔女睇電視而唔帶太大罪疚感，不論LED比LCD技術如何進步，對唔住，係返唔到轉頭的。
........
如果有師兄睇到呢度，睇怕你都係好愛超短投甚至心大心細先肯頂得順咁差劣的文筆，感激感激。總括來講，我會覺得超短投係一門”80分的藝術“，佢並唔極致，佢只有8成頂級長投的black level, 8成LED電視的光度對比，8成的寧靜度，8成的時延，仲有果20%的不完美扣分，諸如彩虹效應， 色班，黑邊等。但只要你妥協了，接受得了這份80分的答卷，咁我恭喜你，因為你只需要俾三萬甚至更少的價錢，就可以擁有一份比起傳統投影配置更方便的超值體驗。“超值？冇野嘛？”不如睇睇同廠叔一部98吋的4K LED電視的價錢？
價值從來都是相對。就係咁。
佢唔係最好，但值得俾更加多人了解它的好，我預計佢亦都會係未來呢幾年最受影音愛好者關注的產品，如今年CES 2023 出沒的LEICA投影，0.94吋DLP 超短投的 Samsung同Hisense 8K UST，終有一日或者佢哋都或會出現響百記的showroom的銷售品。在呢一日之前，希望分享少少體驗俾大家呢個未來新趨勢。不過即使我唔講，超短投都好多師兄知道係好東西，但坊間對超短投真係唔大。邀請左幾批朋友上來，幾乎個個對住個梗幕問點解你個電視咁大又咗薄🥲，好啦所以就有動機響呢度為UST盡少少綿力了。
80分的妥協，換來一塊大銀幕同朋友一齊同朋友唱K友共情時光，換來一齊睇千與千尋的親子時光，再換來一個可以讓深宵暗暗回味兒時最愛的片段的小影院，
這就是超短投，謝謝。 |
-
好彩開出黎冇穿冇爛
-
開箱只識震冇得瞓
-
90吋幕你有少少感動
-
磁吸屏原理 免卻好多麻煩
-
就係呢種紅色 有魔力的紅
-
但如果唔TUNE 就會偏粉色 BTW開晒廳燈 光度算係咁了 睇一般新聞電視絕對夠做 ...
-
買左返黎都唔知Loop過多次
-
睇Dark Knight唔睇imax 不如唔睇
-
愛情紀錄片愛的逼降
-
追4K劇 就係投影大派用埸的時候 用手機睇THE CROWN係浪費左套劇
-
0.19比 8-9CM投90吋
-
開燈唔覺, 但熄燈就會好兀顯眼的黑邊
-
明明唔支持，但用apple tv又chok到個dv出來 奇怪~
評分
-
| 參與人數 19 | 威望 +904 |
金錢 +905 |
收起
理由
|
 DuckieSiu@G
| + 10 |
+ 10 |
師兄報告詳盡,真正用家心得。 |
 WaveLam@FB
| + 9 |
+ 9 |
|
 flagship
| + 20 |
+ 20 |
師兄報告詳盡,真正用家心得. |
 bcougarb
| + 10 |
+ 10 |
師兄報告詳盡,真正用家心得. |
 blindfaith3by8
| + 10 |
+ 10 |
超正, 即時加分比師兄先! |
 RPO
| + 10 |
+ 10 |
師兄報告詳盡,真正用家心得. |
 wayne0503
| + 10 |
+ 10 |
師兄報告詳盡,真正用家心得. |
 gamma
| + 20 |
+ 20 |
超正, 即時加分比師兄先! |
 huohou
| + 10 |
+ 10 |
超正, 即時加分比師兄先! |
 see海
| + 50 |
+ 50 |
師兄報告詳盡,真正用家心得. |
 cbr600rr
| + 10 |
+ 10 |
師兄報告詳盡,真正用家心得. |
 小瑟
| + 600 |
+ 600 |
師兄報告詳盡,真正用家心得. |
 ahnel
| + 10 |
+ 10 |
|
 成龍大哥
| + 10 |
+ 10 |
師兄報告詳盡,真正用家心得. |
 1234qwer
| + 10 |
+ 10 |
超正, 即時加分比師兄先! |
 chhanthony
| + 80 |
+ 80 |
|
 火機
| + 10 |
+ 10 |
Excellent |
 littlefat69
| + 9 |
+ 10 |
感激師兄用心分享 |
 iamkeichan
| + 6 |
+ 6 |
師兄報告詳盡,真正用家心得. |
查看全部評分
|
[複製鏈接]
發表於 2023-1-20 00:30
樓主
, 冇辦法香港咩成本都太貴
