DIY 細8字頭電源線

ricodaredevil

＊＊＊香港不可用110V美式插頭
＊＊＊巿電其實完全唔建議(定明文禁止?唔記得左)用焊錫固定,原因係萬一出意外發生短路而fuse冇正常運作的話係可以輕易在兩秒內超越焊錫既熔點,然後不出意外會出更大意外


最近喇叭系統轉成了主動式+全平衡式,便大興土木將幾乎所有線材都換曬....我習慣都是全DIY線的,其中xlr比rca易做太多冇乜好講,一般power cord好多人教也很易做
就黎講講呢種焊接式的8字頭電源線



呢種頭其實我是不太喜歡的(因奶過野 ),對上做果次成功用得耐既好似仲係秋記買既果隻約$30既細頭


我換的speaker是genelec 8010a+7040a組合,完全比到我要求既(比我之前用的markaudio全頻兩邊大幅延展,要動態也要超高音,而且要保持同等的密度)

上一對喇叭,完全係我自製的

同埋好緊要的一樣,我要縮細對喇叭,枱面要番D空間,新喇叭呢點非常唔錯(6.5吋,橫向發展木箱 vs 3吋)但有D位縮過頭了



喇叭後面的電源線位是8字頭而且出線位背板側面超緊貼,圓柱型的大頭用不了,而我基本上不能忍受用小黑線只好搵料做番焊接式的power cord

事實上唔用呢種cheap cheap焊接頭的話我搵到有兩個選擇
一個係oyaide有出一款細頭8字線,價錢好似約hkd700
http://www.oyaide.com/ja/products/power_supply/power_cable/li15_emx_v2

另一個係furutech有出兩隻DIY既細頭,剛剛好入到8010a個細位,雖然接線位都係用焊接頭,但明顯會比教學中用果隻易做同穩好多,比較貴似乎要300以上
https://www.furutech.com/2019/05/21/18313/



一對喇叭要用兩條power cord,我頂佢淘左一對ps5266 US PLUG佢只出貨了一隻  .....叫佢補貨之餘先用cheap cheap vimar頂住當先



本文用的焊接頭我用過係唔錯,有秋記細頭水準,有興趣的師兄可pm我問邊度買

線身係用每邊2M長的gotham 80515,呢條算比較細但入細8字頭已經要大執位....而外皮唔入插頭殼的做法我不能接受





拆線皮,剪網,屏蔽做接地+絕緣呢D就大家都識不多說明了

絕緣用的套是鐵氟龍套,常做線的可以淘定幾個size,我覺得好用過熱縮通好多
另外可以講的係我做線的開皮小技巧:用筆刀界一圈未到線芯的深度,之後再從開口處屈彎條線,用筆刀慢慢界深或直接用指甲夾住線皮抽出,比較不易傷到線芯



我唔想浪費線芯,便將地線接上N極組成1L2N組合
雖然8字頭唔分L極N極,但迴路路徑粗過供給路徑呢點一定好過相反

因為係高壓電加比較細體積的DIY,從呢度開始每步驟都用他表check通路短路,小心D唔會係壞事

wong1032003

呢個八字頭幾靚仔

ricodaredevil

然後係今次的主角啦,個人覺得造工其實比印象中的秋記8字頭差少少,需要修下毛邊,但勝在膠殼外圍較厚稍為適合入粗少少既線

＊＊＊插頭上面的標示要注意,登住125V的便是不適合香港用的
＊＊＊呢類頭其實失敗率幾高下,反正唔貴買多幾隻備用,邊一part整衰左立即剪左個頭重做,浪費5cm同一個頭好過爆米花~

本身個開口好細好細個尾套冇可能有用立即掉左



我其實做呢兩條前試過,呢一款頭唔修改係可以岩岩好入8741的,但我嫌佢對比小黑線提升好少就再做了

拆左螺絲夾上外皮,差得太多就動手修改,先量度開口同線皮差距



然後用差不多的鑽嘴擴孔.要注意既係有開口既塑膠其實好脆弱,最好夾緊個頭,然後電鑽用比較高既轉速入就比較唔易爛



之後電磨磨到差不多(記得磨埋入邊,最好入邊比開口開深少少),再用筆刀執邊位,切走利角同飛走膠碎
呢度要留意既係留意膠殼既厚度,留有1mm以上強度唔會跌得太多



最後夾住外皮上實螺絲,接縫最闊不超過0.5mm就可以了

ricodaredevil

下一步就係做線,屏蔽開乾淨D,將剪鉗伸入D剪
因實際空間好細而屏蔽網有接地線,hi到少少就會出事(個總製冇事的話一通電就會跳)

之後度住個位開線皮,內芯就住螺絲位撐開D,外皮盡量推入D,多出黎既線芯轉頭再剪走

呢度其實有一點有D失敗,行220v既線皮通常都係好易熔,其實可以cut少D,留番D預比焊錫時熔化既縮水位




將線蕊上錫,平時做線我地唔會上太多錫,但呢種頭好大程度係要靠錫黎食力的,狠心D就冇錯了
用盡量大功率既辣雞,或者有控溫的話開到最大,咁就可以快D上錫而膠件熔化得比較少

