thepancakes亂入大初戀日喊足成晚音樂會 (07-06-2022)

245141525

完全冇諗過，竟然有生之年可以等到 the pancakes 出山！
(場內唔畀影相，所以只稍為用文字演繹一下，請諒 !)

佢點解會出返嚟，好多媒體都有報導，唔喺度詳細講，但要講下個買飛過程，因為完全係意料之外。

今時今日，想買演唱會/音樂會嘅飛根本係遙不可及嘅事，時間、運氣、過五關斬六將，就算畀你買到，都係啲豬頭骨位。
今次偶像出山只開兩場，場地坐位扣埋疫情限制，我諗每場大約得7、800人，用網上登記實名抽籤形式，機會渺茫之極，爬晒文之後，發現最後一句，忽然眼前一亮！
[6月1日前已經是我patreon會員的隊員可以確保一定入到會]
嘩！我咪係囉！
興奮之餘，成個心定晒。
隨後嘅登記買飛過程非常順利，工作人員細心有交帶，要畀十個讚！

到入場當晚，自己都有啲策略，既然係實名制，即係間接飛已經到手，換飛已經唔係重要，第一時間梗係先去散貨區，睇下有咩筍嘢，因為隊長事先預告咗，佢會將啲新但舊、舊但新嘢攞返出嚟賣，包括義賣極限量嘅7”黑膠唱片(其實係紅膠) (呢個後面再講)。
由於我算早，散貨區仲算好多嘢，但 CD、書我都已經有，最後買咗個靚靚環保袋，再搲咗兩張貼紙。
好彩策略成功，轉頭換完飛已經差唔多畀人掃晒，而條隊仲長長。

好喇，入場。
入場前辛苦工作人員又對多一次身分。
其實一攞起張飛已經見到，吓？row A？！唔X係啞？
第一行？心目中只有內部認購、嘉賓，或者同演出者 friend 底先會坐到，我竟然安排到坐第一行！個心爭啲彈咗出嚟⋯⋯
第一行，當年睇 BEYOND 衝出去我就試過，仲要畀欄杆攔住。

20:15左右，久違嘅隊長終於出場，有說睇 Top Gun 2 會毛管戙起雞皮，我坐第一行睇冇可能出山嘅 the pancakes 出山，近距離兜口兜面睇住隊長，現場聽住日聽夜聽嘅歌，直頭打晒冷震！好彩冇打針，唔係心臟病發都似⋯⋯
期間唱下歌，講下心路歷程，吹吹水，搞下笑，好快就過咗兩個鐘頭。
萬般不捨得，唔知仲有冇下一次⋯⋯
又知道好多好多想睇嘅隊員抽唔到，去唔到，真心覺得真係好可惜，覺得自己已經好幸福。

講返隻黑膠碟，本身諗住都會買，都有兩大原因：極限量，只印咗 20隻，再經過二十年時間洗禮，隊長手頭只淨返 17 隻，佢自己話要留 1 隻，所以每場只分到 8 隻；義賣，不扣除成本，全數捐畀「香港流浪狗之家」，都係一個我心儀嘅機構嚟；得到心頭好，又做到善事，唔使諗啦。

每場只分到 8 隻，點買法呢？原來完場先有得買。
點爭呢？因為隊長想畀真係想買嘅人買，所以價錢都定得幾高(如果大家有興趣先再話畀大家知)，希望可以畀真係好想好想買嘅人先買。
音樂會中段嚟咗個現場表態，發現都有十幾人想買，唔夠分，就即時就玩下問答環節，揀出 8 個名額，我志在必得，當然不甘示弱，唔知醜搏命搶答，爭取到其中之一。

開心、興奮、滿足噉過咗一晚。

少量圖片分享：



入場券，真係 row A 㗎，冇吹水


第一行視角


極限量紅膠 (得閒攞返 76Studio 播下先)


靚靚環保袋


完場後派嘅名信片 (有說係fans自製) 多謝您


戟會2022會員證 (漏咗個s)


搲咗兩張貼紙


時間流逝，外貌改變，處境都變，情懷未變。
憑歌寄意一下，一首我經常聽嘅歌：不知不覺



回憶若太遠又怎麼追
其實我常問

當天星光那麼燦爛最後又如何歸於平淡
全部不知不覺

阿定

我抽唔中呀！

小瑟

Music76果邊竟然有腦細加持！！祺哥你今生無悔啦！🤣🤣🤣

小瑟

隻膠膠得20隻???? 你竟然手上有一隻....唔L係下馬~~
快D囉返來STUDIO開箱, 我拍片比大家聽下~

245141525

小瑟 發表於 2022-6-10 09:20
隻膠膠得20隻???? 你竟然手上有一隻....唔L係下馬~~
快D囉返來STUDIO開箱, 我拍片比大家聽下~ ...

係唔係真係拍先？
唔好又得個擺⋯⋯

小瑟

245141525 發表於 2022-6-11 11:11
係唔係真係拍先？
唔好又得個擺⋯⋯

拍條快開冇問題架，你一齊我要問你野架喎！！

haha161

個環保袋好靚