定之影評~《明日戰記》IMAX版影評 (極少量劇透)

阿定

首先，套戲係好睇的，但如果唔能夠接受負面意見的朋友，請離開本帖，因為小弟文字表達一向都差，就算我本意係建議都有機會被睇成批評。

頭盔就戴好啦，今次我係抱著對科幻片的興趣而入場睇，再加上港產片加乘，咁就比多少少錢，睇IMAX版，睇下CG畫面係咪真係咁勁。

入場前，無特別睇過太多介紹，不過咁多宣傳攻勢，唔可能完全唔知套戲講咩，本身無抱太大期望入場就是了。

睇的戲院係 K11 MUSEA 的 IMAX版本，早買早享受的關系，成功買到皇帝位位置，畫面方面唔知係我太投入，定係真係唔多，唔太感覺到有IMAX巨幕的時間，畫面精細度的話，因為無睇過普通版本，亦做唔到比較，不過說老實，成套戲畫面都唔太清晰，除了幾幕特別慢的慢動作場境係好靚好Details外，部分場境有少量顆粒感。

成套戲來講，畫面節奏去得太快，唔知係想追真實感，定怕速度減慢後掣作CG就要更細心而增加工作成本，個人係覺得有點浪費了港產片一向最強的動作設計技巧，如果全部打鬥場面都放番慢，應該會好睇好多，宜家動作場面幾好都無用，因為快到睇唔到，如果平時睇Netflix會開1.5倍速的朋友應該會幾習慣(笑)，不過減慢速度亦有可能會更突顯劇情太直線唔夠深度的問題。

音效方面，成套戲由頭爆到尾，HiFi友基本上都唔可能會失望，印象中都無邊套荷里活電影有咁長時間的震撼效果，打算日後係屋企睇碟爆機的朋友，除非住獨立屋，否則應該會狂被人襟鐘仔投訴吧。

戲情方面，一開始的世界觀前設用口述我覺得係有少少Downgrade套戲，如果改為機械人大戰為主，加少量對白，應該會更加好，反正都打算由頭爆到尾，不如一開波就來個震撼彈比我地可能更好，特別係古仔講故事的聲音，真係......算吧啦！故事非常直線，講白少少，即係無咩深度，可能同剪剩100分鐘有關，雖然由頭到尾無悶場，但如果要成為經典電影，除了經典在首套科幻特技港產片外，應該無咩地方值得成為經典。戲情的直線程度係搞到我覺得剩番的文戲變得更可有可無，特別係父女之情個Part我覺得太多添。

演技方面，唔計劉青雲同黑仔，電影出來的效果，感覺其他人都係平時水準之下，可能正如劉青雲所講，香港拍科幻綠幕戲真係機會太少，個人認為呢個應該係其原因吧！

成套戲整體係好值得大家入場睇的，對今時今日睇慣乜Man物Man的人來講，我覺得非常滿足，特別係醫院個場動作戲，個人比分會比飛車個幕更高分，醫院槍戰比起高階電腦槍Game更震撼，更緊張刺激，至於有影評人評價套戲的CG質素有如PS3，我又唔覺得有咁誇，最多都係評價為PS4質素吧，部份場口都有PS5質素的，不過太多畫面用上Motion blur(動態模糊)特效又真係幾討厭的，我又唔係玩緊Switch，電影唔存在GPU唔夠快run in game CG的情況啊。最後大戰的地點，真係超親切，再加埋戲入面的所有電腦界面都係繁體中文，勁正囉。

個人非常期望有加長版可以比我有動力入場睇多次Dolby atmos版本。

小瑟

我都上星期優先場都睇左, 三個字, 打打打!!!

wantai288

c兄，你就講得中肯，我都係睇imax畫面唔知係唔係，up上所以我都覺得有d畫面好似模糊，我唔識，我只係甘諗，套戲經典一定冇可能，最少可以係幾十年比人記得，香港都有一套科幻片呀。當年天殺地球反擊戰一個病毒搞死外星人，韋生美軍戰機打野外星人戰機，唔知d人又冇鬧，我只係覺得永遠都有第一次姐。

阿定

wantai288 發表於 2022-8-26 10:53
c兄，你就講得中肯，我都係睇imax畫面唔知係唔係，up上所以我都覺得有d畫面好似模糊，我唔識，我只係甘諗， ...

咁我都明點解會有人鬧的，抱住好大期望入去真心係會有可能失望而回的，今次同類型的戲就只有乜Man物Man可以比較，咁比較落，唔計港式情懷，整體性係差人地少少的，但投資成本上，明日戰記個幾億對荷里活來講，只係一個細數，做到咁，已經好了不起，不過學古仔自己講，人地係要你做得好，唔係做得到，有人會鬧都好正常的。

haha161

剛剛睇完 imax,

唔係用 imax 機拍  就咁谷上咁大銀幕畫面一定鬆啦⋯⋯

d搖鏡睇到暈船浪😵‍💫

老五

我正想問呢套戲有冇用Imax攝影機拍，原來冇咁就冇乜必要去IMAX睇

gashapon

我今早都同老婆去了睇, 大家的感覺都係喜歡的. 當然我自己會覺得劇情上相對係比較簡單, 但同時其實都係比較爽, 唔會太多要估的地方. 特技方面我覺得都好好呀, 都感受到當中的世界觀. 少少要彈係幾個角色上真係比較失色, 例如張家輝扮老人真係唔太似...基本上第一眼已經知佢係奸的...
喜玲個女長官又係換了另一人做都無咩所謂咁, 同埋唔知點解梗係覺得佢地d對白讀得好怪咁....
另外就係光仔全場都木無表情咁, 完全唔似係一個特種部隊的成員.
但整體上我係滿意的, 我又唔想純粹因為"香港電影"就話支持, 但問心我係認為真係好睇的.

wantai288

gashapon 發表於 2022-8-27 14:11
我今早都同老婆去了睇, 大家的感覺都係喜歡的. 當然我自己會覺得劇情上相對係比較簡單, 但同時其實都係比較 ...

所以我真係唔知道，點解有人可以話得60幾分，可能佢地要求好高，我地唔識咩叫做戲

gashapon

wantai288 發表於 2022-8-27 17:08
所以我真係唔知道，點解有人可以話得60幾分，可能佢地要求好高，我地唔識咩叫做戲 ...

我自己最喜歡係公路那段, 不過都奇怪點解架車d裝甲咁厚 XD, 度門竟然擋到部機械人的重機槍XD 跟住門無o左入面d人都無事, 主角威能太勁啦~~~ XD

Hon

今朝睇完IMAX版本...

部份濛位其實普通版都係一樣, 所以唔存在大定細既問題, 反而我覺得無所謂既, 嗰幾幕當佢係一個回億咁睇, 濛其實都好正常, 況且都唔係太長時間有呢個問題, 所以唔需要放大黎講, 當然LA有好多人會用呢個POINT黎做話題, 我就覺得.. 係可以既, 不過唔駛成日提住咁解...

始終問題都係只得一個, 呢套算係香港以黎特技方面時間上做得最長, 俾得最多錢同埋叫最有誠意既機械科技電腦特技片, 真係收貨有餘.