錫既量要上到正反面都上到滿出來,多蕊線芯之間都要充滿錫

水線因為有兩條線,要先對好位扭正角度,夾實之後再上錫,以增大接觸面積為目的,我既做法就如圖(不鏽鋼夾唔怕痴錫,可以放心夾住銅芯黎焊)



上好錫之後再cut走長出黎的部分


插頭芯可以的話就拆出黎上錫,唔得就將銅片抬起黎上錫,同樣係上到滿出黎
要注意8字頭膠殼都幾易熔,如果熔到插芯鬆動就唔好要了




上錫,都係開到最熱然後快手D,結果線皮多少都會熔左D縮左水,肉眼check,他表度過冇問題就唔洗理開始下一步

ricodaredevil

做呢D頭上錫難度係最高,但重要性只排第2,最重要的是之後的收口同固定

呢度唔建議用熱縮通做食力用,而我個人也不喜歡用熱縮通,原因有下
1氣密性好少或等於零,即係比較易氧化,只要係會動的部位熱縮通就會越動越鬆然後漏氣
2因為係越動越鬆,熱縮通固定線既能力係有時限的,而且個位越細越快死
3上兩點姑且可以上網淘一種內部帶粘性膠的熱縮通將壽命延長,但切口位D膠會流出黎超級樣衰.係,第3點就係講個樣 你熱縮通切到好齊口,一加熱就受熱不勻歪左.熱風槍?我冇位擺啊

所以我就用膠水痴了.小黑線係膠bear出黎的,構造上係等同用膠水封死

重點係用咩膠,我呢個case係用AA膠(將硬貼硬既野固定好,如插芯同膠殼)同UHU勞作膠(膠同金屬都痴到,乾後係軟的固定到軟膠皮而且流動性高可以盡量滲透加大粘貼面積)

其實用AB膠的話效果係最好,不過我嫌佢步驟麻煩而且打算做好即用就算了(AB膠有分唔同固化時間的型號,要穩陣的話要慢乾如1hr以上)



先係插芯位附近,線皮接近開口處點上少許AA膠,作初步固定以及封口,以免UHU膠從呢D位滲出,呢個頭就會馬上廢左

之後就係中間的空位上盡量多的UHU膠,上到盡量岩岩好幾乎冇滲出,呢樣就要自己拿捏份量啦.在約3分鐘內比D膠滲入到各部位,用牙簽通一通D縫隙會有幫助的,之後就合上上實螺絲



呢個時候有條縫係正常的,我就用老虎鉗大力夾緊,然後在外觀上不明顯位置的縫隙(比如轉角位)點上少少aa膠,一兩秒後馬上用紙巾擦走在外面多餘的膠水,不用再另外處理夾約5分鐘就OK
呢part其實同整模型的步驟好似吧

＊UHU膠用起來拉絲超勁代表佢流動性同滲入性非常好,但就永遠有一兩條拉出左外殼 處理方法其實好簡單,上面夾完個頭鬆左出黎時UHU為半乾狀態,用指甲或牙簽一刮就甩
＊圖中我用的老虎鉗係淘記叫做精密台鉗,通常一條link有唔同size可選的果種.夠精密到就算好大個的鉗都可以平行地夾實細微零件,有diy開野的ching可以買一舊睇門口,圖中的2吋百零就有了 佢係實心鋼好重下,所以多數就咁放係台面就用都唔洗再固定,當然都要小心你買較大型的款比運費嚇親 我買過開口最大3.5吋的就已經超過10KG了


仔細睇係會有小小膠水跡的,不過見識慣美國的醫療用插頭後我都不當一回事了,遠睇都唔覺~~~



彎曲,扯幾下條線插頭冇裂開,用他表check埋最後一下冇問題就直接上了
我整呢兩條線之前都有整左三兩條比mon,ps5用,除插頭時都係直接搖條線扯出黎而冇出過問題的



gotham85015比小黑線果然係有全面提升(雖然我覺得最大原因係飛左條fuse)
ps5266插頭到左,換走左vimar之後聽得出的分別係低頻實左少少,結像稍再改善,其他我木耳不太聽得出分別

出面某lab我見有賣細8字頭既85025成品,我覺得因為頭太細既關係一定用唔到條地線,1.5mm既1L2N同2.5MM既1L1N我猜測只會係低頻量稍多,反而係會緊左D?冇乜興趣試

我間細房(50呎)處理D低頻駐波都已經煩死我了


總之如果ching們要自己選線黎做的話,我認為主要睇兩點
  -線徑不可以太粗(廢話),線外皮最粗只可以去到8字頭厚度-2mm
  -線身要軟!線硬的話絕大多數都會令到個插頭食住道彎曲的力量(就算留長D線留位比佢轉大彎,線身本身的重量都已經係一道力)個頭一定好短命


多謝收看 (點解我會認為呢篇文可以1日之內打好 )

阿定

好高技巧的說！

raylee

好文, 但太長無睇曬

DIY文值得支持

marco

師兄D架生好齊

圄多文詳,解說清晰,一級好文
Thanks.

zhao148

哇，這看起來很酷。有趣的文章。