《正義迴廊》影評 | 紐約愛音鱷 | 不設字幕 | 廣東話 #好熱戲

影音小編輯

《正義迴廊》影評 | 紐約愛音鱷 | 不設字幕 | 廣東話 #好熱戲

Kin導

監製有話兒：

《正義迴廊》兩周票房逼近一千萬，意味著什麼？意味著已經超過當天《踏血尋梅》的總票房。
當日我到處敲門找投資希望有人願意投資《正義》，處處碰壁，第一個問題就是﹕你呢部戲個主角係乜水？然後仲要拍到八、九百萬，點回本？……其實我都真係唔識答。
如果放棄內地市場，主力在香港上映，回本的確有點兒是天方夜譚，於是，我又戇居居去找大陸負責做網絡電影的平台負責人傾下，得到的回應是﹕大佬你個主角殺自己父母，點可能過到審？
我話﹕我哋可摸耳剪一個版本其實張顯宗係收養返嚟而唔係親生仔？……平台負責人﹕唔好玩啦翁生。
踏破鐵鞋，我跟我公司的合夥人孫霏找了很多家公司尋求投資，要見呢啲老闆甚至不惜深入虎穴，夜闖夜總會等煙花之地 (雖然我回味至今) ，
但都不得要領，從最早的答案「翁導你拍戲實有品質保證，分分鐘仲有獎攞，輸少少有咩所謂？當做宣傳囉﹗」到後來改口風話﹕「翁導你知而家香港咩環境㗎啦，『香港』兩個字都敏感啦，
仲叫我投港片？飲啦﹗……」
這個情況下，我們只能集中去找支持港片的公司，有一家公司座館的回覆更加經典﹕「咁你當年拍《踏血尋梅》都係攞三幾個獎啫，咪又係蝕錢﹗」我完全沒有還口之力，只能自己默默消化。
有一天我跟孫霏說，我諗我哋要靠自己幫下呢部戲呢個導演，佢用一個凶險的眼神問我﹕「你想點幫？」我話﹕「我哋自己公司刮埋刮埋，應該都有少少積蓄，我們自己投返多少」，
佢話好，但萬萬沒想到，我話投資，原來會結果成為了這電影的大股東，花了我一世人都未花過再多的錢 (可能下一世都花唔到咁多)，投了這部電影。
本來我想趁樓市低迷，首付買返層納米樓，好讓我可以不用再睡在我父母那套「居者有其屋」裡的碌架床，也好讓無兒無女的我老去後有地方落腳，
然而這筆錢終於都要用在這部《正義迴廊》身上。
我要感謝美亞的李國興老闆，再一次誤信我這個電影神棍，答應了投資這電影的部分費用，當日我語氣有點重的跟您說﹕「好過投俾一年拍幾部港片攞到投資一半製作費落自己袋仲敢話部戲自己有份投嗰位監製啦」多謝您信任我，繼《踏血尋梅》之後再投一部我的電影，你知道我是對電影義無反顧的。當然也要多謝電影基金。另外因為我荷包始終好淺，其實我生平最怕開口問人借錢，但要夠錢投資都係要靠借，兩位匿名貸款人主動成為了白武士，全因對我和導演阿天的信任。最後仍差一百萬，我膽粗粗打電話問了K先生，他對我一直錯愛，今次我就老實不客氣，
開口就要借一百萬，佢電話裡只是說了兩句﹕「聽日過數。」和「不用多謝我也不用提我，努力為香港拍一部好戲」。
終於電影開畫票房廿幾萬，我倒抽一口涼氣，同自己講﹕「三級片係咁㗎啦」默默地要脅導演﹕「喂大佬你搏命去謝下票，收得幾多得幾多，觀眾支持我哋都要感恩」，到了第二周，電影票房上升，已經四天成為單日票房冠軍，剛過去的周末周日票房都超過了一百三十萬，大佬呢個係荷里活大片的票房數字啊﹗我們靠口碑打了一場逆轉勝，周六晚我看了票房數字，默默坐在我家中的碌架床流下了眼淚，老懷安慰。」孫霏知道了票房數字，從埋怨我到現在鼓勵我，給我發訊息﹕「投資電影係咪好過賭馬呢？」，我話「大佬我賭馬都係一百幾十蚊一注咋」。
我打電話俾美亞唐生，我話我哋「萬一」票房有二千萬，會唔會可以收返成本呢，然後我聽到幾下計數機的聲音，佢就話﹕「如果收到二千就仲爭少少」。鬼叫我堅持要拍咁多錢咩，再死慳死抵都係為咗拍一部quality film啫。剪片時我已經跟導演何爵天說﹕「我覺得呢部戲唔差得過《踏血尋梅》㗎，可能觀眾仲加鍾意㖭」，佢話﹕「點會呀？」其實我知道佢默默暗喜，我都好鍾意以前「新藝城」奮鬥房上面寫的一句話「長江後浪冚前浪，一代新人葬舊人」好𨶙有型﹗
我做監製，最好的是一部戲如果出嚟俾人讚，我亦不用飄飄然，因為不是我的作品，不用認屎認屍，可以保持「懶謙厚」的態度；有人鬧，亦唔使咬牙切齒，可以平常心，更虛心受教。
我的體會是﹕
你的友好來讚你，是俾面客氣，但也消耗了人家的信譽，心裡要感恩；
如果是你的友好來批評你，是更加難能可貴，這才是真朋友才做得到，一定是君子﹗
如果是你的襯家來讚你，這簡直是聖人下凡，好少發生，但在我生命中也有發生過，以戲論戲，我也誠心學習，我也做到過，可能成世人一兩次；
如果是你的襯家來招呼你，難道不是最理所當然的事嗎？不用動氣，你有嘢做得唔好人哋捉到你痛腳，自己都要認巢，但也有此類人會上升到批評創作者的人格，咁我就只能說一句，常懷私怨者，非可恥，可憐人也。一輩子活在仇恨的陰影裡，也是非常困倦的事。我跟導演說﹕「做好自己，人貴自知，勇對未知。」電影當然不夠好，面對批評有則改之無則加勉，俞琤以前教我要不卑不亢，受用終身。
導演今日同我講﹕「今日啲I Max戲院已經無排我哋部戲。」我話﹕「正常啦，要留俾《黑豹2》吖嘛，我哋又唔係拍I Max，同人爭嚟做咩啫？戲院少啲坐滿啲，電影梗係多人睇先更加開心㗎」(雖然其我也很喜歡自己一個人睇戲)……不敢妄想二千萬或者更多，感恩很多喜歡這電影的觀眾，有啲甚至睇咗幾次，實在是很大的恩情，能喚起大家愛看港片的熱情，導演跟我一樣都好開心，當然我也會繼續逼使導演繼續拉著演員一起謝票，在電影院親近一下各位觀眾，其實是我們比觀眾更加幸福。
尋日我代導演在屯門某戲院謝票，有一位觀眾問我﹕「其實你係邊個？點解會嚟謝票？導演做咩唔嚟？……」我唔識答，然後同佢講我拍過一部戲叫《踏血尋梅》，佢就話﹕「吓？又係你有份㗎？點解你專搞埋呢啲戲？……咁《正義迴廊》好睇好多。」我微笑點頭﹕「我代導演多謝你，夜嘞，快啲返屋企食飯啦。」
希望大家繼續支持《正義迴廊》。