為家庭影院加入震動低頻器(震子) -測試篇

CalvinTsang@FB · 發表於 2022-12-27 10:43

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

安裝好後，就係調整震子與重低音之協調性，由於沒有似用咪調整嘅方法，所以都係憑感覺同我喜好去調整。兩個重低音之前搵左人調整過，所以不會改變本身設定，只針對震子嘅分頻及音量大小設定。

由於副擴音機沒有數字指標，所以都係憑感覺調整。我先將分頻點設於頭1/3位置(調整範圍廠家講為30-300Hz)，音量置於一半，然後開始測試。先用主擴音機的Level調整設定，subwoofer設定，確定4個震子均會震動，証明接駁正確無誤，亦沒有故障。

主要調試電影，我揀左強戰世界(War of the worlds)，低頻段為開頭機械人由地底冒出來嘅一段。一直好喜歡呢一段，覺得有唔同程度嘅低頻可以試，包括輕微地裂、建築物破損、地陷、機械人腳步等。震子好震！直頭將我成個人震起，4個威力好大，不過覺得震感上蓋過左Sub仔，所以將分頻點設為頭1/5位置，大約預計60-80Hz之間，多餘的震動細左好多，平衡返少少Sub仔之間嘅低音，感受自然好多唔會混濁，當有地裂嘅場面，震子才會震動，其他衡常低音交返俾Sub仔。然後反覆調試，自己比較喜歡震感強少少，最後提高音量至2/3位置，基本調試完成。

重新提高主擴音音量，正式觀看。

強戰世界(Dolby Atmos)機械人出來一段其實好震撼，特別係機械人一出來果下，隻腳踩上地面果下，本身兩隻Sub打心口嘅感覺，加埋震子震動加倍效果，個感覺確實有別於之前體驗。

第二段係沙丘瀚戰Trailer(DUNE, Dts-Master-HD)，不同程度低音都係好自然，唔係下下都需要震子震動的，最尾一段沙蟲鑽出來一段，又係無比強勁嘅震動感，好High睇得我~

第三段係Dolby Atmos招牌試機片-Amaze，去到行雷個位係震到問識講，我個女本身同我一齊坐都嚇到走入房。另外最開心係調細主音量後，震動仍然可以感受到，終於搵到個可以夜晚睇戲係唔會嘈到人，又可以提升臨場感嘅一個方法。

再簡單輕輕執執分頻同音量，大致完成！

最後，就係搵埋老婆試，有時自己感覺未必準，搵個完全唔識嘅試，攞下平衡就好D。經過AB測試後(冇開同有開震子)，冇同佢講係震子影響，老婆結論係B明顯震撼好多。

最後總結下，有師兄可能認為未必需要呢種「補品」，或者本身重低音非常強勁，不過對於我地窮窮玩家，用有限嘅金錢，能提升一點玩味，又何嘗唔好呢？

預祝大家新年快樂，順利提升體驗！